1 ܟܕ ܢܦ̣ܩ ܝ̣ܣܪܐܝܠ ܒܫܒ̣ܝܐ ܠܐܪܥܐ ܢܘ̣ܟܪܝܬܐ ܟܕ ܐܪܚ̣ܩܘ ܡ̣ܢ ܡܪܝܐ ܦ̇ܪܘܩܗܘܢ̇
2 ܐܫܬܕܝܘ ܡ̣ܢ ܝ̇ܪܬܘܬܐ ܗ̇ܝ ܕܝܗ̣ܒ ܠܗܘܢ̇ ܐܠܗܐ ܒܟ̇ܠܗܘܢ̇ ܥܡ̣̈ܡܐ ܗ̣ܘܐ ܒܘܕܪܗ ܕܝ̣ܣܪܐܝܠ ܐܝܟ ܡܠ̣ܬܗ ܕܐܠܗܐ
3 ܡܛܠ ܕܬܙܕܕܩ ܐܠܗܐ ܒܙܕܝܩܘܬܟ ܒܥ̣̇ܘܠܢ ܕܝ̣ܠܢ
4 ܡܛܠ ܕܐܢܬ ܗ̣ܘ ܕܝ̇ܢܐ ܙ̣̇ܕܝܩܐ ܥܠ ܟ̇ܠܗܘܢ̇ ܥܡ̣̈ܡܐ ܕܐܪܥܐ
5 ܡܛܠ ܕܠܐ ܡ̣ܬܛܫܐ ܓܝܪ ܡ̣ܢ ܬܪܥܝ̣ܬܟ ܟ̇ܠ ܡ̇ܢ ܕܥ̇ܒܕ ܥ̣̇ܘܠܐ
6 ܘܙܕܝܩܘܬܐ ܕܝܢ ܕܬܪ̈ܝܨܝܟ ܡܪܝܐ ܩܕܡ̇ܝܟ ܘܠܐܝܟܐ ܢܬܛܫܐ ܒܪܐܢܫܐ ܡ̣ܢ ܬܪܥܝ̣ܬܟ ܐܠܗܐ
7 ܥ̇ܒܕܝܢܢ ܓܝܪ ܒܚܐܪܘܬܐ ܘܒܓ̣̇ܒܝܘܬܐ ܕܢܦܫܢ ܠܡܥ̣ܒܕ ܛܒ̇ܬܐ ܘܒܝ̣ܫܬܐ ܒܥܒܕܐ ܕܐܝ̈ܕܝܢ
8 ܘܒܙܕܝܩܘܬܟ ܣ̇ܥܪ ܐܢܬ ܒܢܝ̈ܢܫܐ
9 ܗ̇ܘ ܓܝܪ ܕܥ̇ܒܕ ܙܕܝܩܘܬܐ ܣܝ̣ܡܬܐ ܕܚ̈ܝܐ ܣ̇ܐܡ ܠܗ ܠܘܬ ܡܪܝܐ ܘܗ̇ܘ ܕܥ̇ܒܕ ܥ̣̇ܘܠܐ ܗ̣ܘ ܚ̇ܐܒ ܕܝ̣ܢܐ ܕܢ̣̇ܦܫܗ ܒܐܒܕܢܐ
10 ܕܝܢ̈ܘܗܝ ܓܝܪ ܒܙܕܝܩܘܬܐ ܥܠ ܟ̇ܠ ܒܪܐܢܫ ܘܒ̣̇ܝܬܗ
11 ܠܡ̣̇ܢܘ ܓܝܪ ܢܛܐܒ ܐܠܗܐ ܐܠܐ ܐܢ ܠܗ̇ܢܘܢ̇ ܕܩ̇ܪܝܢ ܠܡܪܝܐ
12 ܡܕܟܐ ܓܝܪ ܚܛܗ̈ܝܗ̇ ܕܢܦܫܐ ܒܡ̣̇ܘܕܝܢܘܬܐ
13 ܡܛܠ ܕܒ̣ܗܬܬܐ ܗܝ ܠܢ ܘܠܐܦ̈ܝܢ ܥܠ ܟ̇ܠܗܝܢ ܗܠܝܢ
14 ܠܡܢܘ ܓܝܪ ܢܫܒܘܩ ܚܛܗ̈ܐ ܐܠܐ ܐܢ ܠܗܠܝܢ ܕܚ̣ܛܘ
15 ܠܙܕܝ̈ܩܐ ܓܝܪ ܡܒ̇ܪܟ ܘܠܐ ܡܟܣ ܐܢܬ ܠܗܘܢ̇ ܥܠ ܡܕܡ ܕܚ̣ܛܘ ܛܝܒܘܬܟ ܓܝܪ ܥܠ ܐܝܠܝܢ ܕܚ̣ܛܘ ܡܐ ܕܬܒ̣ܘ ܐܝܬܝܗ̇
16 ܘܗܫܐ ܐܢܬ ܗܘ ܐܠܗܢ ܘܚܢܢ ܥܡܟ ܗ̇ܘ ܕܐܚ̣ܒܬ ܚܙ̣ܝ ܘܪܚ̇ܡ ܐܠܗܗ ܕܝ̣ܣܪܐܝܠ ܡܛܠ ܕܕܝ̣ܠܟ ܚܢܢ ܠܐ ܬܪܚܩ ܪ̈ܚܡ̣ܝܟ ܡ̣ܢܢ ܕܠܐ ܢܪܡܘܢ ܥܠܝܢ ܥܡ̣̈ܡܐ
17 ܡܛܠ ܕܐܢܬ ܓܒ̣ܝܬ ܠܙܪܥܗ ܕܐܒܪܗܡ ܝܬܝܪ̣ ܡ̣ܢ ܟ̇ܠܗܘܢ̇ ܥܡ̣ܡ̈ܐ
18 ܘܣ̣ܡܬ ܥܠܝܢ ܫܡܟ ܡܪܝܐ ܘܠܐ ܬܫ̣ܠܐ ܥܕܡܐ ܠܥ̇ܠܡ
19 ܒܩܝ̇ܡܐ ܐܩܝ̣ܡܬ ܠܐܒ̈ܗܬܢ ܥܠܝܢ ܘܚܢܢ ܡܣ̣̇ܒܪܝܢܢ ܒܟ ܒܬܝ̇ܒܘܬܗ ܕܢܦܫܢ
20 ܕܡܪܝܐ ܐܢܘܢ̇ ܪ̈ܚ̣ܡܐ ܥܠ ܒ̣̇ܝܬܐ ܕܝ̣ܣܪܐܝܠ ܗܫܐ ܘܠܥ̇ܠܡ
Psalms of Solomon 8 · Psalms of Solomon 10 · Greek (Septuagint / SBLGNT)