Read Proverbs 10 side by side with translations · The Final Bible
1 ϣⲁⲣⲉⲟⲩϣⲏⲣⲉ ⲛⲥⲟⲫⲟⲥ ⲉⲩⲫⲣⲁⲛⲉ ⲙⲡⲉϥⲉⲓⲱⲧ ⲟⲩⲗⲩⲡⲏ ⲇⲉ ⲛⲧⲉϥⲙⲁⲁⲩ ⲡⲉ ⲟⲩϣⲏⲣⲉ ⲛⲁⲧϩⲏⲧ
2 ⲛⲁϩⲱⲱⲣ ⲛⲁϯϩⲏⲩ ⲁⲛ ⲛⲛⲁⲛⲟⲙⲟⲥ ϣⲁⲣⲉⲧⲇⲓⲕⲁⲓⲟⲥⲩⲛⲏ ⲇⲉ ⲛⲟⲩϩⲙ ⲉⲃⲟⲗ ϩⲙⲡⲙⲟⲩ
3 ⲡϫⲟⲉⲓⲥ ⲛⲁⲙⲉⲩⲧⲟⲩⲯⲩⲭⲏ ⲁⲛ ⲛⲇⲓⲕⲁⲓⲟⲥ ϩⲁⲡⲉϩⲕⲟ ϥⲛⲁⲟⲩⲱⲗⲥ ⲇⲉ ⲙⲡⲱⲛϩ ⲛⲛⲁⲥⲉⲃⲏⲥ
4 ϣⲁⲣⲉⲧⲙⲛⲧϩⲏⲕⲉ ⲑⲃⲃⲓⲉⲡⲣⲱⲙⲉ ϣⲁⲣⲉⲧϭⲓϫ ⲇⲉ ⲛⲛϫⲱⲱⲣⲉ ⲣⲣⲙⲙⲁⲟ ⲟⲩⲛⲟⲩϣⲏⲣⲉ ⲉϥⲧⲥⲁⲃⲏⲩ ⲛⲁⲣⲥⲟⲫⲟⲥ ϥⲛⲁⲭⲣⲱ ⲇⲉ ⲙⲡⲁⲧϩⲏⲧ ϩⲱⲥ ⲣⲉϥϣⲙϣⲉ
5 ϥⲛⲁⲟⲩϫⲁⲓ ϩⲛⲟⲩⲕⲁⲩⲙⲁ ⲛϭⲓⲟⲩϣⲏⲣⲉ ⲛⲥⲁⲃⲉ ⲟⲩⲛⲟⲩϣⲏⲣⲉ ⲇⲉ ⲙⲡⲁⲣⲁⲛⲟⲙⲟⲥ ⲛⲁϣⲱⲥⲙ ϩⲙⲡⲱϩⲥ ϥⲛⲁⲥⲟⲩⲱϩ ⲉϩⲟⲩⲛ ϩⲙⲡϣⲱⲙ ⲡⲉϫⲡⲓⲏⲧ ⲇⲉ ⲛⲁϣⲱⲥⲙ ϩⲙⲡⲱϩⲥ
6 ⲉⲣⲉⲡⲉⲥⲙⲟⲩ ⲙⲡⲛⲟⲩⲧⲉ ϩⲓϫⲛⲧⲁⲡⲉ ⲛⲛⲇⲓⲕⲁⲓⲟⲥ ⲟⲩⲛⲟⲩϩⲏⲃⲉ ⲇⲉ ⲛϣⲁⲣⲉϩⲉ ⲛⲁϩⲱⲃⲥ ⲛⲧⲧⲁⲡⲣⲟ ⲛⲛⲁⲥⲉⲃⲏⲥ
7 ⲟⲩⲥⲟⲉⲓⲧ ⲉⲛⲁⲛⲟⲩϥ ⲡⲉ ⲡⲣⲡⲙⲉⲉⲩⲉ ⲙⲡⲇⲓⲕⲁⲓⲟⲥ ⲡⲣⲁⲛ ⲇⲉ ⲛⲛⲁⲥⲉⲃⲏⲥ ⲛⲁϫⲉⲛⲁ
8 ⲡⲥⲟⲫⲟⲥ ϩⲙⲡⲉϥϩⲏⲧ ⲛⲁϣⲱⲡ ⲉⲣⲟϥ ⲛⲧⲛⲧⲟⲟⲗⲏ ⲁⲩⲱ ⲥⲉⲛⲁϭⲱⲡⲉ ⲙⲡⲁⲧϩⲏⲧ ϩⲛⲛⲉϥⲥⲡⲟⲧⲟⲩ ⲡⲉⲧϣⲧⲣⲧⲱⲣ ⲇⲉ ⲉϥϭⲟⲟⲙⲉ ϩⲛⲛⲉϥⲥⲡⲟⲧⲟⲩ ϥⲛⲁϩⲉ
9 ⲡⲉⲧⲙⲟⲟϣⲉ ϩⲛⲟⲩⲙⲛⲧⲃⲁⲗϩⲏⲧ ⲉϥⲙⲟⲟϣⲉ ϩⲛⲟⲩⲧⲁϫⲣⲟ ⲡⲉⲧⲕⲧⲟ ⲇⲉ ⲉⲃⲟⲗ ⲛⲛⲉϥϩⲓⲟⲟⲩⲉ ϥⲛⲁⲟⲩⲱⲛϩ ⲉⲃⲟⲗ
10 ⲡⲉⲧϫⲱⲣⲙ ⲛⲛⲉϥⲃⲁⲗ ϩⲛⲟⲩⲕⲣⲟϥ ϥⲛⲁⲥⲉⲩϩⲗⲩⲡⲓ ⲉϩⲟⲩⲛ ⲛⲛⲣⲱⲙⲉ ⲡⲉⲧϫⲡⲓⲟ ⲇⲉ ϩⲛⲟⲩⲟⲩⲱⲛϩ ⲉⲃⲟⲗ ϥⲛⲁⲁⲁⲩ ⲛⲉⲓⲣⲏⲛⲏ
11 ⲉⲣⲉⲧⲡⲏⲅⲏ ⲙⲡⲱⲛϩ ϩⲛⲧϭⲓϫ ⲙⲡⲇⲓⲕⲁⲓⲟⲥ ⲡⲧⲁⲕⲟ ⲇⲉ ⲛⲁϩⲱⲃⲥ ⲛⲧⲧⲁⲡⲣⲟ ⲙⲡⲁⲥⲉⲃⲏⲥ
12 ϣⲁⲣⲉⲡⲙⲟⲥⲧⲉ ⲧⲟⲩⲛⲉⲥⲟⲩϯⲧⲱⲛ ⲟⲩⲟⲛ ⲇⲉ ⲛⲓⲙ ⲉⲧⲉⲛⲥⲉϫⲓ ⲁⲛ ⲛϭⲟⲛⲥ ⲧⲙⲛⲧϣⲃⲏⲣ ⲛⲁϩⲟⲃⲥⲟⲩ
13 ⲡⲉⲧⲉⲓⲛⲉ ⲛⲟⲩⲥⲟⲫⲓⲁ ⲉⲃⲟⲗ ϩⲛⲣⲱϥ ⲉϥⲣⲱϩⲧ ⲛⲟⲩⲣⲱⲙⲉ ⲛⲁⲧϩⲏⲧ ϩⲛⲟⲩϭⲉⲣⲱⲃ
14 ⲛⲥⲟⲫⲟⲥ ⲛⲁϩⲱⲡ ⲛϩⲉⲛⲥⲱϣ ⲧⲧⲁⲡⲣⲟ ⲇⲉ ⲛⲟⲩϣⲧⲣⲧⲱⲣ ⲛⲁϩⲱⲛ ⲉϩⲟⲩⲛ ⲉⲡⲟⲩⲱϣϥ
15 ⲡⲉϫⲡⲟ ⲛⲟⲩⲣⲙⲙⲁⲟ ⲡⲉ ⲟⲩⲡⲟⲗⲓⲥ ⲉⲥⲟⲣϫ ⲡⲟⲩⲱϣϥ ⲇⲉ ⲛⲛⲁⲥⲉⲃⲏⲥ ⲡⲉ ⲧⲙⲛⲧϩⲏⲕⲉ
16 ϣⲁⲣⲉⲛⲉϩⲃⲏⲩⲉ ⲙⲡⲇⲓⲕⲁⲓⲟⲥ ϫⲡⲉⲡⲱⲛϩ ⲛⲕⲁⲣⲡⲟⲥ ⲇⲉ ⲛⲛⲁⲥⲉⲃⲏⲥ ⲛⲉ ⲛⲛⲟⲃⲉ
17 ϣⲁⲣⲉⲧⲉⲥⲃⲱ ϩⲁⲣⲉϩ ⲉⲛⲉϩⲓⲟⲟⲩⲉ ⲙⲡⲱⲛϩ ⲧⲉⲥⲃⲱ ⲇⲉ ⲉⲧⲉⲙⲡⲟⲩϫⲡⲓⲟⲥ ⲡⲗⲁⲛⲁ
18 ϣⲁⲣⲉϩⲉⲛⲥⲡⲟⲧⲟⲩ ⲙⲙⲉ ϩⲉⲡⲟⲩⲙⲛⲧϫⲁϫⲉ ϩⲉⲛⲁⲧϩⲏⲧ ⲇⲉ ⲛⲉⲧⲉⲓⲛⲉ ⲉⲃⲟⲗ ⲛϩⲉⲛⲥⲁϩⲟⲩ
19 ⲉⲃⲟⲗ ϩⲛⲧⲙⲛⲧϩⲁϩ ⲛϣⲁϫⲉ ⲛⲛⲉⲕⲣⲃⲟⲗ ⲉⲛⲟⲃⲉ ⲉⲕϯⲥⲟ ⲇⲉ ⲉⲛⲉⲕⲥⲡⲟⲧⲟⲩ ⲕⲁⲛⲛⲛⲣⲙⲛϩⲏⲧ
20 ⲟⲩϩⲁⲧ ⲉϥⲥⲟⲧⲡ ⲡⲉ ⲡⲗⲁⲥ ⲛⲛⲇⲓⲕⲁⲓⲟⲥ ⲡϩⲏⲧ ⲇⲉ ⲛⲛⲁⲥⲉⲃⲏⲥ ⲛⲁⲱϫⲛ
21 ⲛⲉⲥⲡⲟⲧⲟⲩ ⲛⲛⲇⲓⲕⲁⲓⲟⲥ ⲥⲟⲟⲩⲛ ⲛⲛⲉⲧϫⲟⲥⲉ ⲉⲣⲉⲛⲁⲧϩⲏⲧ ⲇⲉ ⲛⲁⲙⲟⲩ ϩⲛⲟⲩϭⲣⲱϩ
22 ⲡⲉⲥⲙⲟⲩ ⲙⲡⲛⲟⲩⲧⲉ ⲡⲉ ⲧⲙⲛⲧⲣⲙⲙⲁⲟ ⲁⲩⲱ ⲛⲉⲩⲟⲩⲱϩ ⲉⲣⲟϥ ⲛⲟⲩⲗⲩⲡⲉⲓ ϩⲙⲡϩⲏⲧ
23 ϣⲁⲣⲉⲡⲁⲧϩⲏⲧ ϩⲙⲡⲉϥⲥⲱⲃⲉ ⲉⲓⲣⲉ ⲛⲟⲩⲙⲛⲧϣⲁϥⲧⲉ ϣⲁⲣⲉⲧⲥⲟⲫⲓⲁ ⲇⲉ ϫⲡⲉⲧⲙⲛⲧⲥⲁⲃⲉ ⲙⲡⲣⲱⲙⲉ
24 ϣⲁⲣⲉⲡⲁⲥⲉⲃⲏⲥ ϣⲉⲓ ϩⲙⲡⲧⲁⲕⲟ ⲧϩⲟⲧⲉ ⲇⲉ ⲙⲡⲁⲥⲉⲃⲏⲥ ⲛⲧⲟⲥ ⲉⲧⲛⲏⲩ ⲉϫⲱϥ ⲛⲉⲡⲓⲑⲩⲙⲓⲁ ⲇⲉ ⲛⲛⲇⲓⲕⲁⲓⲟⲥ ⲥⲟⲧⲡ
25 ⲡⲁⲥⲉⲃⲏⲥ ⲛⲁⲧⲁⲕⲟ ϩⲛⲟⲩϩⲁⲧⲏⲩ ⲉⲥⲙⲟⲟϣⲉ ⲡⲇⲓⲕⲁⲓⲟⲥ ⲇⲉ ⲛⲁⲣⲁⲕⲧϥ ⲉⲃⲟⲗ ⲙⲙⲟⲥ ⲛϥⲟⲩϫⲁⲓ ϣⲁⲉⲛⲉϩ
26 ⲛⲧϩⲉ ⲛⲟⲩⲉⲗⲉⲗϩⲙϫ ⲉϣⲁⲣⲃⲟⲟⲛⲉ ⲛⲛⲛⲁϫϩⲉ ⲁⲩⲱ ⲟⲩⲕⲁⲡⲛⲟⲥ ⲛⲛⲃⲁⲗ ⲧⲁⲓ ⲧⲉ ⲧϩⲉ ⲛⲧⲡⲁⲣⲁⲛⲟⲙⲓⲁ ⲛⲛⲉⲧⲉⲓⲣⲉ ⲙⲙⲟⲥ
27 ϣⲁⲣⲉⲧⲙⲛⲧⲙⲁⲓⲛⲟⲩⲧⲉ ⲟⲩⲱϩ ϩⲛⲟⲩⲛⲟϭ ⲛⲁϩⲉ ⲛⲣⲟⲙⲡⲉ ⲇⲉ ⲛⲛⲁⲥⲉⲃⲏⲥ ⲛⲁⲥⲃⲟⲕ
28 ϣⲁⲣⲉⲡⲟⲩⲛⲟϥ ⲱⲥⲕ ⲙⲛⲛⲇⲓⲕⲁⲓⲟⲥ ⲧϩⲉⲗⲡⲓⲥ ⲇⲉ ⲛⲛⲁⲥⲉⲃⲏⲥ ⲛⲁⲧⲁⲕⲟ
29 ⲡϫⲓⲥⲉ ⲙⲡⲉⲧⲟⲩⲁⲁⲃ ⲧⲉ ⲧⲉϩⲓⲏ ⲙⲡϫⲟⲉⲓⲥ ⲧⲉϩⲓⲏ ⲇⲉ ⲙⲡϫⲟⲉⲓⲥ ⲟⲩϩⲟⲧⲉ ⲧⲉ ⲛⲛⲉⲧⲣϩⲱⲃ ⲉⲧⲁⲛⲟⲙⲓⲁ ⲟⲩⲟⲩⲱϣϥ ⲇⲉ ⲧⲉ ⲛⲛⲉⲧⲣϩⲱⲃ ⲉⲡⲉⲧϩⲟⲟⲩ
30 ⲙⲉⲣⲉⲡⲇⲓⲕⲁⲓⲟⲥ ⲉⲓ ⲉⲡⲁϩⲟⲩ ϣⲁⲉⲛⲉϩ ⲛⲁⲥⲉⲃⲏⲥ ⲇⲉ ⲛⲁⲟⲩⲱϩ ⲁⲛ ϩⲓϫⲙⲡⲕⲁϩ
31 ⲧⲧⲁⲡⲣⲟ ⲛⲛⲇⲓⲕⲁⲓⲟⲥ ⲛⲁⲧⲁⲩⲟ ⲉⲃⲟⲗ ⲛⲧⲥⲟⲫⲓⲁ ⲡⲗⲁⲥ ⲇⲉ ⲛⲛⲣⲉϥϫⲓⲛϭⲟⲛⲥ ⲛⲁⲧⲁⲕⲟ
32 ⲛⲉⲥⲡⲟⲧⲟⲩ ⲛⲛⲣⲱⲙⲉ ⲛⲇⲓⲕⲁⲓⲟⲥ ⲥⲟⲟⲩⲛ ⲛϩⲉⲛⲭⲁⲣⲓⲥ ⲧⲧⲁⲡⲣⲟ ⲇⲉ ⲛⲛⲁⲥⲉⲃⲏⲥ ⲛⲁϣⲟⲣϣⲣ
Proverbs 9 · Proverbs 11 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)