Proverbs 15 — Coptic (Sahidic)

1 ϣⲁⲣⲉⲧⲟⲣⲅⲏ ⲧⲁⲕⲟ ⲛⲛⲕⲉⲥⲁⲃⲉⲉⲩ ϣⲁⲣⲉⲟⲩϣⲁϫⲉ ⲉϥⲙⲡⲉϥⲙⲁ ⲕⲧⲟ ⲉⲃⲟⲗ ⲛⲟⲩϭⲱⲛⲧ ϣⲁⲣⲉⲟⲩϣⲁϫⲉ ⲛⲣⲉϥⲗⲩⲡⲓ ⲧⲟⲩⲛⲉⲥϩⲉⲛⲟⲣⲅⲏ

2 ⲡⲗⲁⲥ ⲇⲉ ⲛⲛⲥⲁⲃⲉ ⲥⲟⲟⲩⲛ ⲛⲛⲉⲧⲛⲁⲛⲟⲩⲟⲩ ⲧⲧⲁⲡⲣⲟ ⲇⲉ ⲛⲛⲁⲧϩⲏⲧ ⲥⲟⲟⲩⲛ ⲛⲛⲉⲧϩⲟⲟⲩ

3 ⲛⲃⲁⲗ ⲙⲡⲛⲟⲩⲧⲉ ϭⲱϣⲧ ϩⲙⲙⲁ ⲛⲓⲙ ⲉϫⲛⲛⲛⲉⲧϩⲟⲟⲩ ⲙⲛⲛⲉⲧⲛⲁⲛⲟⲩⲟⲩ

4 ⲟⲩϣⲏⲛ ⲛⲱⲛϩ ⲡⲉ ⲡⲧⲁⲗϭⲟ ⲙⲡⲗⲁⲥ ⲡⲉⲧⲉⲓⲣⲉ ⲇⲉ ⲙⲙⲟϥ ⲛⲁⲥⲉⲓ ⲛⲛⲉϥⲕⲁⲣⲡⲟⲥ

5 ϣⲁⲣⲉⲡⲁⲧϩⲏⲧ ⲕⲙϣⲧⲉⲥⲃⲱ ⲙⲡⲉϥⲉⲓⲱⲧ ⲟⲩⲥⲁⲃⲉ ⲇⲉ ⲛϩⲟⲩⲟ ⲡⲉ ⲡⲉⲧϩⲁⲣⲉϩ ⲉⲛⲉϫⲡⲓⲟ

6 ⲟⲩⲛⲟⲩⲛⲟϭ ⲛϭⲟⲙ ϩⲛⲧⲇⲓⲕⲁⲓⲟⲥⲩⲛⲏ ⲉⲧⲟϣ ⲙⲙⲟⲕⲙⲉⲕ ⲇⲉ ⲛⲛⲁⲥⲉⲃⲏⲥ ⲛⲁⲡⲱⲣⲕ ⲙⲛⲛⲉⲩⲛⲟⲩⲛⲉ ⲟⲩⲛⲟⲩⲛⲟϭ ⲛϭⲟⲙ ϩⲛⲡⲏⲓ ⲛⲛⲇⲓⲕⲁⲓⲟⲥ ⲛⲕⲁⲣⲡⲟⲥ ⲇⲉ ⲛⲛⲁⲥⲉⲃⲏⲥ ⲛⲁⲧⲁⲕⲟ

7 ⲛⲉⲥⲡⲟⲧⲟⲩ ⲛⲛⲥⲟⲫⲟⲥ ⲙⲏⲣ ⲛⲟⲩⲁⲓⲥⲑⲏⲥⲓⲥ ⲛϩⲏⲧ ⲇⲉ ⲛⲛⲁⲧϩⲏⲧ ⲟⲣϫ ⲁⲛ

8 ϩⲉⲛⲃⲟⲧⲉ ⲙⲡϫⲟⲉⲓⲥ ⲛⲉ ⲛⲉⲑⲩⲥⲓⲁ ⲛⲙⲡⲁⲣⲁⲛⲟⲙⲟⲥ ⲛⲉⲑⲩⲥⲓⲁ ⲇⲉ ⲛⲛⲉⲧⲥⲟⲩⲧⲱⲛ ϣⲏⲡ ⲛⲛⲁϩⲣⲁϥ

9 ϩⲉⲛⲃⲟⲧⲉ ⲙⲡϫⲟⲉⲓⲥ ⲛⲉ ⲛⲉϩⲓⲟⲟⲩⲉ ⲙⲡⲁⲥⲉⲃⲏⲥ ϥⲙⲉ ⲇⲉ ⲛⲛⲉⲧⲡⲏⲧ ⲛⲥⲁⲧⲇⲓⲕⲁⲓⲟⲥⲩⲛⲏ

10 ϣⲁⲩⲥⲟⲩⲛⲧⲉⲥⲃⲱ ⲛⲛⲃⲁⲗϩⲏⲧ ϩⲓⲧⲛⲛⲉⲧⲡⲁⲣⲁⲅⲉ ⲛⲉⲧⲙⲟⲥⲧⲉ ⲇⲉ ⲛⲛⲉϫⲡⲓⲟ ⲛⲁⲙⲟⲩ ϩⲛⲟⲩⲥⲱϣ

11 ⲉϣϫⲉ ⲁⲙⲛⲧⲉ ⲙⲛⲡⲛⲟⲩⲛ ⲟⲩⲟⲛϩ ⲉⲃⲟⲗ ⲙⲡⲛⲟⲩⲧⲉ ⲛⲁϣ ⲛϩⲉ ⲛⲧⲟⲟⲩ ⲛⲛⲕⲉϩⲏⲧ ⲁⲛ ⲛⲛⲣⲱⲙⲉ

12 ⲙⲉⲣⲉⲡⲁⲧⲥⲃⲱ ⲙⲉⲣⲉⲡⲉⲧϫⲡⲓⲟ ⲙⲙⲟϥ ⲁⲩⲱ ⲙⲉϥϣⲁϫⲉ ⲙⲛⲛⲥⲟⲫⲟⲥ

13 ϣⲁⲣⲉⲡϩⲏⲧ ⲉⲧⲉⲩⲫⲣⲁⲛⲉ ϯⲟⲩⲣⲟⲧ ⲙⲡϩⲟ ϣⲁϥⲱⲕⲙ ⲇⲉ ⲉϥϩⲛϩⲉⲛⲗⲩⲡⲉⲓ

14 ϣⲁⲣⲉⲡϩⲏⲧ ⲉⲧⲥⲟⲩⲧⲱⲛ ϣⲓⲛⲉ ⲛⲥⲁⲟⲩⲁⲓⲥⲑⲏⲥⲓⲥ ⲧⲧⲁⲡⲣⲟ ⲇⲉ ⲛⲛⲁⲧⲥⲃⲱ ⲛⲁⲥⲟⲩⲛϩⲉⲛⲡⲉⲧϩⲟⲟⲩ ⲡϩⲏⲧ ⲙⲡⲁⲧϩⲏⲧ ⲥⲟⲟⲩⲛ ⲛϩⲉⲛⲡⲉⲧϩⲟⲟⲩ

15 ⲉⲣⲉⲛⲃⲁⲗ ⲛⲛⲉⲧϩⲟⲟⲩ ⲛⲟⲩⲟⲉⲓϣ ⲛⲓⲙ ϭⲱϣⲧ ⲉⲃⲟⲗ ϩⲏⲧⲟⲩ ⲛϩⲉⲛⲡⲉⲧϩⲟⲟⲩ ϣⲁⲣⲉⲛⲉⲧⲛⲁⲛⲟⲩⲟⲩ ⲇⲉ ⲕⲁⲣⲱⲟⲩ ⲛⲟⲩⲟⲉⲓϣ ⲛⲓⲙ

16 ⲛⲁⲛⲟⲩⲟⲩⲕⲟⲩⲓ ϩⲛⲧϩⲟⲧⲉ ⲙⲡϫⲟⲉⲓⲥ ⲉϩⲟⲩⲉⲟⲩⲛⲟϭ ⲛⲁϩⲟ ϩⲛⲟⲩⲙⲛⲧⲁⲧϩⲟⲧⲉ

17 ⲛⲁⲛⲟⲩⲟⲩⲙⲛⲧⲙⲁⲓϣⲙⲙⲟ ⲙⲛϩⲉⲛⲟⲩⲟⲟⲧⲉ ⲡⲣⲟⲥ ⲟⲩⲙⲛⲧϣⲃⲏⲣ ⲙⲛⲟⲩⲭⲁⲣⲓⲥ ⲉϩⲟⲩⲉϩⲉⲛⲙⲁⲥⲉ ⲉⲩⲥⲁⲛⲁϣⲧ ϩⲛⲟⲩⲙⲛⲧϫⲁϫⲉ

18 ϣⲁⲣⲉⲟⲩⲣⲱⲙⲉ ⲛⲣⲉϥϭⲱⲛⲧ ⲥⲟⲃⲧⲉ ⲛϩⲉⲛⲙⲓϣⲉ ϣⲁⲣⲉⲡϩⲁⲣϣϩⲏⲧ ⲇⲉ ⲧⲁⲗϭⲉⲏⲛⲕⲟⲟⲩⲉ ⲉⲧⲛⲁϣⲱⲛⲉ ϣⲁⲣⲉⲡϩⲁⲣϣϩⲏⲧ ⲛⲣⲱⲙⲉ ⲱϣⲙ ⲛϩⲉⲛϩⲁⲡ ϣⲁⲣⲉⲡⲁⲥⲉⲃⲏⲥ ⲇⲉ ⲧⲟⲩⲛⲟⲥⲟⲩ ⲛϩⲟⲩⲟ

19 ⲛⲉϩⲓⲟⲟⲩⲉ ⲛⲛⲁⲣⲅⲟⲥ ⲡⲟⲣϣ ⲛϣⲟⲛⲧⲉ ⲛⲁⲛϫⲱⲱⲣⲉ ⲇⲉ ⲕⲉϩⲕⲱϩ

20 ϣⲁⲣⲉⲟⲩϣⲏⲣⲉ ⲛⲥⲟⲫⲟⲥ ⲉⲩⲫⲣⲁⲛⲉ ⲙⲡⲉϥⲉⲓⲱⲧ ϣⲁⲣⲉⲟⲩϣⲏⲣⲉ ⲇⲉ ⲛⲁⲧϩⲏⲧ ⲕⲙϣⲧⲉϥⲙⲁⲁⲩ

21 ⲛⲉϩⲓⲟⲟⲩⲉ ⲙⲡⲁⲧϩⲏⲧ ⲣϭⲣⲱϩ ⲛⲧⲙⲛⲧⲥⲁⲃⲉ ⲟⲩⲣⲱⲙⲉ ⲇⲉ ⲛⲥⲁⲃⲉ ϣⲁϥⲙⲟⲟϣⲉ ⲉϥⲥⲟⲩⲧⲱⲛ

22 ϣⲁⲣⲉⲛⲉⲧⲉⲛⲥⲉⲧⲁⲉⲓⲟ ⲁⲛ ⲛϩⲉⲛⲥⲟⲟⲩϩⲥ ⲕⲱ ⲛⲥⲱⲟⲩ ⲛϩⲉⲛϣⲟϫⲛⲉ ϣⲁⲣⲉⲡϣⲟϫⲛⲉ ⲇⲉ ⲙⲟⲩⲛ ⲉⲃⲟⲗ ϩⲛⲛϩⲏⲧ ⲛⲛⲣⲉϥⲙⲉⲉⲩⲉ

23 ⲛⲛⲉⲡⲉⲧϩⲟⲟⲩ ⲥⲱⲧⲙ ⲛⲥⲱϥ ⲁⲩⲱ ⲛⲛⲉϥϫⲉⲗⲁⲁⲩ ⲉⲛⲁⲛⲟⲩϥ ϩⲙⲡⲉϥⲟⲩⲟⲉⲓϣ ⲙⲡⲙⲏⲏϣⲉ

24 ϩⲉⲛϩⲓⲟⲟⲩⲉ ⲛⲱⲛϩ ⲛⲉ ⲙⲙⲉⲉⲩⲉ ⲙⲡⲥⲁⲃⲉ ϫⲉⲉϥⲉⲣⲁⲕⲧϥ ⲉⲃⲟⲗ ⲛⲁⲙⲛⲧⲉ ⲛϥⲟⲩϫⲁⲓ

25 ⲡⲛⲟⲩⲧⲉ ⲛⲁϣⲟⲣϣⲣ ⲛⲛⲏⲓ ⲛⲛⲣⲉϥⲥⲱϣ ⲁϥⲧⲁϫⲣⲟ ⲇⲉ ⲛⲛⲧⲟϣ ⲛⲧⲉⲭⲏⲣⲁ

26 ⲟⲩⲃⲟⲧⲉ ⲙⲡϫⲟⲉⲓⲥ ⲡⲉ ⲡⲙⲉⲉⲩⲉ ⲛϫⲓⲛϭⲟⲛⲥ ϩⲉⲛⲙⲛⲧⲣⲙⲛϩⲏⲧ ⲇⲉ ⲛⲉ ⲛϣⲁϫⲉ ⲉⲧⲟⲩⲁⲁⲃ

27 ⲡⲉⲧϫⲓⲇⲱⲣⲟⲛ ⲛⲁⲧⲁⲕⲟϥ ⲟⲩⲁⲁϥ ⲡⲉⲧⲙⲟⲥⲧⲉ ⲇⲉ ⲛϫⲓⲇⲱⲣⲟⲛ ⲛⲁⲱⲛϩ ⲉϣⲁⲩⲕⲱ ⲉⲃⲟⲗ ⲛⲛⲛⲟⲃⲉ ϩⲛϩⲉⲛⲙⲛⲧⲛⲁ ⲙⲛϩⲉⲛⲡⲓⲥⲧⲓⲥ ϩⲛⲧϩⲟⲧⲉ ⲇⲉ ⲙⲡⲛⲟⲩⲧⲉ ⲉⲣⲉⲟⲩⲟⲛ ⲛⲓⲙ ⲣⲓⲕⲉ ⲙⲙⲟϥ ⲉⲃⲟⲗ ⲛⲙⲡⲉⲧϩⲟⲟⲩ

28 ⲉⲣⲉⲛϩⲏⲧ ⲛⲛⲇⲓⲕⲁⲓⲟⲥ ⲙⲉⲗⲉⲧⲁ ⲛⲧⲡⲓⲥⲧⲓⲥ ⲉⲣⲉⲧⲧⲁⲡⲣⲟ ⲇⲉ ⲛⲛⲁⲥⲉⲃⲏⲥ ⲛⲁϫⲱ ⲛϩⲉⲛⲡⲉⲧϩⲟⲟⲩ ⲛⲉϩⲓⲟⲟⲩⲉ ⲙⲡⲣⲱⲙⲉ ⲛⲇⲓⲕⲁⲓⲟⲥ ⲥⲟⲧⲡ ⲙⲡⲛⲟⲩⲧⲉ ⲁⲩⲱ ⲉϣⲁⲣⲉϩⲉⲛϫⲁϫⲉ ϩⲱⲧⲡ ⲉⲃⲟⲗ ϩⲓⲧⲟⲟⲧⲟⲩ

29 ⲡⲛⲟⲩⲧⲉ ⲟⲩⲏⲩ ⲛⲛⲁⲥⲉⲃⲏⲥ ϣⲁϥⲥⲱⲧⲙ ⲇⲉ ⲉⲛⲉϣⲗⲏⲗ ⲛⲛⲇⲓⲕⲁⲓⲟⲥ ⲛⲁⲛⲟⲩϫⲓⲟⲩⲕⲟⲩⲓ ϩⲛⲟⲩⲇⲓⲕⲁⲓⲟⲥⲩⲛⲏ ⲉϩⲟⲩⲉϩⲁϩ ⲛⲅⲉⲛⲏⲙⲁ ϩⲛⲟⲩϫⲓⲛϭⲟⲛⲥ ⲡϩⲏⲧ ⲙⲡⲣⲱⲙⲉ ⲙⲁⲣⲉϥⲙⲉⲉⲩⲉ ⲉϩⲉⲛⲙⲛⲧⲙⲉ ϫⲉⲉⲣⲉⲛⲉϥϩⲓⲟⲟⲩⲉ ⲥⲟⲟⲩⲧⲛ ⲉⲃⲟⲗ ϩⲓⲧⲙⲡϫⲟⲉⲓⲥ

30 ⲡⲃⲁⲗ ⲉⲧⲛⲁⲩ ⲉⲡⲡⲉⲧⲛⲁⲛⲟⲩϥ ϣⲁϥⲉⲩⲫⲣⲁⲛⲉ ⲙⲡϩⲏⲧ ϣⲁⲣⲉⲡⲥⲟⲉⲓⲧ ⲇⲉ ⲉⲧⲛⲁⲛⲟⲩϥ ϯⲟⲩⲣⲟⲧ ⲛⲛⲕⲉⲉⲥ

32 ⲉⲣⲉⲡⲉⲧⲕⲱ ⲛⲥⲱϥ ⲛⲧⲉⲥⲃⲱ ⲙⲟⲥϩⲧⲉ ⲙⲙⲟϥ ⲟⲩⲁⲁϥ ⲡⲉⲧϩⲁⲣⲉϩ ⲇⲉ ⲉⲛⲉϫⲡⲓⲟ ⲙⲉ ⲛⲧⲉϥⲯⲩⲭⲏ ⲙⲁⲩⲁⲁϥ

33 ⲧϩⲟⲧⲉ ⲙⲡϫⲟⲉⲓⲥ ⲧⲉ ⲧⲉⲥⲃⲱ ⲙⲛⲧⲥⲟⲫⲓⲁ ⲁⲩⲱ ⲧⲁⲣⲭⲏ ⲙⲡⲉⲟⲟⲩ ⲛⲁⲟⲩⲱϣⲃ ⲛⲁⲥ ⲡⲉⲟⲟⲩ ⲛⲁⲙⲟⲟϣⲉ ⲙⲛⲛⲉⲧⲑⲃⲃⲓⲏⲩ ⲁⲩⲱ ⲧⲁⲣⲭⲏ ⲙⲡⲉⲟⲟⲩ ⲧⲉ ⲧⲉϩⲟⲩⲉⲓⲧⲉ ⲛⲇⲓⲕⲁⲓⲟⲥⲩⲛⲏ ⲙⲡⲛⲟⲩⲧⲉ ⲉⲧⲥⲟⲩⲧⲱⲛ