Read Proverbs 8 side by side with translations · The Final Bible
1 ⲛⲧⲟⲕ ⲇⲉ ⲧⲁϣⲉⲟⲉⲓϣ ⲛⲧⲥⲟⲫⲓⲁ ϫⲉⲉⲣⲉⲧⲙⲛⲧⲣⲙⲛϩⲏⲧ ⲥⲱⲧⲙ ⲛⲁⲕ
2 ⲉⲥϩⲓϫⲛⲛⲕⲟⲟϩ ⲅⲁⲣ ⲉⲧϫⲟⲥⲉ ⲥⲁϩⲉ ⲇⲉ ⲉⲣⲁⲧⲥ ϩⲛⲧⲙⲏⲧⲉ ⲛⲛⲉϩⲓⲟⲟⲩⲉ
3 ⲥϭⲟⲣϭ ϩⲁⲧⲛⲙⲡⲩⲗⲏ ⲛⲛϫⲱⲱⲣⲉ ⲁⲩⲱ ⲥⲉⲥⲙⲟⲩ ⲉⲣⲟⲥ ϩⲛⲑⲙⲙⲁⲛⲃⲱⲕ ⲉϩⲟⲩⲛ
4 ϫⲉϯⲡⲁⲣⲁⲕⲁⲗⲉⲓ ⲙⲙⲱⲧⲛ ⲛⲣⲱⲙⲉ ⲁⲩⲱ ϯϫⲱ ⲛⲏⲧⲛ ⲛⲧⲁⲥⲃⲱ ⲛϣⲏⲣⲉ ⲛⲛⲣⲱⲙⲉ
5 ⲛⲃⲁⲗϩⲏⲧ ⲛⲟⲉⲓ ⲛⲟⲩⲙⲛⲧⲥⲁⲃⲉ ⲛⲁⲧϩⲏⲧ ϯ ⲙⲡⲉⲧⲛϩⲏⲧ
6 ⲥⲱⲧⲙ ⲉⲣⲟⲓ ϫⲉⲉⲓⲛⲁϫⲱ ⲅⲁⲣ ⲛϩⲉⲛⲥⲃⲱ ⲁⲩⲱ ⲉⲓⲛⲁⲟⲩⲱⲛ ⲛⲛⲉⲧⲥⲟⲩⲧⲱⲛ ⲉⲃⲟⲗ ϩⲛⲛⲁⲥⲡⲟⲧⲟⲩ
7 ⲉⲣⲉⲣⲱⲓ ⲅⲁⲣ ⲙⲉⲗⲉⲧⲁ ⲛⲟⲩⲡⲓⲥⲧⲓⲥ ⲛⲉⲥⲡⲟⲧⲟⲩ ⲇⲉ ⲛϭⲟⲗ ϫⲁϩⲙ ⲙⲡⲁⲙⲧⲟ ⲉⲃⲟⲗ
8 ⲉⲣⲉⲛϣⲁϫⲉ ⲧⲏⲣⲟⲩ ⲛⲣⲱⲓ ϩⲛⲟⲩⲇⲓⲕⲁⲓⲟⲥⲩⲛⲏ ⲙⲛⲗⲁⲁⲩ ⲛϩⲏⲧⲟⲩ ⲉϥϭⲟⲟⲙⲉ ⲟⲩⲇⲉ ⲉϥϫⲏⲩ ⲛⲕⲟⲧⲥ
9 ⲥⲉⲙⲡⲉⲙⲧⲟ ⲉⲃⲟⲗ ⲧⲏⲣⲟⲩ ⲛⲛⲉⲧⲛⲟⲉⲓ ⲥⲉⲥⲟⲩⲧⲱⲛ ⲇⲉ ⲛⲛⲉⲧⲟⲩⲱϣ ⲉϫⲓ ⲛⲟⲩⲁⲓⲥⲑⲏⲥⲓⲥ
10 ϯϩⲏⲩ ⲛⲟⲩⲥⲃⲱ ⲛⲟⲩϩⲁⲧ ⲁⲛ ⲁⲩⲱ ⲟⲩⲥⲟⲟⲩⲛ ⲉϩⲟⲩⲉⲟⲩⲛⲟⲩⲃ ⲉϥⲥⲟⲧⲡ ⲥⲉⲧⲡⲧⲙⲛⲧⲣⲙⲛϩⲏⲧ ⲉϩⲟⲩⲉⲡⲛⲟⲩⲃ ⲉⲧⲧⲁⲉⲓⲏⲩ
11 ⲧⲥⲟⲫⲓⲁ ⲅⲁⲣ ⲥⲟⲧⲡ ⲉϩⲟⲩⲉϩⲉⲛⲉⲛⲉ ⲙⲙⲉ ⲛⲉⲧⲧⲁⲉⲓⲏⲩ ⲇⲉ ⲧⲏⲣⲟⲩ ⲙⲡϣⲁ ⲙⲙⲟⲥ ⲁⲛ
12 ⲁⲛⲟⲕ ⲧⲥⲟⲫⲓⲁ ⲁⲓⲥⲱⲛⲧ ⲙⲡϣⲟϫⲛⲉ ⲁⲛⲟⲕ ⲁⲓⲕⲱ ⲛⲁⲓ ⲛⲧⲁⲓⲥⲑⲏⲥⲓⲥ ⲙⲛⲡⲙⲉⲉⲩⲉ
13 ⲧⲙⲛⲧⲙⲁⲓⲛⲟⲩⲧⲉ ⲙⲟⲥⲧⲉ ⲛⲧⲕⲁⲕⲓⲁ ⲁⲩⲱ ⲥⲙⲟⲥⲧⲉ ⲛⲟⲩⲥⲱϣ ⲙⲛⲟⲩⲙⲛⲧϫⲁⲥⲓϩⲏⲧ ⲙⲛϩⲉⲛϩⲓⲟⲟⲩⲉ ⲉⲩϩⲟⲟⲩ ⲙⲛⲟⲩⲧⲁⲡⲣⲟ ⲛϭⲟⲗ ⲡⲱⲓ ⲡⲉ ⲡϣⲟϫⲛⲉ ⲙⲛⲡⲱⲣϫ
14 ⲧⲱⲓ ⲧⲉ ⲧⲙⲛⲧⲣⲙⲛϩⲏⲧ ⲧⲱⲓ ⲧⲉ ⲧϭⲟⲙ
15 ⲉⲣⲉⲛⲉⲣⲣⲱⲟⲩ ⲟ ⲛⲣⲣⲟ ⲉⲃⲟⲗ ϩⲓⲧⲟⲟⲧⲁⲩⲱ ⲉⲣⲉⲛϫⲱⲱⲣⲉ ⲁⲙⲁϩⲧⲉ ⲡⲕⲁϩ ⲉⲃⲟⲗ ϩⲓⲧⲟⲟⲧ
16 ⲉⲣⲉⲛⲛⲟϭ ⲁⲓⲁⲓ ⲉⲃⲟⲗ ϩⲓⲧⲟⲟⲧⲁⲩⲱ ⲉⲣⲉⲛⲧⲩⲣⲁⲛⲛⲟⲥ ⲁⲙⲁϩⲧⲉ ⲙⲡⲕⲁϩ ⲉⲃⲟⲗ ϩⲓⲧⲟⲟⲧ
17 ⲁⲛⲟⲕ ⲉⲓⲙⲉ ⲛⲛⲉⲧⲙⲉ ⲙⲙⲟⲓ ⲛⲉⲧϣⲓⲛⲉ ⲇⲉ ⲛⲥⲱⲓ ⲥⲉⲛⲁϭⲛⲧ
18 ⲟⲩⲛⲧⲁⲓⲧⲙⲛⲧⲣⲙⲙⲁⲟ ⲅⲁⲣ ⲙⲛⲡⲉⲟⲩ ⲁⲩⲱ ⲟⲩϫⲡⲉϩⲁϩ ⲙⲛⲟⲩⲇⲓⲕⲁⲓⲟⲥⲩⲛⲏ
19 ⲛⲁⲛⲟⲩϫⲡⲟⲓ ⲛⲏⲧⲛⲉϩⲟⲩⲉⲡⲛⲟⲩⲃ ⲙⲛⲡⲉⲛⲉ ⲙⲙⲉ ⲁⲩⲱ ⲛⲁⲛⲟⲩⲛⲁⲅⲉⲛⲏⲙⲁ ⲉϩⲟⲩⲉⲡϩⲁⲧ ⲉⲧⲥⲟⲧⲡ
20 ⲉⲓⲙⲟⲟϣⲉ ϩⲛϩⲉⲛϩⲓⲟⲟⲩⲉ ⲙⲙⲛⲧⲙⲉ ⲁⲩⲱ ⲉⲓⲃⲏⲕ ϩⲛⲛⲉϩⲓⲟⲟⲩⲉ ⲛⲧⲙⲉ
21 ϫⲉⲕⲁⲥ ⲉⲓⲉⲡⲱϣ ⲉϫⲛⲛⲉⲧⲙⲉ ⲙⲙⲟⲓ ⲛⲟⲩⲙⲛⲧⲣⲙⲙⲁⲟ ⲁⲩⲱ ⲛⲧⲁⲙⲉϩⲛⲉⲩⲁϩⲱⲱⲣ ⲛⲁⲅⲁⲑⲟⲛ ⲉⲓϣⲁⲛϫⲱ ⲛⲏⲧⲛ ⲛⲛⲉⲧϣⲟⲟⲡ ⲙⲙⲏⲛⲉ ϯⲛⲁⲣⲡⲙⲉⲉⲩⲉ ⲉⲉⲡ ϫⲓⲛⲉⲛⲉϩ
22 ⲁⲡⲛⲟⲩⲧⲉ ⲥⲟⲛⲧ ϩⲛⲧⲁⲣⲭⲏ ⲛⲛⲉϥϩⲓⲟⲟⲩⲉ ⲉⲛⲉϥϩⲃⲏⲩⲉ ⲉⲙⲡⲁⲧϥⲧⲁⲙⲓⲉⲗⲁⲁⲩ
23 ⲁⲩⲱ ⲁϥⲥⲙⲛⲥⲛⲧⲉ ⲙⲙⲟⲓ ϩⲁⲧϩⲏ ⲛⲛⲉⲛⲉϩ ϩⲛⲧⲁⲣⲭⲏ
24 ⲉⲙⲡⲁⲧϥⲧⲁⲙⲓⲉⲡⲕⲁϩ ⲁϥϫⲡⲟⲓ ⲇⲉ ϩⲁⲧϩⲏ ⲙⲡⲛⲟⲩⲛ
25 ⲉⲙⲡⲁⲧⲉⲙⲡⲏⲅⲏ ⲙⲙⲟⲟⲩ ⲉⲓ ⲉⲃⲟⲗ ⲉⲙⲡⲁⲧϥⲧⲁϫⲣⲉⲛⲧⲟⲟⲩ ⲁⲩⲱ ⲛϥⲡⲗⲁⲥⲥⲉ ⲙⲡⲕⲁϩ ⲙⲛⲧⲟⲓⲕⲟⲩⲙⲉⲛⲏ ⲁϥϫⲡⲟⲓ ⲇⲉ ϩⲁⲧϩⲏ ⲛⲥⲓⲃⲧ ⲛⲓⲙ
26 ⲁⲡⲛⲟⲩⲧⲉ ⲧⲁⲙⲓⲉⲧⲡⲉ ⲙⲛⲡⲕⲁϩ ⲁⲩⲱ ⲁⲣⲏϫϥ ⲙⲡⲕⲁϩ ⲉⲧϭⲟⲣϭ ϩⲁⲧⲡⲉ
27 ⲉϥⲛⲁⲥⲃⲧⲉⲧⲡⲉ ⲛⲉⲓⲛⲙⲙⲁϥ ⲡⲉ ⲁⲩⲱ ⲉϥⲛⲁⲡⲣϣⲡⲉϥⲑⲣⲟⲛⲟⲥ ⲉⲃⲟⲗ ϩⲓϫⲛⲛⲧⲏⲩ
28 ⲁⲩⲱ ⲉϥⲛⲁⲱⲣϫ ⲛⲙⲡⲏⲅⲏ ⲉⲧϩⲁⲧⲡⲉ ⲉϥⲛⲁⲧⲁϫⲣⲉⲛⲉⲕⲗⲟⲟⲗⲉ ⲉⲧϩⲣⲁⲓ
29 ⲁⲩⲱ ⲉϥⲛⲁⲣϫⲛⲥⲛⲧⲉ ⲙⲡⲕⲁϩ
30 ⲛⲉⲓⲛⲙⲙⲁϥ ⲡⲉ ⲉⲓⲥⲟⲃⲧⲉ ⲛⲁϥ ⲁⲛⲟⲕ ⲡⲉ ⲛⲉϥⲣⲁϣⲉ ⲛⲙⲙⲁⲓ ⲛⲉⲓⲉⲩⲫⲣⲁⲛⲉ ⲇⲉ ⲙⲙⲏⲛⲉ ⲙⲡⲉϥⲙⲧⲟ ⲉⲃⲟⲗ ⲛⲟⲩⲟⲉⲓϣ ⲛⲓⲙ
31 ⲁⲩⲱ ⲉϥⲛⲁⲉⲩⲫⲣⲁⲛⲉ ⲛⲧⲉⲣⲉϥϫⲱⲕ ⲉⲃⲟⲗ ⲛⲧⲟⲓⲕⲟⲩⲙⲉⲛⲏ ⲁⲩⲱ ⲉϥⲛⲁⲉⲩⲫⲣⲁⲛⲉ ⲉϫⲛⲛϣⲏⲣⲉ ⲛⲛⲣⲱⲙⲉ ϣⲁⲣⲉⲛⲉϥⲁϩⲱⲣ ⲇⲉ ⲧⲣⲉⲛⲣⲱⲙⲉ ⲣⲁϣⲉ
32 ⲧⲉⲛⲟⲩ ϭⲉ ⲛⲁϣⲏⲣⲉ ⲥⲱⲧⲙ ⲉⲣⲟⲓ
33 ϯϩⲧⲏⲧⲛ ⲉⲡϣⲁϫⲉ ⲛⲧⲁⲥⲃⲱ ϫⲉⲉⲧⲉⲧⲛⲣⲟⲩⲛⲟϭ ⲛⲁϩⲉ ⲁⲩⲱ ⲛⲧⲉⲧⲛⲣⲥⲟⲫⲟⲥ ⲙⲡⲣⲣⲡⲃⲟⲗ ⲛⲛⲁϫⲡⲓⲟ
34 ⲛⲁⲓⲁⲧϥ ⲙⲡⲣⲱⲙⲉ ⲉⲧⲛⲁⲥⲱⲧⲙ ⲉⲣⲟⲓ ⲁⲩⲱ ⲡⲣⲱⲙⲉ ⲉⲧⲛⲁϩⲁⲣⲉϩ ⲉⲛⲁϩⲓⲟⲟⲩⲉ ⲉⲧⲟ ⲛⲟⲩϣⲏ ⲛⲣⲟⲉⲓⲥ ϩⲓⲣⲛ ⲛⲁⲣⲟ ⲙⲙⲏⲛⲉ ⲉϥϩⲁⲣⲉϩ ⲉⲛⲟⲩⲉϭⲣⲟ ⲛⲛⲁⲙⲁ ⲛⲉⲓⲉϩⲟⲩⲛ
35 ⲛⲁϩⲓⲟⲟⲩⲉ ⲅⲁⲣ ϩⲉⲛϩⲓⲟⲟⲩⲉ ⲛⲱⲛϩ ⲛⲉ ⲁⲩⲱ ⲉⲣⲉⲡⲟⲩⲱϣ ⲥⲟⲃⲧⲉ ⲉⲃⲟⲗ ϩⲓⲧⲙⲡϫⲟⲉⲓⲥ ⲉⲣⲉⲡⲟⲩⲣⲟⲧ ⲇⲉ ⲛⲏⲩ ⲉⲃⲟⲗ ϩⲓⲧⲙⲡⲛⲟⲩⲧⲉ ⲙⲛϩⲱⲃ ⲛⲓⲙ ⲉⲧⲥⲟⲧⲡ
36 ⲛⲉⲧⲣⲛⲟⲃⲉ ⲇⲉ ⲉⲣⲟⲓ ⲥⲉⲛⲁⲃⲗⲁⲡⲧⲉⲓ ⲛⲛⲉⲩⲯⲩⲭⲏ ⲁⲩⲱ ⲛⲉⲧⲙⲟⲥⲧⲉ ⲙⲙⲟⲓ ⲉⲩⲟ ⲛϣⲃⲏⲣ ⲉⲡⲙⲟⲩ
Proverbs 7 · Proverbs 9 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)