Read Genesis 48 side by side with translations · The Final Bible
1 ⲁⲥϣⲱⲡⲉ ⲇⲉ ⲙⲛⲛⲥⲁⲛⲉⲓϣⲁϫⲉ ⲁⲩϫⲓⲡⲟⲩⲱ ⲛⲓⲱⲥⲏⲫ ϫⲉⲡⲉⲕⲉⲓⲱⲧ ⲙⲟⲕϩ ⲁϥϫⲓ ⲙⲡⲉϥϣⲏⲣⲉ ⲥⲛⲁⲩ ⲙⲁⲛⲁⲥⲥⲏ ⲙⲛⲉⲫⲣⲁⲓⲙ ⲁϥⲉⲓ ϣⲁⲡⲉϥⲉⲓⲱⲧ
2 ⲁⲩϫⲓ ⲙⲡⲟⲩⲱ ⲇⲉ ⲛⲓⲁⲕⲱⲃ ⲉⲩϫⲱ ⲙⲙⲟⲥ ϫⲉⲉⲓⲥⲡⲉⲕϣⲏⲣⲉ ⲓⲱⲥⲏⲫ ⲛⲏⲩ ϣⲁⲣⲟⲕ ⲁϥϭⲙϭⲟⲙ ⲛϭⲓⲡⲓⲥⲣⲁⲏⲗ ⲁϥϩⲙⲟⲟⲥ ⲉϩⲣⲁⲓ ⲉϫⲙⲡⲉϥϭⲗⲟϭ
3 ⲡⲉϫⲉⲓⲁⲕⲱⲃ ⲛⲓⲱⲥⲏⲫ ϫⲉⲡⲁⲛⲟⲩⲧⲉ ⲁϥⲟⲩⲱⲛϩ ⲛⲁⲓ ⲉⲃⲟⲗ ϩⲣⲁⲓ ϩⲛⲗⲟⲩⲍⲁ ϩⲙⲡⲕⲁϩ ⲛⲭⲁⲛⲁⲁⲛ ⲁϥⲥⲙⲟⲩ ⲉⲣⲟⲓ
4 ⲉϥϫⲱ ⲙⲙⲟⲥ ϫⲉϯⲛⲁⲁⲩⲝⲁⲛⲉ ⲙⲙⲟⲕ ⲧⲁⲧⲁϣⲟⲕ ⲧⲁⲁⲕ ⲛϩⲉⲛⲥⲩⲛⲁⲅⲱⲅⲏ ⲛⲛϩⲉⲑⲛⲟⲥ ⲧⲁϯ ⲛⲁⲕ ⲙⲡⲉⲓⲕⲁϩ ⲙⲛⲡⲉⲕⲥⲡⲉⲣⲙⲁ ⲙⲛⲛⲥⲱⲕ ⲉⲩⲙⲁ ⲛⲁⲙⲁϩⲧⲉ ϣⲁⲉⲛⲉϩ
5 ⲧⲉⲛⲟⲩ ϭⲉ ⲡⲉⲕϣⲏⲣⲉ ⲥⲛⲁⲩ ⲛⲧⲁⲩϣⲱⲡⲉ ⲛⲁⲕ ϩⲣⲁⲓ ϩⲛⲕⲏⲙⲉ ⲙⲡⲁⲧⲓⲉⲓ ϣⲁⲣⲟⲕ ⲉⲕⲏⲙⲉ ⲛⲟⲩⲓ ⲛⲉ ⲉⲫⲣⲁⲓⲙ ⲙⲛⲙⲁⲛⲁⲥⲥⲏ ⲉⲩⲛⲁϣⲱⲡⲉ ⲛⲁⲓ ⲛⲧϩⲉ ⲛϩⲣⲟⲩⲃⲏⲛ ⲙⲛⲥⲉⲙⲉⲱⲛ
6 ⲛϣⲏⲣⲉ ⲉⲧⲉⲕⲛⲁϫⲡⲟⲟⲩ ϫⲓⲛⲧⲉⲛⲟⲩ ⲉⲩⲛⲁϣⲱⲡⲉ ⲛⲁⲕ ⲛⲥⲉⲙⲟⲩⲧⲉ ⲉⲣⲟⲟⲩ ⲉⲡⲣⲁⲛ ⲛⲛⲉⲩⲥⲛⲏⲩ ϩⲛⲛⲉⲕⲗⲏⲣⲟⲛⲟⲙⲓⲁ ⲛⲛⲉⲧⲙⲙⲁⲩ
7 ⲉⲓⲛⲏⲩ ⲇⲉ ⲉⲃⲟⲗ ϩⲛⲧⲙⲉⲥⲟⲡⲟⲇⲁⲙⲓⲁ ⲛⲧⲥⲩⲣⲓⲁ ⲁⲥⲙⲟⲩ ⲛϭⲓϩⲣⲁⲭⲏⲗ ⲧⲉⲕⲙⲁⲁⲩ ϩⲣⲁⲓ ϩⲙⲡⲕⲁϩ ⲛⲭⲁⲛⲁⲁⲛ ⲛⲧⲉⲣⲓϩⲱⲛ ⲉϩⲟⲩⲛ ⲕⲁⲧⲁⲡϩⲓⲡⲡⲟⲇⲣⲟⲙⲟⲥ ϩⲙⲡⲕⲁϩ ⲛⲭⲁⲃⲣⲁⲑⲁ ⲉⲉⲓ ⲉϩⲣⲁⲓ ⲉⲉⲫⲣⲁⲑⲁ ⲁⲩⲱ ⲁⲓⲧⲱⲙⲥ ⲙⲙⲟⲥ ϩⲁⲧⲉϩⲓⲏ ⲙⲡϩⲓⲡⲡⲟⲇⲣⲟⲙⲟⲥ ⲉⲧⲉⲧⲁⲓ ⲧⲉ ⲃⲏⲑⲗⲉⲉⲙ
8 ⲁⲡⲓⲥⲣⲁⲏⲗ ⲇⲉ ⲛⲁⲩ ⲉⲛϣⲏⲣⲉ ⲛⲓⲱⲥⲏⲫ ⲡⲉϥϣⲏⲣⲉ ⲡⲉϫⲁϥ ⲛⲁϥ ϫⲉⲟⲩ ⲉⲣⲟⲕ ⲛⲉ ⲛⲁⲓ
9 ⲡⲉϫⲁϥ ⲇⲉ ⲛϭⲓⲓⲱⲥⲏⲫ ⲙⲡⲉϥⲉⲓⲱⲧ ϫⲉⲛⲁϣⲏⲣⲉ ⲛⲉ ⲛⲁⲓ ⲛⲧⲁⲡⲛⲟⲩⲧⲉ ⲧⲁⲁⲩ ⲛⲁⲓ ϩⲙⲡⲉⲓⲙⲁ ⲡⲉϫⲁϥ ⲛϭⲓⲓⲁⲕⲱⲃ ϫⲉⲉⲛⲧⲟⲩ ⲉⲣⲟⲓ ϫⲉⲕⲁⲥ ⲉⲓⲉⲥⲙⲟⲩ ⲉⲣⲟⲟⲩ
10 ⲁⲛⲃⲁⲗ ⲇⲉ ⲙⲡⲓⲥⲣⲁⲏⲗ ϩⲧⲟⲙⲧⲙ ⲉⲃⲟⲗ ϩⲛⲧⲙⲛⲧϩⲗⲗⲟ ⲉⲙⲛϭⲟⲙ ⲙⲙⲟϥ ⲉⲛⲁⲩ ⲉⲃⲟⲗ ⲁϥⲉⲛⲧⲟⲩ ⲇⲉ ⲉϩⲟⲩⲛ ⲉⲣⲟϥ ⲁϥϯⲡⲓ ⲉⲣⲟⲟⲩ ⲛⲧⲉⲣⲉϥϩⲱⲗϭ ⲇⲉ ⲉⲣⲟⲟⲩ
11 ⲡⲉϫⲁϥ ⲛϭⲓⲡⲓⲥⲣⲁⲏⲗ ⲛⲓⲱⲥⲏⲫ ϫⲉⲉⲓⲥϩⲏⲏⲧⲉ ⲙⲡⲟⲩϩⲟⲩⲣⲟⲧ ⲙⲡⲉⲕϩⲟ ⲁⲩⲱ ⲉⲓⲥ ϩⲏⲏⲧⲉ ⲁⲡⲛⲟⲩⲧⲉ ⲧⲁⲩⲟⲓ ⲉⲡⲉⲕⲥⲡⲉⲣⲙⲁ
12 ⲁⲓⲱⲥⲏⲫ ⲇⲉ ⲉⲛⲧⲟⲩ ⲉⲃⲟⲗ ⲟⲩⲧ ⲛⲉϥⲡⲁⲧ ⲁⲩⲟⲩⲱϣⲧ ⲛⲁϥ ⲉϫⲙⲡⲉⲩϩⲟ ⲉϩⲣⲁⲓ ⲉϫⲙⲡⲕⲁϩ
13 ⲁϥϫⲓ ⲇⲉ ⲙⲡⲉϥϣⲏⲣⲉ ⲥⲛⲁⲩ ⲛϭⲓⲓⲱⲥⲏⲫ ⲉⲫⲣⲁⲓⲙ ϩⲛⲧⲉϥϭⲓϫ ⲛⲟⲩⲛⲁⲙ ⲛⲥⲁϩⲃⲟⲩⲣ ⲙⲓⲏⲗ ⲁⲩⲱ ⲙⲁⲛⲁⲥⲥⲏ ϩⲛⲧⲉϥϩⲃⲟⲩⲣ ⲛⲥⲁⲟⲩⲛⲁⲙ ⲙⲡⲓⲥⲣⲁⲏⲗ
14 ⲁⲡⲓⲥⲣⲁⲏⲗ ⲇⲉ ⲥⲟⲟⲩⲧⲛ ⲉⲃⲟⲗ ⲛⲧⲉϥϭⲓϫ ⲛⲟⲩⲛⲁⲙ ⲁϥⲧⲁⲗⲟⲥ ⲉϫⲛⲧⲁⲡⲉ ⲛⲉⲫⲣⲁⲓⲙ ⲛⲉⲡⲕⲟⲩⲓ ⲇⲉ ⲡⲁⲓ ⲁⲩⲱ ⲧⲉϥϩⲃⲟⲩⲣ ⲉϫⲛⲧⲁⲡⲉ ⲙⲙⲁⲛⲁⲥⲥⲏ ⲉⲁϥⲡⲱⲱⲛⲉ ⲛⲛⲉϥϭⲓϫ
15 ⲁϥⲥⲙⲟⲩ ⲉⲣⲟⲟⲩ ϫⲉⲡⲛⲟⲩⲧⲉ ⲡⲁⲓ ⲛⲧⲁⲛⲁⲉⲓⲟⲧⲉ ⲣⲁⲛⲁϥ ⲙⲡⲉϥⲙⲧⲟ ⲉⲃⲟⲗ ⲁⲃⲣⲁϩⲁⲙ ⲙⲛⲓⲥⲁⲁⲕ ⲡⲛⲟⲩⲧⲉ ⲉⲧⲥⲁⲁⲛϣ ⲙⲙⲟⲓ ϫⲓⲛⲧⲁⲙⲛⲧⲕⲟⲩⲓ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ
16 ⲡⲁⲅⲅⲉⲗⲟⲥ ⲉⲧⲛⲟⲩϩⲙ ⲙⲙⲟⲓ ⲉⲃⲟⲗ ϩⲙⲡⲉⲧϩⲟⲟⲩ ⲛⲓⲙ ⲛⲓⲙ ⲉϥⲉⲥⲙⲟⲩ ⲉⲛⲉⲓϣⲏⲣⲉ ϣⲏⲙ ⲁⲩⲱ ⲉⲩⲉⲙⲟⲩⲧⲉ ⲉⲡⲁⲣⲁⲛ ϩⲣⲁⲓ ⲛϩⲏⲧⲟⲩ ⲙⲛⲡⲣⲁⲛ ⲛⲛⲁⲉⲓⲟⲧⲉ ⲁⲃⲣⲁϩⲁⲙ ⲙⲛⲓⲥⲁⲁⲕ ⲛⲥⲉⲁϣⲁⲓ ⲁⲩⲱ ⲛⲥⲉϣⲱⲡⲉ ⲉⲟⲩⲛⲟϭ ⲙⲙⲏⲏϣⲉ ⲉϩⲣⲁⲓ ⲉϫⲙⲡⲕⲁϩ
17 ⲛⲧⲉⲣⲉϥⲛⲁⲩ ⲇⲉ ⲛϭⲓⲓⲱⲥⲏⲫ ϫⲉⲁⲡⲉϥⲉⲓⲱⲧ ⲧⲁⲗⲉⲧⲉϥϭⲓϫ ⲛⲟⲩⲛⲁⲙ ⲉϫⲛⲉⲫⲣⲁⲓⲙ ⲁⲡϩⲱⲃ ϣⲱⲡⲉ ⲉϥϩⲟⲣϣ ⲙⲡⲉϥⲙⲧⲟ ⲉⲃⲟⲗ ⲁϥⲁⲙⲁϩⲧⲉ ⲛϭⲓⲓⲱⲥⲏⲫ ⲉⲧϭⲓϫ ⲙⲡⲉϥⲉⲓⲱⲧ ⲉϥⲓⲧⲥ ϩⲓϫⲛⲧⲁⲡⲉ ⲛⲉⲫⲣⲁⲓⲙ ⲉⲧⲁⲗⲟⲥ ⲉϩⲣⲁⲓ ⲉϫⲛⲧⲁⲡⲉ ⲙⲙⲁⲛⲁⲥⲥⲏ
18 ⲡⲉϫⲁϥ ⲇⲉ ⲛϭⲓⲓⲱⲥⲏⲫ ⲙⲡⲉϥⲉⲓⲱⲧ ϫⲉⲛⲧⲉⲓϩⲉ ⲁⲛ ⲧⲉ ⲡⲁⲉⲓⲱⲧ ⲡⲁⲓ ⲅⲁⲣ ⲡⲉ ⲡϣⲣⲡⲙⲙⲓⲥⲉ ⲙⲁⲧⲁⲗⲟ ⲛⲧⲉⲕϭⲓϫ ⲛⲟⲩⲛⲁⲙ ⲉϫⲛⲧⲉϥⲁⲡⲉ
19 ⲛⲧⲟϥ ⲇⲉ ⲙⲡⲉϥⲟⲩⲱϣ ⲁⲗⲗⲁ ⲡⲉϫⲁϥ ϫⲉϯⲥⲟⲟⲩⲛ ⲡⲁϣⲏⲣⲉ ϯⲥⲟⲟⲩⲛ ⲡⲁⲓ ϩⲱⲱϥ ⲟⲛ ⲛⲁϣⲱⲡⲉ ⲛⲟⲩⲗⲁⲟⲥ ⲉϥⲟϣ ⲁⲩⲱ ϥⲛⲁϫⲓⲥⲉ ⲁⲗⲗⲁ ⲡⲉϥⲥⲟⲛ ⲕⲟⲩⲓ ⲛⲁϫⲓⲥⲉ ⲉϩⲟⲩⲉ ⲉⲣⲟϥ ⲁⲩⲱ ⲡⲉϥⲥⲡⲣⲙⲁ ⲛⲁϣⲱⲡⲉ ⲉⲩⲙⲏⲏϣⲉ ⲛϩⲑⲛⲟⲥ
20 ⲁⲩⲱ ⲁϥⲥⲟⲩ ⲉⲣⲟⲟⲩ ϩⲙⲡⲉϩⲟⲟⲩ ⲉⲧⲙⲙⲁⲩ ⲉϥϫⲱ ⲙⲙⲟⲥ ϫⲉⲉⲣⲉⲡⲓⲥⲣⲁⲏⲗ ϫⲓⲥⲙⲟⲩ ϩⲣⲁⲓ ⲛϩⲏⲧⲧⲏⲩⲧⲛ ⲉⲩϫⲱ ⲙⲙⲟⲥ ϫⲉⲉⲣⲉⲡⲛⲟⲩⲧⲉ ⲁⲁⲕ ⲛⲧϩⲉ ⲛⲉⲫⲣⲁⲓⲙ ⲁⲩⲱ ⲛⲧϩⲉ ⲙⲙⲁⲛⲁⲥⲥⲏ ⲁⲩⲱ ⲁϥⲕⲱ ⲛⲉⲫⲣⲁⲓⲙ ϩⲓⲧϩⲏ ⲙⲙⲁⲛⲁⲥⲥⲏ
21 ⲡⲉϫⲁϥ ⲇⲉ ⲛϭⲓⲡⲓⲥⲣⲁⲏⲗ ⲛⲓⲱⲥⲏⲫ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲙⲟⲩ ⲡⲛⲟⲩⲧⲉ ⲇⲉ ⲛⲁϣⲱⲡⲉ ⲛⲙⲙⲏⲧⲛ ⲁⲩⲱ ϥⲛⲁⲕⲧⲉⲧⲏⲩⲧⲛ ⲉϩⲣⲁⲓ ⲉⲡⲕⲁϩ ⲛⲛⲉⲧⲛⲉⲓⲟⲧⲉ
22 ⲁⲛⲟⲕ ⲇⲉ ϯⲛⲁϯ ⲛⲁⲕ ⲛⲥⲓⲕⲉⲙⲁ ⲛⲥⲱⲧⲡ ⲉϩⲟⲩⲉ ⲉⲛⲉⲕⲥⲛⲏⲩ ⲧⲁⲓ ⲛⲧⲁⲓϫⲓⲧⲥ ⲉⲃⲟⲗ ϩⲛⲧϭⲓϫ ⲛⲛⲁⲙⲟⲣⲣⲁⲓⲟⲥ ϩⲛⲧⲁⲥⲏⲫⲉ ⲙⲛⲧⲁⲡⲓⲧⲉ
Genesis 47 · Genesis 49 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)