Read Isaiah 34 side by side with translations · The Final Bible
1 ϩⲱⲛ ⲉⲣⲟⲓ ⲛϩⲉⲑⲛⲟⲥ ⲛⲧⲉⲧⲛⲥⲱⲧⲙ ⲛⲁⲣⲭⲱⲛ ⲙⲁⲣⲉⲡⲕⲁϩ ⲥⲱⲧⲙ ⲙⲛⲛⲉⲧⲟⲩⲏϩ ⲛϩⲏⲧϥ ⲧⲟⲓⲕⲟⲩⲙⲉⲛⲏ ⲙⲛⲡⲉⲥⲗⲁⲟⲥ
2 ϫⲉⲡϭⲱⲛⲧ ⲙⲡϫⲟⲉⲓⲥ ⲛⲏⲩ ⲉϫⲛⲛϩⲉⲑⲛⲟⲥ ⲧⲏⲣⲟⲩ ⲁⲩⲱ ⲟⲩⲟⲣⲅⲏ ⲉϫⲛⲧⲉⲩⲁⲡⲉ ⲉⲧⲁⲕⲟⲟⲩ ⲁⲩⲱ ⲉⲧⲁⲁⲩ ⲉⲡⲕⲟⲛⲥⲟⲩ
3 ⲛⲉⲩϩⲁⲓⲃⲉⲥ ⲇⲉ ⲙⲛⲛⲉⲩⲣⲉϥⲙⲟⲟⲩⲧ ⲛⲁϣⲱⲡⲉ ⲉⲩⲛⲏϫ ⲛⲧⲉⲡⲉⲩⲥⲧⲟⲓ ⲉⲓ ⲉϩⲣⲁⲓ ⲛⲧⲉⲛⲧⲟⲟⲩ ϩⲱⲣⲡ ⲙⲡⲉⲩⲥⲛⲟϥ
4 ⲛⲧⲉⲧⲡⲉ ϭⲱⲗ ⲛⲧϩⲉ ⲛⲟⲩϫⲱⲱⲙⲉ ⲁⲩⲱ ⲛⲥⲓⲟⲩ ⲧⲏⲣⲟⲩ ⲛⲁϩⲉ ⲛⲧϩⲉ ⲛϩⲉⲛϭⲱⲃⲉ ⲛⲉⲣⲡⲱ ⲉⲃⲟⲗ ϩⲛⲟⲩⲃⲱ ⲛⲉⲗⲟⲟⲗⲉ ⲁⲩⲱ ⲛⲧϩⲉ ⲉϣⲁⲣⲉϩⲉⲛϭⲱⲃⲉ ϩⲉ ϩⲛⲟⲩⲃⲱ ⲛⲕⲛⲧⲉ
5 ⲁⲧⲁⲥⲏϥⲉ ϯϩⲉ ϩⲛⲧⲡⲉ ⲉⲓⲥ ϩⲏⲏⲧⲉ ⲥⲛⲏⲩ ⲉⲡⲉⲥⲏⲧ ⲉϫⲛⲧⲓⲇⲟⲩⲙⲁⲓⲁ ⲁⲩⲱ ⲉϫⲙⲡⲗⲁⲟⲥ ⲙⲡⲧⲁⲕⲟ ϩⲛⲟⲩϩⲱⲡ
6 ⲁⲧⲥⲏϥⲉ ⲙⲡϫⲟⲉⲓⲥ ⲥⲉⲓ ⲛⲥⲛⲟϥ ⲁⲥⲟⲩⲙⲟⲧ ⲉⲃⲟⲗ ϩⲙⲡⲱⲧ ⲛⲛⲉϩⲓⲉⲓⲃ ⲙⲛⲡⲱⲧ ⲛⲛϭⲓⲉ ⲙⲛⲛⲟⲉⲓⲗⲉ ϫⲉⲧⲉⲑⲩⲥⲓⲁ ⲙⲡϫⲟⲉⲓⲥ ϩⲛⲃⲟⲥⲟⲣ ⲁⲩⲱ ⲟⲩⲛⲟϭ ⲛⲕⲱⲛⲥ ϩⲛⲧⲓⲇⲟⲩⲙⲁⲓⲁ
7 ⲁⲩⲱ ⲛϭⲓⲉ ⲛⲁϩⲉ ⲛⲙⲙⲁⲩ ⲙⲛⲛⲟⲉⲓⲗⲉ ⲙⲛⲙⲙⲁⲥⲉ ⲁⲩⲱ ⲡⲕⲁϩ ⲛⲁϯϩⲉ ϩⲙⲡⲉⲩⲥⲛⲟϥ ⲁⲩⲱ ϥⲛⲁⲥⲓ ϩⲙⲡⲉⲩⲱⲧ
8 ⲡⲉϩⲟⲟⲩ ⲅⲁⲣ ⲙⲡϩⲁⲡ ⲙⲡϫⲟⲉⲓⲥ ⲁⲩⲱ ⲧⲉⲣⲟⲙⲡⲉ ⲛⲧⲱⲱⲃⲉ ⲙⲡⲥⲓⲱⲛ ⲁⲥⲟⲩⲉⲓⲛⲉ ⲉϫⲱⲟⲩ
9 ⲁⲩⲱ ⲛⲉⲥⲉⲓⲁ ⲛⲁⲕⲟⲧⲟⲩ ⲉⲩⲗⲁⲙϫⲁⲧⲡ ⲁⲩⲱ ⲡⲉⲥⲕⲁϩ ⲉⲩⲑⲏⲛ ⲁⲩⲱ ⲡⲉⲥⲕⲁϩ ⲛⲁϣⲱⲡⲉ ⲉϥⲙⲟⲩϩ ⲛⲧϩⲉ ⲛⲟⲩⲗⲁⲙϫⲁⲧⲡ
10 ⲛⲧⲉⲩϣⲏ ⲙⲛⲡⲉϩⲟⲟⲩ ⲁⲩⲱ ⲛϥⲛⲁⲱϣⲙ ⲁⲛ ϣⲁⲉⲛⲉϩ ⲛⲟⲩⲟⲉⲓϣ ⲁⲩⲱ ⲡⲉⲥⲕⲁⲡⲛⲟⲥ ⲛⲁϫⲓⲥⲉ ⲉⲧⲡⲉ ⲥⲛⲁϣⲱϥ ϣⲁϩⲉⲛϫⲱⲙ ⲛⲥⲣϫⲁⲓⲉ ⲉⲩⲛⲟϭ ⲛⲟⲩⲟⲉⲓϣ
11 ⲁⲩⲱ ⲛϩⲁⲗⲁⲧⲉ ⲛⲁⲟⲩⲱϩ ⲛϩⲏⲧⲥ ⲙⲛⲛⲉϩⲃⲱ ⲙⲛⲛⲉϩⲓⲃⲱⲓ ⲙⲛⲛⲁⲃⲟⲟⲕⲉ ⲁⲩⲱ ⲥⲉⲛⲁⲥⲱⲣ ⲉϫⲱⲥ ⲛⲟⲩⲛⲟⲩϩ ⲛϣⲓⲉⲓⲱϩⲉ ⲛϫⲁⲓⲉ ⲁⲩⲱ ⲛϩⲟⲛⲟⲕⲉⲛⲧⲁⲩⲣⲟⲥ ⲛⲁⲟⲩⲱϩ ⲛϩⲏⲧⲥ
12 ⲛⲉⲥⲁⲣⲭⲱⲛ ⲛⲁϣⲱⲡⲉ ⲁⲛ ⲛⲉⲥⲉⲣⲣⲱⲟⲩ ⲅⲁⲣ ⲙⲛⲛⲉⲥⲁⲣⲭⲱⲛ ⲛⲁϣⲱⲡⲉ ⲉⲩⲧⲁⲕⲟ
13 ⲁⲩⲱ ⲛϣⲁⲩ ⲛϣⲟⲛⲧⲉ ⲛⲁⲣⲱⲧ ϩⲣⲁⲓ ϩⲛⲛⲉⲥⲡⲟⲗⲓⲥ ⲙⲛⲛⲉⲥⲙⲁ ⲉⲧϫⲟⲥⲉ ⲛⲥϣⲱⲡⲉ ⲛⲉⲣⲥⲱ ⲛⲛⲥⲓⲣⲏⲛⲟⲥ ⲁⲩⲱ ⲛⲟϩⲉ ⲛⲛⲉⲥⲧⲣⲉⲟⲩⲑⲟⲥ
14 ⲁⲩⲱ ⲛⲇⲁⲓⲙⲟⲛⲓⲟⲛ ⲛⲁⲧⲱⲙⲛⲧ ⲉⲛϩⲟⲛⲟⲕⲉⲛⲧⲁⲩⲣⲟⲥ ⲛⲥⲉϫⲓϣⲕⲁⲕ ⲉⲃⲟⲗ ⲟⲩⲁ ⲛⲁϩⲣⲉⲛ ⲟⲩⲁ ⲉⲣⲉⲛϩⲟⲛⲟⲕⲉⲛⲧⲁⲩⲣⲟⲥ ⲛⲁⲙⲧⲟⲛ ⲙⲙⲟⲟⲩ ⲙⲙⲁⲩ ⲁⲩϩⲉ ⲅⲁⲣ ⲉⲩⲙⲟⲧⲛⲉⲥ ⲛⲁⲩ
15 ⲛⲧⲁⲧⲉϩⲃⲱ ⲥⲁⲁⲛϣ ⲙⲙⲁⲩ ⲛⲛⲉⲥϣⲏⲣⲉ ⲁⲩⲱ ⲁⲡⲕⲁϩ ⲧⲟⲩϫⲟ ⲛⲛⲉⲥϣⲏⲣⲉ ϩⲛⲟⲩⲱⲣϫ ⲛⲧⲁⲛⲓⲟⲩⲗ ⲧⲱⲙⲛⲧ ⲙⲙⲁⲩ ⲁⲩⲛⲁⲩ ⲉⲡϩⲟ ⲛⲛⲉⲩⲉⲣⲏⲩ
16 ⲁⲩⲉⲓ ⲉⲃⲟⲗ ϩⲛⲟⲩⲏⲡⲉ ⲙⲡⲉⲟⲩⲁ ⲙⲙⲟⲟⲩ ⲥⲱⲣⲙ ⲙⲡⲉⲟⲩⲁ ϣⲓⲛⲉ ⲛⲥⲁⲟⲩⲁ ϫⲉⲡϫⲟⲉⲓⲥ ⲡⲉⲛⲧⲁϥϩⲱⲛ ⲉⲧoⲟⲧⲟⲩ ⲁⲩⲱ ⲡⲉϥⲡⲛⲉⲩⲙⲁ ⲡⲉⲛⲧⲁϥⲥⲟⲟⲩϩⲟⲩ
17 ⲁⲩⲱ ⲛⲧⲟϥ ⲡⲉⲛⲧⲁϥⲛⲟⲩϫⲉ ⲛⲁⲩ ⲛϩⲉⲛⲕⲗⲏⲣⲟⲥ ⲁⲩⲱ ⲧⲉϥϭⲓϫ ⲧⲉⲛⲧⲁⲥⲡⲱϣ ⲛⲁⲩ ⲉⲙⲟⲟⲛⲉ ϣⲁⲉⲛⲉϩ ⲛⲟⲩⲟⲉⲓϣ ⲛⲧⲉⲧⲛⲕⲗⲏⲣⲟⲛⲟⲙⲉⲓ ⲛϩⲉⲛϫⲱⲙ ⲛϫⲱⲙ ⲁⲩⲱ ⲥⲉⲛⲁⲙⲧⲟⲛ ⲙⲙⲟⲟⲩ ⲉϫⲱⲥ
Isaiah 33 · Isaiah 35 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)