Read Proverbs 12 side by side with translations · The Final Bible
1 ϣⲁⲣⲉⲡⲉⲧⲙⲉ ⲛⲧⲉⲥⲃⲱ ⲙⲉⲣⲉⲧⲁⲓⲥⲑⲏⲥⲓⲥ ⲟⲩⲁⲧϩⲏⲧ ⲇⲉ ⲡⲉ ⲡⲉⲧⲙⲟⲥⲧⲉ ⲛⲛⲉϫⲡⲓⲟ
2 ⲛⲁⲛⲟⲩ ⲡⲉⲛⲧⲁϥϩⲉ ⲉⲩϩⲙⲟⲧ ⲛⲛⲁϩⲣⲙⲡⲛⲟⲩⲧⲉ ⲉⲣⲉⲟⲩⲣⲱⲙⲉ ⲇⲉ ⲛⲣⲉϥⲙⲉⲉⲩⲉ ⲉⲡⲡⲉⲧϩⲟⲟⲩ ⲡⲁⲣⲁⲛⲟⲙⲉⲓ
3 ⲙⲛⲣⲱⲙⲉ ⲛⲁⲥⲟⲟⲩⲧⲛ ⲉⲃⲟⲗ ϩⲛⲟⲩⲁⲛⲟⲙⲟⲥ ⲛⲛⲟⲩⲛⲉ ⲇⲉ ⲛⲛⲇⲓⲕⲁⲓⲟⲥ ⲛⲁⲡⲱⲣⲕ ⲁⲛ
4 ⲟⲩⲕⲗⲟⲙ ⲙⲡⲉⲥϩⲁⲓ ⲡⲉ ⲟⲩⲥϩⲓⲙⲉ ⲛϫⲱⲱⲣⲉ ⲛⲧϩⲉ ⲛⲟⲩϥⲛⲧ ⲉϥϩⲛⲟⲩϣⲉ ⲁⲩⲱ ⲟⲩϩⲟⲟⲗⲉ ϩⲛⲟⲩϣⲧⲏⲛ ⲧⲁⲓ ⲧⲉ ⲧϩⲉ ⲉⲧⲉⲣⲉⲟⲩⲥϩⲓⲙⲉ ⲉⲥⲃⲟⲟⲛⲉ ⲛⲁⲧⲁⲕⲉⲡⲉⲥϩⲁⲓ
5 ϩⲉⲛϩⲁⲡ ⲛⲉ ⲙⲙⲉⲉⲩⲉ ⲛⲛⲇⲓⲕⲁⲓⲟⲥ ϣⲁⲣⲉⲛⲁⲥⲉⲃⲏⲥ ⲇⲉ ⲣϩⲙⲙⲉ ⲛϩⲉⲛⲕⲣⲟϥ
6 ⲧⲧⲁⲡⲣⲟ ⲛⲛⲇⲓⲕⲁⲓⲟⲥ ⲛⲁⲧⲟⲩϫⲟⲟⲩ ⲟⲩⲕⲣⲟϥ ⲇⲉ ⲧⲉ ⲧⲧⲁⲡⲣⲟ ⲛⲛⲁⲥⲉⲃⲏⲥ
7 ⲛⲁⲥⲉⲃⲏⲥ ⲛⲁⲧⲁⲕⲟ ϩⲙⲡⲙⲁ ⲉⲧϥⲛⲁⲕⲟⲧϥ ⲉⲣⲟϥ ⲛⲏⲓ ⲇⲉ ⲛⲛⲇⲓⲕⲁⲓⲟⲥ ⲛⲁⲙⲟⲩⲛ ⲉⲃⲟⲗ
8 ϣⲁⲣⲉⲛⲣⲙⲛϯⲙⲉ ⲙⲡⲣⲙⲛϩⲏⲧ ⲥⲙⲟⲩ ⲉⲧⲉϥⲧⲁⲡⲣⲟ ϣⲁⲩⲕⲱⲙϣ ⲇⲉ ⲛⲥⲁⲡϭⲁⲃϩⲏⲧ
9 ⲛⲁⲛⲟⲩⲟⲩⲣⲱⲙⲉ ⲉϥⲟ ⲛϩⲙϩⲁⲗ ⲛⲁϥ ⲟⲩⲁⲁϥ ⲉϥϩⲛⲟⲩⲥⲱϣ ⲉϩⲟⲩⲉⲡⲉⲧϯⲉⲟⲟⲩ ⲛⲁϥ ⲟⲩⲁⲁϥ ⲉϥⲣϭⲣⲱϩ ⲙⲡⲟⲉⲓⲕ
10 ϣⲁⲣⲉⲡⲇⲓⲕⲁⲓⲟⲥ ⲛⲁⲛⲛⲉⲯⲩⲭⲏ ⲛⲛⲉϥⲧⲃⲛⲟⲟⲩⲉ ϩⲛⲁⲧⲛⲁ ⲇⲉ ⲛⲉ ⲙⲙⲛⲧϣⲁⲛϩⲧⲏϥ ⲛⲛⲁⲥⲉⲃⲏⲥ
11 ⲡⲉⲧⲣϩⲱⲃ ⲉⲡⲉϥⲕⲁϩ ⲛⲁⲥⲉⲓ ⲛⲟⲉⲓⲕ ⲛⲉⲧⲡⲏⲧ ⲇⲉ ⲛⲥⲁϩⲉⲛⲡⲉⲧϣⲟⲩⲉⲓⲧ ϩⲉⲛⲁⲧⲥⲃⲱ ⲛⲉ ⲡⲉⲧⲟⲩⲛⲟϥ ϩⲣⲁⲓ ϩⲛϩⲉⲛⲙⲁⲛⲥⲉⲏⲣⲡ ϥⲛⲁⲕⲱ ⲛⲟⲩⲥⲱϣ ϩⲛⲛⲉϥⲙⲁⲛϣⲱⲡⲉ
12 ⲛⲉⲡⲓⲑⲩⲙⲓⲁ ⲛⲛⲁⲥⲉⲃⲏⲥ ϩⲟⲟⲩ ⲉⲣⲉⲛⲛⲟⲩⲛⲉ ⲇⲉ ⲛⲛⲣⲙⲡⲛⲟⲩⲧⲉ ϩⲛϩⲉⲛⲧⲁϫⲣⲟ
13 ⲡⲣⲉϥⲣⲛⲟⲃⲉ ⲛⲁϩⲉ ⲉⲩⲡⲁϣ ⲉⲧⲃⲉⲙⲙⲛⲧⲙⲛⲧⲣⲉ ⲛⲛⲉϥⲥⲡⲟⲧⲟⲩ ⲡⲇⲓⲕⲁⲓⲟⲥ ⲇⲉ ⲛⲁⲣⲃⲟⲗ ⲉⲣⲟⲟⲩ ⲥⲉⲛⲁⲛⲁ ⲙⲡⲉⲧϯ ⲛϩⲧⲏϥ ⲙⲙⲁⲧⲉ ⲡⲉⲧⲧⲱⲙⲛⲧ ⲇⲉ ϩⲓⲣⲛⲙⲡⲩⲗⲏ ⲛⲁⲥⲁⲛϣ ⲛϩⲉⲛⲯⲩⲭⲏ
14 ⲧⲉⲯⲩⲭⲏ ⲙⲡⲣⲱⲙⲉ ⲛⲁⲥⲉⲓ ⲛϩⲉⲛⲡⲉⲧⲛⲁⲛⲟⲩϥ ⲉⲃⲟⲗ ϩⲛⲛⲕⲁⲣⲡⲟⲥ ⲛⲧⲉϥⲧⲁⲡⲣⲟ ⲥⲉⲛⲁϯ ⲇⲉ ⲛⲁϥ ⲙⲡⲧⲟⲩⲓⲟ ⲛⲛⲉϥⲥⲡⲟⲧⲟⲩ
15 ⲛⲉϩⲓⲟⲟⲩⲉ ⲛⲛⲁⲧϩⲏⲧ ⲥⲟⲩⲧⲱⲛ ⲙⲡⲉⲩⲙⲧⲟ ⲉⲃⲟⲗ ϣⲁⲣⲉⲛⲥⲟⲫⲟⲥ ⲇⲉ ⲥⲱⲧⲙ ⲛⲥⲁⲟⲩϣⲟϫⲛⲉ
16 ϣⲁⲣⲉⲡⲁⲧϩⲏⲧ ϫⲉⲧⲉϥⲟⲣⲅⲏ ⲙⲙⲏⲛⲉ ϣⲁⲣⲉⲡⲥⲁⲃⲉ ⲇⲉ ϩⲱⲡ ⲑⲙⲡⲉϥⲥⲱϣ
17 ϣⲁⲣⲉⲡⲇⲓⲕⲁⲓⲟⲥ ϫⲱ ⲛⲟⲩⲡⲓⲥⲧⲓⲥ ⲉⲥⲟⲩⲟⲛϩ ⲉⲃⲟⲗ ⲟⲩⲕⲣⲟϥ ⲇⲉ ⲡⲉ ⲡⲙⲛⲧⲣⲉ ⲛⲣⲉϥϫⲓⲛϭⲟⲛⲥ
18 ⲟⲩⲛⲡⲉⲧϣⲁϫⲉ ⲉⲩⲟ ⲛⲧϩⲉ ⲛⲛⲉⲧⲕⲱⲛⲥ ϩⲛⲟⲩⲥⲏϥⲉ ϣⲁⲣⲉⲛⲗⲁⲥ ⲇⲉ ⲛⲛⲥⲟⲫⲟⲥ ⲧⲁⲗϭⲟ
19 ϣⲁⲣⲉϩⲉⲛⲥⲡⲟⲧⲟⲩ ⲙⲙⲉ ⲥⲟⲟⲩⲧⲛ ⲛⲟⲩⲙⲛⲧⲙⲛⲧⲣⲉ ⲟⲩⲣⲉϥⲙⲛⲧⲣⲉ ⲇⲉ ⲛϭⲉⲡⲏ ⲟⲩⲛⲧϥⲟⲩⲗⲁⲥ ⲛϫⲓⲛϭⲟⲛⲥ
20 ⲟⲩⲕⲣⲟϥ ⲡⲉⲧϩⲙⲡϩⲏⲧ ⲙⲡⲉⲧⲙⲉⲉⲩⲉ ⲉϩⲉⲛⲡⲉⲧϩⲟⲟⲩ ⲛⲉⲧϣⲟϫⲛⲉ ⲇⲉ ⲉⲩⲉⲓⲣⲏⲛⲏ ⲛⲁⲉⲩⲫⲣⲁⲛⲉ
21 ⲙⲛⲗⲁⲁⲩ ⲛϫⲓⲛϭⲟⲛⲥ ⲛⲁⲣⲁⲛⲁϥ ⲙⲡⲇⲓⲕⲁⲓⲟⲥ ⲛⲁⲥⲉⲃⲏⲥ ⲇⲉ ⲛⲁⲙⲟⲩ ϩⲙⲡⲡⲉⲧϩⲟⲟⲩ
22 ϩⲛⲃⲟⲧⲉ ⲛⲛⲁϩⲣⲙⲡϫⲟⲉⲓⲥ ⲛⲉ ϩⲉⲛⲥⲡⲟⲧⲟⲩ ⲛϭⲟⲗ ⲡⲉⲧⲉⲓⲣⲉ ⲇⲉ ⲛⲧⲡⲓⲥⲧⲓⲥ ϣⲏⲡ ⲛⲛⲁϩⲣⲁϥ
23 ⲟⲩⲑⲣⲟⲛⲟⲥ ⲛⲁⲓⲥⲑⲏⲥⲓⲥ ⲡⲉ ⲟⲩⲣⲱⲙⲉ ⲛⲥⲁⲃⲉ ⲡϩⲏⲧ ⲇⲉ ⲙⲡⲁⲧϩⲏⲧ ⲛⲁⲧⲱⲙⲛⲧ ⲉϩⲉⲛⲥⲁϩⲟⲩ
24 ⲧϭⲓϫ ⲛⲛⲥⲱⲧⲡ ⲛⲁⲁⲙⲁϩⲧⲉ ⲛⲟⲩⲧⲁϫⲣⲟ ⲛⲉⲕⲣⲟϥ ⲇⲉ ⲛⲁϣⲱⲡⲉ ϩⲛⲟⲩϣⲱⲗ ⲡϩⲏⲧ ⲙⲡⲁⲧϩⲏⲧ ⲛⲁⲧⲱⲙⲛⲧ ⲉϩⲉⲛⲡⲉⲧϩⲟⲟⲩ
25 ϣⲁⲣⲉⲟⲩϣⲁϫⲉ ⲛϩⲟⲧⲉ ϣⲧⲣⲧⲣⲡϩⲏⲧ ⲙⲡⲣⲱⲙⲉ ϣⲁⲣⲉⲟⲩⲟⲩⲱ ⲇⲉ ⲉⲛⲁⲛⲟⲩϥ ⲉⲩⲫⲣⲁⲛⲉ ⲙⲙⲟϥ
26 ϣⲁⲣⲉⲟⲩⲇⲓⲕⲁⲓⲟⲥ ⲟⲩⲟⲛϩϥ ⲉⲃⲟⲗ ⲙⲡⲉϥϣⲃⲏⲣ ϩⲉⲛⲙⲛⲧϩⲁⲕ ⲇⲉ ⲛⲉ ⲛϣⲟϫⲛⲉ ⲛⲛⲣⲙⲛⲛⲟⲩⲧⲉ ⲧⲉϩⲓⲏ ⲇⲉ ⲛⲛⲁⲥⲉⲃⲏⲥ ⲛⲁⲥⲟⲣⲙⲟⲩ
27 ⲡⲉⲕⲣⲟϥ ⲛⲁⲁⲙⲁϩⲧⲉ ⲁⲛ ⲛⲟⲩϭⲟⲣϭⲥ ⲟⲩⲙⲛⲧⲣⲙⲙⲁⲟ ⲇⲉ ⲉⲥⲧⲁⲓⲏⲩ ⲡⲉ ⲟⲩⲣⲱⲙⲉ ⲉϥⲟⲩⲁⲁⲃ
28 ⲉⲣⲉⲡⲱⲛϩ ϩⲓⲛⲉϩⲓⲟⲟⲩⲉ ⲛⲧⲇⲓⲕⲁⲓⲟⲥⲩⲛⲏ ⲉⲣⲉⲛⲉϩⲓⲟⲟⲩⲉ ⲇⲉ ⲛⲣⲉϥⲙⲉⲉⲩⲉ ⲉⲡⲡⲉⲧϩⲟⲟⲩ ϣⲟⲟⲡ ⲉⲡⲙⲟⲩ
Proverbs 11 · Proverbs 13 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)