Read Jonah 4 side by side with translations · The Final Bible
1 ⲁⲩⲱ ⲁϥⲗⲩⲡⲉⲓ ⲛϭⲓⲓⲱⲛⲁⲥ ϩⲛⲟⲩⲛⲟϭ ⲛⲗⲩⲡⲉⲓ ⲁⲩⲱ ⲁϥⲙⲕⲁϩ ⲛϩⲏⲧ
2 ⲁϥϣⲗⲏⲗ ⲉϩⲣⲁⲓ ⲉⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉⲱ ⲡϫⲟⲉⲓⲥ ⲙⲏ ⲛⲛⲁⲓ ⲁⲛ ⲛⲉ ⲛϣⲁϫⲉ ⲉⲧⲓ ⲉⲓϣⲟⲟⲡ ϩⲙⲡⲕⲁϩ ⲉⲧⲃⲉⲡⲁⲓ ⲁⲓⲣϣⲟⲣⲡ ⲉⲡⲱⲧ ⲉϩⲣⲁⲓ ⲉⲑⲁⲣⲥⲉⲓⲥ ⲉⲃⲟⲗ ϫⲉⲁⲓⲉⲓⲙⲉ ϫⲉⲛⲧⲕ ⲟⲩⲛⲁϩⲏⲧ ⲛⲧⲟⲕ ⲁⲩⲱ ⲛⲧⲕ ⲟⲩϣⲁⲛϩⲧⲏϥ ⲛⲧⲕ ⲟⲩϩⲁⲣϣϩⲏⲧ ⲉⲛⲁϣⲉⲡⲉⲕⲛⲁ ⲉⲕⲉⲓⲣⲉ ⲛϩⲧⲏⲕ ⲉϫⲛⲛⲕⲁⲕⲓⲁ
3 ⲧⲉⲛⲟⲩ ϭⲉ ⲡϫⲟⲉⲓⲥ ϫⲓ ⲧⲁⲯⲩⲭⲏ ⲛⲧⲟⲟⲧⲉⲃⲟⲗ ϫⲉⲛⲁⲛⲟⲩⲥ ⲛⲁⲓ ⲉⲙⲟⲩ ⲉϩⲟⲩⲉ ⲱⲛϩ
4 ⲁⲩⲱ ⲡⲉϫⲉⲡϫⲟⲉⲓⲥ ⲛⲓⲱⲛⲁ ϫⲉⲉⲛⲉ ⲁⲕⲙⲕⲁϩ ⲛϩⲏⲧ ⲛⲧⲟⲕ ⲉⲙⲁⲧⲉ
5 ⲁⲩⲱ ⲓⲱⲛⲁⲥ ⲁϥⲣⲡⲃⲟⲗ ⲛⲧⲡⲟⲗⲓⲥ ⲁϥϩⲙⲟⲟⲥ ⲙⲡⲉⲙⲧⲟ ⲉⲃⲟⲗ ⲛⲧⲡⲟⲗⲓⲥ ⲁⲩⲱ ⲁϥⲧⲁⲙⲓⲟ ⲛⲁϥ ⲙⲡⲙⲁ ⲉⲧⲙⲙⲁⲩ ⲛⲟⲩⲥⲕⲏⲛⲏ ⲁϥϩⲙⲟⲟⲥ ϩⲁⲣⲟⲥ ⲉϥϫⲓ ϩⲁⲓⲃⲉⲥ ϩⲁⲣⲟⲥ ϣⲁⲛⲧϥⲛⲁⲩ ϫⲉⲟⲩ ⲡⲉⲧⲛⲁϣⲱⲡⲉ ϩⲛⲧⲡⲟⲗⲓⲥ
6 ⲁⲩⲱ ⲡϫⲟⲉⲓⲥ ⲁϥⲟⲩⲉϩⲥⲁϩⲛⲉ ⲛⲟⲩⲃⲛⲧ ⲛⲉϭⲗⲟϭ ⲁⲩⲱ ⲁϥϯⲟⲩⲱ ⲉϫⲛⲓⲱⲛⲁ ⲉⲧⲣⲉϥⲣϩⲁⲓⲃⲉⲥ ⲉϫⲱϥ ⲉⲃⲟⲗ ϩⲙⲛⲉϥϩⲓⲥⲉ ⲁⲩⲱ ⲁϥⲣⲁϣⲉ ⲛϭⲓⲓⲱⲛⲁⲥ ϩⲛⲟⲩⲛⲟϭ ⲛⲣⲁϣⲉ ⲉϫⲛⲡⲃⲛⲧ ⲛⲉϭⲗⲟϭ
7 ⲁⲩⲱ ⲡⲛⲟⲩⲧⲉ ⲁϥⲟⲩⲉϩⲥⲁϩⲛⲉ ⲛⲟⲩϥⲛⲧ ⲙⲡⲛⲁⲩ ⲛϩⲧⲟⲟⲩⲉ ⲙⲡⲉϥⲣⲁⲥⲧⲉ ⲁϥⲣⲱϩⲧ ⲙⲡⲃⲛⲧ ⲛⲉϭⲗⲟϭ ⲁϥϣⲟⲟⲩⲉ
8 ⲁⲩⲱ ⲁⲥϣⲱⲡⲉ ⲉⲣⲉⲡⲣⲏ ⲛⲁϣⲁ ⲡⲛⲟⲩⲧⲉ ⲁϥⲟⲩⲉϩⲥⲁϩⲛⲉ ⲛⲟⲩⲧⲏⲩ ⲛϣⲁⲣⲃⲁ ⲁⲩⲱ ⲉϥⲣⲟⲕϩ ⲁⲩⲱ ⲁⲡⲣⲏ ϩⲓⲟⲩⲉ ⲉⲧⲁⲡⲉ ⲛⲓⲱⲛⲁ ⲁϥϣⲱⲥⲙ ⲛϩⲏⲧ ⲁⲩⲱ ⲁϥⲕⲁⲧⲟⲟⲧϥ ⲉⲃⲟⲗ ⲡⲉϫⲁϥ ϫⲉⲛⲁⲛⲟⲩⲥ ⲛⲁⲓ ⲉⲙⲟⲩ ⲉϩⲟⲩⲉ ⲱⲛϩ
9 ⲁⲩⲱ ⲡⲉϫⲉⲡϫⲟⲉⲓⲥ ⲡⲛⲟⲩⲧⲉ ⲛⲓⲱⲛⲁ ϫⲉⲉⲛⲉ ⲁⲕⲙⲕⲁϩ ⲛϩⲏⲧ ⲛⲧⲟⲕ ⲉⲙⲁⲧⲉ ⲉϫⲛⲡⲃⲛⲧ ⲛⲉϭⲗⲟϭ ⲁⲩⲱ ⲡⲉϫⲁϥ ϫⲉⲁⲓⲙⲕⲁϩ ⲛϩⲏⲧ ⲉⲙⲁⲧⲉ ⲁⲛⲟⲕ ϣⲁϩⲣⲁⲓ ⲉⲡⲙⲟⲩ
10 ⲡⲉϫⲉⲡϫⲟⲉⲓⲥ ⲛⲁϥ ϫⲉⲛⲧⲟⲕ ⲁⲕϣⲛϩⲧⲏⲕ ⲉϫⲛⲡⲃⲛⲧ ⲛⲉϭⲗⲟϭ ⲉⲙⲡⲕϣⲡϩⲓⲥⲉ ⲉϫⲱϥ ⲟⲩⲇⲉ ⲙⲡⲕⲥⲁⲛⲟⲩϣϥ ⲛⲧⲁϥϯⲟⲩⲱ ϩⲛⲟⲩⲟⲩϣⲏ ⲁϥⲙⲟⲩ ⲟⲛ ϩⲛⲟⲩⲟⲩϣⲏ
11 ⲁⲛⲟⲕ ϭⲉ ⲛⲛⲁϯ ⲥⲟ ⲉⲧⲛⲓⲛⲉⲩⲏ ⲧⲛⲟϭ ⲙⲡⲟⲗⲓⲥ ⲉⲩⲛϩⲏⲧⲥ ⲛϭⲓⲁϩⲟⲩⲟ ⲉⲙⲛⲧⲥⲛⲟⲟⲩⲥ ⲛⲧⲃⲁ ⲛⲣⲱⲙⲉ ⲛⲁⲓ ⲉⲧⲉⲙⲡⲟⲩⲥⲟⲩⲛ ⲧⲉⲩⲟⲩⲛⲁⲙ ⲙⲛⲧⲉⲩϩⲃⲟⲩⲣ ⲙⲛϩⲉⲛⲧⲃⲛⲟⲟⲩⲉ ⲉⲛⲁϣⲱⲟⲩ
Jonah 3 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)