Read Jonah 3 side by side with translations · The Final Bible
1 ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲓⲱⲛⲁⲥ ⲙⲡⲙⲉϩⲥⲉⲡⲥⲛⲁⲩ ⲉϥϫⲱ ⲙⲙⲟⲥ ⲛⲁϥ
2 ϫⲉⲧⲱⲟⲩⲛ ⲛⲅⲃⲱⲕ ⲉϩⲣⲁⲓ ⲉⲛⲓⲛⲉⲩⲏ ⲧⲛⲟϭ ⲙⲡⲟⲗⲓⲥ ⲛⲅⲕⲏⲣⲩⲥⲥⲉ ⲛⲁⲥ ⲕⲁⲧⲁⲡⲕⲏⲣⲩⲅⲙⲁ ⲛϣⲟⲣⲡ ⲡⲁⲓ ⲉⲛⲧⲁⲓϫⲟⲟϥ ⲉⲣⲟⲕ
3 ⲁⲩⲱ ⲁϥⲧⲱⲟⲩⲛϥ ⲛϭⲓⲓⲱⲛⲁⲥ ⲁϥⲙⲟⲟϣⲉ ⲉϩⲣⲁⲓ ⲉⲛⲓⲛⲉⲩⲏ ⲕⲁⲧⲁⲧϩⲉ ⲉⲛⲧⲁⲡϫⲟⲉⲓⲥ ϣⲁϫⲉ ⲛⲙⲙⲁϥ ⲛⲓⲛⲉⲩⲏ ⲇⲉ ⲛⲉⲩⲛⲟϭ ⲙⲡⲟⲗⲓⲥ ⲡⲉ ⲙⲡϫⲟⲉⲓⲥ ⲉⲥⲛⲁⲥⲟⲩϩⲓⲏ ⲛϣⲟⲙⲛⲧ ⲛϩⲟⲟⲩ ⲙⲙⲟⲟϣⲉ
4 ⲁⲩⲱ ⲁϥϫⲱⲛⲧϥ ⲓⲱⲛⲁⲥ ⲉⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲛϩⲟⲟⲩ ⲟⲩⲁ ⲙⲙⲟⲟϣⲉ ⲁⲩⲱ ⲁϥⲕⲏⲣⲩⲥⲥⲉ ⲉϥϫⲱ ⲙⲙⲟⲥ ϫⲉⲉⲧⲓ ϣⲟⲙⲛⲧ ⲛϩⲟⲟⲩ ⲁⲩⲱ ⲛⲓⲛⲉⲩⲏ ⲥⲉⲛⲁⲧⲁⲕⲟⲥ
5 ⲛⲣⲱⲙⲉ ⲛⲛⲓⲛⲉⲩⲏ ⲁⲩⲡⲓⲥⲧⲉⲩⲉ ⲉⲡⲛⲟⲩⲧⲉ ⲁⲩⲕⲏⲣⲩⲥⲥⲉ ⲛⲟⲩⲛⲏⲥⲧⲉⲓⲁ ⲁⲩⲱ ⲁⲩϯ ϩⲓⲱⲱⲟⲩ ⲛϩⲉⲛϭⲟⲟⲩⲛⲉ ϫⲓⲛⲡⲉⲩⲛⲟϭ ϣⲁⲡⲉⲩⲕⲟⲩⲓ
6 ⲁⲩⲱ ⲡϣⲁϫⲉ ⲁϥⲡⲱϩ ϣⲁⲡⲣⲣⲟ ⲛⲛⲓⲛⲉⲩⲏ ⲁⲩⲱ ⲁϥⲧⲱⲟⲩⲛ ⲉⲃⲟⲗ ϩⲓϫⲛⲡⲉϥⲑⲣⲟⲛⲟⲥ ⲁϥⲕⲁⲁϥ ⲕⲁϩⲏⲩ ⲛⲧⲉϥϩⲃⲥⲱ ⲁϥϭⲟⲟⲗⲉϥ ⲛⲟⲩϭⲟⲟⲩⲛⲉ ⲁϥϩⲙⲟⲟⲥ ϩⲓϫⲛⲟⲩⲕⲣⲙⲉⲥ
7 ⲁⲩⲱ ⲁⲩⲕⲏⲣⲩⲥⲥⲉ ϩⲛⲛⲓⲛⲉⲩⲏ ⲉⲃⲟⲗ ϩⲓⲧⲟⲟⲧϥ ⲙⲡⲣⲣⲟ ⲙⲛⲛⲉϥⲙⲉⲅⲓⲥⲧⲁⲛⲟⲥ ⲛⲟⲩϣⲁϫⲉ ⲉϥϫⲱ ⲙⲙⲟⲥ ϫⲉⲛⲣⲱⲙⲉ ⲙⲛⲛⲧⲃⲛⲟⲟⲩⲉ ⲁⲩⲱ ⲛⲉϩⲟⲟⲩ ⲙⲛⲛⲉⲥⲟⲟⲩ ⲙⲛⲛⲉϩⲟⲟⲩ ⲙⲡⲣⲧⲣⲉⲩⲟⲩⲱⲙ ⲗⲁⲁⲩ ⲟⲩⲇⲉ ⲙⲡⲣⲧⲣⲉⲩⲙⲟⲟⲛⲉ ⲙⲙⲟⲟⲩ ⲁⲩⲱ ⲙⲡⲣⲧⲣⲉⲩⲥⲉⲙⲟⲟⲩ
8 ⲁⲩⲱ ⲁⲩϭⲟⲟⲗⲟⲩ ⲛϩⲉⲛϭⲟⲟⲩⲛⲉ ⲛϭⲓⲛⲣⲱⲙⲉ ⲙⲛⲛⲧⲃⲛⲟⲟⲩⲉ ⲁⲩⲱ ⲁⲩⲛⲏⲥⲧⲉⲩⲉ ⲁⲩⲱϣ ⲉⲃⲟⲗ ⲉⲙⲁⲧⲉ ⲉϩⲣⲁⲓ ⲉⲡϫⲟⲉⲓⲥ ⲁⲩⲱ ⲁϥⲕⲧⲟϥ ⲛϭⲓⲡⲟⲩⲁ ⲡⲟⲩⲁ ⲉⲃⲟⲗ ϩⲛⲧⲉϥϩⲓⲏ ⲉⲧϩⲟⲟⲩ ⲙⲛⲡϫⲓⲛϭⲟⲛⲥ ⲉⲧⲟ ⲛⲛⲉⲩϭⲓϫ ⲁⲩⲱ ⲡⲉϫⲁⲩ
9 ϫⲉⲛⲓⲙ ⲡⲉⲧⲛⲁϣⲁϫⲉ ϥⲛⲁⲣϩⲧⲏϥ ⲛϭⲓⲡⲛⲟⲩⲧⲉ ⲛϥⲕⲧⲟϥ ⲉⲃⲟⲗ ⲛⲧⲟⲣⲅⲏ ⲙⲡⲉϥϭⲱⲛⲧ ⲛⲧⲛⲧⲙⲙⲟⲩ
10 ⲁⲩⲱ ⲡⲛⲟⲩⲧⲉ ⲁϥⲛⲁⲩ ⲉⲛⲉⲩϩⲃⲏⲩⲉ ϫⲉⲁⲩⲕⲧⲟⲟⲩ ⲉⲃⲟⲗ ϩⲓⲛⲉⲩϩⲓⲟⲟⲩⲉ ⲉⲧϩⲟⲟⲩ ⲁⲩⲱ ⲁϥⲣϩⲧⲏϥ ⲛϭⲓⲡⲛⲟⲩⲧⲉ ⲉϫⲛⲙⲡⲉⲧϩⲟⲟⲩ ⲉⲛⲧⲁϥϣⲁϫⲉ ⲉⲁⲁⲩ ⲛⲁⲩ ⲁⲩⲱ ⲙⲡϥⲁⲁⲩ
Jonah 2 · Jonah 4 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)