Judges 17 — Coptic (Sahidic)

2 ... ϩⲁⲧⲏⲓ ⲁⲛⲟⲕ ⲁⲓϫⲓⲧϥ ⲁⲩⲱ ⲧⲉϥⲙⲁⲁⲩ ⲡⲉϫⲁⲥ ϫⲉⲡⲁϣⲏⲣⲉ ϥⲥⲙⲁⲙⲁⲁⲧ ⲛⲧⲟⲟⲧϥ ⲙⲡϫⲟⲉⲓⲥ

3 ⲁⲩⲱ ⲁϥϯⲙⲛⲧⲟⲩⲉ ⲛϣⲉ ⲛϩⲁⲧ ⲛⲧⲉϥⲙⲁⲁⲩ ⲡⲉϫⲉⲧⲉϥⲙⲁⲁⲩ ϫⲉϩⲛⲟⲩⲧⲃⲃⲟ ⲁⲓⲧⲃⲃⲟ ⲙⲡϩⲁⲧ ⲙⲡϫⲟⲉⲓⲥ ⲉⲃⲟⲗ ϩⲛⲧⲁϭⲓϫ ⲉⲧⲣⲁⲧⲁⲙⲓⲟ ⲙⲡⲁϣⲏⲣⲉ ⲛⲟⲩⲅⲗⲩⲡⲧⲟⲛ ⲙⲛⲟⲩⲭⲱⲛⲉⲩⲧⲟⲛ ⲁⲩⲱ ⲧⲉⲛⲟⲩ ϯⲛⲁⲧⲁⲁϥ ⲛⲁⲕ

4 ⲁϥϯⲡϩⲁⲧ ⲛⲧⲉϥⲙⲁⲁⲩ ⲁⲩⲱ ⲧⲉϥⲙⲁⲁⲩ ⲁⲥϫⲓ ⲛϣⲏⲧ ⲛϩⲁⲧ ⲛϩⲣϣⲏⲣⲉ ⲁⲥⲧⲁⲁⲩ ⲙⲡⲣⲉϥⲣϩⲁⲧ ⲁϥⲧⲁⲙⲓⲟ ⲛⲟⲩⲭⲱⲛⲉⲩⲧⲟⲛ ⲙⲛⲟⲩⲅⲗⲩⲡⲧⲟⲛ ⲁϥⲱϣ ⲡⲉ ϩⲙⲡⲏⲓ ⲙⲙⲓⲭⲁ

5 ⲁⲩⲱ ⲡⲣⲱⲙⲉ ⲙⲓⲭⲁ ⲛⲉϥⲟ ⲛⲁϥ ⲛⲟⲩⲏⲏⲃ ⲙⲡⲛⲟⲩⲧⲉ ⲁⲩⲱ ⲁϥⲧⲁⲙⲓⲟ ⲛⲟⲩⲉⲫⲟⲩⲇ ⲙⲛⲟⲩⲑⲉⲣⲁⲫⲓⲙ ⲁⲩⲱ ⲟⲩⲁ ⲉⲃⲟⲗ ϩⲛⲛⲉϥϣⲏⲣⲉ ⲁϥϩⲉⲛⲅⲧⲉϥϭⲓϫ ⲁϥϣⲱⲡⲉ ⲛⲁϥ ⲛⲟⲩⲏⲏⲃ

6 ϩⲛⲛⲉϩⲟⲟⲩ ⲇⲉ ⲉⲧⲙⲙⲁⲩ ⲉⲛⲉⲛⲛⲣⲣⲟ ϩⲙⲡⲓⲥⲣⲁⲏⲗ ⲡⲣⲱⲙⲉ ⲛⲉϥⲉⲓⲣⲉ ⲙⲡⲉⲧⲥⲟⲩⲧⲱⲛ ⲛⲛⲁϩⲣⲁϥ

7 ⲁⲩⲱ ⲁϥϣⲱⲡⲉ ⲛϭⲓⲟⲩϣⲏⲣⲉ ϣⲏⲙ ⲉⲃⲟⲗ ϩⲛⲃⲏⲑⲗⲉⲉⲙ ⲛⲧⲉⲓⲟⲩⲇⲁ ⲁⲩⲱ ⲛⲧⲟϥ ⲟⲩⲗⲉⲩⲓⲧⲏⲥ ⲡⲉ ⲉϥⲟⲩⲏϩⲙⲙⲁⲩ

8 ⲁⲩⲱ ⲁϥⲃⲱⲕ ⲛϭⲓⲡⲣⲱⲙⲉ ⲡⲉ ⲉⲃⲟⲗ ϩⲛⲃⲏⲑⲗⲉⲉⲙ ⲧⲡⲟⲗⲓⲥ ⲛⲓⲟⲩⲇⲁ ⲉⲧⲣⲉϥϭⲟⲓⲗⲉ ⲉⲡⲙⲁ ⲉⲧϥⲛⲁϩⲉ ⲉⲣⲟϥ ⲁϥⲉⲓ ϣⲁϩⲣⲁⲓ ⲉⲡⲧⲟⲟⲩ ⲛⲉⲫⲣⲁⲓⲙ ⲉⲧⲣⲉϥϭⲟⲓⲗⲉ ⲉⲡⲏⲓ ⲙⲙⲓⲭⲁ ⲉⲧⲣⲉϥⲥⲟⲩⲧⲛⲧⲉϥϩⲓⲏ

9 ⲡⲉϫⲉⲙⲓⲭⲁ ⲛⲁϥ ϫⲉⲉⲕⲛⲏⲩ ⲧⲱⲛ ⲡⲉϫⲁϥ ⲛⲁϥ ϫⲉⲁⲛⲅⲟⲩⲗⲉⲩⲉⲓⲧⲏⲥ ⲉⲃⲟⲗ ϩⲛⲃⲏⲑⲗⲉⲉⲙ ⲛⲧⲉⲓⲟⲩⲇⲁ ⲁⲩⲱ ⲁⲛⲟⲕ ⲉⲓⲙⲟⲟϣⲉ ⲉϭⲟⲓⲗⲉ ⲉⲡⲙⲁ ⲉϯⲛⲁϩⲉ ⲉⲣⲟϥ

10 ⲡⲉϫⲉⲙⲓⲭⲁ ⲛⲁϥ ϫⲉϭⲱ ϩⲁⲧⲏⲓ ⲛⲅϣⲱⲡⲉ ⲛⲁⲓ ⲉⲩⲉⲓⲱⲧ ⲁⲩⲱ ⲉⲩⲟⲩⲏⲏⲃ ⲁⲩⲱ ⲁⲛⲟⲕ ϯⲛⲁϯ ⲛⲁⲕ ⲙⲙⲏⲧ ⲛϩⲁⲧ ⲙⲙⲏⲛⲉ ⲙⲛⲟⲩⲥⲧⲟⲗⲏ ⲛϩⲟⲉⲓⲧⲉ ⲙⲛⲛⲉⲧⲕⲛⲁϫⲓⲧⲟⲩ ⲉⲣⲟⲕ ⲉⲡⲉⲕⲱⲛϩ

11 ⲁⲩⲱ ⲡⲗⲉⲩⲓⲧⲏⲥ ⲁϥⲃⲱⲕ ⲁϥⲧⲱϣ ⲉϭⲟⲓⲗⲉ ⲉⲡⲣⲱⲙⲉ ⲁⲡϣⲏⲣⲉ ϣⲏⲙ ϭⲱ ϩⲁⲧⲏϥ ⲛⲧϩⲉ ⲛⲟⲩⲁ ⲛⲛⲉϥϣⲏⲣⲉ

12 ⲁⲩⲱ ⲙⲓⲭⲁ ⲁϥⲧⲃⲃⲉⲧϭⲓϫ ⲙⲡⲗⲉⲩⲓⲧⲏⲥ ⲁϥϣⲱⲡⲉ ⲛϭⲓⲡϣⲓⲣⲉ ⲉⲩⲟⲩⲏⲏⲃ ⲁϥϭⲱ ϩⲙⲡⲏⲓ ⲙⲙⲓⲭⲁ

13 ⲡⲉϫⲉⲙⲓⲭⲁ ϫⲉⲧⲉⲛⲟⲩ ⲉⲓⲉⲓⲙⲉ ϫⲉⲡϫⲟⲉⲓⲥ ϥⲛⲁⲣⲡⲡⲉⲧⲛⲁⲛⲟⲩϥ ⲛⲁⲓ ⲉⲃⲟⲗ ϫⲉⲟⲩⲗⲉⲩⲓⲧⲏⲥ ⲁϥϣⲱⲡⲉ ⲛⲁⲓ ⲉⲩⲟⲩⲏⲏⲃ