Read Proverbs 19 side by side with translations · The Final Bible
3 ϣⲁⲣⲉⲧⲙⲛⲧⲁⲧϩⲏⲧ ⲙⲡⲣⲱⲙⲉ ⲧⲁⲕⲉⲛⲉϥϩⲓⲟⲟⲩⲉ ϣⲁϥϭⲛⲁⲣⲓⲕⲉ ⲇⲉ ⲉⲡⲛⲟⲩⲧⲉ ϩⲙⲡⲉϥϩⲏⲧ
4 ϣⲁⲣⲉⲧⲙⲛⲧⲣⲙⲙⲁⲟ ϫⲡⲉϩⲁϩ ⲛϣⲃⲏⲣ ϣⲁⲣⲉⲡϩⲏⲕⲉ ⲇⲉ ⲡⲱⲣϫ ⲉⲃⲟⲗ ⲙⲡⲉϥⲕⲉⲟⲩⲁ
5 ⲙⲛⲙⲛⲧⲣⲉ ⲛϭⲟⲗ ⲛⲁⲣⲃⲟⲗ ⲉⲡⲉⲧϩⲟⲟⲩ ⲁⲩⲱ ⲡⲉⲧⲉⲛⲕⲁⲗⲉⲓ ϩⲛⲟⲩϫⲓⲛϭⲟⲛⲥ ⲛⲛⲉϥⲛⲟⲩϩⲙ
6 ϩⲁϩ ⲛⲉⲧϣⲙϣⲉ ⲙⲡⲉⲙⲧⲟ ⲉⲃⲟⲗ ⲛⲛⲉⲣⲣⲱⲟⲩ ⲛⲉⲧϩⲟⲟⲩ ⲇⲉ ⲧⲏⲣⲟⲩ ⲛⲁϣⲱⲡⲉ ⲉⲩⲛⲟϭⲛⲉϭ ⲙⲡⲣⲱⲙⲉ
7 ϣⲁⲣⲉⲡⲙⲉⲉⲩⲉ ⲉⲧⲛⲁⲛⲟⲩϥ ϩⲱⲛ ⲉϩⲟⲩⲛ ⲉⲛⲉⲧⲥⲟⲟⲩⲛ ⲙⲙⲟϥ ⲡⲣⲱⲙⲉ ⲇⲉ ⲛⲥⲁⲃⲉ ⲛⲁϩⲉ ⲉⲣⲟϥ ⲟⲩⲟⲛ ⲛⲓⲙ ⲉⲧⲛⲁⲙⲉⲥⲧⲉⲟⲩⲥⲟⲛ ⲛϩⲏⲕⲉ ⲉϥⲛⲁⲟⲩⲉ ⲟⲛ ⲛⲟⲩⲙⲛⲧϣⲃⲏⲣ ⲡⲉⲧⲣϩⲁϩ ⲙⲡⲉⲧϩⲟⲟⲩ ⲛⲁϫⲱⲕ ⲉⲃⲟⲗ ⲛⲟⲩⲕⲁⲕⲓⲁ ⲡⲉⲧⲧⲱⲕⲥ ⲇⲉ ⲛⲛϣⲁϫⲉ ⲛⲁⲟⲩϫⲁⲓ ⲁⲛ
8 ⲡⲉⲧϫⲡⲟ ⲛⲁϥ ⲛⲧⲙⲛⲧⲣⲙⲛϩⲏⲧ ⲉϥⲙⲉ ⲙⲙⲟϥ ⲟⲩⲁⲁϥ ⲡⲉⲧϩⲁⲣⲉϩ ⲇⲉ ⲉⲧⲙⲛⲧⲥⲁⲃⲉ ⲛⲁϩⲉ ⲉⲡⲡⲉⲧⲛⲁⲛⲟⲩϥ
9 ⲙⲙⲛⲟⲩⲙⲛⲧⲣⲉ ⲛϫⲓⲛϭⲟⲛⲥ ⲛⲁⲣⲃⲟⲗ ⲉⲡⲉⲧϩⲟⲟⲩ ⲡⲉⲧⲧⲙϩⲟ ⲇⲉ ⲛⲟⲩⲕⲁⲕⲓⲁ ϥⲛⲁⲧⲁⲕⲟ ⲛϩⲏⲧⲥ
10 ⲙⲙⲛⲧⲣⲩⲫⲏ ⲣⲛⲟϥⲣⲉ ⲙⲡⲁⲧϩⲏⲧ ⲁⲩⲱ ⲉⲣϣⲁⲛⲟⲩϩⲙϩⲁⲗ ⲁⲣⲭⲉⲓ ϩⲛⲟⲩϩⲱⲃ ϥⲛⲁϫⲓ ⲛϫⲛⲁϩ ϩⲛⲟⲩⲥⲱϣ
11 ϣⲁⲣⲉⲡⲣⲱⲙⲉ ⲛⲛⲁⲏⲧ ⲣϩⲁⲣϣϩⲏⲧ ⲉⲣⲉⲡⲉϥϣⲟⲩϣⲟⲩ ⲇⲉ ⲛⲏⲩ ⲉϫⲛⲙⲡⲁⲣⲁⲛⲟⲙⲟⲥ
12 ⲉⲣⲉⲧⲁⲡⲉⲓⲗⲏ ⲛⲟⲩⲣⲣⲟ ⲟ ⲛⲧϩⲉ ⲙⲡⲁϣⲁϩⲟⲩⲙ ⲛⲟⲩⲙⲟⲩⲓ ⲉⲣⲉⲡⲉϥⲟⲩⲣⲟⲧ ⲇⲉ ⲟ ⲛⲧϩⲉ ⲛⲟⲩⲉⲓⲱⲧⲉ ϩⲓⲟⲩⲭⲟⲣⲧⲟⲥ
13 ⲟⲩϣⲓⲡⲉ ⲛⲟⲩⲉⲓⲱⲧ ⲡⲉ ⲟⲩϣⲏⲣⲉ ⲛⲁⲧϩⲏⲧ ⲁⲩⲱ ⲛⲁⲛⲟⲩⲛⲉⲣⲁⲧⲉ ⲁⲛ ⲉⲃⲟⲗ ϩⲛⲛⲃⲉⲕⲉ ⲛⲟⲩϩⲉⲧⲉⲣⲁ
14 ϣⲁⲣⲉⲛⲉⲓⲟⲧⲉ ⲡⲉϣⲏⲓ ϩⲓⲛⲕⲁ ⲉϫⲛⲛϣⲏⲣⲉ ⲉϣⲁⲩϣⲉⲛϥ ⲟⲩⲥϩⲓⲙⲉ ⲇⲉ ⲙⲡⲣⲱⲙⲉ ⲉⲃⲟⲗ ϩⲓⲧⲙⲡⲛⲟⲩⲧⲉ
15 ϣⲁⲣⲉⲟⲩⲙⲛⲧϭⲱⲃ ⲁⲙⲁϩⲧⲉ ⲙⲡϭⲁⲃϩⲏⲧ ⲧⲉⲯⲩⲭⲏ ⲇⲉ ⲛⲛⲁⲣⲅⲟⲥ ⲛⲁϩⲕⲟ
16 ⲡⲉⲧⲛⲁϩⲁⲣⲉϩ ⲉⲧⲉⲛⲧⲟⲗⲏ ⲉϥⲛⲁϩⲁⲣⲉϩ ⲉⲧⲉϥⲯⲩⲭⲏ ⲡⲉⲧⲕⲁⲧⲁⲫⲣⲟⲛⲉⲓ ⲇⲉ ⲛⲛⲉϥϩⲓⲟⲟⲩⲉ ϥⲛⲁⲙⲟⲩ
17 ⲉⲣⲉⲡⲉⲧⲛⲁ ⲛⲟⲩϩⲏⲕⲉ ϯϩⲁⲧ ⲉⲙⲏⲥⲉ ⲙⲡⲛⲟⲩⲧⲉ ϥⲛⲁⲧⲱⲱⲃⲉ ⲇⲉ ⲛⲁϥ ⲕⲁⲧⲁⲡⲉϥϯ ⲉⲣⲉⲡⲟⲩⲁ ⲅⲁⲣ ⲡⲟⲩⲁ ⲛⲁϫⲓ ⲕⲁⲧⲁⲛⲉϥϩⲃⲏⲩⲉ
18 ϯⲥⲃⲱ ⲙⲡⲉⲕϣⲏⲣⲉ ⲉϥⲛⲁⲁⲓⲁⲓ ⲅⲁⲣ ⲛⲧⲉⲓϩⲉ ⲙⲡⲣϫⲓⲥⲉ ⲇⲉ ⲙⲙⲟⲕ ϩⲙⲡⲉⲕϩⲏⲧ ⲉⲩⲥⲱϣ
19 ⲡⲣⲉϥⲙⲉⲉⲩⲉ ⲉⲡⲉⲧϩⲟⲟⲩ ϥⲛⲁϯⲟⲥⲉ ⲉⲙⲁⲧⲉ ⲉϥϣⲁⲛϫⲱϩⲙ ⲇⲉ ⲉϥⲛⲁⲟⲩⲉϩⲙⲧⲉϥⲯⲩⲭⲏ
20 ⲥⲱⲧⲙ ⲡⲁϣⲏⲣⲉ ⲉⲧⲉⲥⲃⲱ ⲙⲡⲉⲕⲉⲓⲱⲧ ϫⲉⲉⲕⲉⲣⲥⲟⲫⲟⲥ ϩⲛⲧⲉⲕϩⲁⲏ
21 ⲟⲩⲛϩⲁϩ ⲙⲙⲉⲉⲩⲉ ϩⲙⲡϩⲏⲧ ⲙⲡⲣⲱⲙⲉ ⲡϣⲟϫⲛⲉ ⲇⲉ ⲙⲡⲛⲟⲩⲧⲉ ⲡⲉⲧⲟⲣϫ
22 ⲟⲩⲕⲁⲣⲡⲟⲥ ⲛⲁⲧⲏⲡⲉ ⲧⲉ ⲧⲙⲛⲧⲛⲁ ⲛⲁⲛⲟⲩⲟⲩϩⲏⲕⲉ ⲛⲇⲓⲕⲁⲓⲟⲥ ⲉⲩⲣⲙⲙⲁⲟ ⲛⲣⲉϥϫⲓϭⲟⲗ
23 ⲉⲣⲉⲧϩⲟⲧⲉ ⲙⲡϫⲟⲉⲓⲥ ⲣϩⲱⲃ ⲉⲡⲱⲛϩ ⲁⲩⲱ ⲧⲙⲛⲧⲙⲁⲓⲛⲟⲩⲧⲉ ⲉⲩⲱⲛϩ ⲙⲡⲣⲱⲙⲉ ⲉⲣⲉⲡⲉⲧⲉⲛϥⲣϩⲟⲧⲉ ⲇⲉ ⲁⲛ ⲛⲁϣⲱⲡⲉ ϩⲛϩⲉⲛⲙⲁ ⲉⲙⲡϣⲁⲉⲛⲉϩ ϭⲓⲛⲉ ⲁⲛ ⲙⲡⲉⲩϣⲓⲛⲉ
24 ⲡⲉⲧⲕⲱⲗϫ ⲛⲛⲉϥϭⲓϫ ϩⲁⲕⲟⲩⲛϥ ϩⲛⲟⲩϫⲓⲛϭⲟⲛⲥ ⲛⲛⲉϥⲛⲧⲟⲩ ⲟⲛ ⲉⲣⲱϥ
25 ϩⲣⲁⲓ ϩⲛϩⲉⲛϩⲓⲥⲉ ϣⲁⲣⲉⲡⲁⲧϩⲏⲧ ⲛⲟⲩϣⲧ ⲙⲙⲟϥ ⲛϩⲟⲩⲟ ⲉⲕϣⲁⲛϫⲡⲓⲟ ⲇⲉ ⲛⲟⲩⲣⲱⲙⲉ ⲛⲥⲁⲃⲉ ϥⲛⲁⲛⲟⲉⲓ ⲛⲟⲩⲁⲓⲥⲑⲏⲥⲓⲥ
26 ⲡϣⲏⲣⲉ ⲉⲧⲥⲱϣ ⲙⲡⲉϥⲉⲓⲱⲧ ⲁⲩⲱ ⲉⲧⲕⲱ ⲛⲥⲱϥ ⲛⲧⲉϥⲙⲁⲁⲩ ϥⲛⲁϣⲱⲡⲉ ϩⲁⲛⲟϭⲛⲉϭ ⲁⲩⲱ ⲛϥϫⲓ ϣⲓⲡⲉ
27 ⲟⲩϣⲏⲣⲉ ⲉϥⲕⲱ ⲛⲥⲱϥ ⲛⲧⲉⲥⲃⲱ ϥⲛⲁϩⲁⲣⲉϩ ⲉϩⲉⲛⲡⲉⲧϩⲟⲟⲩ ϥⲛⲁⲙⲉⲗⲉⲧⲁ ⲇⲉ ⲛϩⲉⲛϣⲁϫⲉ ⲉⲩⲃⲟⲟⲛⲉ
28 ⲡⲉⲧϣⲡⲧⲱⲣⲉ ⲛⲟⲩϩⲙϩⲁⲗ ⲛⲁⲧϩⲏⲧ ⲉϥⲥⲱϣ ⲙⲡⲛⲟⲙⲟⲥ ⲧⲧⲁⲡⲣⲟ ⲇⲉ ⲙⲡⲁⲥⲉⲃⲏⲥ ⲛⲁⲟⲩⲱⲙⲕ ⲛϩⲉⲛⲥⲱϣ
29 ⲥⲉⲛⲁⲥⲟⲃⲧⲉ ⲛϩⲉⲛⲙⲁⲥⲧⲓⲅⲝ ⲛϩⲉⲛⲁⲧⲁⲙⲁϩⲧⲉ ⲁⲩⲱ ϩⲉⲛⲙⲟⲕϩⲥ ϩⲛⲛⲏⲓ ⲛⲛⲁⲧϩⲏⲧ
Proverbs 18 · Proverbs 20 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)