Proverbs 20 — Coptic (Sahidic)

1 ⲟⲩⲁⲧⲁⲙⲁϩⲧⲉ ⲡⲉ ⲡⲏⲣⲡ ⲁⲩⲱ ⲟⲩⲥⲱϣ ⲡⲉ ⲡϯϩⲉ ⲟⲩⲟⲛ ⲇⲉ ⲛⲓⲙ ⲉⲧⲧⲱⲗⲙ ϩⲛⲛⲁⲓ ⲛϥⲛⲁϣⲱⲡⲉ ⲁⲛ ⲛⲥⲁⲃⲉ

2 ⲡⲉⲛⲟⲩϭⲥ ⲛⲟⲩⲣⲣⲟ ϣⲟⲃⲉ ⲁⲛ ⲉⲡϭⲱⲛⲧ ⲛⲟⲩⲙⲟⲩⲓ ⲡⲉⲧⲧⲱⲃⲥ ⲇⲉ ⲙⲙⲟϥ ⲁⲩⲱ ⲉⲧⲧⲧⲏϩ ⲛⲙⲙⲁϥ ⲉϥⲣⲛⲟⲃⲉ ⲉⲧⲉϥⲯⲩⲭⲏ ⲙⲙⲓⲛⲙⲙⲟϥ

3 ⲡⲉⲟⲟⲩ ⲙⲡⲣⲱⲙⲉ ⲡⲉ ⲥⲁϩⲱϥ ⲉⲃⲟⲗ ⲛϩⲉⲛⲥⲁϩⲟⲩ ⲁⲧϩⲏⲧ ⲇⲉ ⲛⲓⲙ ϣⲁⲩⲙⲟⲩϫⲧ ϩⲛⲛⲁⲓ

4 ⲙⲉⲣⲉⲛⲣⲉϥϫⲛⲁⲁⲩ ϣⲓⲡⲉ ⲉⲩⲛⲟϭⲛⲉϭ ⲙⲙⲟϥ ⲧⲁⲓ ⲟⲛ ⲧⲉ ⲧϩⲉ ⲙⲡⲉⲧϫⲓⲥⲟⲩⲟ ⲉⲙⲏⲥⲉ ϩⲙⲡⲱϩⲥ

5 ⲟⲩⲙⲟⲟⲩ ⲉϥϣⲏⲕ ⲡⲉ ⲡϣⲟϫⲛⲉ ϩⲙⲡϩⲏⲧ ⲙⲡⲣⲱⲙⲉ ⲡⲣⲱⲙⲉ ⲇⲉ ⲛⲥⲟⲫⲟⲥ ⲛⲁⲛⲧϥ ⲉϩⲣⲁⲓ

6 ⲟⲩⲛⲟϭ ⲡⲉ ⲟⲩⲣⲱⲙⲉ ⲁⲩⲱ ⲡⲣⲱⲙⲉ ⲧⲉⲛⲛⲁⲏⲧ ⲧⲁⲓⲏⲩ ⲟⲩϩⲱⲃ ⲇⲉ ⲡⲉ ⲉϩⲉ ⲉⲩⲣⲱⲙⲉ ⲙⲡⲓⲥⲧⲟⲥ

7 ⲡⲉⲧⲙⲟⲟϣⲉ ⲉϥⲟⲩⲁⲁⲃ ϩⲛⲟⲩⲇⲓⲕⲁⲓⲟⲥⲩⲛⲏ ϥⲛⲁⲕⲱ ⲛⲛⲉϥϣⲏⲣⲉ ⲙⲙⲁⲕⲁⲣⲓⲟⲥ

8 ⲉⲣϣⲁⲛⲟⲩⲣⲣⲟ ⲛⲇⲓⲕⲁⲓⲟⲥ ϩⲙⲟⲟⲥ ϩⲓⲟⲩⲑⲣⲟⲛⲟⲥ ⲙⲉⲣⲉⲗⲁⲁⲩ ⲙⲡⲉⲧϩⲟⲟⲩ ϯ ⲟⲩⲃⲏϥ

9 ⲛⲓⲙ ⲡⲉⲧⲛⲁϣⲟⲩϣⲟⲩ ⲙⲙⲟϥ ⲉⲣⲉⲡⲉϥϩⲏⲧ ⲟⲩⲁⲁⲃ ⲏ ⲛⲓⲙ ⲡⲉⲧⲛⲁⲡⲁⲣⲣⲏⲥⲓⲁⲍⲉ ⲙⲙⲟϥ ⲉϥϫⲱ ⲙⲙⲟⲥ ϫⲉϯⲟⲩⲁⲁⲃ ⲉⲛⲟⲃⲉ ⲡⲟⲩⲟⲉⲓⲛ ⲛⲁⲱϫⲛ ⲙⲡⲉⲧϫⲉⲡⲉⲧϩⲟⲟⲩ ⲛⲥⲁⲡⲉϥⲉⲓⲱⲧ ⲙⲛⲧⲉϥⲙⲁⲁⲩ ⲛⲕⲉⲕⲉ ⲇⲉ ⲛⲛⲉϥⲃⲁⲗ ⲛⲁⲛⲁⲩ ⲉⲩⲕⲁⲕⲉ ⲟⲩⲙⲉⲣⲓⲥ ⲉⲩϭⲉⲡⲏ ⲉϫⲡⲟⲥ ⲛϣⲟⲣⲡ ⲥⲛⲁⲥⲟⲟⲩⲧⲛ ⲁⲛ ϩⲛⲧⲉⲥϩⲁⲏ ⲙⲡⲣϫⲟⲟⲥ ϫⲉϯⲛⲁⲧⲱⲱⲃⲉ ⲙⲡⲁϫⲁϫⲉ ⲁⲗⲗⲁ ϩⲩⲡⲟⲙⲓⲛⲉ ⲉⲡⲛⲟⲩⲧⲉ ϫⲉⲉϥⲉⲃⲟⲏⲑⲉⲓ ⲉⲣⲟⲕ

10 ⲟⲩⲛⲟϭ ⲛϣⲓ ⲙⲛⲟⲩⲕⲟⲩⲓ ⲁⲩⲱ ⲟⲉⲓⲡⲉ ⲥⲛⲧⲉ ϩⲉⲛⲁⲕⲁⲑⲁⲣⲧⲟⲛ ⲛⲉ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ϩⲓⲟⲩⲥⲟⲡ

11 ⲁⲩⲱ ⲡⲉⲧⲉⲓⲣⲉ ⲛⲛⲁⲓ ⲥⲉⲛⲁⲥⲟⲛϩϥ ϩⲛⲛⲉϥⲙⲉⲉⲩⲉ ⲟⲩϩⲣϣⲓⲣⲉ ⲉϥⲙⲟⲟϣⲉ ⲙⲛⲡⲉⲧⲟⲩⲁⲁⲃ ϣⲁⲣⲉⲧⲉϥϩⲓⲏ ⲥⲟⲟⲩⲧⲛ

12 ⲡⲙⲁⲁϫⲉ ⲡⲉⲧⲥⲱⲧⲙ ⲁⲩⲱ ⲡⲃⲁⲗ ⲡⲉⲧⲛⲁⲩ ⲉⲃⲟⲗ ⲛⲉϩⲃⲏⲩⲉ ⲇⲉ ⲙⲡⲛⲟⲩⲧⲉ ⲛⲉ ⲙⲡⲉⲥⲛⲁⲩ

13 ⲙⲡⲣⲙⲉⲣⲉ ϫⲉⲡⲉⲧϩⲟⲟⲩ ⲙⲏⲡⲟⲧⲉ ⲛⲅⲧⲁⲕⲟ ⲟⲩⲱⲛ ⲇⲉ ⲛⲛⲉⲕⲃⲁⲗ ⲛⲅϭⲱϣⲧ ⲉⲛⲉⲧⲥⲟⲩⲧⲱⲛ

23 ⲧⲃⲟⲧⲉ ⲙⲡϫⲟⲉⲓⲥ ⲡⲉ ϣⲓ ⲥⲛⲁⲩ ⲁⲩⲱ ⲛⲁⲛⲟⲩⲟⲩⲙⲁϣⲉ ⲁⲛ ⲛⲕⲣⲟϥ ⲙⲡⲉϥⲙⲧⲟ ⲉⲃⲟⲗ

24 ⲉⲣⲉⲛⲉϩⲓⲟⲟⲩⲉ ⲙⲡⲣⲱⲙⲉ ⲥⲟⲩⲧⲱⲛ ϩⲓⲧⲙⲡⲛⲟⲩⲧⲉ ⲉⲣⲉⲡⲣⲱⲙⲉ ⲇⲉ ⲛⲁⲛⲟⲉⲓ ⲛⲛⲉϥϩⲓⲟⲟⲩⲉ ⲛⲁϣ ⲛϩⲉ

25 ⲟⲩϭⲟⲣϭⲥ ⲙⲡⲣⲱⲙⲉ ⲡⲉ ⲉⲣⲏⲧ ⲉⲃⲟⲗ ϩⲛⲛⲉϥⲛⲕⲁ ϩⲛⲟⲩϭⲉⲡⲏ ⲙⲛⲛⲥⲁⲧⲣⲉϥⲉⲣⲏⲧ ⲅⲁⲣ ϣⲁⲥϣⲱⲡⲉ ⲛϥⲣϩⲧⲏϥ

26 ⲡⲣⲉϥϩⲓ ⲛⲛⲁⲥⲉⲃⲏⲥ ⲡⲉ ⲟⲩⲣⲣⲟ ⲛⲥⲟⲫⲟⲥ ⲁⲩⲱ ϣⲁϥⲉⲓⲛⲉ ⲉϫⲱⲟⲩ ⲛⲟⲩⲕⲟⲧ ⲙⲡⲉⲧϩⲟⲟⲩ ⲙⲙⲛⲧⲛⲁ ⲙⲛⲧⲡⲓⲥⲧⲓⲥ ⲡⲉ ⲡϩⲁⲣⲉϩ ⲛⲟⲩⲣⲣⲟ ⲁⲩⲱ ϩⲉⲛⲇⲓⲕⲁⲓⲟⲥ ⲛⲉⲧⲛⲁⲕⲱⲧⲉ ⲉⲡⲉϥⲑⲣⲟⲛⲟⲥ

27 ⲡⲟⲩⲟⲉⲓⲛ ⲙⲡϫⲟⲉⲓⲥ ⲡⲉ ⲧⲉⲡⲛⲟⲏ ⲛⲛⲣⲱⲙⲉ ⲡⲉⲧⲙⲟⲩϣⲧ ⲛⲛⲧⲁⲙⲉⲓⲟⲛ ⲛⲧϩⲏ

28 ⲧⲙⲛⲧⲛⲁ ⲙⲛⲧⲙⲉ ⲡⲉ ⲡϩⲁⲣⲉϩ ⲛⲟⲩⲣⲣⲟ ⲁⲩⲱ ⲧⲇⲓⲕⲁⲓⲟⲥⲩⲛⲏ ⲛⲁⲕⲟⲧⲥ ⲉⲡⲉϥⲑⲣⲟⲛⲟⲥ

29 ⲡⲕⲟⲥⲙⲟⲥ ⲛⲛϣⲏⲣⲉ ϣⲏⲙ ⲡⲉ ⲧⲥⲟⲫⲓⲁ ⲡⲉⲟⲟⲩ ⲇⲉ ⲛⲛϩⲗⲗⲟ ⲡⲉ ⲡⲥⲟⲟⲩⲛ

30 ϩⲉⲛⲉⲗⲉⲗⲕⲏⲙⲉ ⲙⲛϩⲛⲟⲩⲱϣϥ ⲛⲉⲧⲛⲁⲧⲱⲙⲛⲧ ⲉⲛⲉⲑⲟⲟⲩ ϩⲉⲛⲡⲗⲏⲅⲏ ⲇⲉ ⲛⲉ ⲛⲧⲁⲙⲉⲓⲟⲛ ⲛϩⲏⲧⲟⲩ