Read Job 5 side by side with translations · The Final Bible
1 ⲙⲟⲩⲧⲉ ⲛⲅⲛⲁⲩ ϫⲉⲟⲩⲛⲡⲉⲧⲛⲁⲥⲱⲧⲙ ⲉⲣⲟⲕ ⲏ ϫⲉⲛⲅⲛⲁⲛⲁⲩ ⲉⲗⲁⲁⲩ ⲛⲁⲅⲅⲉⲗⲟⲥ ⲉϥⲟⲩⲁⲁⲃ
2 ⲕⲁⲓ ⲅⲁⲣ ϣⲁⲣⲉⲧⲟⲣⲅⲏ ⲧⲁⲕⲉ ⲡⲁⲧϩⲏⲧ ϣⲁⲣⲉⲡⲕⲱϩ ⲇⲉ ⲙⲉⲩⲧⲡⲉⲧⲥⲟⲣⲙ
3 ⲁⲛⲟⲕ ⲇⲉ ⲁⲓⲛⲁⲩ ⲉⲛⲁⲧϩⲏⲧ ⲉⲩⲛⲉϫⲛⲟⲩⲛⲉ ⲉⲃⲟⲗ ⲁⲗⲗⲁ ⲛⲧⲉⲩⲛⲟⲩ ⲁⲩⲱϫⲛ ϩⲙⲡⲉⲩⲙⲁ
4 ⲉⲣⲉⲛⲉⲩϣⲏⲣⲉ ⲟⲩⲉ ⲙⲡⲟⲩϫⲁⲓ ⲉⲩϩⲓⲟⲩⲉ ⲇⲉ ⲉⲣⲟⲟⲩ ϩⲓⲧⲛⲛⲣⲟ ⲛⲛⲉⲧⲃⲃⲓⲏⲩ ⲉⲣⲟⲟⲩ ⲁⲩⲱ ⲛϥⲧⲙϣⲱⲡⲉ ⲛϭⲓⲡⲉⲧⲛⲟⲩϩⲙ ⲙⲟⲟⲩ
5 ⲛⲉⲛⲧⲁⲛⲁⲓ ⲅⲁⲣ ⲥⲟⲟⲩϩⲟⲩ ⲉϩⲟⲩⲛ ⲛⲇⲓⲕⲁⲓⲟⲥ ⲛⲉⲧⲛⲁⲟⲩⲟⲙⲟⲩ ⲛⲧⲟⲟⲩ ⲇⲉ ⲛⲛⲉⲩⲟⲩ ϫⲁⲓ ⲉⲡⲉⲧϩⲟⲟⲩ ⲉⲣⲉⲧⲉⲩϭⲟⲙ ⲱϫⲛ
6 ⲙⲉⲣⲉϩⲓⲥⲉ ⲅⲁⲣ ⲉⲓ ⲉⲃⲟⲗ ϩⲙⲡⲕⲁϩ ⲟⲩⲇⲉ ⲙⲉⲣⲉⲙⲟⲕϩⲥ ϯⲟⲩⲱ ϩⲓⲧⲟⲟⲩ
7 ⲁⲗⲗⲁ ⲉⲩϫⲡⲟ ⲙⲡⲣⲱⲙⲉ ⲉⲡϩⲓⲥⲉ ⲉⲣⲉⲙⲙⲁⲥ ⲇⲉ ⲛⲛⲟⲩⲣⲉ ϩⲏⲗ ϩⲛⲛⲉⲧϫⲟⲥⲉ
8 ⲙⲙⲟⲛ ⲇⲉ ⲁⲛⲟⲕ ϩⲱ ϯⲛⲁⲥⲉⲡⲥⲡϫⲟⲉⲓⲥ ϯⲛⲁⲱϣ ⲇⲉ ⲉϩⲣⲁⲓ ⲉⲡϫⲟⲉⲓⲥ ⲡⲉⲧϩⲓϫⲛ ⲟⲩⲟⲛ ⲛⲓⲙ
9 ⲡⲉⲛⲧⲁϥⲧⲁⲙⲓⲉⲛⲉⲓⲛⲟϭ ⲙⲛⲛⲉⲓⲁⲧⲁⲣⲏϫⲛⲟⲩ ⲛⲉⲧⲧⲁⲉⲓⲏⲩ ⲁⲩⲱ ⲛⲉⲓϣⲡⲏⲣⲉ ⲉⲧⲉⲙⲛⲧⲟⲩⲏⲡⲉ
10 ⲡⲉⲧϯ ⲙⲡϩⲟⲟⲩ ⲉϫⲙⲡⲕⲁϩ ⲡⲉⲧⲧⲛⲛⲟⲟⲩ ⲛⲟⲩⲙⲟⲟⲩ ϩⲁⲧⲡⲉ
11 ⲡⲉⲧϫⲓⲥⲉ ⲛⲛⲉⲑⲃⲃⲓⲏⲩ ⲡⲉⲧⲧⲟⲩⲛⲟⲩⲥ ⲛⲛⲉⲧⲧⲁⲕⲟ
12 ⲡⲉⲧϣⲓⲃⲉ ⲙⲡϣⲟϫⲛⲉ ⲛⲛⲣⲙⲛϩⲏⲧ ⲁⲩⲱ ⲛⲛⲉⲛⲉⲩϭⲓϫ ⲣⲗⲁⲁⲩ ⲙⲙⲉ
13 ⲡⲉⲧⲧⲁϩⲟ ⲛⲛⲉⲓⲥⲟⲫⲟⲥ ϩⲛⲛⲉⲩⲙⲛⲧⲥⲁⲃⲉ ⲁϥⲡⲱϣⲥ ⲇⲉ ⲙⲡϣⲟϫⲛⲉ ⲛⲛⲉⲓⲥⲁⲛⲕⲟⲧⲥ
14 ⲡⲕⲁⲕⲉ ⲛⲁⲧⲟⲙⲛⲧ ⲉⲣⲟⲟⲩ ⲙⲡⲉϩⲟⲟⲩ ⲥⲉⲛⲁϭⲟⲙϭⲙ ⲇⲉ ⲙⲡⲛⲁⲩ ⲙⲙⲉⲉⲣⲉ ⲛⲧϩⲉ ⲛⲧⲉⲩϣⲏ
15 ⲉⲩⲉⲧⲁⲕⲟ ⲇⲉ ϩⲛⲟⲩⲡⲟⲗⲉⲙⲟⲥ ⲉⲣⲉⲟⲩϭⲱⲃ ⲇⲉ ⲣⲃⲟⲗ ⲉⲧϭⲓϫ ⲙⲡϫⲱⲱⲣⲉ ⲉⲣⲟϥ
16 ⲉⲣⲉⲟⲩϩⲉⲗⲡⲓⲥ ⲇⲉ ϣⲱⲡⲉ ⲙⲡⲁⲧϭⲟⲙ ⲉⲣⲉⲧⲧⲁⲡⲣⲟ ⲇⲉ ⲙⲡⲣⲉϥϫⲓⲛϭⲟⲛⲥ ⲧⲱⲙ
17 ⲛⲁⲓⲁⲧϥ ⲇⲉ ⲙⲡⲣⲱⲙⲉ ⲛⲧⲁⲡϫⲟⲉⲓⲥ ϫⲡⲓⲟϥ ⲙⲡⲣⲕⲱ ⲇⲉ ⲛⲥⲱⲕ ⲛⲧⲉⲥⲃⲱ ⲙⲡⲡⲁⲛⲧⲟⲕⲣⲁⲧⲱⲣ
18 ⲛⲧⲟϥ ⲅⲁⲣ ⲡⲉ ϣⲁϥⲙⲟⲕϩⲟⲩ ⲁⲩⲱ ⲛϥⲧⲁϩⲟⲟⲩ ⲉⲣⲁⲧⲟⲩ ⲉⲡⲉⲩⲙⲁ ⲁⲩⲱ ϣⲁϥϣⲁⲁⲣ ⲛⲧⲉⲧⲉϥϭⲓϫ ⲟⲛ ⲧⲁⲗϭⲟ
19 ϥⲛⲁⲧⲟⲩϫⲟⲕ ⲛⲥⲟⲟⲩ ⲛⲥⲟⲡ ϩⲛⲛⲉⲕⲁⲛⲁⲅⲕⲏ ⲁⲩⲱ ⲛⲛⲉⲡⲉⲧϩⲟⲟⲩ ϫⲱϩ ⲉⲣⲟⲕ ϩⲙⲡⲙⲉϩⲥⲁϣϥ
20 ϥⲛⲁⲛⲁϩⲙⲉⲕ ⲉⲡⲙⲟⲩ ϩⲙⲡϩⲉⲃⲱⲱⲛ ϥⲛⲁⲧⲟⲩϫⲟⲕ ⲇⲉ ϩⲛⲟⲩⲡⲟⲗⲉⲙⲟⲥ ⲉⲧⲟⲟⲧϥ ⲙⲡⲡⲉⲛⲓⲡⲉ
21 ϥⲛⲁϩⲟⲡⲕ ⲉⲩⲟⲩⲱϣⲥ ⲛⲗⲁⲥ ⲁⲩⲱ ⲛⲛⲉⲕⲣϩⲟⲧⲉ ϩⲏⲧⲟⲩ ⲛϩⲉⲛⲡⲉⲧϩⲟⲟⲩ ⲉⲩⲛⲏⲩ
22 ⲕⲛⲁⲥⲱⲃⲉ ⲛⲥⲁⲛⲣⲉϥϫⲓⲛϭⲟⲛⲥ ⲙⲛⲛⲁⲛⲟⲙⲟⲥ ⲛⲛⲉⲕⲣϩⲟⲧⲉ ϩⲏⲧⲟⲩ ⲛⲛⲉⲑⲏⲣⲓⲟⲛ ⲛⲁⲅⲣⲓⲟⲛ
23 ⲛⲉⲑⲏⲣⲓⲟⲛ ⲅⲁⲣ ⲛⲁⲅⲣⲓⲟⲛ ⲛⲁⲥⲱⲧⲙ ⲛⲁⲕ
24 ⲉⲓⲧⲁ ⲕⲛⲁⲉⲓⲙⲉ ϫⲉⲡⲉⲕⲏⲓ ⲛⲁⲥⲱⲧⲙ ⲛⲁⲕ ⲁⲩⲱ ⲛⲛⲉⲡⲛⲉⲩⲙⲁ ⲛϣⲱⲡⲉ ⲛⲧⲉⲕⲥⲕⲏⲛⲏ ⲣⲛⲟⲃⲉ
25 ⲕⲛⲁⲉⲓⲙⲉ ⲇⲉ ϫⲉⲛⲁϣⲉ ⲡⲉⲕⲥⲡⲉⲣⲙⲁ ⲁⲩⲱ ⲛⲉⲕϣⲏⲣⲉ ⲛⲁϣⲱⲡⲉ ⲛⲧϩⲉ ⲛⲛⲣⲱⲧ ⲧⲏⲣⲟⲩ ⲛⲧⲥⲱϣⲉ
26 ⲕⲛⲏⲩ ⲇⲉ ⲉⲡⲧⲁⲫⲟⲥ ⲛⲧϩⲉ ⲛⲟⲩⲥⲟⲩⲟ ϩⲙⲡⲉϥⲇⲉ ⲉⲁⲩⲟϩⲥϥ ϩⲙⲡⲉϥⲟⲩⲟⲉⲓϣ ⲏ ⲛⲧϩⲉ ⲛⲟⲩϫⲁⲧⲙⲉ ⲛϫⲛⲟⲟⲩ ⲉⲁⲩϫⲓⲧⲥ ⲉϩⲟⲩⲛ ⲛⲧⲉⲥⲟⲩⲛⲟⲩ
27 ⲉⲓⲥ ϩⲏⲏⲧⲉ ⲁⲛϩⲉⲧϩⲧⲛⲁⲓ ⲛϯϩⲉ ⲁⲩⲱ ⲛⲁⲓ ⲛⲉⲛⲧⲁⲛⲥⲟⲧⲙⲟⲩ ⲛⲧⲟⲕ ⲇⲉ ⲉⲓⲙⲉ ⲛϩⲏⲧⲕ ϫⲉⲛⲧⲁⲕⲣⲟⲩ
Job 4 · Job 6 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)