Read Proverbs 13 side by side with translations · The Final Bible
1 ϣⲁⲣⲉⲟⲩϣⲏⲣⲉ ⲛⲥⲁⲃⲉ ⲥⲱⲧⲙ ⲛⲥⲁⲡⲉϥⲉⲓⲱⲧ ⲉⲣⲉⲟⲩϣⲏⲣⲉ ⲇⲉ ⲛⲁⲧⲥⲱⲧⲙ ϩⲙⲡⲧⲁⲕⲟ
2 ⲡⲉⲧⲛⲁⲛⲟⲩϥ ⲛⲁⲟⲩⲱⲙ ⲉⲃⲟⲗ ϩⲙⲡⲕⲁⲣⲡⲟⲥ ⲛⲧⲇⲓⲕⲁⲓⲟⲥⲩⲛⲏ ⲛⲉⲯⲩⲭⲏ ⲇⲉ ⲛⲙⲡⲁⲣⲁⲛⲟⲙⲟⲥ ⲛⲁⲙⲟⲩ ⲉⲩⲟ ⲛϣⲁⲣⲁϩⲉ
3 ⲡⲉⲧϩⲁⲣⲉϩ ⲣⲱϥ ⲉϥϩⲁⲣⲉϩ ⲉⲧⲉϥⲯⲩⲭⲏ ⲡⲉⲧϣⲧⲣⲧⲱⲣ ⲇⲉ ϩⲛⲛⲉϥⲥⲡⲟⲧⲟⲩ ⲛⲁϣⲧⲣⲧⲱⲣϥ ⲟⲩⲁⲁϥ
4 ⲁⲣⲅⲟⲥ ⲛⲓⲙ ϩⲛϩⲉⲛⲉⲡⲓⲑⲩⲙⲓⲁ ⲛϭⲓϫ ⲇⲉ ⲛⲛϫⲱⲱⲣⲉ ϩⲛⲟⲩⲱⲣϫ
5 ⲡⲇⲓⲕⲁⲓⲟⲥ ⲙⲟⲥⲧⲉ ⲛⲟⲩϣⲁϫⲉ ⲛϫⲓⲛϭⲟⲛⲥ ⲡⲁⲥⲉⲃⲏⲥ ⲇⲉ ⲛⲁϫⲓ ϣⲓⲡⲉ ⲛϥⲧⲙϫⲓ ⲛⲟⲩⲡⲁⲣⲣⲏⲥⲓⲁ
6 ϣⲁⲣⲉⲧⲇⲓⲕⲁⲓⲟⲥⲩⲛⲏ ϩⲁⲣⲉϩ ⲉⲛⲃⲁⲗϩⲏⲧ ϣⲁⲣⲉⲡⲛⲟⲃⲉ ⲇⲉ ⲣⲁⲥⲉⲃⲏⲥ ⲛⲕⲣⲟϥ
7 ⲟⲩⲛⲛⲉⲧⲉⲓⲣⲉ ⲙⲙⲟⲟⲩ ⲛⲣⲙⲙⲁⲟ ⲉⲙⲛⲧⲟⲩⲗⲁⲁⲩ ⲁⲩⲱ ⲟⲩⲛⲛⲉⲧⲑⲃⲃⲓⲟ ⲙⲙⲟⲟⲩ ⲉⲩϩⲛⲟⲩⲛⲟϭ ⲙⲙⲛⲧⲣⲙⲙⲁⲟ
8 ⲡⲥⲱⲧⲉ ⲛⲧⲉⲯⲩⲭⲏ ⲙⲡⲣⲱⲙⲉ ⲧⲉ ⲧⲉϥⲙⲛⲧⲣⲙⲙⲁⲟ ⲙⲉⲣⲉⲡϩⲏⲕⲉ ⲇⲉ ϥⲓ ϩⲁⲟⲩⲁⲡⲉⲓⲗⲏ
9 ⲡⲟⲩⲟⲉⲓⲛ ϣⲟⲟⲡ ⲛⲛⲇⲓⲕⲁⲓⲟⲥ ⲛⲟⲩⲟⲉⲓϣ ⲛⲓⲙ ⲡⲟⲩⲟⲉⲓⲛ ⲇⲉ ⲛⲛⲁⲥⲉⲃⲏⲥ ⲛⲁϫⲉⲛⲁ ⲛⲉⲯⲩⲭⲏ ⲛⲕⲣⲟϥ ⲡⲗⲁⲛⲁ ϩⲛϩⲉⲛⲛⲟⲃⲉ ϣⲁⲣⲉⲛⲇⲓⲕⲁⲓⲟⲥ ⲇⲉ ϣⲛϩⲧⲏⲩ ⲛⲥⲉⲛⲁ
10 ϣⲁⲣⲉⲡⲡⲉⲧϩⲟⲟⲩ ⲣϩⲉⲛⲡⲉⲧϩⲟⲟⲩ ϩⲛⲟⲩⲥⲱϣ ϩⲉⲛⲥⲟⲫⲟⲥ ⲇⲉ ⲛⲉ ⲛⲉⲧⲥⲟⲟⲩⲛ ⲛⲧⲇⲓⲕⲁⲓⲟⲥⲩⲛⲏ
11 ⲧⲙⲛⲧⲣⲙⲙⲁⲟ ⲉⲧⲟⲩϭⲉⲡⲏ ⲉϫⲡⲟⲥ ϩⲛⲟⲩⲁⲛⲟⲙⲓⲁ ⲛⲁⲣϭⲣⲱϩ ⲧⲉⲧⲟⲩⲥⲟⲩⲱϩ ⲇⲉ ⲙⲙⲟⲥ ⲉϩⲟⲩⲛ ϩⲛⲟⲩⲙⲛⲧⲙⲁⲓⲛⲟⲩⲧⲉ ⲛⲁⲁϣⲁⲓ
12 ϥⲥⲟⲧⲡ ⲛϭⲓⲡⲉⲧⲣϣⲟⲣⲡ ⲉⲃⲟⲏⲑⲉⲓ ϩⲙⲡϩⲏⲧ ⲉϩⲟⲩⲉⲡⲉⲧⲉⲣⲏⲧ ⲁⲩⲱ ⲉϥⲣϩⲧⲏϥ ϣⲁⲣⲉⲟⲩϣⲏⲛ ⲅⲁⲣ ⲛⲱⲛϩ ϣⲱⲡⲉ ϩⲛⲟⲩⲟⲩⲱϣ ⲉⲛⲁⲛⲟⲩϥ
13 ⲡⲉⲧⲕⲁⲧⲁⲫⲣⲟⲛⲉⲓ ⲛⲟⲩϩⲱⲃ ⲥⲉⲛⲁⲕⲁⲧⲁⲫⲣⲟⲛⲉⲓ ⲙⲙⲟϥ ⲡⲉⲧⲣϩⲟⲧⲉ ⲇⲉ ϩⲏⲧⲥ ⲛⲧⲉⲛⲧⲟⲗⲏ ⲡⲁⲓ ⲡⲉ ⲉⲧⲟⲩⲟϫ ⲙⲛⲗⲁⲁⲩ ⲛⲁⲅⲁⲑⲟⲛ ⲛⲁϣⲱⲡⲉ ⲛⲟⲩϣⲏⲣⲉ ⲛⲕⲣⲟϥ ⲟⲩⲛϩⲉⲛϩⲃⲏⲩⲉ ⲇⲉ ⲉⲩⲥⲟⲩⲧⲱⲛ ⲛⲁϣⲱⲡⲉ ⲛⲟⲩϩⲙϩⲁⲗ ⲛⲥⲟⲫⲟⲥ
14 ⲟⲩⲛⲟⲩⲡⲏⲅⲏ ⲛⲱⲛϩ ϩⲛⲛⲉϩⲓⲟⲟⲩⲉ ⲛⲧⲥⲟⲫⲓⲁ ⲡⲁⲧϩⲏⲧ ⲇⲉ ⲛⲁⲙⲟⲩ ϩⲛⲟⲩⲡⲁϣ
15 ϣⲁⲣⲉⲟⲩⲙⲛⲧⲣⲙⲛϩⲏⲧ ⲉⲛⲁⲛⲟⲩⲥ ϯ ⲛⲟⲩϩⲙⲟⲧ ⲟⲩⲧⲁⲕⲟ ⲇⲉ ⲛⲉ ⲛⲉϩⲓⲟⲟⲩⲉ ⲛⲙⲡⲁⲣⲁⲛⲟⲙⲟⲥ
16 ϣⲁⲣⲉⲡⲁⲛⲟⲩⲣⲅⲟⲥ ⲛⲓⲙ ⲣϩⲱⲃ ϩⲛⲟⲩϣⲟϫⲛⲉ ϣⲁⲣⲉⲡⲁⲧϩⲏⲧ ⲇⲉ ⲡⲣϣⲧⲉϥⲕⲁⲕⲓⲁ ⲉⲃⲟⲗ
17 ⲟⲩⲛⲟⲩϥⲁⲓϣⲓⲛⲉ ⲛⲛⲁϣⲧⲙⲙⲉ ⲛⲁϩⲉ ⲉϩⲣⲁⲓ ⲉϩⲉⲛⲡⲉⲧϩⲟⲟⲩ ϣⲁⲣⲉⲡϥⲁⲓϣⲓⲛⲉ ⲇⲉ ⲉⲧⲛϩⲟⲧ ⲧⲁⲗϭⲟ
18 ϣⲁⲣⲉⲧⲉⲥⲃⲱ ϥⲓ ⲛⲟⲩⲙⲛⲧϩⲏⲕⲉ ⲙⲛⲟⲩⲥⲱϣ ⲡⲉⲧϩⲁⲣⲉϩ ⲇⲉ ⲉϩⲉⲛϫⲡⲓⲟ ⲛⲁϫⲓⲉⲟⲟⲩ
19 ϣⲁⲣⲉⲛⲉⲡⲓⲑⲩⲙⲓⲁ ⲛⲛⲣⲙⲛⲛⲟⲩⲧⲉ ϯⲟⲩⲛⲟϥ ⲛⲛⲉⲩⲯⲩⲭⲏ ⲛⲉⲡⲓⲑⲩⲙⲓⲁ ⲇⲉ ⲛⲛⲁⲥⲉⲃⲏⲥ ⲟⲩⲏⲩ ⲉⲃⲟⲗ ⲙⲡⲥⲟⲟⲩⲛ ⲛϫⲱϩⲙ ⲛⲛⲁⲥⲉⲃⲏⲥ ⲟⲩⲏⲩ ⲉⲃⲟⲗ ⲛⲁⲓⲥⲑⲏⲥⲓⲥ ⲛⲁⲥⲉⲃⲏⲥ ⲇⲉ ⲛⲁⲥⲁϩⲟⲩ ⲉⲃⲟⲗ ⲛⲛⲣⲙⲛⲟⲩⲧⲉ
20 ⲉⲕϣⲁⲛⲙⲟⲟϣⲉ ⲙⲛϩⲉⲛⲥⲟⲫⲟⲥ ⲕⲛⲁⲣⲥⲟⲫⲟⲥ ⲡⲉⲧⲙⲟⲟϣⲉ ⲇⲉ ⲙⲛϩⲉⲛⲁⲧϩⲏⲧ ϥⲛⲁⲟⲩⲱⲛϩ ⲉⲃⲟⲗ ⲛⲇⲓⲕⲁⲓⲟⲥ ⲛⲁϣⲱⲡⲉ ϩⲛⲟⲩⲉⲓⲣⲏⲛⲏ
21 ⲙⲡⲉⲧϩⲟⲟⲩ ⲛⲁⲡⲱⲧ ⲛⲥⲁⲛⲣⲉϥⲣⲛⲟⲃⲉ ⲛⲁⲅⲁⲑⲟⲛ ⲇⲉ ⲛⲁⲧⲁϩⲉⲛⲇⲓⲕⲁⲓⲟⲥ
22 ⲡⲣⲱⲙⲉ ⲛⲇⲓⲕⲁⲓⲟⲥ ⲛⲁⲡⲱϣ ⲉϫⲛⲛϣⲏⲣⲉ ⲛⲛⲉϥϣⲏⲣⲉ ⲉⲩⲥⲟⲩⲱϩ ⲉϩⲟⲩⲛ ⲛⲧⲙⲛⲧⲣⲙⲙⲁⲟ ⲛⲛⲁⲥⲉⲃⲏⲥ ⲛⲛⲇⲓⲕⲁⲓⲟⲥ
23 ⲛϫⲱⲱⲣⲉ ⲛⲁⲙⲧⲟⲛ ⲙⲙⲟⲟⲩ ⲛϩⲁϩ ⲛⲣⲟⲙⲡⲉ ϩⲛⲟⲩⲙⲛⲧⲣⲙⲙⲁⲟ ⲁϩⲟⲓⲛⲉ ⲇⲉ ⲧⲁⲕⲟ ⲛⲧⲉⲩⲛⲟⲩ
24 ⲡⲉⲧϯⲥⲟ ⲉⲡⲉϥϭⲉⲣⲱⲃ ⲉϥⲙⲟⲥϩⲧⲉ ⲙⲡⲉϥϣⲏⲣⲉ ⲡⲉⲧⲙⲉ ⲇⲉ ⲙⲡⲱϥ ϥⲛⲁϯⲥⲃⲱ ⲛⲁϥ ⲉⲙⲁⲧⲉ
25 ⲉⲣⲉⲡⲇⲓⲕⲁⲓⲟⲥ ⲟⲩⲱⲙ ϣⲁϥⲧⲥⲓⲟ ⲛⲧⲉϥⲯⲩⲭⲏ ⲛⲉⲯⲩⲭⲏ ⲇⲉ ⲛⲛⲁⲥⲉⲃⲏⲥ ⲛⲁⲣϭⲣⲱϩ
Proverbs 12 · Proverbs 14 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)