Read Job 4 side by side with translations · The Final Bible
1 ⲁϥⲟⲩⲱϣⲃ ⲇⲉ ⲛϭⲓⲉⲗⲓⲫⲁⲥ ⲡⲉⲑⲁⲓⲙⲁⲛⲓⲧⲏⲥ ⲡⲉϫⲁϥ
2 ϫⲉⲙⲉ ⲁⲩϣⲁϫⲉ ⲛⲙⲙⲁⲕ ⲛϩⲁϩ ⲛⲥⲟⲡ ϩⲛⲟⲩϩⲓⲥⲉ ⲛⲓⲙ ⲇⲉ ⲡⲉⲧⲛⲁϣϥⲓ ϩⲁⲧϭⲟⲙ ⲛⲛⲉⲕϣⲁϫⲉ
3 ⲉϣϫⲉ ⲛⲧⲟⲕ ⲅⲁⲣ ⲁⲕϯⲥⲃⲱ ⲛⲟⲩⲙⲏⲏϣⲉ ⲁⲩⲱ ⲁⲕⲥⲉⲡⲥⲛϭⲓϫ ⲛⲛϭⲱⲃ
4 ⲁⲕⲧⲟⲩⲛⲉⲥ ⲛⲉⲧϣⲱⲛⲉ ϩⲛⲛⲉⲕϣⲁϫⲉ ⲁⲕϯⲧⲱⲕ ⲛⲙⲡⲁⲧ ⲛⲛϭⲱⲃ
5 ⲧⲉⲛⲟⲩ ⲇⲉ ⲁⲡϩⲓⲥⲉ ⲉⲓ ⲉϩⲣⲁⲓ ⲉϫⲱⲕ ⲁϥϫⲱϩ ⲉⲣⲟⲕ ⲛⲧⲟⲕ ⲇⲉ ⲁⲕϣⲧⲟⲣⲧⲣ
6 ⲉⲓⲉ ⲉⲣⲉⲧⲉⲕϩⲟⲧⲉ ϣⲟⲟⲡ ⲁⲛ ϩⲛⲟⲩⲙⲛⲧⲁⲧϩⲏⲧ ⲁⲩⲱ ⲧⲉⲕϩⲉⲗⲡⲓⲥ ⲙⲛⲧⲕⲁⲕⲓⲁ ⲛⲧⲉⲕϩⲓⲏ
7 ⲁⲣⲓⲡⲙⲉⲉⲩⲉ ϫⲉⲛⲓⲙ ⲡⲉⲛⲧⲁϥϩⲉ ⲉⲃⲟⲗ ⲉϥⲟⲩⲁⲁⲃ ⲏ ⲛⲓⲙ ⲛⲣⲙⲙⲙⲉ ⲡⲉⲛⲧⲁϥⲡⲱⲣⲕ ⲁϥⲧⲁⲕⲟ
8 ⲕⲁⲧⲁⲧϩⲉ ⲛⲧⲁⲓⲛⲁⲩ ⲉⲛⲉⲧⲥⲕⲁⲓ ⲛⲛⲉⲧⲉⲙⲉϣϣⲉ ⲛⲉⲧϫⲟ ⲇⲉ ⲙⲙⲟⲟⲩ ⲉⲩⲛⲁⲱϩⲥ ⲛⲁⲩ ⲛϩⲉⲛϩⲓⲥⲉ
9 ⲥⲉⲛⲁϩⲉ ⲇⲉ ⲉⲃⲟⲗ ϩⲓⲧⲙⲡⲉⲡⲣⲟⲥⲗⲁⲅⲙⲁ ⲙⲡϫⲟⲉⲓⲥ ⲁⲩⲱ ⲥⲉⲛⲁⲧⲁⲕⲟ ϩⲓⲧⲙⲡⲉⲡⲛⲉⲩⲙⲁ ⲛⲧⲟⲣⲅⲏ
10 ⲧϭⲟⲙ ⲛⲟⲩⲙⲟⲩⲓ ⲧⲉⲥⲙⲏ ⲇⲉ ⲛⲟⲩⲗⲁⲃⲁⲓ ⲡϣⲟⲩϣⲟⲩ ⲇⲉ ⲛⲛⲉⲇⲣⲁⲕⲱⲛ ⲁϥⲱϣⲙ
11 ⲁⲡⲙⲩⲣⲙⲏⲕⲟⲗⲏⲱⲛ ⲧⲁⲕⲟ ϫⲉⲙⲛⲧϥ ϩⲣⲏ ⲙⲙⲁⲩ ⲁⲙⲙⲁⲥ ⲇⲉ ⲙⲙⲟⲩⲉⲓ ⲱϫⲛ ⲛⲛⲉⲩⲉⲣⲏⲩ
12 ⲉⲛⲉⲛⲧⲁⲅⲓⲟⲛϣⲁϫⲉ ⲇⲉ ⲙⲙⲉ ϣⲱⲡⲉ ϩⲛⲛⲉⲕϣⲁϫⲉ ⲛⲉ ⲙⲛⲗⲁⲁⲩ ⲛⲛⲉⲓⲡⲉⲧϩⲟⲟⲩ ⲛⲁⲧⲱⲙⲛⲧ ⲉⲣⲟⲕ ⲙⲏ ⲡⲁⲙⲁⲁϫⲉ ⲛⲁⲥⲱⲧⲙ ⲁⲛ ⲉϩⲉⲛϣⲡⲏⲣⲉ ⲉⲃⲟⲗ ϩⲓⲧⲟⲟⲧϥ
13 ⲉⲟⲩϩⲟⲧⲉ ⲙⲛⲟⲩϩⲣⲟⲟⲩ ⲛϭⲱⲣϩ ⲉⲣⲉⲧϩⲟⲧⲉ ϩⲏⲩ ⲉϫⲛⲛⲣⲱⲙⲉ
14 ⲁⲩⲛⲉϩϣⲗϥ ⲇⲉ ⲧⲱⲙⲛⲧ ⲉⲣⲟⲓ ⲙⲛⲟⲩⲥⲧⲱⲧ ⲁⲩⲱ ⲁϥⲛⲟⲉⲓⲛ ⲛⲛⲁⲕⲉⲉⲥ ⲉⲙⲁⲧⲉ
15 ⲁⲩⲡⲛⲉⲩⲙⲁ ⲉⲓ ⲁϩⲣⲁⲓ ϩⲓⲡⲁϩⲟ ⲁⲛⲁⲃⲱ ⲇⲉ ⲛⲉϩϣⲗϥ ⲙⲛⲛⲁⲥⲁⲣⲝ
16 ⲁⲓⲧⲱⲟⲩⲛ ⲙⲡⲓⲛⲁⲩ ⲁⲓϭⲱϣⲧ ⲙⲡⲓϭⲛ ⲥⲙⲟⲧ ⲙⲡⲁⲙⲧⲟ ⲉⲃⲟⲗ ⲁⲗⲗⲁ ⲛⲉⲩⲟ ⲉⲓⲁⲁⲧⲉ ⲁⲩⲱ ⲛⲉⲩⲥⲱⲧⲙ ⲉⲟⲩⲥⲙⲏ
17 ⲉϣⲁⲣⲉⲟⲩ ⲅⲁⲣ ϣⲱⲡⲉ ⲙⲏ ⲟⲩ ⲛⲣⲱⲙⲉ ⲛⲁⲧⲃⲃⲟ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲏ ⲡⲣⲱⲙⲉ ⲛⲁϣⲱⲡⲉ ⲛⲁⲧⲛⲟⲃⲉ ϩⲛⲛⲉϥϩⲃⲏⲩⲉ
18 ⲉϣϫⲉ ⲙⲉϥⲧⲁⲛϩⲟⲩⲧϥ ⲣⲱ ⲙⲛⲛⲉϥϩⲙϩⲁⲗ ⲁϥⲙⲉⲉⲩⲉ ⲇⲉ ⲉⲩϭⲱⲱⲙⲉ ⲉⲛⲉϥⲁⲅⲅⲉⲗⲟⲥ
19 ⲉⲓⲉ ⲛⲉⲧⲟⲩⲏϩ ⲣⲱ ϩⲛⲛⲉⲓⲏⲓ ⲛⲟⲙⲉ ⲉⲁⲛ ϩⲉⲛⲉⲃⲟⲗ ϩⲱⲱⲛ ϩⲙⲡⲉⲓⲟⲙⲉ ⲛⲟⲩⲱⲧ ⲁⲩⲥⲙⲟⲧ ⲇⲉ ⲛϫⲟⲟⲗⲉⲥ ⲧⲁⲕⲟⲟⲩ
20 ⲁⲩⲱ ⲛⲥⲉϣⲟⲟⲡ ⲁⲛ ϫⲓⲛϩⲧⲟⲟⲩⲉ ϣⲁⲣⲟⲩϩⲉ ⲁⲩⲧⲁⲕⲟ ⲇⲉ ϫⲉⲙⲛϣϭⲟⲙ ⲙⲙⲟⲟⲩ ⲉⲃⲟⲏⲑⲉⲓ ⲉⲣⲟⲟⲩ
21 ⲁⲩⲛⲓⲃⲉ ⲅⲁⲣ ⲉⲣⲟⲟⲩ ⲁⲩⲱ ⲁⲩϣⲟⲟⲩⲉ ⲁⲩⲧⲁⲕⲟ ⲇⲉ ϫⲉⲙⲛⲧⲁⲩ ⲧⲥⲟⲫⲓⲁ
Job 3 · Job 5 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)