Read Proverbs 11 side by side with translations · The Final Bible
1 ϩⲉⲛⲃⲟⲧⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛⲉ ϩⲉⲛϣⲓ ⲛⲕⲣⲟϥ ⲡϣⲓ ⲇⲉ ⲙⲙⲉ ⲥⲟⲧⲡ ⲛⲁϥ
2 ⲡⲙⲁ ⲉⲧⲉⲣⲉⲡⲥⲱϣ ⲛⲁⲃⲱⲕ ⲉϩⲟⲩⲛ ⲉⲣⲟϥ ⲉⲣⲉⲡⲕⲉⲥⲱϣϥ ⲙⲙⲁⲩ ⲧⲧⲁⲡⲣⲟ ⲇⲉ ⲛⲛⲉⲧⲑⲃⲃⲓⲏⲩ ⲛⲁⲙⲉⲗⲉⲧⲁ ⲛⲧⲥⲟⲫⲓⲁ
3 ⲧⲙⲛⲧⲃⲁⲗϩⲏⲧ ⲇⲉ ⲛⲛⲉⲧⲥⲟⲩⲧⲱⲛ ⲛⲁϫⲓⲙⲟⲉⲓⲧ ϩⲏⲧⲟⲩ ⲉⲣϣⲁⲛⲡⲇⲓⲕⲁⲓⲟⲥ ⲙⲟⲩ ϣⲁⲩⲣϩⲧⲏⲩ ⲛⲥⲱϥ ϣⲁⲩⲉⲓⲁⲧⲟⲟⲧⲟⲩ ⲇⲉ ⲛⲥⲁⲡⲧⲁⲕⲟ ⲙⲡⲁⲥⲉⲃⲏⲥ ⲁⲩⲱ ϣⲁⲩⲣⲁϣⲉ ⲙⲙⲟϥ
4 ⲙⲛⲭⲣⲏⲙⲁ ⲛⲁϯϩⲏⲩ ⲙⲡⲉϩⲟⲟⲩ ⲛⲧⲟⲣⲅⲏ ϣⲁⲣⲉⲧⲇⲓⲕⲁⲓⲟⲥⲩⲛⲏ ⲇⲉ ⲧⲟⲩϫⲟ ⲉⲃⲟⲗ ϩⲙⲡⲙⲟⲩ
5 ⲧⲇⲓⲕⲁⲓⲟⲥⲩⲛⲏ ⲙⲡⲉⲧⲟⲩⲁⲁⲃ ⲛⲁⲥⲟⲟⲩⲧⲛ ⲛⲛⲉϥϩⲓⲟⲟⲩⲉ ⲡⲣⲉϥϫⲓⲛϭⲟⲛⲥ ⲇⲉ ⲛⲁϩⲉ ⲉϩⲣⲁⲓ ⲉⲩⲙⲛⲧϣⲁϥⲧⲉ
6 ⲧⲇⲓⲕⲁⲓⲟⲥⲩⲛⲏ ⲛⲛⲣⲱⲙⲉ ⲉⲧⲥⲟⲩⲧⲱⲛ ⲛⲁⲧⲟⲩϫⲟⲟⲩ ⲉⲣⲉⲙⲡⲁⲣⲁⲛⲟⲙⲟⲥ ⲇⲉ ⲛⲁⲧⲁⲕⲟ ϩⲛⲧⲉⲩⲙⲛⲧϣⲁϥⲧⲉ
7 ⲉⲣϣⲁⲛⲟⲩⲣⲱⲙⲉ ⲉⲛⲁⲛⲟⲩϥ ⲙⲟⲩ ⲙⲉⲣⲉⲧⲉϥϩⲉⲗⲡⲓⲥ ⲧⲁⲕⲟ ⲡϣⲟⲩϣⲟⲩ ⲛⲛⲁⲥⲉⲃⲏⲥ ⲛⲁⲧⲁⲕⲟ
8 ⲡⲇⲓⲕⲁⲓⲟⲥ ϣⲁϥⲉⲓ ⲉⲃⲟⲗ ϩⲁϩⲉⲛϣⲛⲏⲩ ⲥⲉⲛⲁϯ ⲇⲉ ⲙⲡⲣⲉϥⲣⲛⲟⲃⲉ ⲉⲡⲉϥⲙⲁ
9 ⲟⲩⲛⲟⲩϭⲟⲣϭⲥ ⲛⲛⲣⲙⲛϯⲙⲉ ϩⲛⲧⲧⲁⲡⲣⲟ ⲛⲙⲡⲁⲣⲁⲛⲟⲙⲟⲥ ⲧⲁⲓⲥⲑⲏⲥⲓⲥ ⲇⲉ ⲛⲛⲇⲓⲕⲁⲓⲟⲥ ⲥⲟⲩⲧⲱⲛ
10 ϣⲁⲣⲉⲙⲡⲟⲗⲓⲥ ⲇⲉ ϫⲓⲥⲉ ϩⲛⲛⲉⲥⲙⲟⲩ ⲛⲛⲇⲓⲕⲁⲓⲟⲥ
11 ϣⲁⲩϣⲣϣⲱⲣⲟⲩ ⲇⲉ ϩⲛⲧⲧⲁⲡⲣⲟ ⲛⲛⲁⲥⲉⲃⲏⲥ
12 ϣⲁⲣⲉⲡⲁⲧϩⲏⲧ ⲕⲙϣⲛⲉϥⲣⲙⲛϯⲙⲉ ϣⲁⲣⲉⲟⲩⲣⲱⲙⲉ ⲇⲉ ⲛⲥⲁⲃⲉ ⲕⲁⲣⲱϥ
13 ϣⲁⲣⲉⲟⲩⲣⲱⲙⲉ ⲛⲗⲁⲥ ⲥⲛⲁⲩ ϭⲗⲡϩⲉⲛϣⲟϫⲛⲉ ⲉⲃⲟⲗ ϩⲛⲟⲩⲥⲟⲟⲩϩⲥ ϣⲁⲣⲉⲡⲡⲓⲥⲧⲟⲥ ⲇⲉ ⲑϩⲙⲡⲉϥϣⲁϫⲉ ϩⲱⲡ ⲛϩⲉⲛϩⲃⲏⲩⲉ
14 ϣⲁⲣⲉⲛⲉⲧⲉⲙⲛⲧⲟⲩⲡⲣϩⲙⲙⲉ ⲥⲣⲟϥⲣⲉϥ ⲛⲧϩⲉ ⲛϩⲉⲛϭⲱⲃⲉ ⲉⲣⲉⲡⲟⲩϫⲁⲓ ⲇⲉ ϩⲛⲟⲩⲛⲟϭ ⲛϣⲟϫⲛⲉ
15 ϣⲁⲣⲉⲡⲡⲟⲛⲏⲣⲟⲥ ⲙⲉⲉⲩⲉ ⲉⲛⲉⲡⲉⲧϩⲟⲟⲩ ⲉϥϣⲁⲛⲧⲱϩ ⲙⲛⲡⲇⲓⲕⲁⲓⲟⲥ ϥⲙⲟⲥϩⲧⲉ ⲇⲉ ⲛⲛⲉϩⲃⲏⲩⲉ ⲙⲡⲱⲣϫ
16 ϣⲁⲣⲉⲟⲩⲥϩⲓⲙⲉ ⲉⲩⲑⲛⲧⲥϩⲙⲟⲧ ⲧⲟⲩⲛⲉⲥⲟⲩⲉⲟⲟⲩ ⲙⲡⲉⲥϩⲁⲓ ⲟⲩⲑⲣⲟⲛⲟⲥ ⲇⲉ ⲛⲥⲱϣ ⲡⲉ ⲟⲩⲥϩⲓⲙⲉ ⲉⲥⲙⲟⲥⲧⲉ ⲛϩⲉⲛⲙⲛⲧⲙⲉ ⲛⲣⲉϥϫⲛⲁⲁⲩ ⲛⲁⲣϭⲣⲱϩ ⲛⲧⲙⲛⲧⲣⲙⲙⲁⲟ ⲛϫⲱⲱⲣⲉ ⲇⲉ ⲛⲁⲧⲁϫⲣⲟ ϩⲛⲧⲙⲛⲧⲣⲙⲙⲁⲟ
17 ⲉⲣⲉⲟⲩⲣⲱⲙⲉ ⲛⲛⲁⲏⲧ ⲣⲁⲅⲁⲑⲟⲛ ⲛⲧⲉϥⲯⲩⲭⲏ ⲡⲁⲧⲛⲁ ⲇⲉ ⲛⲁⲧⲁⲕⲟ ⲙⲡⲉϥⲥⲱⲙⲁ ϣⲁⲣⲉⲡⲁⲥⲉⲃⲏⲥ ⲣϩⲉⲛϩⲃⲏⲩⲉ ⲛϫⲓⲛϭⲟⲛⲥ
18 ⲉⲣⲉⲡⲉⲧϫⲟ ⲇⲉ ⲛⲧⲇⲓⲕⲁⲓⲟⲥⲩⲛⲏ ⲣϩⲱⲃ ⲉⲧⲡⲓⲥⲧⲓⲥ ⲟⲩⲃⲉⲕⲉ ⲙⲙⲉ ⲡⲉ ⲡⲉⲥⲡⲉⲣⲙⲁ ⲛⲛⲇⲓⲕⲁⲓⲟⲥ
19 ⲉⲩϫⲡⲟ ⲛⲟⲩϣⲏⲣⲉ ⲛⲇⲓⲕⲁⲓⲟⲥ ⲉⲡⲱⲛϩ ⲡⲇⲓⲱⲅⲙⲟⲥ ⲇⲉ ⲙⲡⲁⲥⲉⲃⲏⲥ ⲡⲉ ⲡⲙⲟⲩ
20 ϩⲉⲛⲁⲕⲁⲑⲁⲣⲧⲟⲥ ⲛⲛⲁϩⲣⲙⲡⲛⲟⲩⲧⲉ ⲛⲉ ⲛⲛⲁϣⲑⲏⲧ ⲟⲩⲃⲟⲧⲉ ⲙⲡϫⲟⲉⲓⲥ ⲡⲉ ⲡⲉⲧϭⲟⲟⲙⲉ ϩⲓⲧⲉϥϩⲓⲏ ⲥⲉϣⲏⲡ ⲇⲉ ⲛⲁϩⲣⲁϥ ⲛϭⲓⲟⲩⲟⲛ ⲛⲓⲙ ⲉⲧⲟⲩⲁⲁⲃ ϩⲛⲧⲉⲩϩⲓⲏ ⲡⲉϥⲟⲩⲱϣ ⲅⲁⲣ ⲡⲉ ⲟⲩⲟⲛ ⲛⲓⲙ ⲉϯⲧⲟⲩⲁⲁⲃ ϩⲛⲧⲉⲩϩⲓⲏ
21 ⲡⲉⲧϫⲡⲟ ⲇⲉ ϩⲛⲟⲩⲇⲓⲕⲁⲓⲟⲥⲩⲛⲏ ϥⲛⲁϫⲓ ⲛⲟⲩⲃⲉⲕⲉ ⲛⲧⲡⲓⲥⲧⲓⲥ
22 ⲛⲧϩⲉ ⲛⲟⲩϭⲁϫⲉ ⲉϥϩⲛϣⲁⲛⲧⲥ ⲛⲟⲩⲉϣⲱ ⲧⲁⲓ ⲧⲉ ⲧϩⲉ ⲙⲡⲥⲁ ⲛⲟⲩⲥϩⲓⲙⲉ ⲉⲥⲃⲟⲟⲛⲉ
23 ⲛⲁⲛⲟⲩⲡⲟⲩⲱϣ ⲧⲏⲣϥ ⲛⲛⲇⲓⲕⲁⲓⲟⲥ ⲧϩⲉⲗⲡⲓⲥ ⲇⲉ ⲛⲛⲁⲥⲉⲃⲏⲥ ⲛⲁⲧⲁⲕⲟ
24 ⲟⲩⲛⲡⲉⲧϫⲟ ⲛⲛⲟⲩϥ ⲙⲙⲓⲛⲙⲙⲟϥ ⲉⲩⲣϩⲟⲩⲟ ⲛⲁϥ ⲟⲩⲛⲛⲉⲧⲥⲟⲩⲱϩ ϩⲱⲟⲩ ⲉϩⲟⲩⲛ ⲁⲩⲱ ⲉⲩϣⲁⲁⲧ
25 ⲯⲩⲭⲏ ⲛⲓⲙ ⲉⲧⲟⲩⲥⲙⲟⲩ ⲉⲣⲟⲥ ⲣⲟⲟⲩⲧ ⲛⲁⲛⲟⲩⲟⲩⲣⲱⲙⲉ ⲇⲉ ⲁⲛ ⲛⲣⲉϥϭⲱⲛⲧ
26 ⲡⲉⲧⲉⲧⲡⲥⲟⲩⲟ ⲉϩⲟⲩⲛ ϣⲁⲣⲉⲡⲙⲏⲏϣⲉ ⲥϩⲟⲩⲱⲣϥ ⲡⲉⲥⲙⲟⲩ ⲇⲉ ⲛⲏⲟⲩ ⲉϫⲛⲧⲁⲡⲉ ⲙⲡⲉⲧϯ
27 ⲡⲉⲧⲙⲉⲉⲩⲉ ⲉϩⲉⲛⲡⲉⲧⲛⲁⲛⲟⲩ ⲉϥϣⲓⲛⲉ ⲛⲥⲁϩⲉⲛⲭⲁⲣⲓⲥ ⲉⲛⲁⲛⲟⲩⲟⲩ ⲙⲡⲉⲧϩⲟⲟⲩ ⲇⲉ ⲛⲁⲧⲁϩⲉⲛⲉⲧϣⲓⲛⲉ ⲛⲥⲱⲟⲩ
28 ⲡⲉⲧⲕⲱ ⲛϩⲧⲏϥ ⲉⲩⲙⲛⲧⲣⲙⲙⲁⲟ ϥⲛⲁϩⲉ ⲡⲉⲧⲛⲁ ⲇⲉ ⲛⲛϩⲏⲕⲉ ⲥⲉⲛⲁⲙⲁⲕⲁⲣⲓⲍⲉ ⲙⲙⲟϥ ⲡⲉⲧⲕⲱⲧ ⲙⲡⲉϥⲏⲓ ϩⲛⲟⲩϫⲓⲛϭⲟⲛⲥ ⲉϥⲛⲁⲕⲁϩⲛⲙⲕⲁϩ ⲛⲅϩⲏⲧ ⲛⲛⲉϥϣⲏⲣⲉ
29 ⲡⲉⲧⲉⲛϥϣⲉⲉⲓ ⲇⲉ ⲁⲛ ⲙⲛⲡⲉϥⲏⲓ ⲛⲁⲕⲗⲏⲣⲟⲛⲟⲙⲉⲓ ⲛϩⲉⲛⲧⲏⲩ ⲡⲁⲧϩⲏⲧ ⲛⲁⲣϩⲙϩⲁⲗ ⲙⲡⲥⲁⲃⲉ
30 ⲟⲩⲛⲟⲩϣⲏⲛ ⲛⲱⲛϩ ⲉⲃⲟⲗ ϩⲙⲡⲕⲁⲣⲡⲟⲥ ⲛⲧⲇⲓⲕⲁⲓⲟⲥⲩⲛⲏ ⲥⲉⲛⲁⲙⲟⲟⲩⲧ ⲇⲉ ⲛⲛⲉⲯⲩⲭⲏ ⲛⲙⲡⲁⲣⲁⲛⲟⲙⲟⲥ ϩⲛⲟⲩⲙⲛⲧϣⲁⲣⲁϩⲉ
31 ⲉϣϫⲉ ⲙⲟⲅⲓⲥ ⲉⲣⲉⲡⲇⲓⲕⲁⲓⲟⲥ ⲛⲁⲟⲩϫⲁⲓ ⲉⲓⲉ ⲡⲣⲉϥⲣⲛⲟⲃⲉ ⲙⲛⲡⲁⲥⲉⲃⲏⲥ ⲛⲁⲟⲩⲱⲛϩ ⲉⲃⲟⲗ ⲧⲱⲛ
Proverbs 10 · Proverbs 12 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)