Jonah 1 — Coptic (Sahidic)

1 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲓⲱⲛⲁⲥ ⲡϣⲏⲣⲉ ⲛⲁⲙⲁⲑⲉⲓ ⲉϥϫⲱ ⲙⲙⲟⲥ ϫⲉ

2 ⲧⲱⲟⲩⲛ ⲛⲅⲃⲱⲕ ⲉϩⲣⲁⲓ ⲉⲧⲛⲓⲛⲉⲩⲏ ⲧⲛⲟϭ ⲙⲡⲟⲗⲓⲥ ⲛⲅⲕⲏⲣⲩⲥⲥⲉ ⲉϩⲣⲁⲓ ⲛϩⲏⲧⲥ ϫⲉⲁⲡⲉⲟⲩⲟⲉⲓϣ ⲛⲧⲉⲥⲕⲁⲕⲓⲁ ⲉⲓ ⲉϩⲣⲁⲓ ⲙⲡⲁⲙⲧⲟ ⲉⲃⲟⲗ

3 ⲁⲩⲱ ⲁϥⲧⲱⲟⲩⲛ ⲛϭⲓⲓⲱⲛⲁⲥ ⲉⲡⲱⲧ ⲉⲑⲁⲣⲥⲉⲓⲥ ⲛⲛⲁϩⲣⲛⲡϩⲟ ⲙⲡϫⲟⲉⲓⲥ ⲁⲩⲱ ⲁϥⲃⲱⲕ ⲉϩⲣⲁⲓ ⲉⲓⲟⲡⲏ ⲁϥϭⲛⲟⲩϫⲟⲉⲓ ⲉϥⲛⲁⲥϭⲏⲣ ⲉⲑⲁⲣⲥⲉⲓⲥ ⲁϥϯⲧⲉϥϩⲏⲙⲉ ⲉϥⲧⲁⲗⲉ ⲉⲣⲟϥ ⲉⲥϭⲏⲣ ⲛⲙⲙⲁⲩ ⲉⲑⲁⲣⲥⲉⲓⲥ ⲛⲛⲁϩⲣⲛⲡϩⲟ ⲙⲡϫⲟⲉⲓⲥ

4 ⲁⲩⲱ ⲡϫⲟⲉⲓⲥ ⲁϥⲧⲟⲩⲛⲟⲥ ⲟⲩⲛⲟϭ ⲛⲧⲏⲟⲩ ⲉϩⲣⲁⲓ ⲉⲓ ⲉⲑⲁⲗⲁⲥⲥⲁ ⲁⲩⲛⲟϭ ⲛϩⲟⲉⲓⲙ ϣⲱⲡⲉ ⲉϩⲣⲁⲓ ⲛϩⲏⲧⲥ ⲁⲩⲱ ⲡϫⲟⲉⲓ ⲁϥϭⲓⲛⲇⲩⲛⲉⲩⲉ ⲉⲧⲁⲕⲟ

5 ⲁⲛⲛⲉⲉϥ ⲣϩⲟⲧⲉ ϩⲛⲟⲩⲛⲟϭ ⲛϩⲟⲧⲉ ⲁⲩⲱ ⲁⲩⲱϣ ⲉⲃⲟⲗ ⲛϭⲓⲡⲟⲩⲁ ⲡⲟⲩⲁ ⲉϩⲣⲁⲓ ⲉⲡⲉϥⲛⲟⲩⲧⲉ ⲁⲩⲱ ⲁⲩⲛⲟⲩϫⲉ ⲉⲃⲟⲗ ϩⲛⲛⲉⲥⲕⲉⲩⲏ ⲉⲧϩⲛⲡϫⲟⲉⲓ ⲉⲧⲉⲑⲁⲗⲁⲥⲥⲁ ⲉⲧⲣⲉⲡϫⲟⲉⲓ ⲁⲥⲁⲓ ⲉⲣⲟⲟⲩ ⲓⲱⲛⲁⲥ ⲇⲉ ⲁϥⲃⲱⲕ ⲉϩⲣⲁⲓ ⲉⲡⲟⲩⲛⲧ ⲙⲡϫⲟⲉⲓ ⲁϥⲛⲕⲟⲧⲕ ⲁϥϩⲣϩⲣ

6 ⲁⲩⲱ ⲁϥϯⲡⲉϥⲟⲩⲟⲉⲓ ⲉⲣⲟϥ ⲛϭⲓⲡⲛⲉⲉϥ ⲉⲧϩⲓϩⲏ ⲉϥϫⲱ ⲙⲙⲟⲥ ⲛⲁϥ ϫⲉⲉⲧⲃⲉⲟⲩ ⲛⲧⲟⲕ ⲕϩⲣϩⲣ ⲧⲱⲟⲩⲛ ⲛⲅⲉⲡⲓⲕⲁⲗⲉⲓ ⲙⲡⲉⲕⲛⲟⲩⲧⲉ ⲙⲉϣⲁⲕ ⲉϥⲉⲛⲁϩⲙⲛ ⲛϭⲓⲡⲉⲕⲛⲟⲩⲧⲉ ⲛⲧⲛⲧⲙⲙⲟⲩ

7 ⲡⲉϫⲉⲡⲟⲩⲁ ⲡⲟⲩⲁ ⲙⲡⲉⲧϩⲓⲧⲟⲩⲱϥ ϫⲉⲁⲙⲏⲉⲓⲧⲛ ⲛⲧⲛⲛⲉϫⲕⲗⲏⲣⲟⲥ ⲧⲁⲣⲛⲉⲓⲙⲉ ϫⲉⲉⲧⲃⲉⲟⲩ ⲛϩⲱⲃ ⲧⲉⲓⲕⲁⲕⲓⲁ ϩⲓϫⲱⲛ ⲁⲩⲛⲉϫⲕⲗⲏⲣⲟⲥ ⲁⲩⲱ ⲁⲡⲉⲕⲗⲏⲣⲟⲥ ⲉⲓ ⲉϫⲛⲓⲱⲛⲁⲥ

8 ⲡⲉϫⲁⲩ ⲛⲁϥ ϫⲉⲧⲁⲙⲟⲛ ϫⲉⲉⲧⲃⲉⲟⲩ ⲛϩⲱⲃ ⲧⲉⲕⲁⲕⲓⲁ ϩⲓϫⲱⲛ ⲟⲩ ⲧⲉ ⲧⲉⲕⲉⲓⲟⲡⲉ ⲁⲩⲱ ⲛⲧⲁⲕⲉⲓ ⲧⲱⲛ ⲁⲩⲱ ⲉⲕⲛⲁⲃⲱⲕ ⲉⲧⲱⲛ ⲛⲧⲕ ⲟⲩ ⲉⲃⲟⲗ ⲛⲧⲟⲕ ⲛⲁϣ ⲛⲭⲱⲣⲁ ⲁⲩⲱ ⲉⲃⲟⲗ ϩⲛⲛⲁϣ ⲛⲗⲁⲟⲥ

9 ⲁⲩⲱ ⲡⲉϫⲁϥ ⲛⲁⲩ ϫⲉⲁⲛⲅ ⲡϩⲙϩⲁⲗ ⲁⲛⲟⲕ ⲙⲡϫⲟⲉⲓⲥ ⲁⲩⲱ ⲡϫⲟⲉⲓⲥ ⲡⲛⲟⲩⲧⲉ ⲛⲧⲡⲉ ⲉⲓϣⲙϣⲉ ⲛⲁϥ ⲁⲛⲟⲕ ⲡⲁⲓ ⲉⲛⲧⲁϥⲧⲁⲙⲓⲟⲑⲁⲗⲗⲁⲥⲥⲁ ⲙⲛⲡⲉⲧϣⲟⲩⲱⲟⲩ

10 ⲁⲩⲱ ⲁⲩⲣϩⲟⲧⲉ ⲛϭⲓⲛⲣⲱⲙⲉ ϩⲛⲟⲩⲛⲟϭ ⲛϩⲟⲧⲉ ⲡⲉϫⲁⲩ ⲛⲁϥ ϫⲉⲉⲧⲃⲉⲟⲩ ⲁⲕⲣⲡⲁⲓ ⲉⲡⲉⲓⲁⲩⲉⲓⲙⲉ ⲛϭⲓⲛⲣⲱⲙⲉ ϫⲉⲛⲧⲁϥⲡⲱⲧ ⲛⲛⲁϩⲣⲛⲡϩⲟ ⲙⲡϫⲟⲉⲓⲥ ⲉⲃⲟⲗ ϫⲉⲁϥⲧⲁⲙⲟⲟⲩ

11 ⲡⲉϫⲁⲩ ⲛⲁϥ ϫⲉⲟⲩ ⲡⲉ ⲧⲉⲧⲛⲛⲁⲁϥ ⲛⲁⲕ ϫⲉⲉⲣⲉⲑⲁⲗⲁⲥⲥⲁ ⲗⲟ ⲉⲥⲟ ⲛϩⲟⲉⲓⲙ ⲉⲣⲟⲛ ⲉⲃⲟⲗ ϫⲉⲧⲉⲑⲁⲗⲁⲥⲥⲁ ⲛⲉⲥⲧⲱⲟⲩⲛ ⲛϩⲟⲩⲟ ⲉⲥⲛⲉϩⲥⲉ ⲛⲟⲩⲛⲟϭ ⲛϩⲟⲉⲓⲙ

12 ⲡⲉϫⲉⲓⲱⲛⲁⲥ ⲛⲁⲩ ϫⲉϥⲓⲧ ⲛⲧⲉⲧⲛⲛⲟϫⲧ ⲉⲑⲁⲗⲁⲥⲥⲁ ⲁⲩⲱ ⲥⲛⲁⲗⲟ ⲉⲥⲟ ⲛϩⲟⲉⲓⲙ ⲉⲣⲱⲧⲛ ⲉⲃⲟⲗ ϫⲉⲁⲓⲉⲓⲙⲉ ⲁⲛⲟⲕ ϫⲉⲉⲧⲃⲏⲏⲧⲉⲣⲉⲡⲉⲓⲛⲟϭ ⲛϩⲟⲉⲓⲙ ϩⲓϫⲱⲧⲛ

13 ⲁⲩⲱ ⲛⲉⲩⲉⲓⲣⲉ ⲛⲁⲡⲁⲧⲟⲟⲧⲟⲩ ⲛϭⲓⲛⲣⲱⲙⲉ ⲉⲕⲧⲟⲟⲩ ⲉⲡⲉⲕⲣⲟ ⲁⲩⲱ ⲙⲡⲟⲩϣⲕⲧⲟⲟⲩ ⲉⲃⲟⲗ ϫⲉⲧⲉⲑⲁⲗⲁⲥⲥⲁ ⲛⲉⲥⲣϩⲟⲉⲓⲙ ⲉⲙⲁⲧⲉ ⲉϫⲱⲟⲩ

14 ⲁⲩⲱ ⲁⲩⲱϣ ⲉⲃⲟⲗ ⲉϩⲣⲁⲓ ⲉⲡϫⲟⲉⲓⲥ ⲉⲩϫⲱ ⲙⲙⲟⲥ ϫⲉⲙⲡⲣϭⲱⲛⲧ ⲉⲣⲟⲛ ⲡϫⲟⲉⲓⲥ ⲙⲡⲣⲧⲣⲉⲛⲙⲟⲩ ⲉⲧⲃⲉⲧⲉⲯⲩⲭⲏ ⲙⲡⲉⲓⲣⲱⲙⲉ ⲙⲡⲣⲉⲓⲛⲉ ⲉϩⲣⲁⲓ ⲉϫⲱⲛ ⲛⲟⲩⲥⲛⲟϥ ⲛⲇⲓⲕⲁⲓⲟⲛ ⲉⲃⲟⲗ ϫⲉⲛⲧϩⲉ ⲛⲧⲁⲕⲟⲩⲁϣⲥ ⲛⲧⲟⲕ ⲡϫⲟⲉⲓⲥ ⲁⲕⲁⲁⲥ

15 ⲁⲩⲱ ⲁⲩϥⲓ ⲛⲓⲱⲛⲁⲥ ⲁⲩⲛⲟϫϥ ⲉϩⲣⲁⲓ ⲉⲑⲁⲗⲁⲥⲥⲁ ⲁⲧⲉⲑⲁⲗⲁⲥⲥⲁ ⲗⲟ ⲉⲥⲟ ⲛϩⲟⲉⲓⲙ

16 ⲁⲩⲱ ⲛⲣⲱⲙⲉ ⲁⲩⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ϩⲛⲟⲩⲛⲟϭ ⲛϩⲟⲧⲉ ⲁⲩⲱ ⲁⲩϣⲱⲱⲧ ⲛⲟⲩⲑⲩⲥⲓⲁ ⲙⲡϫⲟⲉⲓⲥ ⲁⲩⲉⲣⲏⲧ ⲛⲛⲉⲣⲏⲧ