Read Proverbs 7 side by side with translations · The Final Bible
1 ⲡⲁϣⲏⲣⲉ ϩⲁⲣⲉϩ ⲉⲛⲁϣⲁϫⲉ ⲁⲩⲱ ϩⲉⲡⲛⲁⲉⲛⲧⲟⲗⲏ ϩⲁⲧⲏⲕ ⲙⲁⲧⲁⲓⲉⲡⲛⲟⲩⲧⲉ ⲧⲁⲣⲉⲕϭⲙϭⲟⲙ ⲁⲩⲱ ⲙⲡⲣⲣϩⲟⲧⲉ ϩⲏⲧϥ ⲛⲕⲉⲟⲩⲁ ⲛⲃⲗⲗⲁϥ
2 ϩⲁⲣⲉϩ ⲇⲉ ⲉⲛⲁⲉⲛⲧⲟⲗⲏ ⲛⲧⲁⲣⲉⲕⲱⲛϩ ϯ ⲛⲛⲁϣⲁϫⲉ ⲉⲛⲉⲕⲧⲏⲏⲃⲉ ⲛⲧϩⲉ ⲛϩⲉⲛⲕⲉⲕⲉ ⲛⲃⲁⲗ
3 ⲥϩⲁⲓⲥⲟⲩ ⲇⲉ ⲉϫⲙⲡⲡⲱϫϭ ⲙⲡⲉⲕϩⲏⲧ
4 ⲁϫⲓⲥ ⲛⲧⲥⲟⲫⲓⲁ ϫⲉⲧⲉⲕⲥⲱⲛⲉ ⲧⲉ ⲁⲩⲱ ϫⲉⲧⲉⲕⲣⲱⲙⲉ ⲧⲉ ⲧⲙⲛⲧⲣⲙⲛϩⲏⲧ ϫⲡⲟⲥ ⲇⲉ ⲛⲁⲕ
5 ⲉⲥⲉϩⲁⲣⲉϩ ⲉⲣⲟⲕ ⲉⲩⲥϩⲓⲙⲉ ⲉⲛⲧⲱⲕ ⲁⲛ ⲁⲩⲱ ⲉⲥϩⲟⲟⲩ ⲉⲥϣⲁⲛϣⲁϫⲉ ϩⲛϩⲉⲛϣⲁϫⲉ ⲛϩⲙⲟⲧ
6 ⲉⲥϭⲱϣⲧ ⲅⲁⲣ ⲉⲃⲟⲗ ϩⲙⲡϣⲟⲩϣⲧ ⲙⲡⲉⲥⲏⲓ ⲉⲛϩⲓⲣ
7 ⲡϩⲣϣⲓⲣⲉ ⲉⲧⲥⲛⲁⲛⲁⲩ ⲉⲣⲟϥ ⲛⲁⲧϩⲏⲧ ⲉϥϣⲁⲁⲧ ⲛⲥⲃⲱ
8 ⲉϥⲙⲟⲟϣⲉ ϩⲁⲧⲛⲛⲕⲗϫⲉ ⲛⲛϩⲓⲣ ⲙⲡⲉⲥⲏⲓ
9 ⲉϥϣⲁϫⲉ ϩⲙⲡⲕⲁⲕⲉ ⲙⲡⲛⲁⲩ ⲛⲣⲟⲩϩⲉ ⲉⲣⲉⲡⲙⲁ ϩⲟⲣⲕ ⲉⲣⲟⲩϩⲉ ϩⲉⲛⲟⲩⲕⲁⲕⲉ
10 ϣⲁⲣⲉⲧⲉⲥϩⲓⲙⲉ ⲧⲱⲙⲛⲧ ⲉⲣⲟϥ ϩⲛⲟⲩⲥⲙⲟⲧ ⲙⲡⲟⲣⲛⲏ ⲧⲁⲓ ⲉϣⲁⲥⲧⲣⲉⲡϩⲏⲧ ⲛⲛϣⲏⲣⲉ ϣⲏⲙ ϫⲓϥⲟϭⲥ
11 ⲥⲁⲥⲱⲟⲩ ⲇⲉ ⲁⲩⲱ ⲟⲩϣⲛⲁ ⲧⲉ ⲙⲉⲣⲉⲛⲉⲥⲟⲩⲉⲣⲏⲧⲉ ⲇⲉ ϭⲱ ϩⲙⲡⲉⲥⲏⲓ
12 ϣⲁⲥⲟⲩⲟⲉⲓϣ ⲅⲁⲣ ⲉⲥⲕⲱⲧⲉ ϩⲓⲃⲟⲗ ⲟⲩⲟⲉⲓϣ ⲇⲉ ⲉⲥϭⲟⲣϭ ϩⲁⲧⲛⲛⲕⲗϫⲉ ⲛⲓⲙ ϩⲛⲛⲉⲡⲗⲁϯⲁ
13 ⲙⲛⲛⲥⲱⲥ ϣⲁⲥⲁⲙⲁϩⲧⲉ ⲙⲙⲟϥ ⲛⲥϯⲡⲓ ⲉⲣⲱϥ ϩⲛⲟⲩϩⲟ ⲇⲉ ⲛⲁⲧϣⲓⲡⲉ ϣⲁⲥϫⲟⲟⲥ ⲛⲁϥ
14 ϫⲉⲟⲩⲑⲩⲥⲓⲁ ⲛⲉⲓⲣⲏⲛⲓⲕⲏ ⲛⲁⲓ ⲡⲉ ⲡϩⲟⲟⲩ ϯⲛⲁϯ ⲛⲛⲁⲉⲣⲁⲧⲉ
15 ⲉⲧⲃⲉⲡⲁⲓ ⲁⲓⲉⲓ ⲉⲃⲟⲗ ⲉⲧⲱⲙⲛⲧ ⲉⲣⲟⲕ ⲉⲓⲟⲩⲉϣⲡⲉⲕϩⲟ ⲁⲓϩⲉ ⲉⲣⲟϥ
16 ⲁⲓⲥⲱⲙⲛⲧ ⲙⲡⲁϭⲗⲟϭ ϩⲛϩⲉⲛⲕⲉⲣⲉⲁ ⲁⲓⲡⲟⲣϣϥ ⲇⲉ ⲛⲁⲙⲫⲓⲧⲁⲡⲟⲥ ⲛⲧⲉⲕⲏⲙⲉ
17 ⲁⲓⲛⲟⲩϫϭ ⲙⲡⲁϭⲗⲟϭ ϩⲛⲟⲩⲕⲣⲟⲕⲟⲥ ⲁⲩⲱ ⲡⲁⲏⲓ ϩⲛⲟⲩⲕⲓⲛⲁⲙⲱⲙⲟⲛ
18 ⲁⲙⲟⲩ ⲛⲧⲛⲙⲧⲟⲛ ⲙⲙⲟⲛ ϩⲛⲟⲩⲙⲛⲧϣⲃⲏⲣ ϣⲁϩⲧⲟⲟⲩⲉ ⲁⲙⲟⲩ ⲛⲧⲛϩⲱⲗϭ ϩⲛⲟⲩⲙⲉ
19 ⲙⲡⲁϩⲁⲓ ⲅⲁⲣ ϩⲙⲡⲁⲏⲓ ⲁⲛ ⲁϥⲃⲱⲕ ⲉⲩϩⲓⲏ ⲉⲥⲟⲩⲏⲩ
20 ⲉⲣⲉⲟⲩⲧⲱⲱⲙⲉ ϩⲛⲛⲉϥϭⲓϫ ϩⲓⲧⲛⲟⲩⲙⲏⲏϣⲉ ⲛϩⲟⲟⲩ ⲉϥⲛⲁⲕⲟⲧϥ ⲉⲡⲉϥⲏⲓ
21 ⲁⲥⲡⲗⲁⲛⲁ ⲇⲉ ⲙⲙⲟϥ ϩⲛⲟⲩⲛⲟϭ ⲛϩⲟⲙⲓⲗⲓⲁ ⲛϣⲁϫⲉ ⲁⲥⲙⲟⲣϥ ⲇⲉ ⲛϩⲉⲛⲛϩⲁϭⲉ ⲛⲉ ⲉⲃⲟⲗ ϩⲛⲛⲉⲥⲥⲡⲟⲧⲟⲩ ⲁⲥⲑⲓⲟϥ ⲉⲃⲟⲗ
22 ⲛⲧⲟϥ ⲇⲉ ⲁϥⲟⲩⲁϩϥ ⲛⲥⲱⲥ ⲉϥϣⲧⲣⲧⲱⲣ ⲛⲧϩⲉ ⲛⲟⲩⲙⲁⲥⲉ ⲉⲩⲛⲁⲛⲧϥ ⲉⲡⲉϥⲙⲁⲛⲕⲟⲛⲥϥ ⲁⲩⲱ ⲛⲧϩⲉ ⲛⲟⲩⲟⲩϩⲟⲣ ⲉϥϭⲉⲡⲏ ⲉⲧⲁⲁϥ ⲉⲡⲉⲕⲗⲁⲗ
23 ⲏ ⲛⲧϩⲉ ⲛⲟⲩⲉⲓⲟⲩⲗ ⲉⲁⲩϣⲟⲟϭⲉϥ ⲛⲟⲩⲥⲟⲧⲉ ⲉⲡⲉϥϩⲏⲡⲁⲣ ϥϭⲉⲡⲏ ⲇⲉ ⲛⲧϩⲉ ⲛⲟⲩϩⲁⲗⲏⲧ ⲉⲩⲡⲁϣ ⲛϥⲥⲟⲟⲩⲛ ⲁⲛ ϫⲉⲡⲙⲁ ⲙⲡⲉϥⲧⲏⲩ ⲡⲉ
24 ⲧⲉⲛⲟⲩ ϭⲉ ⲡⲁϣⲏⲣⲉ ⲥⲱⲧⲙ ⲉⲣⲟⲓ ⲛⲅϯϩⲧⲏⲕ ⲉⲛϣⲁϫⲉ ⲛⲣⲱⲓ
25 ⲙⲡⲣⲧⲣⲉⲡⲉⲕϩⲏⲧ ⲣⲓⲕⲉ ⲉⲛⲉⲥϩⲓⲟⲟⲩⲉ
26 ⲁⲥⲕⲛⲥⲟⲩⲙⲏⲏϣⲉ ⲅⲁⲣ ⲁⲥⲧⲁⲩⲟⲟⲩ ⲉϩⲣⲁⲓ ⲁⲩⲱ ϩⲉⲛⲁⲧⲏⲡⲉ ⲛⲉ ⲛⲧⲁⲥϩⲟⲧⲃⲟⲩ
27 ⲉⲣⲉⲛⲉⲥϩⲓⲟⲟⲩⲉ ⲃⲏⲕ ⲉⲛⲏⲓ ⲛⲁⲙⲛⲧⲉ ⲉⲩⲃⲏⲕ ⲇⲉ ⲉⲡⲉⲥⲏⲧ ⲉⲛⲧⲁⲙⲉⲓⲟⲛ ⲙⲡⲙⲟⲩ
Proverbs 6 · Proverbs 8 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)