1 ܒܐܘܠܨܢܝ ܩܪܝ̇ܬ ܫܡܗ ܕܡܪܝܐ ܘܠܥܘܕܪܢܝ ܩܪܝ̇ܬ ܠܐܠܗܗ ܕܝܥܩܘ̇ܒ ܘܐܬܦܪܩܬ
2 ܡܛܠ ܕܣܒܪܐ ܘܒܝܬ ܓ̣̇ܘܣܐ ܕܡܣܟ̈ܢܐ ܐܢܬ ܗ̣ܘ ܐܠܗܐ
3 ܡ̣̇ܢܘ̣ ܓܝܪ ܕܥ̣̇ܫܝܢ ܢܘܕܐ ܠܟ ܒܫܪܪܐ
4 ܘܡܢܘ ܚ̣̇ܝܠܗ ܕܒܪܐܢܫܐ ܐܠܐ ܕܢܘܕܐ ܠܫܡܟ
5 ܙܡܝ̣ܪܬܐ ܚ̇ܕܬܐ ܒܩ̇ܠܐ ܒܒܘ̣ܣܡܐ ܕܠܒ̣ܐ ܦܐܪܐ ܕܣ̣̈ܦܘܬܐ ܒܡܐܢܐ ܕܡܬ̣ܩܢ ܒܠ̣ܫܢܐ ܪ̈ܝܫܝܬܐ ܕܣ̣̈ܦܘܬܐ ܡ̣ܢ ܠܒ̣ܐ ܚ̣̇ܣܝܐ ܘܙܕܝܩܐ
6 ܟ̇ܠ ܕܥ̇ܒܕ ܗܠܝܢ ܠܐ ܢܬܬܙܝ̣ܥ ܠܥ̇ܠܡ ܡ̣ܢ ܒܝ̣ܫܐ ܫ̣̇ܠܗܒܝܬܐ ܕܢܘܪܐ ܘܪܘܓܙܐ ܕܥ̇ܘ̈ܠܐ ܠܐ ܢܬ̣ܩܪܒ ܠܗܘܢ
7 ܐܡܬܝ ܕܢܦܘܩ ܥܠ ܚ̈ܛܝܐ ܡ̣ܢ ܩܕܡ ܡܪܝܡܐ ܠܡܥ̣ܩܪ ܟ̇ܠܗܘܢ̇ ܫܪ̈ܫܝܗܘܢ̇ ܕܥ̇ܘ̈ܠܐ
8 ܡܛܠ ܕܐܬ̇ܗ ܓܝܪ ܕܡܪܝܐ ܥܠ ܙܕܝ̈ܩܐ ܠܦܘܪܩ̇ܢܐ ܡ̇ܘܬܐ ܓܝܪ ܘܪܘܡܚܐ ܘܟܦܢܐ ܡ̣ܢ ܙܕܝ̈ܩܐ ܢ̣̇ܪܚܩܘܢ
9 ܢܥ̣ܪܩܘܢ ܓܝܪ ܡ̣ܢܗܘܢ ܐܝܟ ܕܥ̇ܪܩ ܡ̣̇ܘܬܐ ܡ̣ܢ ܚ̈ܝܐ ܢܪܕܦܘܢ ܕܝܢ ܒ̇ܬܪ ܥ̇ܘ̈ܠܐ ܘܢܕܪܟܘܢ ܐܢܘܢ̇ ܘܐܝܠܝܢ ܕܥ̇ܒܕܝܢ ܥ̣̇ܘܠܐ ܠܐ ܢܥ̣ܪܩܘܢ ܡ̣ܢ ܕܝ̣ܢ̈ܝܗ ܕܡܪܝܐ ܐܝܟ ܝ̇ܕ̈ܥܝ ܓܝܪ ܩܪܒܐ ܢ̣ܩܕܡܘܢ ܐܢܘܢ̇
10 ܡܛܠ ܕܐܬ̇ܐ ܕܐܒܕܢܐ ܥܠ ܐܦ̈ܝܗܘܢ̇
11 ܘܝܘܪܬܢܗܘܢ̇ ܕܚ̈ܛܝܐ ܐܒܕܢܐ ܘܚܫܘܟܐ ܘܥܘܠܗܘܢ̇ ܢܪܕܘܦ ܐܢܘܢ̇ ܥܕܡܐ ܠܫܝܘ̇ܠ ܬܚܬܝܬܐ
12 ܘܝܘܪܬܢܗܘܢ̇ ܠܐ ܢܫ̣ܬܟܚ ܠܒܢ̈ܝܗܘܢ̇
13 ܚܛܗ̈ܝܗܘܢ̇ ܓܝܪ ܢܚ̣ܪܘܒ ܒ̈ܬܐ ܕܚ̈ܛܝܐ ܘܢܐܒܕܘܢ ܚܛ̈ܝܐ ܒܝܘܡܐ ܕܕܝ̣ܢܗ ܕܡܪܝܐ ܠܥ̇ܠܡ
14 ܐܡ̣ܬܝ ܕܣ̇ܥܪ ܐܠܗܐ ܐܪܥܐ ܒܕܝ̣ܢܗ
15 ܘܥܠ ܐܝܠܝܢ ܕܕܚ̇ܠܝܢ ܡ̣ܢ ܡܪܝܐ ܢܗ̣ܘܘܢ̇ ܪ̈ܚ̣ܡܐ ܒܗ̇ ܘܢܐܚܘܢ ܒܡܪܚܡܢܘ̣ܬܗ ܕܐܠܗܢ ܘܚ̈ܛܝܐ ܢܐܒܕܘܢ ܠܙܒܢܐ ܕܠܥ̇ܠܡ
Psalms of Solomon 14 · Psalms of Solomon 16 · Greek (Septuagint / SBLGNT)