1 ܠܡܢܐ ܕܡ̣ܟܬܝ ܢ̣̇ܦܫܝ ܘܠܐ ܡܒܪܟܬܝ ܠܡܪܝܐ
2 ܬܫܒܘ̇ܚܬܐ ܚ̇ܕܬܐ ܠܐܠܗܐ ܙܡ̣ܪܝ ܘܐܬܬܥܝ̣ܪܝ ܒܥܝ̣ܪܘܬܗ ܡܛܠ ܕܡ̣̇ܙܡܘܪܐ ܛ̇ܒܐ ܠܐܠܗܐ ܡ̣ܢ ܠܒ̣ܐ ܛ̇ܒܐ
3 ܙܕܝ̈ܩܐ ܒܟ̇ܠܙܒܢ ܢܬܕܟܪܘܢ ܠܡܪܝܐ ܒܬܘܕܝܬܐ ܘܒܙܕܝܩܘܬܐ ܕܝ̣̈ܢܘܗܝ ܕܡܪܝܐ
4 ܠܐ ܢ̣̇ܗܡܐ ܙ̣̇ܕܝܩܐ ܕܡܬܪܕܐ ܡ̣ܢ ܡܪܝܐ ܡܛܠ ܕܨܒܝܢܗ ܒܟ̇ܠ ܙܒܢ ܩܕܡ ܡܪܝܐ
5 ܐܬܬ̣ܩܠ ܙܕܝܩܐ ܘܙ̣̇ܕܩ ܠܐܠܗܐ ܢܦ̣ܠ ܘܡܣܟܐ ܕܡܢܐ ܢܥܒ̣ܕ ܠܗ ܡܪܝܐ
6 ܘܡܚܝܪ ܕܡܢ ܐܝܟܐ ܢܐܬܐ ܦܘ̣ܪܩܢܗ
7 ܫܪܪܐ ܕܙܕ̈ܝܩܐ ܡ̣ܢ ܩܕܡ ܐܠܗܐ ܦ̇ܪܘܩܗܘܢ̇ ܠܐ ܓܝܪ ܒ̣̇ܝܬܐ ܒܒ̣̇ܝܬܐ ܕܙܕܝ̈ܩܐ ܚܛܝ̣ܬܐ ܥܠ ܚܛܝ̣ܬܐ
8 ܡܛܠ ܓܝܪ ܕܒܟ̇ܠ ܙܒܢ ܣ̇ܥܪ ܒ̣̇ܝܬܗ ܕܙܕܝܩܐ ܠܡܥ̣ܛܐ ܚܛܗ̈ܐ ܕܫܘܪ̈ܥܬܗ
9 ܘܦ̇ܪܩ ܢܦܫܗ ܒܡܕܡ ܕܚ̇ܛܐ ܒܠܐ ܝ̣ܕܥܬܐ ܒܨܘܡܐ ܘܒܡܘ̣ܟܟܐ
10 ܘܡܪܝܐ ܡܕܟܐ ܟ̇ܠ ܓܒܪ ܚ̣̇ܣܝܐ ܘܠܒܝܬܗ
11 ܐܬܬܩ̣ܠ ܕܝܢ ܥ̣ܘ̇ܠܐ ܘܠ̣ܛ ܠܚܝ̈ܘܗܝ ܘܠܝܘܡܐ ܕܐܬܝ̣ܠܕ ܒܗ ܘܠܚܒ̣̈ܠܐ ܕܐܡܗ
12 ܘܐܘܣܦ ܚܛ̈ܗܐ ܥܠ ܚܛ̈ܗܐ ܠܚܝ̈ܘܗܝ
13 ܢܦ̣ܠ ܘܡܛܠ ܕܒܝ̣ܫܐ ܡ̣̇ܦܘܠܬܗ ܘܠܐ ܢܩܘ̣ܡ ܐܒܕܢܗ ܓܝܪ ܕܥܘ̇ܠܐ ܠܥ̇ܠܡ ܗ̣ܘ
14 ܘܠܐ ܢܬܕܟܪ ܐܡܬܝ ܕܣ̇ܥܪ ܙܕܝܩܐ
15 ܗܕܐ ܗ̇ܝ ܡܢܬܗܘܢ ܕܥ̈ܘ̇ܠܐ ܠܥ̇ܠܡ
16 ܐܝܠܝܢ ܕܝܢ ܕܕܚ̇ܠܝܢ ܡ̣ܢ ܡܪܝܐ ܢܩܘ̣ܡܘܢ ܠ̈ܚܝܐ ܕܠܥ̇ܠܡ ܘܚܝ̈ܝܗܘܢ̇ ܒܢܘ̣ܗܪܗ ܕܡܪܝܐ ܘܠܐ ܬܘ̣ܒ ܢܬܛ̇ܠܩ ܗܠܠܘܝܐ
Psalms of Solomon 2 · Psalms of Solomon 4 · Greek (Septuagint / SBLGNT)