Read Genesis 35 side by side with translations · The Final Bible
2 ...
3 ...
4 ⲁⲩⲱ ⲓⲁⲕⲱⲃ ⲁϥϩⲟⲡⲟⲩ ϩⲁⲧⲧⲉⲣⲉⲙⲓⲛⲑⲟⲥ ⲉⲧϩⲛⲥⲓⲕⲓⲙⲁ ⲁⲩⲱ ⲁϥⲧⲁⲕⲟⲟⲩ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ
5 ⲁⲓⲁⲕⲱⲃ ⲧⲱⲟⲩⲛ ⲉⲃⲟⲗ ϩⲛⲛⲥⲓϭⲓⲙⲟⲥ ⲁϥⲃⲱⲕ ⲁⲧϩⲟⲧⲉ ⲙⲡⲛⲟⲩⲧⲉ ϣⲱⲡⲉ ⲉϩⲣⲁⲓ ⲉϫⲛⲙⲡⲟⲗⲓⲥ ⲉⲧⲙⲡⲉⲩⲕⲱⲧⲉ ⲙⲡⲟⲩⲡⲱⲧ ϩⲓⲡⲁϩⲟⲩ ⲛⲛϣⲏⲣⲉ ⲙⲡⲓⲥⲣⲁⲏⲗ
6 ⲁⲓⲁⲕⲱⲃ ⲇⲉ ⲉⲓ ⲉϩⲣⲁⲓ ϩⲛⲗⲟⲩⲥⲁ ⲧⲁⲓ ⲉⲧϣⲟⲟⲡ ϩⲙⲡⲕⲁϩ ⲛⲭⲁⲛⲁⲁⲛ ⲡⲁⲓ ⲉⲧⲉⲣⲉϥⲁⲓⲑⲏⲗ ⲛϩⲏⲧϥ ⲛⲧⲟϥ ⲙⲛⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ
7 ⲁϥⲕⲱⲧ ⲛⲟⲩⲑⲏⲥⲓⲥⲧⲏⲣⲓⲟⲛ ϩⲙⲡⲙⲁ ⲉⲧⲙⲙⲁⲩ ⲁϥⲙⲟⲩⲧⲉ ⲉⲡⲣⲁⲛ ⲙⲡⲙⲁ ⲉⲧⲙⲙⲁⲩ ϫⲉⲃⲁⲓⲑⲏⲗ ⲛⲧⲁⲡⲛⲟⲩⲧⲉ ⲅⲁⲣ ⲟⲩⲱⲛϩ ⲉⲣⲟϥ ⲛϩⲏⲧϥ ⲉϥⲡⲏⲧ ⲛⲛⲁϩⲣⲙⲡϩⲟ ⲛⲏⲥⲁⲩ ⲡⲉϥⲥⲟⲛ
8 ⲁⲥⲙⲟⲩ ⲇⲉ ⲛϭⲓⲧⲉⲃⲃⲱⲣⲁ ⲧⲙⲟⲟⲛⲉ ⲛϩⲣⲉⲃⲉⲕⲕⲁ ⲙⲡⲉⲥⲏⲧ ⲛⲃⲁⲓⲑⲏⲗ ϩⲁⲧⲃⲁⲗⲁⲛⲟⲥ ⲁϥⲙⲟⲩⲧⲉ ⲉⲡⲉⲥⲣⲁⲛ ϫⲉⲧⲃⲁⲗⲁⲛⲟⲥ ⲙⲡϩⲏⲃⲉ
9 ⲁⲡⲛⲟⲩⲧⲉ ⲟⲩⲱⲛϩ ⲉⲃⲟⲗ ⲛⲓⲁⲕⲱⲃ ϩⲣⲁⲓ ϩⲛⲗⲟⲩⲥⲁ ⲛⲧⲉⲣⲉϥⲉⲓ ⲉⲃⲟⲗ ϩⲛⲧⲙⲉⲥⲟⲡⲟⲧⲁⲙⲓⲁ ⲛⲧⲥⲩⲣⲓⲁ ⲁϥⲥⲙⲟⲩ ⲉⲣⲟϥ ⲛϭⲓⲡⲛⲟⲩⲧⲉ
10 ⲉϥϫⲱ ⲙⲙⲟⲥ ⲛⲁϥ ϫⲉⲛⲛⲉⲩⲙⲟⲩⲧⲉ ϫⲓⲛⲧⲉⲛⲟⲩ ⲉⲡⲉⲕⲣⲁⲛ ϫⲉⲓⲁⲕⲱⲃ ⲁⲗⲗⲁ ⲡⲓⲥⲣⲁⲏⲗ ⲡⲉⲧⲛⲁϣⲱⲡⲉ ⲛⲁⲕ ⲛⲣⲁⲛ
11 ⲡⲉϫⲁϥ ⲛⲁϥ ⲛϭⲓⲡⲛⲟⲩⲧⲉ ϫⲉⲁⲛⲟⲕ ⲡⲉ ⲡⲛⲟⲩⲧⲉ ⲁⲓⲁⲓ ⲛⲅⲁϣⲁⲓ ⲛⲅϣⲱⲡⲉ ⲉϩⲉⲛϩⲉⲑⲛⲟⲥ ⲙⲛϩⲉⲛⲥⲩⲛⲁⲅⲱⲅⲏ ⲛϩⲉⲑⲛⲟⲥ ⲁⲩⲱ ⲟⲩⲛϩⲉⲛⲉⲣⲱⲟⲩ ⲛⲏⲩ ⲉⲃⲟⲗ ϩⲛⲧⲉⲕϯⲡⲉ
12 ⲁⲩⲱ ⲡⲕⲁϩ ⲛⲧⲁⲓⲧⲁⲁϥ ⲛⲁⲃⲣⲁϩⲁⲙ ⲙⲛⲓⲥⲁⲁⲕ ⲛⲧⲁⲓⲧⲁⲁϥ ⲛⲁⲕ ⲁⲩⲱ ⲡⲉⲕⲥⲡⲉⲣⲙⲁ ⲙⲛⲛⲥⲱⲕ ϯⲛⲁϯ ⲛⲁϥ ⲙⲡⲓⲕⲁϩ
13 ⲁⲡⲛⲟⲩⲧⲉ ⲇⲉ ⲃⲱⲕ ⲉⲃⲟⲗ ϩⲓⲧⲟⲟⲧϥ ⲉⲃⲟⲗ ϩⲙⲡⲙⲁ ⲛⲧⲁϥϣⲁϫⲉ ⲛⲙⲙⲁϥ ⲛϩⲏⲧϥ
14 ⲁⲓⲁⲕⲱⲃ ⲇⲉ ⲧⲁϩⲟ ⲉⲣⲁⲧϥ ⲛⲟⲩⲥⲧⲩⲗⲏ ϩⲙⲡⲙⲁ ⲛⲧⲁϥϣⲁϫⲉ ⲛⲙⲙⲁϥ ⲛϩⲏⲧϥ ⲟⲩⲥⲧⲩⲗⲏ ⲛⲱⲛⲉ ⲁϥⲟⲩⲱⲧⲃ ⲉϩⲣⲁⲓ ⲉϫⲱⲥ ⲛⲟⲩⲱⲧⲛ ⲁϥⲡⲱϩⲧ ⲉϩⲣⲁⲓ ⲉϫⲱϥ ⲛⲟⲩⲛⲉϩ
15 ⲁⲓⲁⲕⲱⲃ ⲙⲟⲩⲧⲉ ⲉⲡⲣⲁⲛ ⲙⲡⲙⲁ ⲛⲧⲁⲡⲛⲟⲩⲧⲉ ϣⲁϫⲉ ⲛⲙⲙⲁϥ ⲛϩⲏⲧϥ ϫⲉⲃⲁⲓⲑⲏⲗ
16 ⲁϥⲧⲱⲟⲩⲛ ⲇⲉ ⲉⲃⲟⲗ ϩⲛⲃⲁⲓⲑⲏⲗ ⲁϥⲥⲙⲓⲛⲉ ⲛⲧⲉϥⲥⲕⲩⲛⲏ ⲙⲡⲓⲥⲁ ⲙⲡⲡⲩⲅⲣⲟⲥ ⲛⲅⲁⲇⲉⲣ ⲁⲥϣⲱⲡⲉ ⲇⲉ ϩⲙⲡⲧⲣⲉϥϩⲱⲛ ⲉϩⲟⲩⲛ ⲉⲭⲁⲃⲣⲁⲑⲁ ⲉⲉⲓ ⲉϩⲣⲁⲓ ⲉⲡⲕⲁϩ ⲛⲉⲫⲣⲁⲑⲁ ⲁⲥⲙⲓⲥⲉ ⲛϭⲓϩⲣⲁⲭⲏⲗ ⲁⲩⲱ ⲁⲥϩⲃⲣⲃⲣⲙⲓⲥⲉ ϩⲙⲡⲉⲥⲙⲓⲥⲉ
17 ⲁⲥϣⲱⲡⲉ ⲇⲉ ϩⲙⲡⲧⲣⲉⲥⲙⲓⲥⲉ ϩⲛⲟⲩⲛϣⲟⲧ ⲡⲉϫⲉⲧⲙⲉⲥⲉⲓⲱ ⲛⲁⲥ ϫⲉⲧⲱⲕ ⲛϩⲏⲧ ⲕⲁⲓ ⲅⲁⲣ ⲟⲩϣⲏⲣⲉ ⲛⲉ ⲡⲉ
18 ⲁⲥϣⲱⲡⲉ ⲉⲥⲛⲁⲕⲁⲡⲧⲏⲩ ⲛⲉⲥⲙⲟⲩ ⲅⲁⲣ ⲡⲉ ⲁⲥⲙⲟⲩⲧⲉ ⲉⲡⲉϥⲣⲁⲛ ϫⲉⲡϣⲏⲣⲉ ⲙⲡⲁϩⲓⲥⲉ ⲁⲡⲉϥⲉⲓⲱⲧ ⲇⲉ ⲙⲟⲩⲧⲉ ⲉⲣⲟϥ ϫⲉⲃⲉⲛⲓⲁⲙⲓⲛ
19 ⲁϩⲣⲁⲭⲏⲗ ⲇⲉ ⲙⲟⲩ ⲁⲩⲧⲟⲙⲥⲥ ϩⲣⲁⲓ ϩⲛⲧⲉϩⲓⲏ ⲛⲉⲫⲣⲁⲑⲁ ⲉⲧⲉⲧⲁⲓ ⲧⲉ ⲃⲏⲑⲗⲉⲉⲙ
20 ⲁⲓⲁⲕⲱⲃ ⲧⲁϩⲟ ⲉⲣⲁⲧϥ ⲛⲟⲩⲟⲉⲓⲧ ⲉϩⲣⲁⲓ ⲉϫⲙⲡⲉⲥⲙϩⲁⲁⲩ ⲡⲁⲓ ⲡⲉ ⲡⲟⲩⲟⲉⲓⲧ ⲛϩⲣⲁⲭⲏⲗ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ
22 ⲁⲥϣⲱⲡⲉ ⲇⲉ ⲛⲧⲉⲣⲉⲡⲓⲥⲣⲁⲏⲗ ⲟⲩⲱϩ ϩⲙⲡⲕⲁϩ ⲉⲧⲙⲙⲁⲩ ⲁϩⲣⲟⲩⲃⲏⲛ ⲃⲱⲕ ⲁϥⲛⲕⲟⲧⲕ ⲙⲛⲧⲡⲁⲗⲗⲁⲕⲏ ⲙⲡⲉϥⲉⲓⲱⲧ ⲁϥⲥⲱⲧⲙ ⲇⲉ ⲛϭⲓⲡⲓⲥⲣⲁⲏⲗ ⲁϥϣⲱⲡⲉ ⲛⲟⲩⲡⲟⲛⲏⲣⲟⲥ ⲙⲡⲉϥⲙⲧⲟ ⲉⲃⲟⲗ ⲛϣⲏⲣⲉ ⲇⲉ ⲛⲓⲁⲕⲱⲃ ⲛⲉⲩⲙⲉϩⲙⲛⲧⲥⲛⲟⲟⲩⲥ
23 ⲛϣⲏⲣⲉ ⲛⲗⲓⲁ ⲡϣⲣⲡⲙⲓⲥⲉ ⲛⲓⲁⲕⲱⲃ ϩⲣⲟⲩⲃⲏⲛ ⲥⲩⲙⲉⲱⲛ ⲗⲉⲩⲉⲓ ⲓⲟⲩⲇⲁⲥ ⲓⲥⲥⲁⲭⲁⲣ ⲥⲁⲃⲟⲩⲗⲱⲛ
24 ⲛϣⲏⲣⲉ ⲇⲉ ⲛϩⲣⲁⲭⲏⲗ ⲓⲱⲥⲏⲫ ⲙⲛⲃⲉⲛⲓⲁⲙⲓⲛ
25 ⲛϣⲏⲣⲉ ⲇⲉ ⲛⲃⲁⲗⲗⲁ ⲧϩⲙϩⲁⲗ ⲛϩⲣⲁⲭⲏⲗ ⲇⲁⲛ ⲙⲛⲉⲫⲑⲁⲗⲉⲓⲙ
26 ⲛϣⲏⲣⲉ ⲇⲉ ⲛⲍⲉⲗⲫⲁ ⲧϩⲙϩⲁⲗ ⲛⲗⲓⲁ ⲅⲁⲇ ⲙⲛⲁⲥⲥⲏⲥ ⲛⲁⲓ ⲛⲉ ⲛϣⲏⲣⲉ ⲛⲓⲁⲕⲱⲃ ⲛⲧⲁⲩϣⲱⲡⲉ ⲛⲁϥ ϩⲛⲧⲙⲉⲥⲟⲡⲟⲇⲁⲙⲓⲁ ⲛⲧⲥⲩⲣⲓⲁ
27 ⲁⲓⲁⲕⲱⲃ ⲇⲉ ⲉⲓ ⲉϩⲣⲁⲓ ϣⲁⲓⲥⲁⲁⲕ ⲡⲉϥⲉⲓⲱⲧ ⲉϩⲣⲁⲓ ⲉⲧⲡⲟⲗⲓⲥ ⲙⲁⲙⲃⲣⲏ ⲉⲧⲡⲟⲗⲓⲥ ⲛⲧⲥⲱϣⲉ ⲉⲧⲉⲧⲁⲓ ⲧⲉ ⲭⲉⲃⲣⲱⲛ ϩⲣⲁⲓ ϩⲙⲡⲕⲁϩ ⲛⲭⲁⲛⲁⲁⲛ ⲡⲙⲁ ⲛⲧⲁϥⲟⲩⲱϩ ϩⲣⲁⲓ ⲛϩⲏⲧϥ ⲛϭⲓⲁⲃⲣⲁϩⲁⲙ ⲙⲛⲓⲥⲁⲁⲕ
28 ⲁⲩϣⲱⲡⲉ ⲇⲉ ⲛϭⲓⲛⲉϩⲟⲟⲩ ⲛⲓⲥⲁⲁⲕ ⲛⲧⲁϥⲱⲛϩ ⲙⲙⲁⲩ ϣⲉ ϩⲙⲉⲛⲉ ⲛⲣⲟⲙⲡⲉ
29 ⲁϥⲕⲁⲧⲟⲟⲧϥ ⲉⲃⲟⲗ ⲁϥⲙⲟⲩ ⲁϥⲟⲩⲁϩϥ ⲛⲁϩⲣⲙ ⲡⲉϥⲅⲉⲛⲟⲥ ⲉⲁϥⲣϩⲗⲗⲟ ⲉϥϫⲏⲕ ⲉⲃⲟⲗ ϩⲛⲛⲉϥϩⲟⲟⲩ ⲁⲩⲧⲟⲙⲥϥ ⲛϭⲓⲏⲥⲁⲩ ⲙⲛⲓⲁⲕⲱⲃ ⲛⲉϥϣⲏⲣⲉ
Genesis 34 · Genesis 36 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)