Judges 16 — Coptic (Sahidic)

1 ⲁⲩⲱ ⲥⲁⲙⲯⲱⲛ ⲁϥⲃⲱⲕ ⲉϩⲣⲁⲓ ⲉⲅⲁⲍⲁ ⲁϥⲛⲁⲩ ϩⲙⲡⲙⲁ ⲉⲧⲙⲙⲁⲩ ⲉⲩⲥϩⲓⲙⲉ ⲙⲡⲟⲣⲛⲏ ⲁϥⲃⲱⲕ ⲉϩⲟⲩⲛ ϣⲁⲣⲟⲥ

2 ⲁⲩⲧⲁⲙⲉⲛⲣⲱⲙⲉ ⲇⲉ ⲛⲅⲁⲍⲁ ⲉⲩϫⲱ ⲙⲙⲟⲥ ⲛⲁⲩ ϫⲉⲁⲥⲁⲙⲯⲱⲛ ⲉⲓ ⲉϩⲣⲁⲓ ⲉⲡⲉⲓⲣⲁ ⲁⲩⲕⲱⲧⲉ ⲉⲡⲏⲓ ⲁⲩϭⲱⲣϭ ⲉⲣⲟϥ ⲛⲧⲉⲩϣⲏ ⲧⲏⲣⲥ ϩⲛⲧⲡⲩⲗⲏ ⲛⲧⲡⲟⲗⲓⲥ ⲁⲩⲱ ⲙⲡⲟⲩϣⲁϫⲉ ⲛⲧⲉⲩϣⲏ ⲧⲏⲣⲥ ⲉⲩϫⲱ ⲙⲙⲟⲥ ϫⲉⲉⲣϣⲁⲛⲡⲥⲟⲩ ⲛⲧⲟⲟⲩⲉ ⲉⲓ ⲉϩⲣⲁⲓ ⲙⲁⲣⲉⲛⲧⲱⲟⲩⲛ ⲛⲧⲛϩⲟⲧⲃⲉϥ

3 ⲁⲩⲱ ⲥⲁⲙⲯⲱⲛ ⲁϥⲛⲕⲟⲧⲕ ϣⲁⲧⲡⲁϣⲉ ⲛⲧⲉⲩϣⲏ ⲁϥⲧⲱⲟⲩⲛ ⲇⲉ ϩⲛⲧⲡⲁϣⲉ ⲛⲧⲉⲩϣⲏ ⲁϥϯⲧⲟⲟⲧϥ ⲛⲛⲣⲟ ⲛⲧⲡⲩⲗⲏ ⲛⲧⲡⲟⲗⲓⲥ ⲙⲛⲧⲟⲩⲉϭⲣⲟ ⲥⲛⲧⲉ ⲁϥϥⲓⲧⲟⲩ ⲙⲛⲡⲉⲩⲙⲟⲭⲗⲟⲥ ⲁϥⲧⲁⲗⲟⲟⲩ ⲉϫⲙⲡⲉϥⲛⲁϩⲃ ⲁϥⲛⲧⲟⲩ ⲉϫⲙⲡⲕⲟⲟϩ ⲙⲡⲧⲟⲟⲩ ⲡⲉⲧⲙⲡϩⲟ ⲉⲃⲟⲗ ⲛⲭⲉⲃⲣⲱⲛ ⲁϥⲕⲁⲁⲧ ⲙⲡⲙⲁ ⲉⲧⲙⲙⲁⲩ

4 ⲁⲥϣⲱⲡⲉ ⲇⲉ ⲙⲛⲛⲥⲁⲛⲁⲓ ⲁϥⲙⲉⲣⲉⲟⲩⲥϩⲓⲙⲉ ϩⲙⲡⲉⲭⲉⲓⲙⲁⲣⲣⲟⲥ ⲛⲥⲱⲣⲏⲭ ⲉⲡⲉⲥⲣⲁⲛ ⲡⲉ ⲇⲁⲗⲓⲗⲁ

5 ⲁⲩⲱ ⲛⲁⲣⲭⲱⲛ ⲛⲛⲁⲗⲗⲟⲫⲩⲗⲗⲟⲥ ⲁⲩⲃⲱⲕ ⲛⲁⲥ ⲉϩⲣⲁⲓ ⲡⲉϫⲁⲩ ⲛⲁⲥ ϫⲉⲁⲣⲓϩⲁⲗ ⲙⲙⲟϥ ⲛⲧⲉⲛⲁⲩ ϫⲉⲉⲣⲉⲧⲉϥⲛⲟϭ ⲛϭⲟⲙ ϣⲟⲟⲡ ϩⲛⲟⲩⲁⲩⲱ ⲉⲛⲛⲁϭⲙϭⲟⲙ ⲉϫⲱϥ ϩⲛⲟⲩⲛⲧⲛⲙⲟⲣϥ ϩⲱⲥⲧⲉ ⲛⲧⲛⲑⲃⲃⲓⲟϥ ⲁⲩⲱ ⲁⲛⲟⲛ ⲧⲛⲛⲁϯ ⲛⲉ ⲛϣⲟ ⲛϩⲓⲉⲓⲃ ⲁⲩⲱ ϣⲉ ⲛϩⲁⲧ

6 ⲡⲉϫⲉⲇⲁⲗⲓⲗⲁ ⲛⲥⲁⲙⲯⲱⲛ ϫⲉⲙⲁⲧⲁⲙⲟⲓ ϫⲉⲉⲣⲉⲧⲉⲕⲛⲟϭ ⲛϭⲟⲙ ϩⲛⲟⲩⲁⲩⲱ ⲉⲩⲛⲁⲙⲟⲣⲕ ϩⲛⲟⲩⲉⲧⲣⲉⲕⲑⲃⲃⲓⲟ

7 ⲡⲉϫⲉⲥⲁⲙⲯⲱⲛ ⲛⲁⲥ ϫⲉⲉⲩϣⲁⲛⲙⲟⲣⲧ ⲛⲥⲁϣϥ ⲛⲕⲱⲃϩ ⲉⲩⲗⲏϭ ⲉⲙⲡⲟⲩⲃⲟⲕⲟⲩ ϯⲛⲁⲣϭⲱⲃ ⲛⲧⲁⲣⲧϩⲉ ⲛⲟⲩⲁ ⲛⲛⲣⲱⲙⲉ

8 ⲁⲩⲱ ⲛⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲗⲟⲥ ⲁⲩⲉⲓⲛⲉ ⲛⲁⲥ ⲙⲡⲥⲁϣϥ ⲛⲕⲱⲃϩ ⲉⲙⲡⲁⲧⲟⲩⲃⲟⲕⲟⲩ ⲁⲥⲥⲟⲛϩϥ ⲛϩⲏⲧⲟⲩ

9 ⲡⲉⲙⲗⲁϩ ⲇⲉ ⲛⲉϥϩⲙⲟⲟⲥ ϩⲙⲡⲧⲁⲙⲉⲓⲟⲛ ⲡⲉϫⲁⲥ ⲛⲁϥ ϫⲉⲛⲁⲗⲗⲟⲫⲩⲗⲗⲟⲥ ⲁⲩⲓ ⲉϫⲱⲕ ⲥⲁⲙⲯⲱⲛ ⲁⲩⲱ ⲁϥⲥⲱⲗⲡ ⲛⲛⲕⲱⲃϩ ⲛⲧϩⲉ ⲛⲟⲩⲁ ⲉϥⲛⲁⲥⲱⲗⲡ ⲛⲟⲩϩⲟⲥⲛⲗⲁⲥ ⲉⲣϣⲁⲛⲟⲩⲕⲱϩⲧ ⲧⲁϩⲟϥ ⲁⲩⲱ ⲙⲡⲟⲩⲉⲓⲙⲉ ⲉⲧⲉϥϭⲟⲙ

10 ⲡⲉϫⲉⲇⲁⲗⲓⲗⲁ ⲉϩⲟⲩⲛ ϩⲛⲥⲁⲙⲯⲱⲛ ϫⲉⲉⲓⲥϩⲏⲏⲧⲉ ⲁⲕⲣϩⲁⲗ ⲙⲙⲟⲓ ⲁⲩⲱ ⲁⲕϣⲁϫⲉ ⲛⲙⲙⲁⲓ ⲉⲕϫⲓϭⲟⲗ ⲙⲙⲟⲓ ⲧⲉⲛⲟⲩ ϭⲉ ⲙⲁⲧⲁⲙⲟⲓ ϫⲉⲉⲩⲛⲁⲙⲟⲣⲕ ϩⲛⲟⲩ

11 ⲡⲉϫⲁϥ ⲛⲁⲥ ϫⲉϩⲛⲟⲩ ⲥⲱⲛϩ ⲉⲩϣⲁⲛⲥⲟⲛϩⲧ ⲛⲥⲁϣϥ ⲛⲛⲟⲩϩ ⲛⲃⲣⲣⲉ ⲉⲙⲡⲁⲧⲟⲩⲣⲗⲁⲁⲩ ⲛϩⲱⲃ ⲛϩⲏⲧⲟⲩ ϯⲛⲁⲣϭⲱⲃ ϩⲱ ⲡⲉ ⲛⲧⲁⲣⲧϩⲉ ⲛⲟⲩⲁ ⲛⲛⲣⲱⲙⲉ

12 ⲁⲩⲱ ⲇⲁⲗⲓⲗⲁ ⲁⲥϫⲓⲛⲛⲟⲩϩ ⲛⲃⲣⲣⲉ ⲁⲥⲥⲟⲛϩϥ ⲛϩⲏⲧⲟⲩ ⲡⲉϫⲁⲥ ⲛⲁϥ ϫⲉⲛⲁⲗⲗⲟⲫⲩⲗⲗⲟⲥ ⲁⲩⲉⲓ ⲉϫⲱⲕ ⲥⲁⲙⲯⲱⲛ ⲡⲉⲙⲗⲁϩ ⲇⲉ ⲛⲉϥϩⲙⲟⲟⲥ ϩⲙⲡⲧⲁⲙⲉⲓⲟⲛ ⲁⲩⲱ ⲁϥⲥⲟⲗⲡⲟⲩ ⲉⲃⲟⲗ ϩⲛⲛⲉϥϭⲃⲟⲓ ⲛⲧϩⲉ ⲛⲟⲩϩⲱⲥ

13 ⲡⲉϫⲉⲇⲁⲗⲓⲗⲁ ⲉϩⲟⲩⲛ ϩⲛⲥⲁⲙⲯⲱⲛ ϫⲉⲉⲓⲥϩⲏⲏⲧⲉ ⲟⲛ ⲁⲕⲣϩⲁⲗ ⲙⲙⲟⲓ ⲁⲩⲱ ⲁⲕϣⲁϫⲉ ⲛⲙⲙⲁⲓ ϩⲛϩⲉⲛϣⲁϫⲉ ⲛϭⲟⲗ ⲧⲁⲙⲟⲓ ϭⲉ ⲧⲉⲛⲟⲩ ϫⲉⲉⲩⲛⲁⲙⲟⲣⲕ ϩⲛⲟⲩⲡⲉϫⲁϥ ⲛⲁⲥ ϫⲉⲉⲣϣⲁⲛϫⲓ ⲛⲧⲉϣⲱⲛⲧ ⲙⲡⲥⲁϣϥ ⲛⲗⲟⲟⲩ ⲛϥⲱ ⲛⲧⲁⲁⲡⲉ ⲙⲛⲧⲕⲉϣⲛⲧⲉ ⲁⲩⲱ ⲛⲧⲉⲕⲟⲗϩⲟⲩ ϩⲛⲧⲉϣⲙⲟⲩ ⲉϩⲟⲩⲛ ⲉⲧϫⲟ ϯⲛⲁⲣϭⲱⲃ ⲛⲧⲁⲣⲧϩⲉ ⲛⲟⲩⲁ ⲛⲛⲣⲱⲙⲉ

14 ⲁⲥϣⲱⲡⲉ ⲇⲉ ⲛⲧⲉⲣϥⲧⲁⲁϥ ⲉⲛⲕⲟⲧⲕ ⲁⲇⲁⲗⲓⲗⲁ ⲁⲥϫⲓ ⲙⲡⲥⲁϣϥ ⲛⲗⲟⲟⲩ ⲛⲧⲉϥⲁⲡⲉ ⲁⲥϣⲟⲛⲧⲟⲩ ⲉϩⲟⲩⲛ ⲉⲧϣⲛⲧⲉ ⲁⲥⲕⲟⲗϩⲟⲩ ⲛⲧⲉϣⲙⲟⲩ ⲉϩⲟⲩⲛ ⲉⲧϫⲟ ⲡⲉϫⲁⲥ ⲇⲉ ⲛⲁⲗⲗⲟⲫⲩⲗⲗⲟⲥ ⲁⲩⲉⲓ ⲉϫⲱⲕ ⲥⲁⲙⲯⲱⲛ ⲁⲩⲱ ⲁϥⲛⲉϩⲥⲉ ⲉϩⲣⲁⲓ ϩⲙⲡⲉϥϩⲓⲛⲏⲃ ⲁϥⲧⲉⲕⲙⲧⲉϣⲙⲟⲩ ⲉⲃⲟⲗ ϩⲛⲧϫⲟ ⲉⲣⲉⲧϣⲛⲧⲉ ⲙⲏⲣ ⲉϩⲟⲩⲛ ⲉⲣⲟⲥ ⲁⲩⲱ ⲙⲡⲟⲩⲉⲓⲙⲉ ⲉⲧⲉϥϭⲟⲙ

15 ⲡⲉϫⲉⲇⲁⲗⲓⲗⲁ ⲛⲥⲁⲙⲯⲱⲛ ϫⲉⲡⲱⲥ ⲉⲕϫⲱ ⲙⲙⲟⲥ ϫⲉⲁⲓⲙⲉⲣⲓⲧⲉ ⲁⲩⲱ ⲙⲡⲉⲕϩⲏⲧ ⲟⲩⲏⲛ ⲁⲛ ⲉϩⲟⲩⲛ ⲉⲣⲟⲓ ⲉⲓⲥ ⲡⲙⲉϩϣⲟⲙⲧⲥⲱⲱⲡ ⲡⲉ ⲡⲁⲓ ⲉⲕⲣϩⲁⲗ ⲙⲙⲟⲓ ⲁⲩⲱ ⲙⲡⲕⲧⲁⲙⲟⲓ ϫⲉⲉⲣⲉⲧⲉⲕⲛⲟϭ ⲛϭⲟⲙ ϩⲛⲟⲩ

16 ⲁⲥϣⲱⲡⲉ ⲇⲉ ⲛⲧⲉⲣⲉⲥⲑⲗⲓⲃⲉ ⲙⲙⲟϥ ⲛⲧⲉⲩϣⲏ ⲧⲏⲣⲥ ϩⲛⲛⲉⲥϣⲁϫⲉ ⲁⲩⲱ ⲁⲥϩⲉϫϩⲱϫϥ ⲁϥⲡⲁⲕⲉ ⲛϩⲏⲧ ⲉⲙⲟⲩ

17 ⲁϥⲟⲩⲱⲛϩ ⲉⲣⲟⲥ ⲙⲡⲉϥϩⲏⲧ ⲧⲏⲣϥ ⲉϥϫⲱ ⲙⲙⲟⲥ ⲛⲁⲥ ϫⲉⲙⲡⲉⲡⲉⲛⲓⲡⲉ ⲗⲁⲁⲩ ⲉⲓ ⲉϫⲛⲧⲁⲁⲡⲉ ϫⲉⲁⲛⲅⲟⲩⲛⲁⲍⲉⲓⲣⲁⲓⲟⲥ ⲁⲛⲟⲕ ⲛⲧⲉⲡⲛⲟⲩⲧⲉ ϫⲓⲛⲉⲓⲛϩⲏⲧⲥ ⲛⲧⲁⲙⲁⲁⲩ ⲉⲓϣⲁⲛϩⲉⲉⲕⲉ ⲉϫⲱⲓ ϭⲉ ⲧⲁϭⲟⲙ ⲛⲁⲥⲁϩⲱⲥ ⲉⲃⲟⲗ ⲙⲙⲟⲓ ⲧⲁⲣϭⲱⲃ ϩⲱ ⲧⲁⲣⲑⲉ ⲛⲟⲩⲁ ⲛⲛⲣⲱⲙⲉ ⲧⲏⲣⲟⲩ

18 ⲁⲩⲱ ⲇⲁⲗⲓⲗⲁ ⲁⲥⲉⲓⲙⲉ ϫⲉⲁϥⲟⲩⲱⲛϩ ⲉⲣⲟⲥ ⲙⲡⲉϥϩⲏⲧ ⲧⲏⲣϥ ⲁⲥϫⲟⲟⲩ ⲁⲥⲙⲟⲩⲧⲉ ⲉⲛⲁⲣⲭⲱⲛ ⲛⲛⲁⲗⲗⲟⲫⲩⲗⲗⲟⲥ ⲉⲥϫⲱ ⲙⲙⲟⲥ ⲛⲁⲩ ϫⲉⲁⲙⲏⲓⲧⲛ ⲛⲁⲓ ϩⲣⲁⲓ ⲙⲡⲉⲓⲕⲉⲥⲟⲡ ϫⲉⲁϥⲟⲩⲱⲛϩ ⲉⲣⲟⲓ ⲙⲡⲉϥϩⲏⲧ ⲧⲏⲣϥ ⲁⲩⲉⲓ

20 ⲉⲓⲥ ⲛⲁⲗⲗⲟϥⲩⲗⲟⲥ ⲁⲩⲉⲓ ⲉϫⲱⲕ ⲁϥⲃⲱϭϥ ⲛϭⲓⲥⲓⲙⲯⲱⲛ ϫⲉϯⲛⲁⲧⲱⲟⲩⲛ ϩⲉ ⲉϩⲣⲁⲓ ⲉϫⲱⲟⲩ ⲕⲁϩ ⲁⲧⲉϥϭⲟⲙ ⲥⲁϩⲱⲱⲥ ⲉⲃⲟⲗ ⲙⲙⲟϥ

21 ⲁⲛⲁⲗⲗⲟϥⲩⲗⲟⲥ ⲃⲱϭⲟⲩ ⲉϫⲱϥ ⲁⲩⲡⲱⲣⲕ ⲛⲛⲉϥⲃⲁⲗ ⲁⲩⲉⲛⲧϥ ⲉϩⲣⲁⲓ ⲉⲅⲁⲍⲁ ⲁⲩⲥⲟⲛϩϥ