Proverbs 9 — Coptic (Sahidic)

1 ⲁⲧⲥⲟⲫⲓⲁ ⲕⲉⲧⲟⲩⲏⲓ ⲛⲁⲥ ⲁⲩⲱ ⲁⲥⲧⲁϫⲣⲟ ⲛⲥⲁϣϥ ⲛⲥⲧⲩⲗⲟⲥ

2 ⲁⲥⲕⲱⲛⲥ ⲛⲛⲉⲥϣⲱⲱⲧ ⲁⲥⲕⲉⲣⲁ ⲙⲡⲉⲥⲏⲣⲡ ⲉⲩϩⲛⲁⲁⲩ ⲁⲥⲥⲟⲃⲧⲉ ⲛⲧⲉⲥⲧⲣⲁⲡⲉⲍⲁ

3 ⲁⲥϫⲟⲟⲩ ⲛⲛⲉⲥϩⲙϩⲁⲗ ⲉⲥⲙⲟⲩⲧⲉ ϩⲛⲟⲩⲛⲟϭ ⲛⲧⲁϣⲉⲟⲉⲓϣ ⲉϫⲙⲡⲉϩⲛⲁⲁⲩ ⲉⲥϫⲱ ⲙⲙⲟⲥ

4 ϫⲉⲡⲁⲧϩⲏⲧ ⲉⲧⲛϩⲏⲧⲧⲏⲩⲧⲛ ⲙⲁⲣⲉϥⲣⲁⲕⲧϥ ϣⲁⲣⲟⲓ ⲁⲩⲱ ⲡⲉϫⲁⲥ ⲛⲛⲉⲧϣⲁⲁⲧ ⲛⲥⲃⲱ

5 ϫⲉⲁⲙⲉⲓⲧⲛ ⲛⲧⲉⲧⲛⲟⲩⲱⲙ ⲉⲃⲟⲗ ϩⲛⲛⲁⲟⲉⲓⲕ ⲁⲩⲱ ⲛⲧⲉⲧⲛⲥⲱ ⲙⲡⲁⲏⲣⲡ ⲛⲧⲁⲓⲕⲉⲣⲁ ⲙⲙⲟϥ

6 ⲕⲱ ⲛⲥⲱⲧⲛ ⲛⲧⲙⲛⲧⲁⲧϩⲏⲧ ϫⲉⲉⲧⲉⲧⲛⲉⲱⲛϩ ⲛⲧⲉⲧⲛϣⲓⲛⲉ ⲛⲥⲁⲧⲙⲛⲧⲣⲙⲛϩⲏⲧ ϫⲉⲉⲧⲉⲧⲛⲉⲣⲁϩⲉ ⲁⲩⲱ ϫⲉⲉⲧⲉⲧⲛⲉⲥⲟⲟⲩⲧⲛ ⲛⲧⲙⲛⲧⲣⲙⲛϩⲏⲧ ϩⲛⲟⲩⲥⲟⲟⲩⲧⲛ ⲙⲉⲉⲩⲉ ⲉⲧⲉⲥⲃⲱ ϩⲛⲟⲩϩⲓⲏ ⲉⲥⲥⲟⲩⲧⲱⲛ

7 ⲡⲉⲧϯⲥⲃⲱ ⲛⲛⲉⲧϩⲟⲟⲩ ⲉϥⲛⲁϫⲓ ⲛⲁϥ ⲛϩⲉⲛⲥⲱϣ ⲉⲣⲉⲟⲩⲥⲱϣ ⲇⲉ ⲛⲏⲩ ⲉϫⲛⲛⲉⲧϩⲟⲟⲩ ϩⲙⲡⲉⲧⲟⲩϭⲱϣⲧ ⲉⲃⲟⲗ ϩⲏⲧϥ ϩⲉⲛⲉⲗⲉⲗⲕⲏⲙⲉ ⲛⲉ ⲛⲉϫⲡⲓⲟ ⲉⲧϣⲟⲟⲡ ⲙⲡⲁⲥⲉⲃⲏⲥ

8 ⲙⲡⲣϫⲡⲓⲉⲛⲉⲧϩⲟⲟⲩ ⲇⲉ ⲛⲛⲉⲩⲙⲉⲥⲧⲱⲕ ϫⲡⲓⲉⲟⲩⲥⲁⲃⲉ ⲧⲁⲣⲉϥⲙⲉⲣⲓⲧⲕ

9 ϯⲧⲁⲫⲟⲣⲙⲏ ⲛⲟⲩⲥⲟⲫⲟⲥ ⲧⲁⲣⲉϥⲣϩⲟⲩⲉⲥⲟⲫⲟⲥ ⲙⲁⲧⲁⲙⲉⲡⲇⲓⲕⲁⲓⲟⲥ ⲧⲁⲣⲉϥϣⲣⲡⲥⲟⲟⲩⲛ ⲛϩⲟⲩⲟ

10 ⲧⲁⲣⲭⲏ ⲛⲧⲥⲟⲫⲓⲁ ⲧⲉ ⲧⲙⲛⲧⲙⲁⲓⲛⲟⲩⲧⲉ ⲧⲙⲛⲧⲣⲙⲛϩⲏⲧ ⲇⲉ ⲛⲛⲉⲧⲟⲩⲁⲁⲃ ⲡⲉ ⲡϣⲣⲡⲥⲟⲟⲩⲛ ⲡⲁⲟⲩϩⲏⲧ ⲇⲉ ⲉⲛⲁⲛⲟⲩϥ ⲡⲉ ⲡⲉⲓⲙⲉ ⲉⲡⲛⲟⲙⲟⲥ

11 ϩⲙⲡⲉⲓⲥⲙⲟⲧ ⲅⲁⲣ ⲉⲕⲛⲁⲣⲟⲩⲛⲟϭ ⲛⲁϩⲉ ⲁⲩⲱ ⲥⲉⲛⲁⲟⲩⲱϩ ⲉⲣⲟⲕ ⲛϩⲉⲛⲣⲙⲡⲟⲟⲩⲉ ⲛⲱⲛϩ

12 ⲡⲁϣⲏⲣⲉ ⲉⲕϣⲁⲛⲣⲥⲟⲫⲟⲥ ⲉⲕⲛⲁⲉⲓⲣⲉ ⲛⲁⲕ ⲙⲛⲡⲉⲧϩⲓⲧⲟⲩⲱⲕ ⲉϣⲱⲡⲉ ⲇⲉ ⲉⲕϣⲁⲛⲑⲟ ⲉⲕⲛⲁⲥⲉⲕⲡⲉⲧϩⲟⲟⲩ ⲛⲁⲕ ⲟⲩⲁⲁⲕ ⲡⲉⲧⲧⲁϫⲣⲟ ⲙⲙⲟϥ ⲉϫⲛϩⲉⲛϭⲟⲗ ⲡⲁⲓ ⲉϥⲙⲟⲟⲛⲉ ⲛϩⲉⲛⲧⲏⲩ ⲁⲩⲱ ⲉϥⲡⲏⲧ ⲛⲥⲁϩⲉⲛϩⲁⲗⲁⲧⲉ ⲉⲩϩⲏⲗ ⲁϥⲕⲱ ⲅⲁⲣ ⲛⲥⲱϥ ⲛⲛⲉϩⲓⲟⲟⲩⲉ ⲙⲡⲉϥⲙⲁⲛⲉⲗⲟⲟⲗⲉ ⲁⲩⲱ ⲁϥⲣⲡⲱⲃϣ ⲛⲛⲉϩⲓⲟⲟⲩⲉ ⲛⲧⲉϥⲥⲱϣⲉ ⲙⲙⲓⲛⲙⲙⲟϥ ⲉϥⲙⲟⲟϣⲉ ϩⲓⲧⲛⲟⲩϫⲁⲓⲉ ⲛⲁⲧⲙⲟⲟⲩ ⲁⲩⲱ ϩⲛⲟⲩⲕⲁϩ ⲉϥϣⲏϥ ϩⲛⲟⲩⲉⲓⲃⲉ ⲉϥⲥⲟⲩⲱϩ ⲇⲉ ⲉϩⲟⲩⲛ ⲛⲛⲉϥϭⲓϫ ⲑⲛⲟⲩϣⲱⲱⲃⲉ

13 ⲟⲩⲛⲟⲩⲥϩⲓⲙⲉ ⲛⲁϣⲧⲙⲙⲉ ⲁⲩⲱ ⲛⲁⲧϩⲏⲧ ⲛⲁⲣϭⲣⲱϩ ⲙⲡⲟⲉⲓⲕ ⲧⲁⲓ ⲉⲧⲉⲛⲥⲥⲟⲟⲩⲛ ⲁⲛ ⲙⲡϣⲓⲡⲉ

14 ⲁⲥϩⲙⲟⲟⲥ ϩⲓⲣⲛⲧϩⲛⲣⲟ ⲙⲡⲉⲥⲏⲓ ϩⲓⲟⲩⲧⲟϭⲥ ⲉⲥⲟⲩⲟⲛϩ ⲉⲃⲟⲗ ϩⲓⲛⲉⲡⲗⲁϯⲁ

15 ⲉⲥⲙⲟⲩⲧⲉ ⲉⲛⲉⲧⲡⲁⲣⲁⲅⲉ ⲁⲩⲱ ⲛⲉⲧⲥⲟⲩⲧⲱⲛ ϩⲓⲛⲉⲩϩⲓⲟⲟⲩⲉ ⲉⲥϫⲱ ⲙⲙⲟⲥ

16 ϫⲉⲛⲓⲙ ⲡⲉ ⲡⲁⲧϩⲏⲧ ⲉⲧⲛϩⲏⲧⲧⲏⲩⲧⲛ ⲙⲁⲣⲉϥⲣⲁⲕⲧϥ ϣⲁⲣⲟⲓ ϯⲟⲩⲁϩⲥⲁϩⲛⲉ ⲇⲉ ⲛⲛⲉⲧϣⲁⲁⲧ ⲛⲥⲃⲱ ⲉⲓϫⲱ ⲙⲙⲟⲥ

17 ϫⲉⲟⲩⲱⲙ ⲛϩⲉⲛⲟⲉⲓⲕ ⲉⲩϩⲏⲡ ϩⲛⲟⲩⲟⲩⲣⲟⲧ ⲙⲛⲟⲩⲙⲟⲟⲩ ⲧⲛϫⲓⲟⲩⲉ ⲉϥϩⲟⲗϭ

18 ⲛϥⲥⲟⲟⲩⲛ ⲇⲉ ⲁⲛ ϫⲉⲉⲣⲉⲛⲣⲱⲙⲉ ⲙⲟⲩ ϩⲁϩⲧⲏⲥ ⲁⲩⲱ ⲉⲥⲧⲱⲙⲛⲧ ⲉⲡⲡⲁϣ ⲛⲁⲙⲛⲧⲉ ⲁⲗⲗⲁ ⲡⲱⲧ ⲉⲡⲟⲩⲉ ⲛⲅⲧⲙⲱⲥⲕ ϩⲙⲡⲉⲥⲙⲁ ⲁⲩⲱ ⲙⲡⲣⲥⲙⲛⲛⲉⲕⲃⲁⲗ ⲉϩⲟⲩⲛ ⲉϩⲣⲁⲥ ⲧⲁⲓ ⲅⲁⲣ ⲧⲉ ⲧϩⲉ ⲉⲧⲕⲛⲁϫⲓⲟⲟⲣ ⲛⲟⲩⲙⲟⲟⲩ ⲉⲛⲡⲱⲕ ⲁⲛ ⲡⲉ ⲁⲩⲱ ⲉⲕⲛⲁⲟⲩⲱⲧⲃ ⲛⲟⲩⲓⲉⲣⲟ ⲛϣⲙⲙⲟ ⲥⲁϩⲱⲕ ⲉⲃⲟⲗ ⲑⲛⲟⲩⲙⲟⲟⲩ ⲉⲛⲡⲱⲕ ⲁⲛ ⲡⲉ ⲁⲩⲱ ⲙⲡⲣⲥⲱ ϩⲛⲟⲩⲡⲏⲅⲏ ⲛϣⲙⲙⲟ ϫⲉⲉⲕⲉⲣⲟⲩⲛⲟϭ ⲛⲁϩⲉ ⲡⲉⲧϩⲱⲛ ⲅⲁⲣ ⲉϩⲟⲩⲛ ⲉⲧⲁⲓ ϥⲛⲁⲃⲱⲕ ⲉⲡⲉⲥⲏⲧ ⲉⲁⲙⲛⲧⲉ ⲡⲉⲧⲛⲁⲥⲁϩⲱϥ ⲇⲉ ⲉⲃⲟⲗ ϥⲛⲁⲟⲩϫⲁⲓ ⲁⲩⲱ ϥⲛⲁⲱⲛϩ ⲉⲩⲟⲩⲟⲉⲓϣ ⲛⲁϩⲉ ⲥⲉⲛⲁⲟⲩⲱϩ ⲇⲉ ⲉⲣⲟϥ ⲛϩⲉⲛⲣⲙⲡⲟⲟⲩⲉ ⲛⲱⲛϩ