1 ܐܘܠܨܢܐ ܘܩ̇ܠܐ ܕܩܪܒܐ ܫܡ̣̈ܥܝ ܐܕ̈ܢܝ ܩܠܐ ܕܩܪܒܐ ܘܪܓܫܐ ܕܩ̣ܛܠܐ ܘܕܐܒܕܢܐ
2 ܩܠܐ ܕܥܡ̣ܐ ܣ̇ܓܝܐܐ ܐܝܟ ܪܘܚܐ ܥ̣̇ܫܝ̣ܢܬܐ ܘܣ̇ܓܝܐܬܐ ܐܝܟ ܥ̣̇ܠܥܠܐ ܕܢܘ̣ܪܐ ܕܐܬܝ̇ܐ ܥܠ ܡ̣̇ܕܒܪܐ
3 ܘܐܡ̇ܪܬ ܠܠ̣ܒܝ ܕܐܝܟܐ ܟܝ ܕܐ̇ܢ ܠܗ
4 ܩ̇ܠܐ ܫܡܥ̇ܬ ܒܐܘ̇ܪܫܠܡ ܡܕܝ̣ܢܬܐ ܩܕܝܫܬܐ
5 ܘܐܫܬܪ̈ܝ ܚܘ̣ܡܪ̈ܝ ܚ̣̇ܨܝ ܡ̣ܢ ܫܡ̣ܥܐ ܘܒܘܪ̈ܟܝ ܪ̈ܥ̣ܠܝ
6 ܘܐܬܬܙܝ̣ܥܘ ܓܪ̈ܡܝ ܐܝܟ ܟ̣ܬܢܐ
7 ܘܐܡ̇ܪܬ ܢܬܪܨܘܢ ܐܘܪ̈ܚܬܗܘܢ ܒܙܕܝܩܘܬܐ ܘܐ̇ܬܕܟܪܬ ܕܝ̣̈ܢܘܗܝ ܕܡܪܝܐ ܕܡ̣ܢ ܟܕ ܐܬܒܪܝ̣ܘ ܫܡ̇ܝܐ ܘܐܪܥܐ ܘܙܕܩ̇ܬ ܠܐܠܗܐ ܒܟ̇ܠܗܘܢ̇ ܕܝ̣̈ܢܘܗܝ ܕܡ̣ܢ ܥ̇ܠܡ
8 ܓܠ̣ܐ ܕܝܢ ܐܠܗܐ ܥܒ̇ܕ̈ܝܗܘܢ ܩܕܡ ܫܡ̣ܫܐ ܘܐܬܝ̣ܕܥ ܠܟ̇ܠܗ̇ ܐܪܥܐ ܕܝ̈ܢܘܗܝ ܕܡܪܝܐ ܙܕܝ̈ܩܐ
9 ܒܛܫ̈ܝܬܐ ܓܝܪ ܕܐܪܥܐ ܡܥܘܠܝܢ ܗ̣ܘܘ
10 ܒܪܐ ܥܡ ܐܡܗ ܘܐܒܐ ܥܡ ܒܪܬܗ ܡ̣ܬܚܠܛ̣ܝܢ ܗ̣ܘܘ
11 ܘܟ̇ܠܗܘܢ̇ ܓ̇ܝܪܝܢ ܗ̣ܘܘ ܢܫ̈ܝ ܚܒܪ̈ܝܗܘܢ̇ ܘܐܩܝ̣ܡܘ ܒܝܢܬܗܘܢ̇ ܩܝ̈ܡܐ ܥܠ ܗܠܝܢ
12 ܒܝܬ ܩܘܕܫܗ ܕܐܠܗܐ ܡܚ̣̇ܛܦܝܢ ܗ̣ܘܘ ܐܝܟ ܗ̇ܘ ܕܠܝܬ ܕܝ̇ܪܬ ܘܦ̇ܪܩ
13 ܘܕܝ̇ܫܝܢ ܗ̣ܘܘ ܗ̣̇ܝܟܠܗ ܒܟܠܗ̇ ܛܡܐܘܬܗܘܢ̇ ܘܒܕܡܐ ܕܟ̣ܦܣܢܝܬܐ ܛܡܐܘ ܕܒ̣̈ܚܐ ܐܝܟ ܒ̣ܣܪܐ ܛܡܐܐ
14 ܘܠܐ ܫܒ̣ܩܘ ܚܛ̈ܗܐ ܕܠܐ ܥܒ̣ܕܘ ܘܝܬܝܪ ܡ̣ܢ ܥܡ̣̈ܡܐ
15 ܡܛܠܗܢܐ ܡܙܓ̣ ܠܗܘܢ̇ ܐܠܗܐ ܪܘܚܐ ܕܛܥ̇ܝܘܬܐ ܘܐܫܩܝ̣ ܐܢܘܢ̇ ܟܣܐ ܚ̣̇ܝܐ ܠܪܘܝܘܬܐ
16 ܐܝܬ̣ܝ ܠܗ̇ܘ ܕܡ̣ܢ ܥܒ̣ܪ̈ܝܗ̇ ܕܐܪܥܐ ܕܐܠ̇ܨ ܩܫܝܐܝ̣ܬ
17 ܘܕܐܢ̇ ܩܪܒܐ ܥܠ ܐܘܪܫܠܡ ܘܥܠ ܐܪܥܗ̇
18 ܘܐܪܥ̣ܘܗܝ ܕܝ̈ܢܝܗ̇ ܕܐܪܥܐ ܒܚ̣̇ܕܘܬܐ ܘܐܡ̣ܪܘ ܠܗ ܬܬܩ̣ܢܝ ܐܘܪܚܟ ܬܐ ܥܘ̇ܠ ܒܫܠܡܐ
19 ܘܐܫܘܝ̣ܘ ܐܘ̣ܪ̈ܚܬܐ ܕܥܪܡܢ ܠܡ̣̇ܥܠܢܘ̣ܬܗ ܦܬ̣ܚܘ ܬܪ̈ܥܐ ܥܠ ܐܘܪܫܠܡ ܘܟ̇ܠ̣ܠܘ ܫܘܪ̈ܝܗ̇
20 ܘܥ̣ܠ ܐܝܟ ܐܒܐ ܠܒ̣̇ܝܬܐ ܕܒܢ̈ܘܗܝ ܒܫܠܡܐ ܘܐܩܝ̣ܡ ܪ̈ܓܠܘܗܝ ܒܫܪܪܐ ܣ̇ܓܝܐܐ
21 ܘܐܚ̣ܕܘ ܡܓܕ̈ܠܝܗ̇ ܘܫܘܪ̈ܝܗ̇ ܕܐܘ̇ܪܫܠܡ
22 ܡܛܠ ܕܐܠܗܐ ܐܝ̣ܬܘܗܝ ܒܬܘܩܢܐ ܥܠ ܡ̣̇ܛܥܝܢܘܬܗܘܢ̇
23 ܘܐܘܒ̣ܕܘ ܪ̈ܝܫܢܝܗܘܢ̇ ܡܛܠ ܕܚܟܝ̣ܡ ܒܡ̣̇ܶܠܟܐ ܘܐܫ̣ܕܘ ܕܡܐ ܕܥ̇ܡܘܪ̈ܝܗ̇ ܕܐܘܪܫܠܡ ܐܝܟ ܡ̈ܝܐ ܕܣ̣̇ܪܝܘܬܐ
24 ܘܐܘܒܠ ܒܢ̈ܝܗܘܢ̇ ܘܒܢ̈ܬܗܘܢ̇ ܗ̇ܢܘܢ̇ ܕܗ̣ܘܘ ܒܛܡܐܘܬܐ
25 ܘܥܒ̣ܕܘ ܛܡܐܘܬܗܘܢ̇ ܐܝܟ ܕܐܦ ܐܒ̈ܗܝܗܘܢ̇
26 ܘܛܡܐܬ̇ ܐܘ̇ܪܫܠܡ ܐܦ ܠܐܝܠܝܢ ܕܡܩܕܫܝܢ ܗ̣ܘܘ ܠܫܡܗ ܕܐܠܗܐ
27 ܘܐܙܕܕܩ ܐܠܗܐ ܒܕܝ̣̈ܢܘܗܝ ܒܥܡ̣̈ܡܐ ܕܐܪܥܐ
28 ܘܚܣ̈ܘܗܝ ܕܐܠܗܐ ܐܝܟ ܐܡ̣ܪ̈ܐ ܬܡ̈ܝܡܐ ܒܝܢܬܗܘܢ̇
29 ܡܫ̣ܒܚ ܗ̣ܘ ܐܠܗܐ ܕܕܐ̇ܢ ܟܠܗ̇ ܐܪܥܐ ܒܙܕܝܩܘܬܗ
30 ܗܐ ܐܢܬ ܐܠܗܐ ܚ̣̇ܘܝܬܢ ܙܕܝܩܘܬܟ
31 ܘܚ̣̈ܙܝ ܥܝ̈ܢܝܢ ܕܝ̣ܢ̈ܝܟ ܐܠܗܐ ܘܙܕܩܢ ܫܡܟ ܡܝܩܪܐ ܠܥ̇ܠܡܝܢ
32 ܡܛܠ ܕܐܢܬ ܗ̣ܘ ܐܠܗܐ ܕܙܕܝܩܘܬܐ ܕܕܐ̇ܢ ܐܢܬ ܠܝ̣ܣܪܐܝܠ ܒܡ̣̇ܪܕܘܬܐ
33 ܐܗܦ̣ܟ ܥܠܝܢ ܪ̈ܚ̣ܡܝܟ ܘܚܘ̣ܢܝܢ
34 ܘܟ̣̇ܢܫ ܒܘ̣ܕܪܗ ܕܝܣܪܐܝܠ ܒܪ̈ܚ̣ܡܐ ܘܒܛܝܒܘܬܐ
35 ܡܛܠ ܕܗ̣̇ܝܡܢܘܬܟ ܥܡܢ ܘܚܢܢ ܩ̣̇ܫܝܢ ܩܕ̈ܠܝܢ ܘܐܢܬ ܪܕܘܝܢ ܐܢܬ
36 ܠܐ ܬܡܗܐ ܡ̣ܢܢ ܐܠܗܢ ܕܕܠܡܐ ܢܒܠܥܘܢܢ ܥܡ̣̈ܡܐ ܐܝܟ ܗ̇ܘ ܕܠܝܬ ܕܦ̇ܪܩ
37 ܘܐܢܬ ܐܠܗܢ ܐܢܬ ܡ̣ܢ ܒܪ̣ܝܫܝܬ ܘܥܠܝܟ ܗ̣ܘ ܣ̣̇ܒܪܢ ܡܪܝܐ
38 ܘܚܢܢ ܠܐ ܢܪܚܩ ܡܢܟ ܡܛܠ ܕܛܒ̈ܝܢ ܐܢܘܢ̇ ܕܝ̣ܢ̈ܝܟ
39 ܥܠܝܢ ܘܥܠ ܒܢ̈ܝܢ ܨ̣ܒܝܢܟ ܠܥ̇ܠܡ ܡܪܝܐ ܐܠܗܐ ܦܪܘܩܢ ܘܬܘ̣ܒ ܠܐ ܢܬܬܙܝ̣ܥ ܠܥ̇ܠܡ
40 ܡܫ̣̇ܒܚ ܗ̣ܘ ܡܪܝܐ ܒܕܝ̣ܢ̈ܘܗܝ ܒܦܘ̣ܡܐ ܕܚܣ̈ܘܗܝ ܘܒܪܝ̣ܟ ܗ̣ܘ ܐܝ̣ܣܪܐܝܠ ܡ̣ܢ ܡܪܝܐ ܠܥ̇ܠܡ
Psalms of Solomon 7 · Psalms of Solomon 9 · Greek (Septuagint / SBLGNT)