Proverbs 14 — Coptic (Sahidic)

1 ϣⲁⲣⲉⲛⲥⲁⲃⲏ ⲛⲥϩⲓⲙⲉ ⲕⲉⲧϩⲉⲛⲏⲓ ⲧⲉⲧⲛⲛⲁⲣⲁⲧϩⲏⲧ ⲇⲉ ⲛⲁϣⲣϣⲱⲣϥ ϩⲛⲛⲉⲥϭⲓϫ

2 ⲡⲉⲧⲙⲟⲟϣⲉ ϩⲛⲟⲩⲥⲟⲟⲩⲧⲛ ⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲡⲉⲧϭⲱⲟⲩϭ ⲇⲉ ⲛⲛⲉϥϩⲓⲟⲟⲩⲉ ⲛⲛⲁϫⲓⲥⲱϣ

3 ⲟⲩϭⲉⲣⲱⲃ ⲛⲥⲱϣ ⲡⲉⲧϩⲛⲧⲧⲁⲡⲣⲟ ⲛⲛⲁⲧϩⲏⲧ ⲛⲉⲥⲡⲟⲧⲟⲩ ⲇⲉ ⲛⲛⲥⲟⲫⲟⲥ ⲛⲁϩⲁⲣⲉϩ ⲉⲣϯⲉⲟⲟⲩ

4 ⲛⲟⲩⲟⲙϥ ϣⲟⲩⲉⲓⲧ ϩⲙⲡⲙⲁ ⲉⲧⲉⲙⲛⲉϩⲉ ⲛϩⲏⲧϥ ⲧϭⲟⲙ ⲛⲧⲉϩⲉ ⲟⲩⲟⲛϩ ⲉⲃⲟⲗ ϩⲙⲡⲙⲁ ⲉⲧⲉⲟⲩⲛϩⲁϩ ⲛϩⲏⲧϥ ⲛⲅⲉⲛⲏⲙⲁ

5 ⲙⲛⲟⲩⲙⲛⲧⲣⲉ ⲙⲡⲓⲥⲧⲟⲥ ⲛⲁϫⲓϭⲟⲗ ϣⲁⲣⲉⲟⲩⲙⲛⲧⲣⲉ ⲇⲉ ⲛϫⲓⲛϭⲟⲛⲥ ⲧⲙϩⲉϩⲉⲛϭⲟⲗ

6 ⲕⲛⲁϣⲓⲛⲉ ⲛⲥⲁⲧⲥⲟⲫⲓⲁ ⲛⲧⲛⲛⲉⲧⲑⲟⲟⲩ ⲛⲅⲧⲙϭⲛⲧⲥ ⲧⲁⲓⲥⲑⲏⲥⲓⲥ ⲇⲉ ⲥⲃⲧⲱⲧ ⲛⲧⲟⲟⲧⲟⲩ ⲛⲛⲥⲁⲃⲉ

7 ϩⲱⲃ ⲛⲓⲙ ϯⲟⲩⲃⲉⲡⲣⲱⲙⲉ ⲛⲁⲧϩⲏⲧ ϩⲉⲛϩⲟⲡⲗⲟⲛ ⲇⲉ ⲛⲁⲓⲥⲑⲏⲥⲓⲥ ⲛⲉ ⲛⲉⲥⲡⲟⲧⲟⲩ ⲛⲛⲥⲁⲃⲉ ϩⲉⲛϩⲟⲡⲗⲟⲛ ⲇⲉ ⲛⲁⲓⲥⲑⲏⲥⲓⲥ ⲛⲉ ⲛⲉⲥⲡⲟⲧⲟⲩ ⲛⲛⲥⲁⲃⲉ

8 ⲧⲥⲟⲫⲓⲁ ⲛⲛⲣⲙⲛϩⲏⲧ ⲛⲁⲉⲓⲙⲉ ⲉⲛⲉⲩϩⲓⲟⲟⲩⲉ ⲧⲙⲛⲧⲁⲧϩⲏⲧ ⲇⲉ ⲛⲁⲧⲥⲃⲱ ϩⲛⲟⲩⲡⲗⲁⲛⲏ

9 ⲛⲏⲓ ⲛⲙⲡⲁⲣⲁⲛⲟⲙⲟⲥ ⲙⲡϣⲁ ⲛⲟⲩⲧⲃⲃⲟ ⲛⲏⲓ ⲇⲉ ⲛⲛⲇⲓⲕⲁⲓⲟⲥ ⲥⲟⲧⲡ

10 ⲡϩⲏⲧ ⲛⲟⲩⲣⲱⲙⲉ ⲛⲣⲉϥⲁⲓⲥⲑⲁⲛⲉ ⲟⲩⲗⲩⲡⲏ ⲡⲉ ⲛⲧⲉϥⲯⲩⲭⲏ ϩⲟⲧⲁⲛ ⲇⲉ ⲉϥϣⲁⲛⲉⲩⲫⲣⲁⲛⲉ ⲙⲉⲣⲉⲧⲗⲩⲡⲏ ⲧⲱϩ ⲛⲙⲙⲁϥ

11 ⲛⲏⲓ ⲛⲛⲁⲥⲉⲃⲏⲥ ⲛⲁⲧⲁⲕⲟ ⲛⲉⲥⲕⲏⲛⲏ ⲇⲉ ⲛⲛⲇⲓⲕⲁⲓⲟⲥ ⲛⲁⲁϩⲉⲣⲁⲧⲟⲩ

12 ⲟⲩⲛⲟⲩϩⲓⲏ ⲉⲣⲉⲡⲣⲱⲙⲉ ⲙⲉⲉⲩⲉ ⲉⲣⲟⲥ ϫⲉⲉⲥⲥⲟⲩⲧⲱⲛ ⲉⲣⲉⲧⲉⲥϩⲁⲏ ⲇⲉ ⲡⲏϩ ⲉⲡϣⲓⲕ ⲛⲁⲙⲛⲧⲉ

13 ⲙⲉⲣⲉⲧⲗⲩⲡⲏ ⲧⲱϩ ⲙⲛⲡⲟⲩⲛⲟϥ ϣⲁⲣⲉⲧϩⲁⲏ ⲇⲉ ⲙⲡⲣⲁϣⲉ ⲉⲓ ⲉⲡϩⲏⲃⲉ

14 ⲡⲛⲁϣⲧϩⲏⲧ ⲛⲁⲥⲉⲓ ⲛⲛⲉϥϩⲓⲟⲟⲩⲉ ⲙⲁⲩⲁⲁϥ ⲡⲣⲱⲙⲉ ⲇⲉ ⲉⲧⲟⲩⲁⲁⲃ ⲉⲃⲟⲗ ϩⲛⲛⲉϥⲙⲉⲉⲩⲉ

15 ϣⲁⲣⲉⲡⲃⲁⲗϩⲏⲧ ⲧⲁⲛϩⲉⲧϣⲁϫⲉ ⲛⲓⲙ ϣⲁⲣⲉⲡⲥⲁⲃⲉ ⲇⲉ ⲣϩⲧⲏϥ

16 ⲉⲣϣⲁⲛⲡⲥⲟⲫⲟⲥ ⲣϩⲟⲧⲉ ϣⲁϥⲣⲁⲕⲧϥ ⲉⲃⲟⲗ ⲙⲡⲡⲉⲧϩⲟⲟⲩ ϣⲁⲣⲉⲡⲁⲧϩⲏⲧ ⲇⲉ ⲧⲱϩ ⲛⲙⲙⲁϥ ϩⲛⲟⲩⲧⲁϫⲣⲟ

17 ϣⲁⲣⲉⲡⲉⲧϭⲉⲡⲏ ⲉϭⲱⲛⲧ ⲉⲓⲣⲉ ⲛⲟⲩⲙⲛⲧⲁⲧϣⲟϫⲛⲉ ϣⲁⲣⲉⲟⲩⲣⲱⲙⲉ ⲇⲉ ⲛⲥⲟⲫⲟⲥ ϥⲓ ⲉⲣⲟϥ ⲉⲙⲁⲧⲉ

18 ⲛⲁⲧϩⲏⲧ ⲛⲁⲡⲱϣ ⲉϫⲱⲟⲩ ⲛⲧⲕⲁⲕⲓⲁ ϣⲁⲣⲉⲛⲥⲁⲃⲉ ⲇⲉ ⲁⲙⲁϩⲧⲉ ⲛⲟⲩⲁⲓⲥⲑⲏⲥⲓⲥ

19 ⲛⲉⲧϩⲟⲟⲩ ⲛⲁϩⲉ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲛⲁⲛⲟⲩⲟⲩ ⲁⲩⲱ ⲛⲁⲥⲉⲃⲏⲥ ⲛⲁϣⲙϣⲉ ϩⲓⲣⲛⲛⲣⲟ ⲛⲛⲇⲓⲕⲁⲓⲟⲥ

20 ϣⲁⲣⲉϩⲉⲛϣⲃⲏⲣ ⲙⲉⲥⲧⲉⲛⲩϣⲃⲏⲣ ⲛϩⲏⲕⲉ ⲛⲁϣⲉⲛⲉϣⲃⲉⲉⲣ ⲇⲉ ⲛⲛⲣⲙⲙⲁⲟ ϣⲁⲣⲉⲡⲣⲉϥⲣⲛⲟⲃⲉ ⲕⲙϣⲛⲉϥϣⲃⲉⲉⲣ

21 ⲡⲉⲧⲥⲱϣ ⲛⲛϩⲏⲕⲉ ⲣⲛⲟⲃⲉ ⲟⲩⲙⲁⲕⲁⲣⲓⲟⲥ ⲇⲉ ⲡⲉⲧⲛⲁⲛⲛϩⲏⲕⲉ

22 ⲛⲉⲧⲥⲟⲣⲙ ⲣϩⲱⲃ ⲉϩⲉⲛⲡⲉⲧϩⲟⲟⲩ ϩⲉⲛⲣⲉϥϫⲓϣⲟϫⲛⲉ ⲛⲙⲡⲉⲧⲛⲁⲛⲟⲩⲟⲩ ⲛⲉ ⲛⲛⲁⲏⲧ ⲛⲣⲉϥϫⲓϣⲟϫⲛⲉ ⲇⲉ ⲛϫⲓⲛϭⲟⲛⲥ ⲥⲉⲡⲗⲁⲛⲁ ϩⲙⲡⲉⲩϣⲟϫⲛⲉ ⲉⲣⲉⲡⲛⲁ ⲇⲉ ⲙⲛⲧⲙⲉ ⲛⲧⲉⲛⲣⲉϥⲣⲡⲉⲧⲛⲁⲛⲟⲩϥ ⲛⲣⲉϥⲣⲡⲉⲧϩⲟⲟⲩ ⲥⲟⲟⲩⲛ ⲁⲛ ⲙⲡⲛⲉⲩⲙⲁ ⲙⲛⲧⲡⲓⲥⲧⲓⲥ ⲉⲣⲉⲙⲙⲛⲧⲛⲁ ⲇⲉ ⲙⲛⲧⲡⲓⲥⲧⲓⲥ ⲛⲧⲟⲟⲧⲟⲩ ⲛⲛⲣⲉϥⲣⲡⲉⲧⲛⲁⲛⲟⲩϥ

23 ⲟⲩⲛⲥⲟⲫⲓⲁ ϩⲛⲟⲩⲟⲛ ⲛⲓⲙ ⲉⲧϥⲓⲣⲟⲟⲩϣ ⲡⲉⲧⲙⲟⲧⲛ ⲇⲉ ⲙⲛⲡⲉⲧⲉⲙⲉϥⲙⲟⲕϩϥ ⲛⲁⲣϭⲣⲱϩ ⲛⲧⲙⲛⲧⲥⲁⲃⲉ

24 ⲧⲙⲛⲧⲣⲙⲙⲁⲟ ⲡⲉ ⲡⲉⲕⲗⲟⲙ ⲛⲛⲥⲟⲫⲟⲥ ⲡⲙⲁⲛϣⲱⲡⲉ ⲇⲉ ⲛⲛⲁⲧϩⲏⲧ ϩⲟⲟⲩ

25 ϣⲁⲣⲉⲟⲩⲙⲛⲧⲣⲉ ⲉϥⲛϩⲟⲧ ⲧⲟⲩϫⲉϩⲉⲛⲯⲩⲭⲏ ⲉϩⲉⲛⲡⲉⲧϩⲟⲟⲩ ϣⲁⲣⲉⲡⲉⲕⲣⲟϥ ⲇⲉ ⲧⲙϩⲉϩⲉⲛϭⲟⲗ

26 ⲉⲣⲉⲧϩⲉⲗⲡⲓⲥ ⲛⲧϭⲟⲙ ϩⲛⲧϩⲟⲧⲉ ⲙⲡϫⲟⲉⲓⲥ ⲟⲩⲁⲙⲁϩⲧⲉ ⲉϥⲧⲁϫⲣⲏⲩ ⲧⲉ ⲧⲙⲛⲧⲙⲁⲓⲛⲟⲩⲧⲉ ϥⲛⲁⲕⲱ ⲇⲉ ⲛⲟⲩⲧⲁϫⲣⲟ ⲛⲱⲛϩ ⲛⲛⲉϥϣⲏⲣⲉ

27 ⲟⲩⲡⲏⲅⲏ ⲛⲱⲛϩ ⲡⲉ ⲡⲉⲡⲣⲟⲥⲧⲁⲅⲙⲁ ⲙⲡϫⲟⲉⲓⲥ ϣⲁϥⲣⲁⲕⲧⲟⲩ ⲇⲉ ⲉⲃⲟⲗ ϩⲙⲡⲡⲁϣ ⲙⲡⲙⲟⲩ

28 ⲉⲣⲉⲡⲉⲟⲟⲩ ⲛⲟⲩⲣⲣⲟ ϩⲛⲟⲩⲛⲟϭ ⲙⲙⲏⲏϣⲉ ⲉⲣⲉⲡⲟⲩⲱϣϥ ⲇⲉ ⲛⲟⲩⲇⲩⲛⲁⲥⲧⲏⲥ ϩⲙⲡⲱϫⲛ ⲛⲛⲗⲁⲟⲥ

29 ⲡϩⲁⲣϣϩⲏⲧ ⲛⲣⲱⲙⲉ ⲟϣ ⲙⲙⲛⲧⲥⲁⲃⲉ ⲟⲩⲁⲧϩⲏⲧ ⲇⲉ ⲉⲙⲁⲧⲉ ⲡⲉ ⲡϩⲏⲧ ϣⲏⲙ

30 ⲟⲩⲥⲁⲉⲓⲛ ϩⲙⲡⲉϥϩⲏⲧ ⲡⲉ ⲟⲩⲣⲱⲙⲉ ⲉⲙⲉϥϭⲱⲛⲧ ⲟⲩϫⲟⲟⲗⲉⲥ ⲇⲉ ⲛⲛⲕⲉⲉⲥ ⲡⲉ ⲟⲩϩⲏⲧ ⲛⲣⲉϥⲁⲓⲥⲑⲁⲛⲉ

31 ⲉⲣⲉⲡⲉⲧϩⲓⲗⲁ ⲉⲩϩⲏⲕⲉ ϯⲛⲟⲩϭⲥ ⲙⲡⲉⲛⲧⲁϥⲧⲁⲙⲓⲟϥ ϣⲁⲣⲉⲡⲉⲧⲧⲁⲉⲓⲟ ⲇⲉ ⲙⲙⲟϥ ⲛⲁⲛⲟⲩϩⲏⲕⲉ

32 ⲡⲁⲥⲉⲃⲏⲥ ⲛⲁⲑⲃⲃⲓⲟ ϩⲛⲧⲉϥⲕⲁⲕⲓⲁ ⲟⲩⲇⲓⲕⲁⲓⲟⲥ ⲇⲉ ⲡⲉ ⲡⲉⲧⲛⲁϩⲧⲉ ⲉⲡⲉϥⲟⲩⲟⲡ

33 ⲉⲣⲉⲙⲙⲛⲧⲙⲉ ⲁϣⲁⲓ ϩⲙⲡϩⲏⲧ ⲉⲧⲛⲁⲛⲟⲩϥ ⲙⲡⲣⲱⲙⲉ ⲁⲩⲱ ⲟⲩⲉⲓⲙⲉ ⲉⲧⲥⲟⲫⲓⲁ ⲙⲉⲩⲉⲓⲙⲉ ⲇⲉ ⲉⲣⲟⲥ ϩⲙⲡϩⲏⲧ ⲛⲛⲁⲧϩⲏⲧ

34 ϣⲁⲣⲉⲧⲇⲓⲕⲁⲓⲟⲥⲩⲛⲏ ϫⲓⲥⲉ ⲛⲟⲩϩⲉⲑⲛⲟⲥ ϣⲁⲣⲉⲛⲛⲟⲃⲉ ⲇⲉ ⲧⲥⲃⲕⲟ ⲛϩⲉⲛⲫⲩⲗⲏ

35 ⲡϩⲩⲡⲉⲣⲉⲧⲏⲥ ⲛⲥⲁⲃⲉ ϣⲏⲡ ⲛⲟⲩⲣⲣⲟ ϣⲁϥϥⲓ ⲇⲉ ⲙⲡⲉϥⲥⲱϣ ϩⲛⲧⲉϥⲙⲛⲧⲣⲉϥⲕⲧⲟϥ