Judges 15 — Coptic (Sahidic)

1 ⲁⲥϣⲱⲡⲉ ⲙⲛⲛⲥⲁϩⲉⲛϩⲟⲟⲩ ⲛⲛⲉϩⲟⲟⲩ ⲛⲉϩⲥⲥⲟⲩⲟ ⲥⲁⲙⲯⲱⲛ ⲁϥϭⲙⲡϣⲓⲛⲉ ⲛⲧⲉϥⲥϩⲓⲙⲉ ϩⲛⲟⲩⲙⲁⲥ ⲛⲃⲁⲁⲙⲡⲉ ⲉϥϫⲱ ⲙⲙⲟⲥ ϫⲉϯⲛⲁⲃⲱⲕ ⲉϩⲟⲩⲛ ϣⲁⲧⲁⲥϩⲓⲙⲉ ⲉⲡⲧⲁⲙⲉⲓⲟⲛ ⲁⲩⲱ ⲙⲡⲉⲡⲉⲥⲉⲓⲱⲧ ⲕⲁⲁϥ ⲉⲧⲣⲉϥⲃⲱⲕ ⲉϩⲟⲩⲛ ⲛⲁⲥ

2 ⲁⲩⲱ ⲡⲉⲥⲉⲓⲱⲧ ⲡⲉϫⲁϥ ⲛⲁϥ ϫⲉⲛⲧⲁⲓϫⲟⲟⲥ ϫⲉϩⲛⲟⲩⲙⲟⲥⲧⲉ ⲁⲕⲙⲉⲥⲧⲱⲥ ⲁⲓⲧⲁⲁⲥ ⲛⲟⲩⲁ ⲛⲛⲉⲕϣⲃⲉⲉⲣ ⲙⲏ ⲛⲧⲉⲥⲕⲟⲩⲓ ⲛⲥⲱⲛⲉ ⲛⲁⲛⲟⲩⲥ ⲁⲛ ⲉⲣⲟⲥ ϫⲓⲧⲥ ⲉⲡⲙⲁ ⲛⲧⲕ

3 ⲡⲉϫⲉⲥⲁⲙⲯⲱⲛ ⲛⲁⲩ ϫⲉⲙⲛⲛⲟⲃⲉ ⲉⲣⲟⲓ ⲧⲉⲛⲟⲩ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲗⲟⲥ ϫⲉⲁⲛⲟⲕ ϯⲛⲁⲉⲓⲣⲉ ⲛⲙⲙⲁⲩ ⲛϩⲉⲛⲡⲉⲧϩⲟⲟⲩ

4 ⲁϥϭⲱⲡⲉ ⲛϣⲙⲧϣⲉ ⲛⲃⲁϣⲟⲣ ⲁϥϫⲓ ⲛϩⲉⲛⲗⲁⲙⲡⲁⲥ ⲁϥⲙⲟⲩⲣ ⲛⲟⲩⲥⲉⲓⲁⲧ ⲉϩⲟⲩⲛ ⲉⲩⲥⲉⲓⲁⲧ ⲁϥⲕⲱ ⲛⲟⲩⲗⲁⲙⲡⲁⲥ ϩⲛⲧⲙⲏⲧⲉ ⲙⲡⲥⲉⲓⲁⲧ ⲥⲛⲁⲩ ⲉⲁϥⲙⲟⲣⲥ ⲉϩⲟⲩⲛ ⲉⲣⲟⲟⲩ

5 ⲁϥϫⲉⲣⲉⲟⲩⲕⲱϩⲧ ϩⲛⲛⲗⲁⲙⲡⲁⲥ ⲁϥϫⲟⲟⲩⲥⲟⲩ ⲉϩⲟⲩⲛ ⲉⲛϩⲙⲥ ⲛⲁⲗⲗⲟⲫⲩⲗⲗⲟⲥ ⲁⲩⲣⲱⲕϩ ϫⲓⲛⲟⲩϫⲛⲟⲟⲩ ϣⲁϩⲉⲛϩⲙⲥ ⲉⲩⲣⲏⲧ ⲁⲩⲱ ϣⲁⲙⲙⲁ ⲛⲉⲗⲟⲟⲗⲉ ⲙⲛⲛⲃⲱ ⲛϫⲟⲉⲓⲧ

6 ⲛⲁⲗⲗⲟⲫⲩⲗⲗⲟⲥ ⲇⲉ ⲡⲉϫⲁⲩ ⲛⲛⲉⲩⲉⲣⲏⲩ ϫⲉⲛⲓⲙ ⲡⲉⲛⲧⲁϥⲣⲛⲁⲓ ⲛⲁⲛ ⲡⲉϫⲁⲩ ϫⲉⲥⲁⲙⲯⲱⲛ ⲡⲉⲛⲧⲁϥϫⲓⲧϣⲉⲉⲣⲉ ⲛⲑⲁⲙⲛⲓ ⲡⲉ ⲉⲃⲟⲗ ϫⲉⲁϥϫⲓⲧⲉϥⲥϩⲓⲙⲉ ⲁϥⲧⲁⲁⲥ ⲛⲟⲩⲁ ⲛⲛⲉϥϣⲃⲉⲉⲣ ⲁⲩⲱ ⲛⲁⲗⲗⲟⲫⲩⲗⲗⲟⲥ ⲁⲩⲃⲱⲕ ⲉϩⲣⲁⲓ ⲁⲩⲣⲟⲕϩⲥ ⲙⲛⲡⲉⲥⲕⲉⲓⲱⲧ ϩⲛⲟⲩⲕⲱϩⲧ

7 ⲡⲉϫⲉⲥⲁⲙⲯⲱⲛ ⲛⲁⲩ ϫⲉⲉⲧⲉⲧⲛϣⲁⲛⲉⲓⲣⲉ ϩⲓⲛⲁⲓ ⲙⲡⲁⲟⲩⲱϣ ⲁⲛ ⲡⲉ ⲁⲗⲗⲁ ⲁⲛⲟⲕ ϯⲛⲁⲉⲓⲣⲉ ⲙⲡⲁⲕⲃⲁ ϩⲙⲡⲟⲩⲁ ⲡⲟⲩⲁ ⲙⲙⲱⲧⲛ ⲙⲛⲛⲥⲱⲥ ⲛⲧⲁⲱⲗ ⲉⲃⲟⲗ

8 ⲁⲩⲱ ⲁϥⲡⲁⲧⲁⲥⲥⲉⲓ ⲙⲙⲟⲟⲩ ⲉⲁϥϩⲓⲟⲩⲉ ⲛⲥⲁⲛⲉⲩⲥⲏϥⲉ ⲉϫⲛⲛⲉⲩⲙⲏⲣⲟⲥ ⲛⲟⲩⲛⲟϭ ⲉⲙⲁⲧⲉ ⲙⲡⲗⲏⲅⲏ ⲁⲩⲱ ⲥⲁⲙⲯⲱⲛ ⲁϥⲉⲓ ⲉϩⲣⲁⲓ ⲁϥϩⲙⲟⲟⲥ ϩⲁⲧⲉ ⲧⲡⲉⲧⲣⲁ ⲛⲁⲓⲇⲁⲙ

9 ⲛⲁⲗⲗⲟⲫⲩⲗⲗⲟⲥ ⲇⲉ ⲁⲩⲉⲓ ⲉϩⲣⲁⲓ ⲁⲩⲃⲱⲕ ⲉⲙⲓϣⲉ ⲙⲛⲓⲟⲩⲇⲁ ⲁⲩϭⲱ ϩⲙⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉⲙⲣⲟⲩⲟϭⲉ

10 ⲡⲉϫⲉⲛⲣⲱⲙⲉ ⲛⲓⲟⲩⲇⲁⲥ ⲛⲁⲩ ϫⲉⲉⲧⲃⲉⲟⲩ ⲁⲧⲉⲧⲛⲉⲓ ⲉϩⲣⲁⲓ ⲉⲙⲓϣⲉ ⲛⲙⲙⲁⲛ ⲡⲉϫⲉⲛⲁⲗⲗⲟⲫⲩⲗⲗⲟⲥ ⲛⲁⲩ ϫⲉⲛⲧⲁⲛⲉⲓ ⲉϩⲣⲁⲓ ⲉⲙⲟⲩⲣ ⲛⲥⲁⲙⲯⲱⲛ ⲁⲩⲱ ⲉⲉⲓⲣⲉ ⲛⲁϥ ⲕⲁⲧⲁⲧϩⲉ ⲉⲛⲧⲁϥⲁⲁⲥ ⲛⲁⲛ

11 ⲁⲩⲱ ⲙⲁⲁⲃ ⲛϣⲉ ⲛⲣⲱⲙⲉ ⲉⲃⲟⲗ ϩⲛⲓⲟⲩⲇⲁ ⲁⲩⲉⲓ ⲉϩⲣⲁⲓ ⲉⲡⲟⲩⲱϣ ⲛⲧⲡⲉⲧⲣⲁ ⲛⲁⲓⲇⲁⲙ ⲡⲉϫⲁⲩ ⲛⲥⲁⲙⲯⲱⲛ ϫⲉⲛⲅⲥⲟⲟⲩⲛ ⲁⲛ ϫⲉⲛⲁⲗⲗⲟⲫⲩⲗⲗⲟⲥ ⲥⲉⲟ ⲛϫⲟⲉⲓⲥ ⲉⲣⲟⲛ ⲁⲩⲱ ⲟⲩ ⲡⲉ ⲡⲉⲓϩⲱⲃ ⲉⲛⲧⲁⲕⲁⲁϥ ⲛⲁⲛ ⲡⲉϫⲉⲥⲁⲙⲯⲱⲛ ⲛⲁⲩ ϫⲉⲕⲁⲧⲁⲧϩⲉ ⲉⲛⲧⲁⲩⲁⲁⲥ ⲛⲁⲓ ⲧⲁⲓ ⲧⲉ ⲧϩⲉ ⲉⲛⲧⲁⲓⲁⲁⲥ ⲛⲁⲩ

12 ⲁⲩⲱ ⲡⲉϫⲁⲩ ⲛⲁϥ ϫⲉⲉⲛⲧⲁⲛⲉⲓ ⲉϩⲣⲁⲓ ⲉⲙⲟⲣⲕ ⲉⲧⲁⲁⲕ ⲉϩⲣⲁⲓ ⲉⲧⲟⲟⲧⲟⲩ ⲛⲁⲗⲗⲟⲫⲩⲗⲗⲟⲥ ⲡⲉϫⲉⲥⲁⲙⲯⲱⲛ ⲛⲁⲩ ϫⲉⲱⲣⲕ ⲛⲁⲓ ϫⲉⲛⲧⲱⲧⲛ ⲛⲧⲉⲧⲛⲁⲙⲟⲩⲟⲩⲧ ⲁⲛ ⲙⲙⲟⲓ ⲁⲗⲗⲁ ⲉⲧⲉⲧⲛⲁⲧⲁⲁⲧ ⲉϩⲣⲁⲓ ⲉⲧⲟⲟⲧⲟⲩ

13 ⲁⲩⲱ ⲁⲩⲱⲣⲕ ⲛⲁϥ ⲉⲩϫⲱ ⲙⲙⲟⲥ ϫⲉⲛⲧⲛⲛⲁⲙⲟⲟⲩⲧⲕ ⲁⲛ ⲁⲗⲗⲁ ⲉⲛⲁⲥⲟⲛϩⲕ ⲛⲧⲛⲧⲁⲁⲕ ⲉϩⲣⲁⲓ ⲉⲧⲟⲟⲧⲟⲩ ϩⲛⲟⲩⲙⲟⲩ ⲇⲉ ⲛⲧⲛⲁⲙⲟⲟⲩⲧⲕ ⲁⲛ ⲁⲩⲱ ⲁⲩⲥⲟⲛϩϥ ϩⲛⲛⲟⲩϩ ⲥⲛⲁⲩ ⲛⲃⲣⲣⲉ ⲁⲩⲛⲧϥ ⲉϩⲣⲁⲓ ϩⲛⲧⲡⲉⲧⲣⲁ ⲉⲧⲙⲙⲁⲩ

14 ⲁϥⲉⲓ ϣⲁϩⲣⲁⲓ ⲉⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉⲙⲣⲟⲩⲟϭⲉ ⲁⲩⲱ ⲛⲁⲗⲗⲟⲫⲩⲗⲗⲟⲥ ⲁⲩⲛⲉϫⲗⲟⲩⲗⲁⲓ ⲉⲃⲟⲗ ⲁⲩⲡⲱⲧ ⲉϩⲟⲩⲛ ⲉⲣⲟϥ ⲡⲉⲡⲛⲉⲩⲙⲁ ⲇⲉ ⲙⲡϫⲟⲉⲓⲥ ⲁϥⲉⲓ ⲉϩⲣⲁⲓ ⲉϫⲱϥ ⲁⲩⲱ ⲛⲛⲟⲩϩ ⲉⲧⲙⲏⲣ ⲉⲛⲉϭⲃⲟⲓ ⲁⲩⲣⲧϩⲉ ⲛⲟⲩⲗⲁⲥ ⲉϣⲁϥⲙⲟⲩϩ ϩⲛⲟⲩⲕⲱϩⲧ ⲁⲛⲛⲟⲩϩ ⲃⲱⲗ ⲉⲃⲟⲗ ϩⲛⲛⲉϥϭⲃⲟⲓ

15 ⲁϥϩⲉ ⲉⲩⲙⲣⲟⲩⲟϭⲉ ⲛⲓⲱ ⲉⲥⲛⲏϫ ϩⲓⲡⲉⲥⲏⲧ ⲁϥⲥⲟⲩⲧⲛⲧⲟⲟⲧϥ ⲉⲃⲟⲗ ⲁϥϫⲓⲧⲥ ⲁⲩⲱ ⲁϥⲣⲱϩⲧ ⲛϩⲏⲧⲥ ⲙⲙⲏⲧ ⲛϣⲉ ⲛⲣⲱⲙⲉ

16 ⲡⲉϫⲉⲥⲁⲙⲯⲱⲛ ϫⲉϩⲛⲟⲩⲙⲣⲟⲩⲟϭⲉ ⲛⲓⲱ ϩⲛⲟⲩϥⲱⲧⲉ ⲁⲓϥⲱⲧⲉ ⲉⲃⲟⲗ ⲛⲛⲁⲗⲗⲟⲫⲩⲗⲗⲟⲥ ϫⲉϩⲛⲧⲙⲣⲟⲩⲟϭⲉ ⲙⲡⲉⲓⲱ ⲁⲓⲡⲁⲧⲁⲥⲥⲉⲓ ⲛϣⲟ ⲛⲣⲱⲙⲉ

17 ⲁⲩⲱ ⲛⲧⲉⲣϥⲟⲩⲱ ⲉϥϣⲁϫⲉ ⲁϥⲛⲟⲩϫⲉ ⲛⲧⲙⲣⲟⲩⲟϭⲉ ⲉⲃⲟⲗ ϩⲛⲧⲉϥϭⲓϫ ⲁϥⲙⲟⲩⲧⲉ ⲉⲡⲙⲁ ⲉⲧⲙⲙⲁⲩ ϫⲉⲧⲁⲛϩⲁⲓⲣⲉⲥⲓⲥ ⲏ ⲧϩⲁⲧⲃⲉⲥ ⲛⲧⲙⲣⲟⲩⲟϭⲉ

18 ⲁϥⲉⲓⲃⲉ ⲇⲉ ⲉⲙⲁⲧⲉ ⲁⲩⲱ ⲁϥⲱϣ ⲉϩⲣⲁⲓ ⲉⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉⲛⲧⲟⲕ ⲡⲉⲛⲧⲁⲕϯ ⲙⲡⲉⲓⲛⲟϭ ⲛⲟⲩϫⲁⲓ ϩⲛⲧϭⲓϫ ⲙⲡⲉⲕϩⲙϩⲁⲗ ⲁⲩⲱ ⲧⲉⲛⲟⲩ ⲉⲓⲛⲁⲙⲟⲩ ϩⲁⲡⲉⲓⲃⲉ ⲛⲧⲁϩⲉ ⲉϩⲣⲁⲓ ⲉⲧⲟⲟⲧⲟⲩ ⲛⲛⲉⲓⲁⲧⲥⲃⲃⲉ

19 ⲁⲩⲱ ⲡⲛⲟⲩⲧⲉ ⲁϥⲟⲩⲱⲛ ⲙⲡϩⲁⲧ ⲉⲧϩⲙⲡⲙⲁ ⲛⲧⲙⲣⲟⲩⲟϭⲉ ⲁⲩⲙⲟⲟⲩ ⲉⲓ ⲉⲃⲟⲗ ⲛϩⲏⲧⲥ ⲁϥⲥⲱ ⲁⲡⲉϥⲡⲛⲉⲩⲙⲁ ⲥⲙⲛⲧϥ ⲁϥⲱⲛϩ ⲉⲧⲃⲉⲡⲁⲓ ⲁϥⲙⲟⲩⲧⲉ ⲉⲡⲉⲥⲣⲁⲛ ϫⲉⲧⲡⲏⲅⲏ ⲙⲡⲉⲧⲉⲡⲓⲕⲁⲗⲓ ⲧⲁⲓ ⲉⲥϣⲟⲟⲡ ϩⲙⲡⲙⲁ ⲉⲧⲙⲙⲁⲩ ⲉⲧⲉⲡⲙⲁ ⲛⲧⲙⲣⲟⲩⲟϭⲉ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ

20 ⲁⲩⲱ ⲁϥⲕⲣⲓⲛⲉ ⲙⲡⲓⲥⲣⲁⲏⲗ ϩⲛⲛⲉϩⲟⲟⲩ ⲛⲛⲁⲗⲗⲟⲫⲩⲗⲗⲟⲥ ⲛϫⲟⲩⲧⲏ ⲛⲣⲟⲙⲡⲉ