Genesis 32 — Coptic (Sahidic)

1 ⲁϥⲧⲱⲟⲩⲛ ⲇⲉ ⲛϭⲓⲗⲁⲃⲁⲛ ⲉϩⲧⲟⲟⲩⲉ ⲁϥϯⲡⲓ ⲉⲣⲛ ⲛⲉϥϣⲏⲣⲉ ⲙⲛⲛⲉϥϣⲉⲉⲣⲉ ⲁϥⲥⲙⲟⲩ ⲉⲣⲟⲟⲩ ⲁⲩⲱ ⲁϥⲕⲧⲟϥ ⲛϭⲓⲗⲁⲃⲁⲛ ⲁⲩⲱ ⲁϥⲃⲱⲕ ⲉϩⲣⲁⲓ ⲉⲡⲉϥⲙⲁ

2 ⲓⲁⲕⲱⲃ ⲇⲉ ⲁϥⲃⲱⲕ ⲉϩⲣⲁⲓ ⲉⲧⲉϥϩⲓⲏ ⲁϥⲃⲓⲛⲓⲁⲧϥ ⲇⲉ ⲉϩⲣⲁⲓ ⲛϭⲓⲓⲁⲕⲱⲃ ⲁϥⲛⲁⲩ ⲉⲧⲡⲁⲣⲉⲙⲃⲟⲗⲏ ⲙⲡⲛⲟⲩⲧⲉ ⲉⲁⲥⲉⲓ ⲉϩⲣⲁⲓ ⲉϫⲱϥ ⲁⲩⲱ ⲁⲩⲧⲱⲙⲏⲧ ⲉⲣⲟϥ ⲛϭⲓⲛⲁⲅⲅⲉⲗⲟⲥ ⲙⲡⲛⲟⲩⲧⲉ

3 ⲡⲉϫⲁϥ ⲇⲉ ⲛϭⲓⲓⲁⲕⲱⲃ ⲛⲧⲉⲣϥⲛⲁⲩ ⲉⲣⲟⲟⲩ ϫⲉⲧⲡⲁⲣⲉⲙⲃⲟⲗⲏ ⲙⲡⲛⲟⲩⲧⲉ ⲧⲉ ⲧⲁⲓ ⲁϥⲙⲟⲩⲧⲉ ⲉⲡⲣⲁⲛ ⲙⲡⲙⲁ ⲉⲧⲙⲙⲁⲩ ϫⲉⲙⲡⲁⲣⲁⲛⲃⲟⲗⲏ

4 ⲁⲓⲁⲕⲱⲃ ⲇⲉ ϫⲟⲟⲩ ⲛϩⲛⲃⲁⲓϣⲓⲛⲉ ϩⲁⲧⲉϥϩⲏ ⲉⲣⲁⲧϥ ⲛⲏⲥⲁⲩ ⲡⲉϥⲥⲟⲛ ⲉϩⲣⲁⲓ ⲉⲡⲕⲁϩ ⲛⲥⲏⲉⲓⲣ ⲉⲧⲉⲭⲱⲣⲁ ⲛⲉⲇⲟⲙ

5 ⲁϥϩⲱⲛ ⲉⲧⲟⲟⲧⲟⲩ ⲉϥϫⲱ ⲙⲙⲟⲥ ϫⲉⲧⲁⲓ ⲧⲉ ⲧϩⲉ ⲉⲧⲉⲧⲛⲁϫⲟⲟⲥ ⲙⲡⲁϫⲟⲉⲓⲥ ⲏⲥⲁⲩ ϫⲉⲧⲁⲓ ⲧⲉ ⲧϩⲉ ⲉⲧϥϫⲱ ⲙⲙⲟⲥ ⲛϭⲓⲡⲉⲕϩⲙϩⲁⲗ ⲓⲁⲕⲱⲃ ϫⲉⲁⲓⲟⲩⲱϩ ⲙⲛⲗⲁⲃⲁⲛ ⲁⲓⲱⲥⲕ ϣⲁϩⲣⲁⲓ ⲉⲧⲉⲛⲟⲩ

6 ⲁⲩϣⲱⲡⲉ ⲛⲁⲓ ⲛϭⲓϩⲛϩⲟⲟⲩ ⲁⲩⲱ ϩⲛⲥⲟⲟⲩ ⲁⲩⲱ ϩⲛϩⲙϩⲁⲗ ⲛϩⲟⲟⲩⲧ ⲙⲛϩⲉⲛϩⲙϩⲁⲗ ⲛⲥϩⲓⲙⲉ ⲁⲓⲧⲛⲛⲟⲟⲩ ⲉϫⲓ ⲙⲡⲓⲟⲩⲱ ⲛⲏⲥⲁⲩ ⲡⲁϫⲟⲉⲓⲥ ϫⲉⲉⲣⲉⲡⲉⲕϩⲙϩⲁⲗ ϩⲉ ⲉⲩϩⲙⲟⲧ ⲙⲡⲉⲕⲙⲧⲟ ⲉⲃⲟⲗ

7 ⲁⲩⲕⲟⲧⲟⲩ ⲛϭⲓⲛⲃⲁⲓϣⲓⲛⲉ ϣⲁⲓⲁⲕⲱⲃ ⲉⲩϫⲱ ⲙⲙⲟⲥ ϫⲉⲁⲛⲃⲱⲕ ϣⲁⲡⲉⲕⲥⲟⲛ ⲏⲥⲁⲩ ⲁⲩⲱ ⲉⲓⲥ ϩⲏⲏⲧⲉ ⲛⲧⲟϥ ϥⲛⲏⲩ ⲉⲧⲱⲙⲛⲧ ⲉⲣⲟⲕ ⲙⲛϥⲧⲟⲟⲩ ⲛϣⲉ ⲛⲣⲱⲙⲉ ⲛⲙⲙⲁϥ

8 ⲁⲓⲁⲕⲱⲃ ⲇⲉ ⲣϩⲟⲧⲉ ⲉⲙⲁⲧⲉ ⲁⲩⲱ ⲁϥⲣϩⲃⲁ ⲁϥⲡⲱϣ ⲙⲡⲗⲁⲟⲥ ⲉⲧⲛⲙⲙⲁϥ ⲙⲛⲛⲉϩⲟⲟⲩ ⲙⲛⲛⲉⲥⲟⲟⲩ ⲉⲡⲁⲣⲉⲙⲃⲟⲗⲏ ⲥⲛⲧⲉ

9 ⲁⲩⲱ ⲡⲉϫⲁϥ ⲛϭⲓⲓⲁⲕⲱⲃ ϫⲉⲉⲣϣⲁⲛⲏⲥⲁⲩ ⲉⲓ ⲉϫⲛⲧϣⲟⲣⲡⲉ ⲙⲡⲁⲣⲉⲙⲃⲟⲗⲏ ⲛϥϭⲉϫϭⲱϫⲥ ⲧⲙⲉϩⲥⲛⲧⲉ ⲛⲁϣⲱⲡⲉ ⲉⲥⲟⲩⲟϫ

10 ⲡⲉϫⲁϥ ⲇⲉ ⲛϭⲓⲓⲁⲕⲱⲃ ϫⲉⲡⲛⲟⲩⲧⲉ ⲙⲡⲁⲉⲓⲱⲧ ⲁⲃⲣⲁϩⲁⲙ ⲁⲩⲱ ⲡⲛⲟⲩⲧⲉ ⲙⲡⲁⲉⲓⲱⲧ ⲓⲥⲁⲁⲕ ⲡϫⲟⲉⲓⲥ ⲡⲛⲟⲩⲧⲉ ⲡⲉⲛⲧⲁϥϫⲟⲟⲥ ⲛⲁⲓ ϫⲉⲃⲱⲕ ⲉϩⲣⲁⲓ ⲉⲡⲕⲁϩ ⲉⲛⲧⲁⲩϫⲡⲟⲕ ϩⲣⲁⲓ ⲛϩⲏⲧϥ ⲧⲁⲣⲡⲉⲧⲛⲁⲛⲟⲩϥ ⲛⲁⲕ

11 ⲁⲣⲓⲛⲁϣⲧⲉ ⲛⲁⲓ ⲉⲃⲟⲗ ϩⲛⲇⲓⲕⲁⲓⲟⲥⲩⲛⲏ ⲛⲓⲙ ⲁⲩⲱ ⲉⲃⲟⲗ ϩⲙⲙⲉ ⲛⲓⲙ ⲉⲛⲧⲁⲕⲁⲁⲩ ⲙⲛⲡⲉⲕϩⲙϩⲁⲗ ϩⲣⲁⲓ ⲅⲁⲣ ϩⲙⲡⲁϭⲉⲣⲱⲃ ⲁⲓϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲧⲉⲛⲟⲩ ⲇⲉ ⲁⲓⲣⲡⲁⲣⲉⲙⲃⲟⲗⲏ ⲥⲛⲧⲉ

12 ⲙⲁⲧⲟⲩϫⲟⲓ ⲉⲃⲟⲗ ϩⲛⲧϭⲓϫ ⲙⲡⲁⲥⲟⲛ ⲉⲃⲟⲗ ϩⲛⲧϭⲓϫ ⲛⲏⲥⲁⲩ ϫⲉϯⲣϩⲟⲧⲉ ⲁⲛⲟⲕ ϩⲏⲧϥ ⲙⲏⲡⲟⲧⲉ ⲛϥⲉⲓ ⲛϥⲣⲱϩⲧ ⲙⲙⲟⲓ ⲁⲩⲱ ⲙⲙⲁⲁⲩ ⲉϩⲣⲁⲓ ⲉϫⲛⲛⲉⲩϣⲏⲣⲉ

13 ⲛⲧⲟⲕ ⲇⲉ ⲁⲕϫⲟⲟⲥ ϫⲉϯⲛⲁⲣⲡⲉⲧⲛⲁⲛⲟⲩϥ ⲛⲁⲕ ⲁⲩⲱ ϯⲛⲁⲕⲱ ⲙⲡⲉⲕⲥⲡⲉⲣⲙⲁ ⲛⲧϩⲉ ⲙⲡϣⲟ ⲛⲧⲉⲑⲁⲗⲁⲥⲥⲁ ⲡⲁⲓ ⲉⲧⲉⲙⲉⲩⲟⲡϥ ⲉⲃⲟⲗ ϩⲙⲡⲉϥⲁϣⲁⲓ

14 ⲁϥⲛⲕⲟⲧⲕ ⲙⲡⲙⲁ ⲉⲧⲙⲙⲁⲩ ⲛⲧⲉⲩϣⲏ ⲉⲧⲙⲙⲁⲩ ⲁϥϫⲓ ⲛϩⲉⲛⲇⲱⲣⲟⲛ ⲉⲃⲟⲗ ϩⲛⲛⲉⲛⲧⲁϥⲉⲛⲧⲟⲩ ⲁϥϫⲟⲟⲩⲥⲟⲩ ⲛⲏⲥⲁⲩ ⲡⲉϥⲥⲟⲛ

15 ϣⲏⲧ ⲛⲃⲁⲁⲙⲡⲉ ϫⲟⲩⲱⲧ ⲛϭⲓⲉ ϣⲏⲧ ⲛⲉⲥⲟⲟⲩ ϫⲟⲩⲱⲧ ⲛⲟⲉⲓⲗⲉ

16 ⲙⲁⲁⲃ ⲛϭⲁⲙⲟⲩⲗ ⲉⲩⲧⲥⲛⲕⲟ ⲛⲛⲉⲩϣⲏⲣⲉ ϩⲙⲉ ⲛⲉϩⲉ ⲙⲏⲧ ⲙⲙⲁⲥⲉ ϫⲟⲩⲱⲧ ⲛⲉⲓⲱ ⲙⲏⲧ ⲛⲥⲏϭ

17 ⲁϥⲧⲁⲁⲩ ⲉⲃⲟⲗ ϩⲓⲧⲛⲧⲉϥϭⲓϫ ⲛⲛⲉϥϩⲙϩⲁⲗ ⲡⲟϩⲉ ⲡⲟϩⲉ ⲙⲁⲩⲁⲁϥ ⲡⲉϫⲁϥ ⲇⲉ ⲛⲛⲉϥϩⲙϩⲁⲗ ϫⲉⲙⲟⲟϣⲉ ϩⲁⲧⲁϩⲏ ⲛⲧⲉⲧⲛⲉⲓⲣⲉ ⲛⲟⲩⲡⲱⲣϫ ⲛⲧⲙⲏⲧⲉ ⲛⲟⲩⲟϩⲉ ⲉⲩⲟϩⲉ

18 ⲁϥϩⲱⲛ ⲉⲧⲟⲟⲧϥ ⲙⲡϣⲟⲣⲡ ⲉϥϫⲱ ⲙⲙⲟⲥ ϫⲉⲉⲣϣⲁⲛⲏⲥⲁⲩ ⲡⲁⲥⲟⲛ ⲧⲱⲙⲛⲧ ⲉⲣⲟⲕ ⲛϥϫⲛⲟⲩⲕ ⲉϥϫⲱ ⲙⲙⲟⲥ ϫⲉⲉⲕⲏⲡ ⲉⲛⲓⲙ ⲁⲩⲱ ⲉⲕⲛⲁ ⲉⲧⲱⲛ ⲁⲩⲱ ⲛⲁⲛⲓⲙ ⲛⲉ ⲛⲁⲓ ⲉⲧⲙⲟⲟϣⲉ ϩⲁⲧⲉⲕϩⲏ

19 ⲉⲕⲉϫⲟⲟⲥ ⲛⲁϥ ϫⲉⲛⲁⲡⲉⲕϩⲙϩⲁⲗ ⲓⲁⲕⲱⲃ ⲛⲉ ⲛⲇⲱⲣⲟⲛ ⲛⲉⲛⲧⲁϥⲧⲛⲛⲟⲟⲩⲥⲉ ⲙⲡⲉϥϫⲟⲉⲓⲥ ⲏⲥⲁⲩ ⲁⲩⲱ ⲉⲓⲥ ϩⲏⲏⲧⲉ ϩⲱⲱϥ ϥⲟⲩⲏϩ ⲛⲥⲱⲛ

20 ⲁϥϩⲱⲛ ⲉⲧⲟⲟⲧϥ ⲙⲡϣⲟⲣⲡ ⲙⲛⲡⲙⲉϩⲥⲛⲁⲩ ⲙⲛⲡⲙⲉϩϣⲟⲙⲧ ⲙⲛⲟⲩⲟⲛ ⲛⲓⲙ ⲉⲧⲟⲩⲏϩ ⲛⲥⲁⲛⲧⲃⲛⲟⲟⲩⲉ ⲉϥϫⲱ ⲙⲙⲟⲥ ϫⲉⲕⲁⲧⲁⲡⲉⲓϣⲁϫⲉ ⲉⲧⲉⲧⲛⲉϣⲁϫⲉ ⲙⲛⲏⲥⲁⲩ ϩⲙⲡⲧⲣⲉⲧⲉⲧⲛⲧⲱⲙⲧ ⲉⲣⲟϥ

21 ⲛⲧⲉⲧⲛϫⲟⲟⲥ ⲛⲁϥ ϫⲉⲉⲓⲥⲡⲉⲕϩⲙϩⲁⲗ ⲓⲁⲕⲱⲃ ⲛⲏⲩ ⲉϥⲟⲩⲏϩ ⲛⲥⲱⲛ ⲁϥϫⲟⲟⲥ ⲅⲁⲣ ϫⲉϯⲛⲁⲥⲟⲡⲥ ⲡⲉⲕϩⲟ ϩⲛϩⲉⲛⲇⲱⲣⲟⲛ ⲛⲁⲓ ⲉⲧⲙⲟⲟϣⲉ ϩⲁⲧⲁϩⲏ ⲙⲛⲛⲥⲁⲛⲁⲓ ϯⲛⲁⲛⲁⲩ ⲉⲡⲉⲕϩⲟ ⲙⲉϣⲁⲕ ⲅⲁⲣ ⲉϥⲛⲁϣⲉⲡϩⲣⲁⲓ ⲉϩⲟⲩⲛ

22 ⲁⲛⲇⲱⲣⲟⲛ ⲙⲟⲟϣⲉ ϩⲁⲧⲉϥϩⲏ ⲛⲧⲟϥ ⲇⲉ ⲁϥⲛⲕⲟⲧⲕ ϩⲛⲧⲉⲟⲩϣⲏ ⲉⲧⲙⲙⲁⲩ ϩⲛⲧⲡⲁⲣⲉⲙⲃⲟⲗⲏ

23 ⲁϥⲧⲱⲟⲩⲛ ⲇⲉ ⲛⲧⲉⲩϣⲏ ⲉⲧⲙⲙⲁⲩ ⲁϥϫⲓ ⲛⲧⲉϥⲥϩⲓⲙⲉ ⲥⲛⲧⲉ ⲁⲩⲱ ⲧϩⲙϩⲁⲗ ⲥⲛⲧⲉ ⲁⲩⲱ ⲡⲉϥⲙⲛⲧⲟⲩⲉⲓ ⲛϣⲏⲣⲉ ⲁϥϫⲓⲟⲟⲣ ⲙⲙⲟⲟⲩ ⲙⲡⲙⲁ ⲛϫⲓⲟⲟⲣ ⲛⲛⲓⲁⲃⲟⲕ

24 ⲁⲩⲱ ⲁϥϫⲓⲧⲟⲩ ⲁϥϫⲓⲟⲟⲣ ⲙⲡⲉⲭⲉⲓⲙⲁⲣⲣⲟⲥ ⲁⲩⲱ ⲁϥϫⲓⲟⲟⲣ ⲙⲡⲉⲧⲛⲧⲁϥ ⲧⲏⲣϥ

25 ⲁⲓⲁⲕⲱⲃ ⲇⲉ ϣⲱϫⲡ ⲙⲁⲩⲁⲁϥ ⲁⲩⲱ ⲁⲩⲣⲱⲙⲉ ⲙⲓϣⲉ ⲛⲙⲙⲁϥ ϣⲁϩⲧⲟⲟⲩⲉ

26 ⲁϥⲛⲁⲩ ⲇⲉ ϫⲉⲙⲡⲉϥⲉϣϭⲙϭⲟⲙ ⲉϯ ⲟⲩⲃⲏϥ ⲁϥϫⲱϩ ⲉⲡⲡⲱϫϭ ⲙⲡⲉϥⲙⲏⲣⲟⲥ ⲁϥⲛⲟⲩϫⲥ ⲛϭⲓⲡⲡⲱϫϭ ⲙⲡⲙⲏⲣⲟⲥ ⲛⲓⲁⲕⲱⲃ ϩⲙⲡⲧⲣⲉϥⲙⲓϣⲉ ⲛⲙⲙⲁϥ

27 ⲡⲉϫⲁϥ ⲛⲁϥ ϫⲉⲕⲁⲁⲧ ⲉⲃⲟⲗ ϫⲉⲁⲡⲟⲩⲟⲉⲓⲛ ⲉⲓ ⲉϩⲣⲁⲓ ⲡⲉϫⲁϥ ⲇⲉ ϫⲉⲛϯⲛⲁⲕⲁⲁⲕ ⲁⲛ ⲉⲃⲟⲗ ⲙⲡⲉⲕⲥⲙⲟⲩ ⲉⲣⲟⲓ

28 ⲡⲉϫⲁϥ ⲇⲉ ⲛⲁϥ ϫⲉⲛⲓⲙ ⲣⲛⲧⲕ ⲛⲧⲟϥ ⲇⲉ ⲡⲉϫⲁϥ ϫⲉⲓⲁⲕⲱⲃ

29 ⲡⲉϫⲁϥ ⲇⲉ ⲛⲁϥ ϫⲉⲛⲛⲉⲩⲙⲟⲩⲧⲉ ⲉⲡⲉⲕⲣⲁⲛ ϫⲉⲓⲁⲕⲱⲃ ⲁⲗⲗⲁ ⲡⲓⲥⲣⲁⲏⲗ ⲡⲉⲧⲛⲁϣⲱⲡⲉ ⲛⲁⲕ ⲛⲣⲁⲛ ϫⲉⲁⲕϭⲙϭⲟⲙ ⲙⲛⲡⲛⲟⲩⲧⲉ ⲁⲩⲱ ⲛⲇⲩⲛⲁⲧⲟⲥ ⲙⲛⲛⲣⲱⲙⲉ

30 ⲁⲓⲁⲕⲱⲃ ⲇⲉ ϫⲛⲟⲩϥ ⲉϥϫⲱ ⲙⲙⲟⲥ ϫⲉⲙⲁⲧⲁⲙⲟⲓ ⲉⲡⲉⲕⲣⲁⲛ ϫⲉⲁⲓϭⲙϭⲟⲙ ⲡⲉϫⲁϥ ⲛⲁϥ ϫⲉⲉⲧⲃⲉⲟⲩ ⲕϣⲓⲛⲉ ⲛⲥⲁⲡⲁⲣⲁⲛ ⲡⲁⲓ ⲉⲧⲉⲟⲩϣⲡⲏⲣⲉ ⲡⲉ ⲁϥⲥⲙⲟⲩ ⲉⲣⲟϥ ϩⲙⲡⲙⲁ ⲉⲧⲙⲙⲁⲩ

31 ⲁⲓⲁⲕⲱⲃ ⲇⲉ ⲙⲟⲩⲧⲉ ⲉⲡⲣⲁⲛ ⲙⲡⲙⲁ ⲉⲧⲙⲙⲁⲩ ϫⲉⲡⲓⲛⲉ ⲙⲡⲛⲟⲩⲧⲉ ⲁⲓⲛⲁⲩ ⲅⲁⲣ ⲉⲡⲛⲟⲩⲧⲉ ⲛϩⲟ ϩⲓϩⲟ ⲁⲩⲱ ⲁⲥⲟⲩϫⲁⲓ ⲛϭⲓⲧⲁⲯⲩⲭⲏ

32 ⲁⲡⲣⲏ ϣⲁⲉϩⲣⲁⲓ ⲉϫⲱϥ ⲛⲧⲉⲣϥⲥⲁⲁⲧϥ ⲛϭⲓⲡⲓⲛⲉ ⲙⲡⲛⲟⲩⲧⲉ ⲛⲧⲟϥ ⲇⲉ ⲁϥϫⲟⲩϩ<ⲉ> ⲉⲡⲉϥⲙⲏⲣⲟⲥ

33 ⲉⲧⲃⲉⲡⲁⲓ ⲛⲛⲉⲩⲟⲩⲱⲙ ⲛϭⲓⲛϣⲏⲣⲉ ⲙⲡⲓⲥⲣⲁⲏⲗ ⲙⲡⲙⲟⲩⲧⲉ ⲛⲧⲁϥⲛⲟⲩϣⲥ ⲡⲁⲓ ⲉⲧϩⲓϫⲙ ⲡⲡⲱϫϭ ⲙⲡⲙⲏⲣⲟⲥ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ ϫⲉⲁϥϫⲱϩ ⲉⲡⲡⲱϫϭ ⲙⲡⲙⲏⲣⲟⲥ ⲛⲓⲁⲕⲱⲃ ⲉⲡⲙⲟⲩⲧⲉ ⲛⲧⲁϥⲛⲟⲩϣⲥ