Isaiah 35 — Coptic (Sahidic)

1 ⲉⲩⲫⲣⲁⲛⲉ ⲧⲉⲣⲏⲙⲟⲥ ⲉⲧⲟⲃⲉ ⲙⲁⲣⲉⲧⲉⲣⲏⲙⲟⲥ ⲧⲉⲗⲏⲗ ⲛⲥϯⲟⲩⲱ ⲛⲧϩⲉ ⲛⲟⲩⲕⲣⲓⲛⲟⲛ

2 ⲁⲩⲱ ⲛϫⲁⲓⲉ ⲙⲡⲓⲟⲣⲇⲁⲛⲏⲥ ⲛⲁϯⲟⲩⲱ ⲛⲥⲉⲧⲉⲗⲏⲗ ⲁⲩⲱ ⲁⲩϯ ⲛⲁⲥ ⲙⲡⲉⲟⲟⲩ ⲙⲡⲗⲓⲃⲁⲛⲟⲥ ⲁⲩⲱ ⲡⲧⲁⲉⲓⲟ ⲙⲡⲕⲁⲣⲙⲏⲗⲟⲥ ⲁⲩⲱ ⲡⲁⲗⲁⲟⲥ ⲛⲁⲛⲁⲩ ⲉⲡⲉⲟⲟⲩ ⲙⲡϫⲟⲉⲓⲥ ⲙⲛⲡϫⲓⲥⲉ ⲙⲡⲛⲟⲩⲧⲉ

3 ϭⲙϭⲟⲙ ⲛϭⲓϫ ⲉⲧⲥⲏϭ ⲙⲛⲙⲡⲁⲧ ⲉⲧⲃⲏⲗ ⲉⲃⲟⲗ

4 ⲡⲁⲣⲁⲕⲁⲗⲉⲓ ⲛⲛϩⲏⲧ ϣⲏⲙ ϩⲙⲡⲉⲩϩⲏⲧ ⲙⲡⲣⲣϩⲟⲧⲉ ⲉⲓⲥ ϩⲏⲏⲧⲉ ⲡⲉⲛⲛⲟⲩⲧⲉ ⲛⲁⲧⲱⲱⲃⲉ ϩⲛⲟⲩϩⲁⲡ ⲁⲩⲱ ϥⲛⲁⲧⲱⲱⲃⲉ ⲛⲁⲩ ⲛⲧⲟϥ ⲡⲉⲧⲛⲏⲩ ⲛϥⲧⲟⲩϫⲟⲛ

5 ⲧⲟⲧⲉ ⲛⲃⲁⲗ ⲛⲛⲃⲗⲗⲉ ⲛⲁⲟⲩⲱⲛ ⲁⲩⲱ ⲙⲙⲁⲁϫⲉ ⲛⲛⲁⲗ ⲛⲁⲥⲱⲧⲙ

6 ⲧⲟⲧⲉ ⲛϭⲁⲗⲉ ⲛⲁϫⲓⲃⲁϭⲥ ⲛⲧϩⲉ ⲛⲛⲓⲟⲩⲗ ⲁⲩⲱ ⲡⲗⲁⲥ ⲛⲛϭⲁϫⲉ ⲗⲁⲥ ⲛⲁⲥⲟⲟⲩⲧⲛ ϫⲉⲁⲩⲙⲟⲟⲩ ⲥⲱⲕ ϩⲓⲡϫⲁⲓⲉ ⲁⲩⲱ ⲟⲩⲉⲓⲁ ϩⲛⲟⲩⲕⲁϩ ⲉϥⲟⲃⲉ

7 ⲁⲩⲱ ⲡⲙⲁ ⲉⲧⲉⲙⲛⲙⲟⲟⲩ ⲛϩⲏⲧϥ ⲛⲁⲣϩⲉⲗⲟⲥ ⲁⲩⲱ ⲟⲩⲡⲩⲅⲏ ⲙⲙⲟⲟⲩ ϩⲛⲟⲩⲕⲁϩ ⲛⲓⲃⲉ ϥⲛⲁϣⲱⲡⲉ ⲙⲙⲁⲩ ⲛϭⲓⲟⲩⲟⲩⲛⲟϥ ⲛϩⲁⲗⲏⲧ ⲁⲩⲱ ϩⲉⲛⲣⲥⲱ ⲛⲟϩⲉ ⲟⲩⲛϩⲉⲛⲕⲁϣ ⲙⲛϩⲉⲛϩⲉⲗⲟⲥ ⲛⲁϣⲱⲡⲉ ⲙⲙⲁⲩ

8 ⲥⲉⲛⲁⲙⲟⲩⲧⲉ ⲉⲣⲟⲥ ϫⲉⲧⲉϩⲓⲏ ⲉⲧⲧⲃⲃⲏⲩ ⲁⲩⲱ ⲉⲧⲟⲩⲁⲁⲃ ⲛⲛⲉⲁⲕⲁⲑⲁⲣⲧⲟⲥ ⲉⲓ ⲉⲃⲟⲗ ϩⲓⲧⲙⲡⲙⲁ ⲉⲧⲙⲙⲁⲩ ⲟⲩⲇⲉ ⲛⲛⲉϩⲓⲏ ⲛⲁⲕⲁⲑⲁⲣⲧⲟⲥ ϣⲱⲡⲉ ⲙⲙⲁⲩ ⲛⲉⲧϫⲟⲟⲣⲉ ⲇⲉ ⲉⲃⲟⲗ ⲛⲁⲙⲟⲟϣⲉ ϩⲓϫⲱϥ ⲁⲩⲱ ⲛⲛⲉⲩⲡⲗⲁⲛⲁ

9 ⲁⲩⲱ ⲛⲛⲉⲙⲟⲩⲓ ϣⲱⲡⲉ ⲙⲙⲁⲩ ⲟⲩⲇⲉ ⲛⲛⲉⲗⲁⲁⲩ ⲛⲑⲏⲣⲓⲱⲛ ⲙⲡⲟⲛⲏⲣⲟⲛ ⲁⲗⲉ ⲉϫⲱϥ ⲟⲩⲇⲉ ⲛⲛⲉⲩϩⲉ ⲉⲣⲟⲟⲩ ⲙⲙⲁⲩ ⲁⲗⲗⲁ ⲥⲉⲛⲁⲙⲟⲟϣⲉ ⲛϩⲏⲧⲥ ⲉⲁⲩⲥⲟⲧⲟⲩ

10 ⲁⲩⲱ ⲉⲩⲥⲟⲟⲩϩ ⲥⲉⲛⲁⲕⲟⲧⲟⲩ ⲉⲧⲃⲉⲡϫⲟⲉⲓⲥ ⲁⲩⲱ ⲛⲥⲉⲉⲓ ⲉⲥⲓⲱⲛ ϩⲛⲟⲩⲟⲩⲛⲟϥ ⲁⲩⲱ ⲉⲣⲉⲡⲟⲩⲛⲟϥ ⲛϣⲁ ⲉⲛⲉϩ ϩⲓϫⲛⲧⲉⲩⲁⲡⲉ ⲡⲉⲥⲙⲟⲩ ⲅⲁⲣ ⲛⲁϣⲱⲡⲉ ϩⲓϫⲱⲟⲩ ⲁⲩⲱ ⲡⲟⲩⲛⲟϥ ⲙⲛⲡⲧⲉⲗⲏⲗ ⲛⲁⲧⲁϩⲟⲟⲩ ⲁⲧⲗⲩⲡⲏ ⲡⲱⲧ ⲙⲛⲡⲉⲙⲕⲁϩ ⲛϩⲏⲧ ⲙⲛⲡⲁϣ ⲁϩⲟⲙ