Read Proverbs 17 side by side with translations · The Final Bible
1 ⲛⲁⲛⲟⲩⲟⲩⲟⲉⲓⲕ ϩⲛⲟⲩⲉⲓⲣⲏⲛⲏ ⲉϩⲟⲩⲉϩⲉⲛⲏⲓ ⲉⲩⲙⲉϩ ⲛϣⲱⲱⲧ ϩⲛⲟⲩϫⲓⲛϭⲟⲛⲥ
2 ϣⲁⲣⲉⲟⲩϩⲑⲙϩⲁⲗ ⲛⲥⲁⲃⲉ ⲁⲙⲁϩⲧⲉ ⲉϫⲛϩⲉⲛϫⲓⲥⲟⲟⲩⲉ ⲛⲁⲧϩⲏⲧ ϣⲁϥⲡⲱϣ ⲇⲉ ⲛϩⲉⲛⲧⲟ ϩⲛϩⲉⲛⲥⲛⲏⲩ
3 ⲛⲧϩⲉ ⲉϣⲁⲩⲇⲟⲕⲓⲙⲁⲍⲉ ⲙⲡⲛⲟⲩⲃ ⲙⲛⲡϩⲁⲧ ϩⲛⲟⲩϩⲣⲱ ⲧⲁⲓ ⲧⲉ ⲧϩⲉ ⲉⲧⲉⲣⲉⲡⲛⲟⲩⲧⲉ ⲥⲱⲧⲡ ⲛⲛϩⲏⲧ ⲛⲛⲣⲱⲙⲉ
4 ϣⲁⲣⲉⲡⲡⲉⲧϩⲟⲟⲩ ⲥⲱⲧⲙ ⲛⲥⲁⲛⲗⲁⲥ ⲛⲙⲡⲁⲣⲁⲛⲟⲙⲟⲥ ⲙⲉⲣⲉⲡⲇⲓⲕⲁⲓⲟⲥ ⲇⲉ ϯϩⲧⲏϥ ⲉⲥⲡⲟⲧⲟⲩ ⲛϭⲟⲗ
6 ⲡⲉⲕⲗⲟⲙ ⲛⲛϩⲗⲗⲟ ⲡⲉ ϩⲛϣⲏⲣⲉ ⲛϣⲏⲣⲉ ⲡⲉⲟⲟⲩ ⲇⲉ ⲛⲛϣⲏⲣⲉ ⲡⲉ ⲛⲉⲩⲉⲓⲟⲧⲉ
7 ⲙⲛϩⲉⲛⲥⲡⲟⲧⲟⲩ ⲉⲩⲛϩⲟⲧ ⲣϣⲁⲩ ⲛⲛⲁⲧϩⲏⲧ ⲟⲩⲇⲉ ⲥⲡⲟⲧⲟⲩ ⲛϭⲟⲗ ⲛⲛⲇⲓⲕⲁⲓⲟⲥ
8 ⲟⲩⲃⲉⲕⲉ ⲧⲛϩⲙⲟⲧ ⲧⲉ ⲧⲉⲥⲃⲱ ⲛⲉⲧⲉⲓⲣⲉ ⲙⲙⲟⲥ ⲡⲙⲁ ⲉⲧⲥⲕⲟⲧⲥ ⲉⲣⲟϥ ϥⲛⲁⲥⲟⲟⲩⲧⲛ
9 ⲉⲣⲉⲡⲉⲧϩⲱⲡ ⲛⲛϫⲓ ⲛϭⲟⲛⲥ ϣⲓⲛⲉ ⲛⲥⲁⲟⲩⲙⲛⲧϣⲃⲏⲣ ⲡⲉⲧⲙⲟⲥⲧⲉ ⲇⲉ ⲛϩⲟⲡⲟⲩ ϣⲁϥⲡⲣϫϩⲉⲛϣⲃⲏⲣ ⲙⲛϩⲉⲛⲣⲙⲛⲏⲓ
10 ϣⲁⲣⲉⲟⲩϭⲱⲛⲧ ⲟⲩⲉϣϥⲡϩⲏⲧ ⲙⲡⲥⲁⲃⲉ ⲉⲩⲙⲁⲥⲧⲓⲅⲟⲩ ⲇⲉ ⲙⲡⲁⲧϩⲏⲧ ⲙⲉϥⲁⲓⲥⲑⲁⲛⲉ
11 ϣⲁⲣⲉⲛⲉⲧϩⲟⲟⲩ ⲧⲏⲣⲟⲩ ⲧⲟⲩⲛⲉⲥϩⲉⲛⲛⲟⲩϩⲙ ⲡⲛⲟⲩⲧⲉ ⲇⲉ ⲛⲁⲧⲛⲛⲟⲟⲩ ⲛⲁⲩ ⲛⲟⲩⲁⲅⲅⲉⲗⲟⲥ ⲛⲁⲧⲛⲁ
12 ⲡⲣⲟⲟⲩϣ ⲛⲁⲧⲁϩⲉⲟⲩⲣⲱⲙⲉ ⲛⲥⲁⲃⲉ ⲉⲣⲉⲛⲁⲧϩⲏⲧ ⲇⲉ ⲙⲉⲉⲩⲉ ⲉϩⲉⲛⲡⲉⲧϩⲟⲟⲩ
13 ⲡⲉⲧⲛⲁϯ ⲛϩⲉⲛⲡⲉⲧϩⲟⲟⲩ ⲉⲡⲙⲁ ⲛϩⲉⲛⲡⲉⲧⲛⲁⲛⲟⲩⲟⲩ ⲙⲡⲉⲧϩⲟⲟⲩ ⲛⲁⲕⲓⲙ ⲁⲛ ϩⲙⲡⲉϥⲏⲓ
14 ϣⲁⲣⲉⲧⲁⲣⲭⲏ ⲛⲧⲇⲓⲕⲁⲓⲟⲥⲩⲛⲏ ϯ ⲛⲟⲩⲉⲝⲟⲩⲥⲓⲁ ⲡⲉϣⲧⲟⲣⲧⲣ ⲇⲉ ⲙⲛⲡⲙⲓϣⲉ ⲙⲟⲟϣⲉ ϩⲏⲧϥ ⲙⲡⲉϭⲣⲱϩ
15 ⲡⲉⲧⲛⲁⲕⲣⲓⲛⲉ ⲙⲡⲇⲓⲕⲁⲓⲟⲥ ϫⲉⲟⲩⲁⲇⲓⲕⲟⲥ ⲡⲉ ⲁⲩⲱ ⲡⲁⲇⲓⲕⲟⲥ ϫⲉⲟⲩⲇⲓⲕⲁⲓⲟⲥ ⲡⲉ ϩⲛⲃⲟⲧⲉ ⲛⲉ ⲙⲡⲉⲥⲛⲁⲩ ⲛⲛⲁϩⲣⲙⲡϫⲟⲉⲓⲥ
16 ⲉⲧⲃⲉⲟⲩ ⲟⲩⲛⲧⲉⲡⲁⲧϩⲏⲧ ⲭⲣⲏⲙⲁ ⲙⲛϭⲟⲙ ⲅⲁⲣ ⲉⲧⲣⲉⲡⲁⲧϩⲏⲧ ϫⲡⲉⲧⲥⲟⲫⲓⲁ ⲉⲣⲉⲡⲉⲧϫⲓⲥⲉ ⲙⲡⲉϥⲏⲓ ϣⲓⲛⲉ ⲛⲥⲁⲟⲩⲟⲩⲱϣϥ ⲡⲉⲧϭⲟⲟⲙⲉ ⲇⲉ ⲉϫⲓⲥⲃⲱ ⲛⲁϩⲉ ⲉϩⲣⲁⲓ ⲉϩⲉⲛⲡⲉⲧϩⲟⲟⲩ
17 ⲙⲁⲣⲉⲡⲉⲕϣⲃⲏⲣ ϣⲱⲡⲉ ⲛⲁⲕ ϩⲛⲙⲁ ⲛⲓⲙ ⲁⲩⲱ ⲛⲧⲉⲛⲉⲕⲥⲛⲏⲩ ϣⲱⲡⲉ ⲛⲁⲕ ⲛϣⲁⲩ ϩⲛⲛⲉⲕⲁⲛⲁⲅⲕⲏ ⲉⲩϫⲡⲟ ⲅⲁⲣ ⲙⲙⲟⲟⲩ ⲉⲡⲉⲓϩⲱⲃ
18 ⲡⲣⲱⲙⲉ ⲛⲁⲧϩⲏⲧ ϫⲁⲕ ⲁⲩⲱ ϥⲣⲁϣⲉ ⲉϫⲱϥ ⲟⲩⲁⲁϥ ⲉϥϣⲡⲧⲱⲣⲉ ⲛⲛⲉϥϣⲃⲉⲉⲣ ϣⲁⲣⲉⲡⲥⲁⲃⲉ ⲇⲉ ⲟⲩⲉ ⲉⲃⲟⲗ ⲛϣⲡⲧⲱⲣⲉ ⲛϥⲧⲁⲉⲓⲟ
19 ϣⲁⲣⲉⲡⲙⲁⲓⲛⲟⲃⲉ ⲣⲁϣⲉ ϩⲛϩⲉⲛⲙⲓϣⲉ
20 ⲡⲛⲁϣⲧϩⲏⲧ ⲇⲉ ⲛⲁⲧⲱⲙⲛⲧ ⲁⲛ ⲉⲡⲉⲧⲛⲁⲛⲟⲩϥ ⲟⲩⲛⲟⲩⲣⲱⲙⲉ ⲛⲣⲉϥⲡⲟⲟⲛⲉϥ ϩⲙⲡⲉϥⲗⲁⲥ ⲛⲁϩⲉ ⲉϩⲣⲁⲓ ⲉϩⲉⲛⲡⲉⲧϩⲟⲟⲩ
21 ⲟⲩⲙⲕⲁϩ ⲇⲉ ⲛϩⲏⲧ ⲡⲉ ⲟⲩϩⲏⲧ ⲛⲁⲧϩⲏⲧ ⲙⲡⲉⲧⲛⲁϫⲡⲟϥ ⲛⲁϥ ⲙⲙⲛⲟⲩⲉⲓⲱⲧ ⲛⲁⲉⲩⲫⲣⲁⲛⲉ ⲉϫⲛⲟⲩϣⲏⲣⲉ ⲛⲁⲧⲥⲃⲱ ⲟⲩϣⲏⲣⲉ ⲇⲉ ⲛⲥⲁⲃⲉ ϥⲛⲁⲉⲩⲫⲣⲁⲛⲉ ⲛⲧⲉϥⲙⲁⲁⲩ
22 ϣⲁⲣⲉⲫⲏⲧ ⲛⲛⲉⲧⲉⲩⲫⲣⲁⲛⲉ ϯⲙⲧⲟⲛ ⲛⲁⲩ ⲛⲕⲉⲉⲥ ⲇⲉ ⲙⲡⲣⲉϥⲗⲩⲡⲓ ⲛⲁϣⲟⲟⲩⲉ
23 ⲟⲩⲁⲥⲉⲃⲏⲥ ⲡⲉ ⲡⲉⲧϫⲓⲇⲱⲣⲟⲛ ⲉⲕⲟⲩⲛϥ ϥⲛⲁⲣⲓⲕⲉ ⲅⲁⲣ ⲉⲃⲟⲗ ϩⲛⲛⲉϩⲓⲟⲟⲩⲉ ⲛⲧⲇⲓⲕⲁⲓⲟⲥⲩⲛⲏ
24 ⲟⲩⲥⲟⲫⲟⲥ ⲡⲉ ⲡϩⲟ ⲙⲡⲣⲱⲙⲉ ⲛⲥⲁⲃⲉ ⲛⲃⲁⲗ ⲇⲉ ⲙⲡⲁⲧϩⲏⲧ ⲉⲓⲟⲣⲙ ⲉⲛⲕⲟϩ ⲙⲡⲕⲁϩ
25 ⲟⲩⲟⲣⲅⲏ ⲛⲟⲩⲉⲓⲱⲧ ⲡⲉ ⲟⲩϣⲏⲣⲉ ⲛⲁⲧϩⲏⲧ ⲁⲩⲱ ⲟⲩⲙⲕⲁϩ ⲛϩⲏⲧ ⲡⲉ ⲛⲧⲉⲛⲧⲁⲥϫⲡⲟϥ
26 ⲛⲁⲛⲟⲩⲧⲣⲉⲟⲩⲣⲱⲙⲉ ⲁⲛ ⲛⲇⲓⲕⲁⲓⲟⲥ ϯⲟⲥⲉ ⲁⲩⲱ ⲛϣϣⲉ ⲁⲛ ⲉⲉⲡⲓⲃⲟⲩⲗⲉⲩⲉ ⲉϩⲉⲛⲇⲩⲛⲁⲥⲧⲏⲥ ⲛⲇⲓⲕⲁⲓⲟⲥ
27 ⲟⲩⲥⲁⲃⲉ ⲡⲉ ⲡⲉⲧϯⲥⲟ ⲉⲛⲉϫⲟⲩϣⲁϫⲉ ⲉⲃⲟⲗ ⲉϥⲛⲁϣⲧ ⲟⲩⲥⲁⲃⲉ ⲇⲉ ⲡⲉ ⲡⲣⲱⲙⲉ ⲛϩⲁⲣϣϩⲏⲧ ⲉⲉⲣϣⲁⲛⲡⲁⲧϩⲏⲧ ϣⲓⲛⲉ ⲛⲥⲁⲧⲥⲟⲫⲓⲁ
28 ⲥⲉⲛⲁⲟⲡϥ ⲉⲥⲟⲫⲟⲥ ϥⲛⲁϣⲱⲡⲉ ⲇⲉ ⲉϥⲟⲛϣ ⲛⲅϩⲉ ⲉⲣⲟϥ ⲉϣϫⲉⲟⲩⲥⲁⲃⲉ ⲡⲉ
Proverbs 16 · Proverbs 18 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)