Proverbs 18 — Coptic (Sahidic)

1 ϣⲁⲣⲉⲡⲣⲱⲙⲉ ⲉⲧⲟⲩⲉϣⲡⲱⲣϫ ⲉⲛⲉϥϣⲃⲉⲉⲣ ϣⲓⲛⲉ ⲛⲥⲁⲟⲩⲗⲟⲓϭⲉ ⲡⲁⲓ ⲛⲧⲉⲓⲙⲓⲛⲉ ⲛⲁϣⲱⲡⲉ ϩⲁⲛⲟϭⲛⲉϭ ⲛⲟⲩⲟⲉⲓϣ ⲛⲓⲙ

2 ⲡⲁⲧϩⲏⲧ ⲣⲭⲣⲉⲓⲁ ⲛⲛⲧⲥⲟⲫⲓⲁ ϥⲟⲩⲉϣⲧⲙⲛⲧⲁⲑⲏⲧ ⲅⲁⲣ ⲛϩⲟⲩⲟ

3 ⲉⲣϣⲁⲛⲡⲁⲥⲉⲃⲏⲥ ⲉⲓ ⲉⲩⲙⲏⲏϣⲉ ⲙⲡⲉⲧϩⲟⲟⲩ ϣⲁϥⲕⲁⲧⲁⲫⲣⲟⲛⲉⲓ ϣⲁⲣⲉⲟⲩⲥⲱϣ ⲇⲉ ⲉⲓ ⲉϫⲱϥ ⲙⲛⲟⲩⲛⲟϭⲛⲉϭ

4 ⲟⲩⲙⲟⲟⲩ ⲉϥϣⲏⲕ ⲡⲉ ⲡϣⲁϫⲉ ϩⲙⲡϩⲏⲧ ⲙⲡⲣⲱⲙⲉ ϣⲁⲣⲉⲧⲡⲏⲅⲏ ⲇⲉ ⲛⲧⲥⲟⲫⲓⲁ ⲃⲉⲉⲃⲉ ⲛⲥϥⲱϭⲉ ⲉϩⲣⲁⲓ ⲙⲛϭⲟⲙ ⲙⲙⲟⲥ ⲉϩⲱⲡ

5 ⲛⲁⲛⲟⲩϫⲓⲡϩⲟ ⲁⲛ ⲛⲟⲩⲁⲥⲉⲃⲏⲥ ⲁⲩⲱ ⲛϣϣⲉ ⲁⲛ ⲉⲥⲧⲉⲟⲩⲇⲓⲕⲁⲓⲟⲥ ⲉⲃⲟⲗ ϩⲛⲟⲩϩⲁⲡ

6 ⲛⲉⲥⲡⲟⲧⲟⲩ ⲙⲡⲁⲧϩⲏⲧ ⲛⲁⲛⲧϥ ⲉϩⲉⲛⲡⲉⲧϩⲟⲟⲩ ⲉⲣⲉⲧⲉϥⲧⲁⲡⲣⲟ ⲇⲉ ⲉⲧⲛⲁϣⲧ ⲉⲡⲓⲕⲁⲗⲓ ⲙⲡⲙⲟⲩ

7 ⲧⲧⲁⲡⲣⲟ ⲙⲡⲁⲧϩⲏⲧ ⲟⲩⲟⲩⲱϣϥ ⲛⲁϥ ⲧⲉ ⲁⲩⲱ ⲟⲩⲡⲁϣ ⲛⲧⲉϥⲯⲩⲭⲏ ⲛⲉ ⲛⲉϥⲥⲡⲟⲧⲟⲩ

8 ϣⲁⲣⲉⲧϩⲟⲧⲉ ⲣⲱϩⲧ ⲙⲡⲣⲉϥϫⲛⲁⲩ ⲛⲉⲯⲩⲭⲏ ⲇⲉ ⲛⲛϭⲁⲃϩⲏⲧ ⲛⲁϩⲕⲟ

9 ⲡⲉⲧⲉⲛϥⲧⲁⲗϭⲟ ⲙⲙⲟϥ ⲁⲛ ϩⲛⲛⲉϥϩⲃⲏⲩⲉ ⲡⲥⲟⲛ ⲡⲉ ⲙⲡⲉⲧⲧⲁⲕⲟ ⲙⲙⲟϥ ⲟⲩⲁⲁϥ ⲟⲩⲁⲧϩⲏⲧ ⲉϥϣⲁⲛϣⲓⲡⲉ ⲥⲛⲁⲱⲡ ⲉⲣⲟϥ ⲉⲩⲥⲟⲫⲓⲁ ⲁⲩⲱ ⲡⲉⲧⲧⲁⲗϭⲟ ⲙⲙⲟϥ ϩⲛⲛⲉϥϩⲃⲏⲩⲉ ⲑⲙⲙⲓⲛ ⲙⲙⲟϥ

10 ⲡⲣⲁⲛ ⲙⲡϫⲟⲉⲓⲥ ⲟⲩⲟⲩⲟⲛϩ ⲉⲃⲟⲗ ϩⲛⲧⲙⲛⲧⲛⲟϭ ⲛⲧⲉϥϭⲟⲙ ⲛⲇⲓⲕⲁⲓⲟⲥ ⲇⲉ ⲛⲁϫⲓⲥⲉ ⲙⲡⲡⲱⲧ ⲉⲣⲁⲧϥ

11 ⲡⲉϫⲡⲟ ⲛⲟⲩⲣⲱⲙⲉ ⲛⲣⲙⲙⲁⲟ ⲡⲉ ⲟⲩⲡⲟⲗⲓⲥ ⲉⲥⲧⲁϫⲣⲏⲩ ⲡⲉⲥⲉⲟⲟⲩ ⲇⲉ ⲣϩⲁⲓⲃⲉⲥ ⲉⲙⲁⲧⲉ

12 ⲡϩⲏⲧ ⲙⲡⲣⲱⲙⲉ ϫⲓⲥⲉ ϩⲁⲧϩⲏ ⲙⲡⲟⲩⲱϣϥ ⲁⲩⲱ ϣⲁϥⲑⲃⲃⲓⲟ ϩⲁⲧϩⲏ ⲙⲡⲉⲟⲟⲩ

13 ⲡⲉⲧⲛⲁϣⲁϫⲉ ⲉⲙⲡⲁⲧϥⲥⲱⲧⲙ ⲟⲩⲙⲛⲧⲁⲧϩⲏⲧ ⲛⲁϥ ⲧⲉ ⲙⲛⲟⲩⲛⲟϭⲛⲉϭ

14 ϣⲁⲣⲉⲟⲩϩⲙϩⲁⲗ ⲛⲥⲁⲃⲉ ⲧⲁⲗϭⲉⲟⲩϭⲱⲛⲧ ⲛⲟⲩⲣⲱⲙⲉ ⲛⲓⲙ ⲇⲉ ⲡⲉⲧⲛⲁϣϥⲓ ϩⲁⲟⲩⲣⲱⲙⲉ ⲛϩⲏⲧ ϣⲏⲙ

15 ⲡϩⲏⲧ ⲙⲡⲥⲁⲃⲉ ⲛⲁϫⲡⲟ ⲛⲁϥ ⲛⲟⲩⲁⲓⲥⲑⲏⲥⲓⲥ ⲉⲣⲉⲙⲙⲁⲁϫⲉ ⲇⲉ ⲛⲛⲥⲟⲫⲟⲥ ϣⲓⲛⲉ ⲛⲥⲁⲟⲩⲙⲉⲉⲩⲉ

16 ϣⲁⲣⲉⲛⲧⲁⲉⲓⲟ ⲙⲡⲣⲱⲙⲉ ⲟⲩⲟϣⲥϥ ⲉⲃⲟⲗ ⲁⲩⲱ ϣⲁⲩⲥⲩⲛϩⲩⲥⲧⲁ ⲙⲙⲟϥ ⲛϩⲉⲛⲛⲟϭ

17 ϣⲁⲣⲉⲡⲇⲓⲕⲁⲓⲟⲥ ⲕⲁⲧⲉⲅⲟⲣⲓ ⲙⲙⲟϥ ⲟⲩⲁⲁϥ ϩⲙⲡⲉϥϣⲟⲣⲡ ⲛϣⲁϫⲉ ⲥⲉⲛⲁϫⲡⲓⲉⲡⲉⲧⲟⲩⲃⲏϥ ⲇⲉ ϩⲙⲡⲉⲧϥⲛⲁϩⲓⲧⲟⲟⲧϥ ⲉⲣⲟϥ

18 ϣⲁⲣⲉⲟⲩⲕⲗⲏⲣⲟⲥ ⲧⲁⲗϭⲉϩⲉⲛⲟⲩⲱϩⲙ ⲁⲩⲱ ϣⲁϥⲡⲱϣ ϩⲛⲛⲛⲟϭ

19 ⲉⲣⲉⲟⲩⲥⲟⲛ ⲉⲩⲃⲟⲏⲑⲉⲓ ⲉⲣⲟϥ ϩⲓⲧⲛⲟⲩⲥⲟⲛ ⲟ ⲛⲧϩⲉ ⲛⲟⲩⲡⲟⲗⲓⲥ ⲉⲥⲟⲣϫ ⲁⲩⲱ ⲉⲥϫⲟⲥⲉ ϥϭⲙϭⲟⲙ ⲇⲉ ⲛⲧϩⲉ ⲛⲟⲩⲙⲛⲧⲣⲣⲟ ⲉⲥⲟⲣϫ

20 ⲉⲣⲉⲡⲣⲱⲙⲉ ⲛⲁⲙⲉϩϩⲏⲧϥ ⲉⲃⲟⲗ ϩⲛⲛⲕⲁⲣⲡⲟⲥ ⲛⲣⲱϥ ⲁⲩⲱ ⲉϥⲛⲁⲥⲉⲓ ⲛⲛⲕⲁⲣⲡⲟⲥ ⲛⲛⲉϥⲥⲡⲟⲧⲟⲩ

21 ⲉⲣⲉⲡⲙⲟⲩ ⲙⲛⲡⲱⲛϩ ⲛⲧϭⲓϫ ⲙⲡⲗⲁⲥ ⲛⲉⲧⲁⲙⲁϩⲧⲉ ⲇⲉ ⲙⲙⲟϥ ⲛⲁⲟⲩⲱⲙ ⲛⲛⲉϥⲕⲁⲣⲡⲟⲥ

22 ⲡⲉⲛⲧⲁϥϩⲉ ⲉⲩⲥϩⲓⲙⲉ ⲉⲛⲁⲛⲟⲩⲥ ⲁϥϩⲉ ⲉⲩϩⲙⲟⲧ ⲁϥϫⲓ ⲇⲉ ⲛⲟⲩⲟⲩⲣⲟⲧ ⲉⲃⲟⲗ ϩⲓⲧⲙⲡⲛⲟⲩⲧⲉ ⲡⲉⲧⲛⲁⲛⲟⲩϫⲉ ⲉⲃⲟⲗ ⲛⲟⲩⲥϩⲓⲙⲉ ⲉⲛⲁⲛⲟⲩⲥ ⲉϥⲛⲁⲛⲟⲩϫⲉ ⲉⲃⲟⲗ ⲛϩⲉⲛⲁⲅⲁⲑⲟⲛ ⲡⲉⲧⲛⲁϭⲱ ⲇⲉ ⲙⲛⲟⲩⲥϩⲓⲙⲉ ⲛⲛⲟⲉⲓⲕ ⲟⲩⲁⲧϩⲏⲧ ⲡⲉ ⲁⲩⲱ ⲟⲩϣⲁⲛⲧⲉ ⲡⲉ