1 ܒܫܘ̣ܒܗܪܗ ܕܥܘ̇ܠܐ ܐܪܡܝ ܒܥ̣̇ܕܥܐܕܐ ܫܘܪ̈ܐ ܚ̣̇ܣ̈ܝܢܐ ܘܠܐ ܟܠ̇ܝܬ
2 ܘܣܠܩ̣ܘ ܥܠ ܡ̣̇ܕܒܚܟ ܥܡ̣̈ܡܐ ܢܘܟܪ̈ܝܐ ܘܡܕܝ̣ܫ̣ܝܢ ܗ̣ܘܘ ܒ̣̇ܡܣܢ̈ܝܗܘܢ̇ ܒܫ̣̇ܒܗܪܢܘܬܐ
3 ܡܛܠ ܕܒܢ̈ܝ ܐܘ̇ܪܫܠܡ ܛܡܐܘ ܒܝܬ ܡܩܕܫܗ ܕܡܪܝܐ ܘܡܛܡܐܝܢ ܗ̣ܘܘ ܩܘܪ̈ܒܢܘܗܝ ܕܐܠܗܐ ܒܥܘܠܘܬܐ
4 ܡܛܠ ܗܢܐ ܐܡ̣ܪ ܕܐܪܚ̣ܩܘ ܘܫ̣ܕܘ ܐܢܘܢ̇ ܡ̣ܢܝ ܘܠܐ ܐܬ̣ܩܢ ܥܡܗܘܢ̇ ܫܘ̣ܦܪܐ ܕܬܫܒܘ̇ܚܬܗ
5 ܐܣܬܠܝ̣ ܩܕܡ ܡܪܝܐ ܘܐܨܛܥܪܬ ܥܕܡܐ ܠܚܪܬܐ
6 ܒܢ̈ܝܗ̇ ܘܒܢ̈ܬܗ̇ ܒܫܒ̣ܝܐ ܡ̣̇ܪܝܪܐ ܘܩܕܠܗܘܢ ܣܝ̣ܡ ܥܠܘܗܝ ܢܝ̣ܪܐ ܚܬܝ̣ܡܐ ܕܥܡ̣̈ܡܐ
7 ܘܐܝܟ ܚܛܗ̈ܝܗܘܢ̇ ܗܟܢܐ ܥܒ̣ܕ ܠܗܘܢ̇ ܡܛܠ ܕܐܪܦܝ̣ ܐܢܘܢ̇ ܒܐܝ̣ܕܐ ܕܡ̇ܢ ܕܥܫܝ̣ܢ ܡܢܗܘܢ̇
8 ܐܗܦ̣ܟ ܓܝܪ ܐܦ̈ܘܗܝ ܡ̣ܢ ܪܚ̈ܡܘܗܝ ܛܠ̈ܝܐ ܘܣ̈ܒܐ ܘܒܢ̈ܝܗܘܢ̇ ܐܟܚܕܐ
9 ܡܛܠ ܕܒܝ̣ܫܬܐ ܥܒ̣ܕܘ ܐܦ ܗ̣ܢܘܢ̇ ܐܟܚܕܐ ܕܠܐ ܢܫ̣ܡܥܘܢܢܝ
10 ܘܐܬܚܡܬ ܫܡ̇ܝܐ ܪܘܪܒܐܝ̣ܬ ܘܐܪܥܐ ܐܣ̣ܠܝܬ̇ ܐܢܘܢ̇
11 ܡܛܠ ܕܠܐ ܥܒ̣ܕ ܟ̇ܠ ܒܪܐܢܫ ܥܠܝܗ̇ ܐܝܟ ܕܥܒ̣ܕܘ
12 ܘܕܬܕܥܝ ܐܪܥܐ ܟ̇ܠܗܘܢ̇ ܕܝ̣̈ܢܝܟ ܙܕܝ̈ܩܐ ܐܠܗܐ
13 ܐܩܝ̣ܡܘ ܠܒܢ̈ܝܗ̇ ܕܐܘ̇ܪܫܠܡ ܒܓܘ̣ܚܟܐ ܒܓܘܗ̇ ܚܠ̣ܦ ܙܢܝ̈ܬܐ ܘܟ̇ܠ ܡ̇ܢ ܕܥ̇ܒܪ ܗ̣ܘܐ ܥ̇ܒܪ ܗ̣ܘܐ ܐܝܟ ܕܠܘ̣ܩܒܠ ܫܡ̣ܫܐ ܟܕ ܡܒ̣̇ܙܚܝܢ ܗ̣ܘܘ ܒܥ̣̇ܘܠܘܬܗܘܢ̇
14 ܐܝ̇ܟ ܕܐܦ ܗ̣ܢܘܢ̇ ܥ̇ܒܕܝܢ ܗܘܘ̇ ܠܘ̣ܩܒܠ ܫܡ̣ܫܐ ܦܪܣܝ̣ܘ ܥ̣̇ܘܠܘܬܗܘܢ̇ ܘܒܢ̈ܬܗ̇ ܕܐܘܪܫܠܡ ܐܬܛܡ̈ܐܝܢ ܐܝܟ ܕܝ̣̈ܢܝܟ
15 ܚܠ̣ܦ ܕܗ̣ܢܝܢ ܛܡ̈ܐܝ ܢܦܫܗܝܢ ܒܚܘ̣ܠܛܢܐ ܕܫܪܝ̣ܚܘܬܐ ܟܪܣܝ ܘܪ̈ܚ̣ܡܝ ܟܝ̇ܒܝܢ ܥܠ ܗܠܝܢ
16 ܐܢ̇ܐ ܕܝܢ ܐܙ̇ܕܩܟ ܡܪܝܐ ܒܬܪܝܨ̣ܘܬܗ ܕܠܒ̣ܝ ܡܛܠ ܕܒܕܝ̣̈ܢܝܟ ܙܕܝܩܘܬܟ ܐܠܗܐ
17 ܡܛܠ ܕܦ̇ܪܥ ܐܢܬ ܠܥ̇ܘ̈ܠܐ ܐܝܟ ܥ̇ܒ̈ܕܝܗܘܢ ܘܐܝܟ ܚܛܗ̈ܝܗܘܢ̇ ܒܝ̣̈ܫܐ ܘܡܪ̈ܝܪܐ
18 ܓܠ̣ܝܬ ܚܛܗ̈ܝܗܘܢ ܡܛܠ ܕܢܬܝ̣ܕܥ ܕܝ̣ܢܟ
19 ܘܥ̣ܛܝܬ ܕܘܟܪܢܗܘܢ̇ ܡ̣ܢ ܐܪܥܐ ܐܠܗܐ ܕܝ̇ܢܐ ܘܙܕܝܩܐ ܘܠܐ ܢ̇ܣܒ ܒܐܦ̈ܐ
20 ܚܣܕܘ ܓܝܪ ܥܡ̣̈ܡܐ ܠܐܘܪܫܠܡ ܒܪܘܫܥܗܘܢ̇ ܘܐܬܦ̣ܣܩ ܫܘܦܪܗ̇ ܡܢ ܬܪܘ̇ܢܘܣ ܕܬܫܒܘ̇ܚܬܗ
21 ܘܐܬܟܣܝܬ̇ ܣ̣̇ܩܐ ܚܠ̣ܦ ܠܒܘ̣ܫܐ ܕܝ̇ܐܝܘܬܐ ܘܚ̣̇ܒܠܐ ܥܠ ܪܝܫܗ̇ ܚܠܦ ܟܠܝ̣ܠܐ
22 ܐܪܝ̣ܡܬ̇ ܡܢܗ̇ ܙܝ̣ܘܐ ܕܬܫܒܘ̇ܚܬܐ ܗ̇ܘ ܕܐܪܡܝ̣ ܥܠܝܗ̇ ܐܠܗܐ
23 ܒܨ̣̇ܥܪܐ ܫܘ̣ܦܪܗ̇ ܐܫܬܕܝ̣ ܥܠ ܐܪܥܐ
24 ܘܐܢ̇ܐ ܚܙܝ̇ܬ ܘܒܥܝ̇ܬ ܐܦ̈ܘܗܝ ܕܡܪܝܐ ܘܐܡ̇ܪܬ ܣ̇ܦܩ ܐܘܩ̣ܪܬ ܐܝ̣ܕܟ ܡܪܝܐ ܥܠ ܝ̣ܣܪܐܝܠ ܒܡ̣̇ܝܬܝܢܘܬܐ ܕܥܡ̣̈ܡܐ
25 ܡܛܠ ܕܒܙܚܘ ܘܠܐ ܚ̣ܣܘ ܒܪܘܓܙܐ ܘܒܟܐܬܐ
26 ܡܓܡܪܝܢ ܐܠܐ ܐܢ ܐܢܬ ܡܪܝܐ ܬܟ̣ܐܐ ܒܗܘܢ̇ ܒܪܘܓܙܟ
27 ܡܛܠ ܕܠܐ ܗ̣ܘܐ ܒܛܢ̣ܢܐ ܥܒ̣ܕܘ ܐܠܐ ܐܢ ܒܪܓܬܐ ܕܢܦܫܐ
28 ܕܢ̣ܫܕܘܢ ܪܘܓܙܗܘܢ̇ ܥܠܝܢ ܒܚܛܘ̣ܦܝܐ ܐܢܬ ܕܝܢ ܡܪܝܐ ܠܐ ܬܘܚܪ ܬܦܪܘܥ ܐܢܘܢ̇ ܒܪܝܫܗܘܢ̇
29 ܠܡܪܡܝܘ ܫܘ̣ܒܗܪܗ ܕܬܢܝܢܐ ܒܨܥܪܐ
30 ܘܠܐ ܐ̇ܫܬܘܚܪܬ ܥܕܡܐ ܕܚܘܝ̣ ܠܝ̣ ܡܪܝܐ ܨܥܪܗ ܟܕ ܡܡܚܝ ܥܠ ܛܘܪ̈ܐ ܕܡܨܪܝܢ ܘܝܬܝܪ ܡ̣ܢ ܒܨܝ̣ܪܐ ܡܣܠܝ ܥܠ ܐܪܥܐ ܘܥܠ ܝܡܐ
31 ܘܦܓܪܗ ܕܝܢ ܟܕ ܐܬ̇ܐ ܥܠ ܓܠ̈ܠܐ ܒܨܥܪܐ ܣ̇ܓܝܐܐ ܘܠܝܬ ܕܩ̇ܒܪ
32 ܡܛܠ ܕܐܣܠ̣ܝܗ ܒܨܥܪܐ ܠܐ ܓܝܪ ܐܬܚܫܒ ܕܒܪܐܢܫܐ ܗ̇ܘ ܘܚܪܬܐ ܠܐ ܐܬܪܥܝ
33 ܐܡ̣ܪ ܓܝܪ ܕܐ̣ܢܐ ܐ̇ܗܘܐ ܡܪܗ̇ ܕܐܪܥܐ ܘܕܝܡܐ ܘܠܐ ܝ̣ܕܥ ܕܡܪܝܐ ܗ̇ܘ ܐܠܗܐ ܪܒܐ ܘܥܫ̣ܝܢܐ ܘܚ̣̇ܝܠܬܢܐ
34 ܘܗܘ̣ܝܘ ܡܠܟܐ ܥܠ ܫܡ̇ܝܐ ܘܥܠ ܐܪܥܐ ܘܕܐ̇ܢ ܡܠ̈ܟܘܬܐ ܘܪ̈ܝܫܢܐ
35 ܗ̇ܘ ܕܡܩܝ̣ܡ ܠܝ̣ ܒܬܫܒܘ̇ܚܬܐ ܘܡܕܡܟ ܠܫܒܗܪ̈ܢܐ ܠܐ ܒܥܕܢܐ ܐܠܐ ܠܥ̇ܠܡ ܒܨܥܪܐ ܡܛܠ ܕܠܐ ܝܕܥܘܗܝ
36 ܘܗܫܐ ܚܙ̣ܘ ܪ̈ܘܪܒܢܝܗ̇ ܕܐܪܥܐ ܕܝ̣ܢܗ ܕܡܪܝܐ ܡܛܠ ܕܡ̣̇ܠܟܐ ܗ̇ܘ ܙܕܝܩܐ ܘܕܐ̇ܢ ܠܕܠܬ̣ܚܬ ܡ̣ܢ ܟ̇ܠܗ̇ ܫܡ̇ܝܐ
37 ܒ̣̇ܪܟܘ ܠܡܪܝܐ ܗ̇ܢܘܢ ܕܕܚ̇ܠܝܢ ܡܢ ܡܪܝܐ ܒܐܣܟܡܐ ܡܛܠ ܕܪ̈ܚ̣ܡܘܗܝ ܕܡܪܝܐ ܥܠ ܕܚ̈ܠܘܗܝ ܒܕܝ̣ܢܐ
38 ܠܡ̣ܦܪܫ ܒܝܢܬ ܙܕܝ̈ܩܐ ܘܥ̇ܘ̈ܠܐ ܠܡܦܪܥ ܠܥ̇ܘ̈ܠܐ ܠܥ̇ܠܡ ܐܝܟ ܥ̇ܒ̈ܕܝܗܘܢ̇
39 ܘܠܡܚܢ ܠܙܕܝ̈ܩܐ ܡ̣ܢ ܡܘ̣ܟܟܐ ܕܥ̇ܘ̈ܠܐ ܘܠܡܦܪܥ ܠܥ̇ܘ̈ܠܐ ܚܠܦ ܕܥܒ̣ܪ ܙܕܩܐ
40 ܡܛܠ ܕܒܣܝܡ ܗ̣ܘ ܡܪܝܐ ܠܐܝܠܝܢ ܕܩ̇ܪܝܢ ܠܗ ܒܡܣ̣̇ܝܒܪܢܘܬܐ ܠܡܥ̣ܒܕ ܐܝܟ ܪ̈ܚܡ̣ܘܗܝ ܠܚܣ̈ܘܗܝ ܠܡܩ̣ܡ ܩܕܡ̇ܘܗܝ ܒܟ̇ܠܙܒܢ ܒܥܘ̣ܫܢܐ
41 ܒܪܝ̣ܟ ܗ̣ܘ ܡܪܝܐ ܠܥ̇ܠܡ ܡ̣ܢ ܥ̇ܒ̈ܕܘܗܝ
Psalms of Solomon 1 · Psalms of Solomon 3 · Greek (Septuagint / SBLGNT)