Read Jonah 2 side by side with translations · The Final Bible
1 ⲁⲩⲱ ⲡϫⲟⲉⲓⲥ ⲁϥⲟⲩⲉϩⲥⲁϩⲛⲉ ⲛⲟⲩⲛⲟϭ ⲛⲕⲏⲧⲟⲥ ⲁϥⲟⲩⲱⲙⲕ ⲛⲓⲱⲛⲁⲥ ⲁⲩⲱ ⲛⲉⲣⲉⲓⲱⲛⲁⲥ ⲛϩⲏⲧϥ ⲛⲕⲏⲧⲟⲥ ⲛϣⲟⲙⲛⲧ ⲛϩⲟⲟⲩ ⲙⲛϣⲟⲙⲧⲉ ⲛⲟⲩϣⲏ
2 ⲁⲩⲱ ⲁϥϣⲗⲏⲗ ⲛϭⲓⲓⲱⲛⲁ ⲉⲡϫⲟⲉⲓⲥ ⲡⲉϥⲛⲟⲩⲧⲉ ⲉϥⲛϩⲏⲧϥ ⲙⲡⲕⲏⲧⲟⲥ
3 ⲉϥϫⲱ ⲙⲙⲟⲥ ϫⲉⲁⲓϫⲓϣⲕⲁⲕ ⲉⲃⲟⲗ ϩⲛⲧⲁⲑⲗⲓⲯⲓⲥ ⲉϩⲣⲁⲓ ⲉⲡϫⲟⲉⲓⲥ ⲡⲁⲛⲟⲩⲧⲉ ⲁϥⲥⲱⲧⲙ ⲉⲣⲟⲓ ⲁⲓⲱϣ ⲉⲃⲟⲗ ⲉⲓ ⲛϩⲏⲧϥ ⲛⲁⲙⲛⲧⲉ ⲁⲩⲱ ⲁⲕⲥⲱⲧⲙ ⲉⲡⲁϩⲣⲟⲟⲩ
4 ⲁⲕⲛⲟϫⲧ ⲉϩⲣⲁⲓ ⲛϣⲓⲕ ⲙⲡϩⲏⲧ ⲛⲧϩⲁⲗⲁⲥⲥⲁ ⲁⲩⲱ ϩⲉⲛⲓⲉⲣⲱⲟⲩ ⲁⲩⲕⲱⲧⲉ ⲉⲣⲟⲓ ⲛⲉⲕϩⲟⲧⲉ ⲧⲏⲣⲟⲩ ⲙⲛⲛⲉⲕϩⲟⲉⲓⲙ ⲁⲩⲉⲓ ⲉϩⲣⲁⲓ ⲉϫⲱⲓ
5 ⲁⲛⲟⲕ ϩⲱ ⲁⲓϫⲱ ⲙⲙⲟⲥ ϫⲉⲁⲩⲛⲟϫⲧ ⲉⲃⲟⲗ ⲛⲛⲁϩⲣⲛⲡⲉⲕϩⲟ ⲁⲣⲁ ϯⲛⲁⲟⲩⲱϩ ⲉⲧⲟⲟⲧⲉϭⲱϣⲧ ⲉⲡⲉⲕⲣⲡⲉ ⲉⲧⲟⲩⲁⲁⲃ
6 ⲁϩⲉⲛⲙⲱⲟⲩ ⲉⲓ ⲉϩⲟⲩⲛ ⲛⲁⲓ ϣⲁⲧⲁⲯⲩⲭⲏ ⲁⲡⲛⲟⲩⲛ ⲛϩⲁⲉ ⲕⲱⲧⲉ ⲉⲣⲟⲓ ⲟⲩϩⲩⲗⲟⲥ ⲁϥⲕⲱⲧⲉ ⲉⲧⲁⲁⲡⲉ
7 ⲁⲓⲃⲱⲕ ⲉⲡⲉⲥⲏⲧ ⲉⲛⲟⲩⲱϣ ⲛⲛⲧⲟⲩⲉⲓⲏ ⲉⲡⲉⲥⲏⲧ ⲉⲩⲕⲁϩ ⲉⲣⲉⲛⲉϥⲙⲟⲭⲗⲟⲥ ⲁⲙⲁϩⲧⲉ ϣⲁⲉⲛⲉϩ ⲁⲩⲱ ⲕⲛⲁⲉⲓⲛⲉ ⲙⲙⲁ ⲛⲱⲛϩ ⲉϩⲣⲁⲓ ϩⲛⲡⲧⲁⲕⲟ ⲉϩⲣⲁⲓ ϣⲁⲣⲟⲕ ⲡϫⲟⲉⲓⲥ ⲡⲁⲛⲟⲩⲧⲉ
8 ϩⲙⲡⲧⲣⲉⲧⲁⲯⲩⲭⲏ ϣⲱⲛⲉ ⲛⲧⲟⲟⲧⲁⲓⲣⲡⲙⲉⲉⲩⲉ ⲙⲡϫⲟⲉⲓⲥ ⲁⲩⲱ ⲙⲁⲣⲉⲡⲁϣⲗⲏⲗ ⲉⲓ ⲉϩⲣⲁⲓ ϣⲁⲣⲟⲕ ⲛⲛⲁϩⲣⲛⲡⲉⲕⲣⲡⲉ ⲉⲧⲟⲩⲁⲁⲃ
9 ⲛⲉⲧϩⲁⲣⲉϩ ⲙⲡⲉⲧϣⲟⲩⲉⲓⲧ ⲙⲛⲛϭⲟⲗ ⲁⲩⲕⲱ ⲛⲥⲱⲟⲩ ⲙⲡⲉⲩⲛⲁ
10 ⲁⲛⲟⲕ ⲇⲉ ϩⲛⲟⲩϩⲣⲟⲟⲩ ⲛⲧⲱⲃϩ ϩⲓⲉⲝⲟⲙⲟⲗⲟⲅⲏⲥⲉⲓⲥ ϯⲛⲁϣⲱⲱⲧ ⲛⲁⲕ ⲛⲟⲩⲑⲩⲥⲓⲁ ⲛⲟⲩϫⲁⲓ ⲛⲉⲛⲧⲁⲓⲉⲣⲏⲧ ⲙⲙⲟⲟⲩ ϯⲛⲁⲧⲁⲁⲩ ⲛⲁⲕ ⲉⲡⲁⲟⲩϫⲁⲓ ⲡϫⲟⲉⲓⲥ
11 ⲁⲩⲱ ⲁϥⲟⲩⲉϩⲥⲁϩⲛⲉ ⲙⲡⲕⲏⲧⲟⲥ ⲁϥⲛⲟⲩϫⲉ ⲛⲓⲱⲛⲁⲥ ⲉϫⲛⲡⲉⲧϣⲟⲩϣⲟⲩ
Jonah 1 · Jonah 3 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)