Read Genesis 33 side by side with translations · The Final Bible
1 ⲁⲓⲁⲕⲱⲃ ⲇⲉ ϥⲓⲧϥ ⲉϩⲣⲁⲓ ⲁϥⲛⲁⲩ ⲁⲩⲱ ⲉⲓⲥ ϩⲏⲏⲧⲉ ⲉⲓⲥ ⲏⲥⲁⲩ ⲡⲉϥⲥⲟⲛ ⲉϥⲛⲏⲩ ⲉⲧⲱⲙⲛⲧ ⲉⲣⲟϥ ⲙⲛϥⲧⲟⲟⲩϣⲉ ⲛⲣⲱⲙⲉ ⲛⲙⲙⲁϥ ⲁϥⲡⲱϣ ⲇⲉ ⲛϭⲓⲓⲁⲕⲱⲃ ⲛⲛϣⲏⲣⲉ ϣⲏⲙ ⲉϫⲛⲗⲓⲁ ⲙⲛϩⲣⲁⲭⲏⲗ ⲙⲛⲧϩⲙϩⲁⲗ ⲥⲛⲧⲉ
2 ⲁϥⲕⲱ ⲛⲧϩⲙϩⲁⲗ ⲥⲛⲧⲉ ⲙⲛⲛⲉⲩϣⲏⲣⲉ ϩⲓⲧϩⲏ ⲁⲩⲱ ⲗⲓⲁ ⲙⲛⲛⲉⲥϣⲏⲣⲉ ϩⲓⲡⲁϩⲟⲩ ⲙⲙⲟⲟⲩ ϩⲣⲁⲭⲏⲗ ⲇⲉ ⲙⲛⲓⲱⲥⲏⲫ ⲛϩⲁⲉ
3 ⲛⲧⲟϥ ⲇⲉ ⲁϥⲙⲟⲟϣⲉ ϩⲁⲧⲉⲩϩⲏ ⲁⲩⲱ ⲁϥⲟⲩⲱϣⲧ ⲉϩⲣⲁⲓ ⲉϫⲙⲡⲕⲁϩ ⲛⲥⲁϣϥ ⲛⲥⲟⲡ ϣⲁⲛⲧⲉϥⲡⲱϩ ⲉⲏⲥⲁⲩ ⲡⲉϥⲥⲟⲛ
4 ⲁⲏⲥⲁⲩ ⲡⲱⲧ ⲉⲃⲟⲗ ϩⲏⲧϥ ⲉⲧⲱⲙⲛⲧ ⲉⲣⲟϥ ⲁϥϩⲱⲗϭ ⲉⲣⲟϥ ⲁϥϯⲡⲓ ⲉⲣⲱϥ ⲁϥⲡⲁϩⲧϥ ⲉϩⲣⲁⲓ ⲉϫⲙⲡⲉϥⲙⲁⲕϩ ⲁⲩⲱ ⲁⲩⲣⲓⲙⲉ ⲙⲡⲉⲥⲛⲁⲩ
5 ⲁϥϥⲓⲉⲓⲁⲧϥ ⲇⲉ ⲉϩⲣⲁⲓ ⲁϥⲛⲁⲩ ⲉⲛⲉϩⲓⲟⲙⲉ ⲙⲛⲛⲉⲩϣⲏⲣⲉ ⲡⲉϫⲁϥ ϫⲉⲟⲩ ⲉⲣⲟⲕ ⲛⲉ ⲛⲁⲓ ⲛⲧⲟϥ ⲇⲉ ⲡⲉϫⲁϥ ϫⲉⲛⲁϣⲏⲣⲉ ⲛⲉ ⲛⲁⲓ ⲛⲧⲁⲡⲛⲟⲩⲧⲉ ⲛⲁⲙⲡⲉⲕϩⲙϩⲁⲗ ⲉⲧⲃⲏⲏⲧⲟⲩ
6 ⲁⲩⲱ ⲁⲛϩⲙϩⲁⲗ ϩⲱⲛ ⲉϩⲟⲩⲛ ⲙⲛⲛⲉⲩϣⲏⲣⲉ ⲁⲩⲟⲩⲱϣⲧ
7 ⲁⲗⲓⲁ ϩⲱⲛ ⲉϩⲟⲩⲛ ⲙⲛⲛⲉⲥϣⲏⲣⲉ ⲁⲩⲟⲩⲱϣⲧ ⲙⲛⲛⲥⲱⲥ ⲁϩⲣⲁⲭⲏⲗ ϩⲱⲛ ⲉϩⲟⲩⲛ ⲙⲛⲓⲱⲥⲏⲫ ⲁⲩⲟⲩⲱϣⲧ
8 ⲡⲉϫⲁϥ ϫⲉⲟⲩ ⲛⲉ ⲛⲉⲓⲡⲁⲣⲉⲙⲃⲟⲗⲏ ⲧⲏⲣⲟⲩ ⲛⲧⲁⲓⲧⲱⲙⲛⲧ ⲉⲣⲟⲟⲩ ⲛⲧⲟϥ ⲇⲉ ⲡⲉϫⲁϥ ϫⲉⲛⲧⲁⲓⲧⲛⲛⲟⲟⲩⲥⲟⲩ ⲛⲁⲕ ϫⲉⲉⲣⲉⲡⲉⲕϩⲙϩⲁⲗ ϩⲉ ⲉⲩϩⲙⲟⲧ ⲙⲡⲉⲕⲙⲧⲟ ⲉⲃⲟⲗ ⲡϫⲟⲉⲓⲥ
9 ⲡⲉϫⲁϥ ⲇⲉ ⲛϭⲓⲏⲥⲁⲩ ϫⲉⲟⲩⲛϯϩⲁϩ ⲙⲙⲁⲩ ⲡⲁⲥⲟⲛ ⲙⲁⲣⲉⲛⲟⲩⲕ ϣⲱⲡⲉ ⲛⲁⲕ
10 ⲡⲉϫⲁϥ ⲇⲉ ⲛϭⲓⲓⲁⲕⲱⲃ ϫⲉⲉϣϫⲉ ⲁⲓϩⲉ ⲉⲩϩⲙⲟⲧ ⲙⲡⲉⲕⲙⲧⲟ ⲉⲃⲟⲗ ϫⲓ ⲛⲛⲓⲇⲱⲣⲟⲛ ⲉⲃⲟⲗ ϩⲓⲧⲛⲛⲁϭⲓϫ ⲉⲧⲃⲉⲡⲁⲓ ⲁⲓⲛⲁⲩ ⲉⲡⲉⲕϩⲟ ⲛⲧϩⲉ ⲛⲟⲩⲁ ⲉϥⲛⲁⲛⲁⲩ ⲉⲡϩⲟ ⲙⲡⲛⲟⲩⲧⲉ ⲁⲣⲓⲡⲁⲟⲩⲱϣ
11 ⲛⲅϫⲓ ⲛⲛⲁⲥⲙⲟⲩ ⲛⲧⲁⲓⲛⲧⲟⲩ ⲛⲁⲕ ϫⲉⲁⲡⲛⲟⲩⲧⲉ ⲛⲁⲛⲁⲓ ⲁⲩⲱ ⲟⲩⲛϯⲡⲧⲏⲣϥ ⲙⲙⲁⲩ ⲁϥϫⲓ ⲙⲙⲟϥ ⲛϫⲛⲁϩ ϣⲁⲛⲧⲉϥϫⲓⲧⲟⲩ
12 ⲁⲩⲱ ⲡⲉϫⲁϥ ϫⲉⲙⲁⲧⲛⲧⲱⲟⲩⲛ ⲛⲧⲛⲃⲱⲕ ⲛⲥⲟⲟⲩⲧⲛ
13 ⲡⲉϫⲁϥ ⲇⲉ ⲛⲁϥ ϫⲉⲡⲁϫⲟⲉⲓⲥ ⲥⲟⲟⲩⲛ ϫⲉⲛⲁⲕⲟⲩⲓ ⲥⲟⲃⲕ ⲁⲩⲱ ⲛⲉⲥⲟⲟⲩ ⲙⲛⲛⲉϩⲟⲟⲩ ⲥⲉⲙⲟⲥⲉ ⲛⲧⲟⲟⲧⲉϣⲱⲡⲉ ⲇⲉ ⲉⲓϣⲁⲛϫⲱⲣⲙ ⲛⲥⲱⲟⲩ ⲛⲟⲩϩⲟⲟⲩ ⲏ ⲥⲛⲁⲩ ⲥⲉⲛⲁⲙⲟⲩ ⲛϭⲓⲛⲧⲃⲛⲟⲟⲩⲉ ⲧⲏⲣⲟⲩ
14 ⲙⲁⲣⲉⲡⲁϫⲟⲉⲓⲥ ⲇⲉ ⲛⲧⲟϥ ⲙⲟⲟϣⲉ ϩⲁⲧϩⲏ ⲙⲡⲉϥϩⲙϩⲁⲗ ⲁⲛⲟⲕ ⲇⲉ ϯⲛⲁϭⲙϭⲟⲙ ϩⲓⲧⲉϩⲓⲏ ⲉⲓⲙⲟⲟϣⲉ ϣⲏⲙ ϣⲏⲙ ⲛⲥⲁⲧⲟⲟⲧⲉⲓⲟⲩⲏϩ ⲛⲥⲁⲛⲁⲕⲟⲩⲓ ϣⲁⲛⲧⲉⲓⲉⲓ ⲉⲣⲁⲧϥ ⲙⲡⲁϫⲟⲉⲓⲥ ⲉϩⲣⲁⲓ ⲉⲥⲏⲉⲓⲣ
15 ⲡⲉϫⲉⲏⲥⲁⲩ ⲇⲉ ⲛⲁϥ ϫⲉϯⲛⲁϣⲱϫⲡ ⲛⲁⲕ ⲛϩⲉⲛⲣⲱⲙⲉ ⲉⲃⲟⲗ ϩⲙⲡⲗⲁⲟⲥ ⲉⲧⲛⲙⲙⲁⲓ ⲛⲧⲟϥ ⲇⲉ ⲡⲉϫⲁϥ ϫⲉⲉⲣⲟⲩ ⲙⲡⲁⲓ ϩⲱ ⲉⲣⲟⲓ ϫⲉⲁⲓϩⲉ ⲉⲩϩⲙⲟⲧ ⲙⲡⲉⲕⲙⲧⲟ ⲉⲃⲟⲗ ⲡϫⲟⲉⲓⲥ
16 ⲁⲏⲥⲁⲩ ⲇⲉ ⲕⲟⲧϥ ϩⲙⲡⲉϩⲟⲟⲩ ⲉⲧⲙⲙⲁⲩ ⲉϩⲣⲁⲓ ⲉⲧⲉϥϩⲓⲏ ⲉϩⲣⲁⲓ ⲉⲥⲏⲉⲓⲣ
17 ⲓⲁⲕⲱⲃ ⲇⲉ ⲁϥⲃⲱⲕ ⲉϩⲣⲁⲓ ⲉⲛⲉⲥⲕⲏⲛⲏ ⲁϥⲧⲁⲙⲓⲟ ⲛⲁϥ ⲛϩⲉⲛⲏⲓ ⲁⲩⲱ ϩⲉⲛϩⲃⲱ ⲁϥⲧⲁⲙⲓⲟⲟⲩ ⲛⲛⲉϥⲧⲃⲛⲟⲟⲩⲉ ⲉⲧⲃⲉⲡⲁⲓ ⲁϥⲙⲟⲩⲧⲉ ⲉⲡⲣⲁⲛ ⲙⲡⲙⲁ ⲉⲧⲙⲙⲁⲩ ϫⲉⲛⲉⲥⲕⲏⲛⲏ
18 ⲁϥⲉⲓ ⲇⲉ ⲛϭⲓⲓⲁⲕⲱⲃ ⲉϩⲣⲁⲓ ⲉⲥⲁⲗⲏⲙ ⲧⲡⲟⲗⲓⲥ ⲛⲛⲥⲓϭⲓⲙⲟⲥ ⲧⲁⲓ ⲉⲧϣⲟⲟⲡ ϩⲣⲁⲓ ϩⲙⲡⲕⲁϩ ⲛⲭⲁⲛⲁⲁⲛ ⲛⲧⲉⲣⲉϥⲉⲓ ⲇⲉ ⲉⲃⲟⲗ ϩⲛⲧⲙⲉⲥⲟⲡⲟⲧⲁⲙⲓⲁ ⲛⲧⲥⲩⲣⲓⲁ ⲁϥⲟⲩⲉϩⲛⲁϥ ⲙⲡⲉⲙⲧⲟ ⲛⲧⲡⲟⲗⲓⲥ
19 ⲁϥϣⲱⲡ ⲛⲁϥ ⲛⲧⲧⲟⲉ ⲛⲧⲥⲱϣⲉ ϩⲙⲡⲙⲁ ⲛⲧⲁϥⲧⲁϩⲉⲧⲉϥⲥⲕⲩⲛⲏ ⲉⲣⲁⲧⲥ ⲛϩⲏⲧϥ ⲉⲃⲟⲗ ϩⲓⲧⲛⲉⲙⲱⲣ ⲡⲉⲓⲱⲧ ⲛⲥⲉⲭⲉⲙ ϩⲁϣⲉ ⲛϩⲓⲉⲓⲃ
20 ⲁϥⲕⲱⲧ ⲙⲡⲙⲁ ⲉⲧⲙⲙⲁⲩ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲁϥⲉⲡⲓⲕⲁⲗⲉⲓ ⲛϩⲏⲧϥ ⲙⲡⲛⲟⲩⲧⲉ ⲙⲡⲓⲥⲣⲁⲏⲗ
Genesis 32 · Genesis 34 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)