Read Psalms 100 side by side with translations · The Final Bible
1 ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ϯⲛⲁϫⲱ ⲉⲣⲟⲕ ⲡϫⲟⲉⲓⲥ ⲛⲟⲩⲛⲁ ⲙⲛⲟⲩϩⲁⲡ
2 ϯⲛⲁⲯⲁⲗⲗⲉⲓ ⲉⲓⲙⲉ ϩⲛⲧⲉϩⲓⲏ ⲛⲛⲉⲧⲟⲩⲁⲁⲃ ϫⲉⲉⲣⲉⲡϫⲟⲉⲓⲥ ⲡⲛⲟⲩⲧⲉ ⲛⲏⲩ ϣⲁⲣⲟⲓ ⲧⲛⲁⲩ ⲛⲉⲓⲙⲟⲟϣⲉ ϩⲛⲧⲙⲛⲧⲃⲁⲗϩⲏⲧ ⲙⲡⲁϩⲏⲧ ϩⲛⲧⲙⲏⲧⲉ ⲙⲡⲁⲏⲓ
3 ⲙⲡⲓⲕⲱ ⲛⲛⲁϩⲣⲁⲓ ⲛⲟⲩϩⲱⲃ ⲙⲡⲁⲣⲁⲛⲟⲙⲟⲛ ⲛⲉⲧⲉⲓⲣⲉ ⲙⲛⲡⲁⲣⲁⲃⲁⲥⲓⲥ ⲁⲓⲙⲉⲥⲧⲱⲟⲩ ⲙⲡⲉϩⲏⲧ ⲉϥϭⲟⲟⲙⲉ ⲧⲱϭⲉ ⲉⲣⲟⲓ
4 ϩⲙⲡⲧⲣⲉⲡⲡⲟⲛⲏⲣⲟⲥ ⲣⲁⲕⲧϥ ⲉⲃⲟⲗ ⲙⲙⲟⲓ ⲙⲡⲓⲉⲓⲙⲉ
5 ⲁⲓⲛⲟⲩϫⲉ ⲉⲃⲟⲗ ⲙⲡⲉⲧⲕⲁⲧⲁⲗⲁⲗⲉⲓ ⲛϫⲓⲟⲩⲉ ⲛⲥⲁⲡⲉⲧϩⲓⲧⲟⲩⲱϥ ⲙⲡⲓⲟⲩⲱⲙ ⲙⲛⲟⲩϫⲁⲥⲓⲃⲁⲗ ⲙⲛⲟⲩϩⲏⲧ ⲛⲁⲧⲥⲉⲓ
6 ⲉⲣⲉⲛⲁⲃⲁⲗ ϭⲱϣⲧ ⲉϫⲛⲛⲉⲧⲟⲩⲁⲁⲃ ⲙⲡⲕⲁϩ ⲉⲧⲣⲉⲩϩⲙⲟⲟⲥ ϩⲁⲧⲏⲓ ⲡⲉⲧⲙⲟⲟϣⲉ ϩⲛⲧⲉϩⲓⲏ ⲛⲛⲉⲧⲟⲩⲁⲁⲃ ⲡⲉ ⲛⲉϥϣⲙϣⲉ ⲛⲁⲓ
7 ⲡⲉⲧⲉⲓⲣⲉ ⲛⲧⲙⲛⲧϫⲁⲥⲓϩⲏⲧ ⲛⲉϥⲟⲩⲏϩ ⲁⲛ ⲡⲉ ϩⲛⲧⲙⲏⲧⲉ ⲙⲡⲁⲏⲓ ⲡⲉⲧϣⲁϫⲉ ϩⲛⲟⲩϫⲓⲛϭⲟⲛⲥ ⲛⲉⲙⲉⲓⲥⲟⲩⲧⲱⲛϥ ⲙⲡⲉⲙⲧⲟ ⲉⲃⲟⲗ ⲛⲛⲁⲃⲁⲗ
8 ⲙⲡⲛⲁⲩ ⲛϣⲱⲣⲡ ⲁⲓⲙⲟⲩⲟⲩⲧ ⲛⲛⲣⲉϥⲣⲛⲟⲃⲉ ⲧⲏⲣⲟⲩ ⲙⲡⲕⲁϩ ⲉⲧⲣⲁϥⲱⲧⲉ ⲉⲃⲟⲗ ϩⲛⲧⲡⲟⲗⲓⲥ ⲙⲡϫⲟⲉⲓⲥ ⲛⲛⲉⲧⲉⲓⲣⲉ ⲧⲏⲣⲟⲩ ⲛⲧⲁⲛⲟⲙⲓⲁ
Psalms 99 · Psalms 101 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)