Genesis 31 — Coptic (Sahidic)

1 ⲁⲓⲁⲕⲱⲃ ⲇⲉ ⲥⲱⲧⲙ ⲉⲛϣⲁϫⲉ ⲛⲛϣⲏⲣⲉ ⲛⲗⲁⲃⲁⲛ ⲉⲩϫⲱ ⲙⲙⲟⲥ ϫⲉⲁⲓⲁⲕⲱⲃ ϫⲓ ⲛⲛⲕⲁ ⲧⲏⲣⲟⲩ ⲙⲡⲉⲛⲉⲓⲱⲧ ⲁⲩⲱ ⲉⲃⲟⲗ ϩⲛⲛⲕⲁ ⲙⲡⲉⲛⲉⲓⲱⲧ ⲁϥϫⲡⲟ ⲛⲁϥ ⲙⲡⲉⲓⲉⲟⲟⲩ ⲧⲏⲣϥ

2 ⲁⲓⲁⲕⲱⲃ ⲇⲉ ⲛⲁⲩ ⲉⲡϩⲟ ⲛⲗⲁⲃⲁⲛ ⲁⲩⲱ ⲉⲓⲥ ϩⲏⲏⲧⲉ ⲛⲉϥⲛⲙⲙⲁϥ ⲁⲛ ⲛⲧϩⲉ ⲛⲥⲁϥ ⲙⲛϣⲙⲧ ⲉⲡϩⲟⲟⲩ ⲛϩⲟⲟⲩ

3 ⲡⲉϫⲉⲡϫⲟⲉⲓⲥ ⲡⲛⲟⲩⲧⲉ ⲛⲓⲁⲕⲱⲃ ϫⲉⲕⲟⲧⲕ ⲉϩⲣⲁⲓ ⲉⲡⲕⲁϩ ⲙⲡⲉⲕⲉⲓⲱⲧ ⲁⲩⲱ ⲉϩⲣⲁⲓ ⲉⲧⲉⲕⲅⲉⲛⲉⲁ ⲧⲁϣⲱⲡⲉ ⲛⲙⲙⲁⲕ

4 ⲁⲓⲁⲕⲱⲃ ⲇⲉ ϫⲟⲟⲩ ⲁϥⲙⲟⲩⲧⲉ ⲉⲗⲓⲁ ⲙⲛϩⲣⲁⲭⲏⲗ ⲉⲃⲟⲗ ⲉⲧⲥⲱϣⲉ ⲉⲡⲙⲁ ⲉⲧⲉⲣⲉⲛⲉⲥⲟⲟⲩ ⲙⲟⲟⲛⲉ ⲛϩⲏⲧϥ

5 ⲡⲉϫⲁϥ ⲛⲁⲩ ϫⲉϯⲛⲁⲩ ⲁⲛⲟⲕ ⲉⲡϩⲟ ⲙⲡⲉⲧⲛⲉⲓⲱⲧ ϫⲉⲛϥⲛⲙⲙⲁⲓ ⲁⲛ ⲛⲧϩⲉ ⲛⲥⲁϥ ⲙⲛϣⲙⲧⲉⲡϩⲟⲟⲩ ⲛϩⲟⲟⲩ ⲡⲛⲟⲩⲧⲉ ⲇⲉ ⲙⲡⲁⲉⲓⲱⲧ ⲛⲉϥϣⲟⲟⲡ ⲛⲙⲙⲁⲓ

6 ⲛⲧⲱⲧⲛ ⲇⲉ ϩⲱⲧⲧⲏⲩⲧⲛ ⲧⲉⲧⲛⲥⲟⲟⲩⲛ ϫⲉϩⲛⲧⲁϭⲟⲙ ⲧⲏⲣⲥ ⲁⲓⲣϩⲙϩⲁⲗ ⲙⲡⲉⲧⲛⲉⲓⲱⲧ

7 ⲡⲉⲧⲛⲉⲓⲱⲧ ⲇⲉ ⲁϥϩⲟⲩⲣⲱⲱⲧⲉ ⲁⲩⲱ ⲁϥϣⲓⲃⲉ ⲙⲡⲁⲃⲉⲕⲉ ⲙⲡⲙⲏⲧ ⲛϩⲓⲉⲓⲃ ⲙⲡⲉⲡⲛⲟⲩⲧⲉ ⲇⲉ ⲧⲁⲁⲥ ⲛⲁϥ ⲉⲑⲙⲕⲟⲓ

8 ⲉϣⲱⲡⲉ ⲉϥϣⲁⲛϫⲟⲟⲥ ⲛⲁⲓ ϫⲉⲛⲉⲧⲟ ⲛⲧⲟⲧⲟ ⲛⲉ ⲛⲉⲧϣⲟⲟⲡ ⲛⲁⲕ ⲛⲃⲉⲕⲉ ⲛⲧⲉⲛⲉⲥⲟⲟⲩ ⲧⲏⲣⲟⲩ ϫⲡⲟ ⲉϥⲟ ⲛⲧⲟⲧⲟ ⲛⲉ ⲉϣⲱⲡⲉ ⲇⲉ ⲟⲛ ⲉϥϣⲁⲛϫⲟⲟⲥ ϫⲉⲛⲉⲧⲟ ⲛⲟⲩⲟⲃϣ ⲛⲉⲧⲛⲁϣⲱⲡⲉ ⲛⲁⲕ ⲛⲃⲉⲕⲉ ⲛⲧⲉⲛⲉⲥⲟⲟⲩ ⲧⲏⲣⲟⲩ ϫⲡⲉⲟⲩⲱⲃϣ ⲛⲉ

9 ⲁⲡⲛⲟⲩⲧⲉ ϥⲓ ⲛⲛⲧⲃⲛⲟⲟⲩⲉ ⲧⲏⲣⲟⲩ ⲙⲡⲉⲧⲛⲉⲓⲱⲧ ⲁϥⲧⲁⲁⲩ ⲛⲁⲓ

10 ⲁⲥϣⲱⲡⲉ ⲇⲉ ⲉⲣⲉⲛⲉⲥⲟⲟⲩ ⲛⲁϫⲓⲟⲩⲱ ⲁⲓⲛⲁⲩ ⲉⲣⲟⲟⲩ ϩⲛⲛⲁⲃⲁⲗ ϩⲛⲧⲣⲁⲥⲟⲩ ⲁⲩⲱ ⲉⲓⲥ ϩⲏⲏⲧⲉ ⲛϭⲓⲉ ⲙⲛⲛⲟⲉⲓⲗⲉ ⲛϩⲟ ⲛⲟⲩⲟⲃϣ ⲙⲛⲛⲧⲟⲧⲟ ⲙⲛⲛⲁⲩⲁⲛ ⲛⲕⲣⲙⲉⲥ ⲛⲥⲓⲟⲩⲥⲓⲟⲩ ⲛⲉⲩⲃⲁϭⲉ ⲉϩⲣⲁⲓ ⲉϫⲛⲛⲉⲥⲟⲟⲩ ⲙⲛⲛⲃⲁⲁⲙⲡⲉ

11 ⲡⲉϫⲉⲡⲁⲅⲅⲉⲗⲟⲥ ⲙⲡⲛⲟⲩⲧⲉ ⲛⲁⲓ ϩⲛⲧⲣⲁⲥⲟⲩ ϫⲉⲓⲁⲕⲱⲃ ⲓⲁⲕⲱⲃ ⲁⲛⲟⲕ ⲇⲉ ⲡⲉϫⲁⲓ ϫⲉⲟⲩ ⲡⲉⲧϣⲟⲟⲡ

12 ⲛⲧⲟϥ ⲇⲉ ⲡⲉϫⲁϥ ⲛⲁⲓ ϫⲉϥⲓⲧⲕ ⲉϩⲣⲁⲓ ⲛⲅⲛⲁⲩ ⲉⲛϭⲓⲉ ⲙⲛⲛⲟⲉⲓⲗⲉ ⲛϩⲟ ⲛⲟⲩⲟⲃϣ ⲙⲛⲛⲉⲧⲟ ⲛⲧⲟⲧⲟ ⲙⲛⲛⲁⲩⲁⲛ ⲛⲕⲉⲣⲙⲉⲥ ⲙⲛⲛⲉⲧⲟ ⲛⲥⲓⲟⲩⲥⲓⲟⲩ ⲉⲩⲃⲱϭⲉ ⲉϩⲣⲁⲓ ⲉϫⲛⲛⲉⲥⲟⲟⲩ ⲙⲛⲛⲃⲁⲁⲙⲡⲉ ⲁⲓⲛⲁⲩ ⲅⲁⲣ ⲉⲛⲉⲧⲉⲣⲉⲗⲁⲃⲁⲛ ⲉⲓⲣⲉ ⲙⲙⲟⲟⲩ ⲛⲁⲕ

13 ⲁⲛⲟⲕ ⲡⲉ ⲡⲛⲟⲩⲧⲉ ⲡⲉⲛⲧⲁϥⲟⲩⲱⲛϩ ⲛⲁⲕ ⲉⲃⲟⲗ ϩⲙⲡⲙⲁ ⲙⲡⲛⲟⲩⲧⲉ ϩⲙⲡⲙⲁ ⲛⲧⲁⲕⲧⲱϩⲥ ⲛⲁⲓ ⲙⲙⲁⲩ ⲛⲟⲩⲟⲉⲓⲧ ⲁⲕⲉⲣⲏⲧ ⲛⲁⲓ ⲛϩⲏⲧϥ ⲛⲟⲩⲉⲣⲏⲧ ⲧⲉⲛⲟⲩ ϭⲉ ⲧⲱⲟⲩⲛ ⲛⲅⲉⲓ ⲉⲃⲟⲗ ϩⲉⲙ ⲡⲓⲕⲁϩ ⲛⲅⲃⲱⲕ ⲉϩⲣⲁⲓ ⲉⲡⲕⲁϩ ⲛⲧⲁⲩϫⲡⲟⲕ ϩⲣⲁⲓ ⲛϩⲏⲧϥ ⲧⲁϣⲱⲡⲉ ⲛⲙⲙⲁⲕ

14 ⲁⲩⲟⲩⲱϣϥ ⲛϭⲓⲗⲓⲁ ⲙⲛϩⲣⲁⲭⲏⲗ ⲡⲉϫⲁⲩ ⲛⲁϥ ϫⲉⲙⲏ ⲟⲩⲛⲧⲟ ϣⲟⲟⲡ ⲛⲁⲛ ⲏ ⲕⲗⲩⲣⲟⲛⲟⲙⲓⲁ ϩⲙⲡⲏⲓ ⲙⲡⲉⲛⲉⲓⲱⲧ

15 ⲙⲏ ⲙⲡⲛϣⲱⲡⲉ ⲛⲁϩⲣⲁϥ ⲛⲧϩⲉ ⲛϩⲛϣⲙⲙⲟ ⲁϥⲧⲁⲁⲛ ⲅⲁⲣ ⲉⲃⲟⲗ ⲁⲩⲱ ϩⲛⲟⲩⲱⲙ ⲁϥⲟⲩⲱⲙ ⲙⲡⲉⲛϩⲁⲧ

16 ⲧⲙⲏⲧⲣⲙⲙⲁⲟ ⲧⲏⲣⲥ ⲙⲛⲡⲉⲟⲟⲩ ⲛⲧⲁⲡⲛⲟⲩⲧⲉ ⲃⲓⲧⲥ ⲛⲧⲛⲡⲉⲛⲉⲓⲱⲧ ⲉⲥⲉϣⲱⲡⲉ ⲛⲁⲛ ⲙⲛⲛⲛϣⲏⲣⲉ ⲧⲉⲛⲟⲩ ϭⲉ ⲛⲛⲧⲁⲡⲕⲛⲟⲩⲧⲉ ϫⲟⲟⲩ ⲛⲁⲕ ⲁⲣⲓⲥⲟⲩ

17 ⲁϥⲧⲱⲟⲩⲛ ⲇⲉ ⲛϭⲓⲓⲁⲕⲱⲃ ⲁϥϫⲓ ⲛⲛⲉϥϩⲓⲟⲙⲉ ⲙⲛⲛⲉϥϣⲏⲣⲉ ⲁϥⲧⲁⲗⲟⲟⲩ ⲛϭⲁⲙⲟⲩⲗ

18 ⲁⲩⲱ ⲁϥϫⲓ ⲛⲛϥϩⲏⲡⲁⲣⲭⲟⲛⲧⲁ ⲧⲏⲣⲟⲩ ⲙⲛⲡⲥⲟϥⲧⲉ ⲧⲏⲣϥ ⲛⲧⲁϥϫⲡⲟϥ ϩⲛⲧⲙⲏⲥⲟⲡⲟⲧⲏⲙⲓⲁ ⲙⲛⲛⲉⲧⲛⲧⲁϥ ⲧⲏⲣⲟⲩ ⲁϥⲃⲱⲕ ϣⲁⲉⲓⲥⲁⲁⲕ ⲡⲉϥⲉⲓⲱⲧ ⲉϩⲣⲁⲓ ⲉⲡⲕⲁϩ ⲛⲭⲁⲛⲁⲁⲛ

19 ⲛⲉⲁⲗⲁⲃⲁⲛ ⲇⲉ ⲃⲱⲕ ⲉϩⲱⲱⲕⲉ ⲛⲛⲉϥⲉⲥⲟⲟⲩ ⲁϩⲣⲁⲭⲏⲗ ⲇⲉ ϩⲱⲃⲉⲧ ⲛⲛⲉⲓⲇⲱⲗⲟⲛ ⲙⲡⲉⲥⲉⲓⲱⲧ

20 ⲁϥϩⲱⲡ ⲇⲉ ⲛϭⲓⲓⲁⲕⲱⲃ ⲉⲗⲁⲃⲁⲛ ⲡⲥⲏⲣⲟⲥ ⲉⲧⲙⲧⲁⲙⲟϥ ϫⲉϥⲛⲁⲃⲱⲕ

21 ⲁϥⲡⲱⲧ ⲛⲧⲟϥ ⲙⲛⲡⲉⲧⲛⲧⲁϥ ⲧⲏⲣϥ ⲁϥϫⲓⲟⲟⲣ ⲙⲡⲓⲉⲣⲟ ⲁϥϯ ⲙⲡⲉϥⲟⲩⲟⲓ ⲉϩⲣⲁⲓ ⲉⲡⲧⲟⲟⲩ ⲛⲅⲁⲗⲁⲁⲧ

22 ⲁⲩϫⲓⲡⲟⲩⲱ ⲇⲉ ⲛⲗⲁⲃⲁⲛ ⲡⲥⲏⲣⲟⲥ ϩⲙⲡⲙϩϣⲟⲙⲧ ⲛϩⲟⲟⲩ ϫⲉⲁⲓⲁⲕⲱⲃ ⲡⲱⲧ

23 ⲁϥϫⲓ ⲛⲛⲉϥⲥⲛⲏⲩ ⲧⲏⲣⲟⲩ ⲛⲙⲙⲁϥ ⲁϥⲡⲱⲧ ⲉⲥⲱϥ ⲛⲟⲩϩⲓⲏ ⲛⲥⲁϣϥ ⲛϩⲟⲟⲩ ⲁϥⲧⲁϩⲟϥ ϩⲙⲡⲧⲟⲟⲩ ⲛⲅⲁⲗⲁⲁⲧ

24 ⲁⲡⲛⲟⲩⲧⲉ ⲉⲓ ϣⲁⲗⲁⲃⲁⲛ ⲡⲥⲏⲣⲟⲥ ϩⲛⲟⲩⲣⲁⲥⲟⲩ ϩⲛⲧⲉⲟⲩϣⲏ ⲡⲉϫⲁϥ ⲛⲁϥ ϫⲉϩⲁⲣϩ ⲉⲣⲟⲕ ⲙⲏⲡⲟⲧⲉ ⲛⲅϣⲁϫⲉ ⲙⲛⲓⲁⲕⲱⲃ ⲛϩⲛⲡⲉⲧϩⲟⲟⲩ

25 ⲁⲗⲁⲃⲁⲛ ⲇⲉ ⲧⲁϩⲉⲓⲁⲕⲱⲃ ⲓⲁⲕⲱⲃ ⲇⲉ ⲁϥⲡⲏⲥⲥⲉ ⲛⲧⲉϥⲥⲕⲏⲛⲏ ϩⲣⲁⲓ ϩⲙⲡⲧⲟⲟⲩ ⲁⲗⲁⲃⲁⲛ ⲧⲁϩⲉⲛϥⲥⲛⲏⲩ ⲉⲣⲁⲧⲟⲩ ϩⲙⲡⲧⲟⲟⲩ ⲛⲅⲁⲗⲁⲁⲧ

26 ⲡⲉϫⲉⲗⲁⲃⲁⲛ ⲇⲉ ⲛⲓⲁⲕⲱⲃ ϫⲉⲟⲩ ⲡⲉ ⲡⲁⲓ ⲛⲧⲁⲕⲁⲁϥ ⲉⲧⲃⲉⲟⲩ ⲁⲕⲡⲱⲧ ⲛϫⲓⲟⲩⲉ ⲁⲩⲱ ⲁⲕϩⲟⲡⲕ ⲉⲣⲟⲓ ⲁⲕⲃⲓ ⲛⲛⲁϣⲉⲉⲣⲉ ⲛⲧϩⲉ ⲛⲛⲓⲉⲭⲙⲁⲗⲱⲧⲟⲥ ϩⲛⲧⲥⲏⲃⲉ

27 ⲉⲛⲉⲛⲧⲁⲕⲧⲁⲙⲟⲓ ⲇⲉ ⲛⲓⲛⲁϫⲟⲟⲩⲕ ⲡⲉ ϩⲛⲟⲩⲟⲩⲛⲟϥ ⲙⲛϩⲙⲙⲟⲩⲥⲓⲕⲟⲛ ⲙⲛϩⲛⲕⲟⲩⲙⲕⲙ ⲙⲛϩⲛⲅⲓⲑⲁⲣⲁ

28 ⲙⲡⲕⲁⲁⲧ ⲛⲙⲡϣⲁ ⲉϯⲡⲓ ⲉⲣⲛ ⲛⲁϣⲏⲣⲉ ⲙⲛⲛⲁϣⲉⲉⲣⲉ ⲧⲉⲛⲟⲩ ⲇⲉ ϩⲛⲟⲩⲙⲏⲧⲁⲑⲏⲧ ⲁⲕⲁⲁⲥ

29 ⲁⲩⲱ ⲧⲉⲛⲟⲩ ⲟⲩⲛϭⲟⲙ ⲛⲧⲁϭⲓϫ ⲉⲣⲡⲉⲧϩⲟⲟⲩ ⲛⲁⲕ ⲡⲛⲟⲩⲧⲉ ⲇⲉ ⲙⲡⲉⲕⲉⲓⲱⲧ ⲛⲥⲁϥ ⲡⲉⲛⲧⲁϥϫⲟⲟⲥ ⲛⲁⲓ ⲉϥϫⲱ ⲙⲙⲟⲥ ϫⲉϩⲁⲣⲉϩ ⲉⲣⲟⲕ ⲙⲏⲡⲟⲧⲉ ⲛⲅϣⲁϫⲉ ⲙⲛⲓⲁⲕⲱⲃ ⲛϩⲙⲡⲉⲧϩⲟⲟⲩ

30 ⲧⲉⲛⲟⲩ ϭⲉ ⲁⲕⲃⲱⲕ ϩⲛⲟⲩⲉⲡⲏⲑⲏⲙⲓⲁ ⲅⲁⲣ ⲁⲕⲉⲡⲏⲑⲏⲙⲓⲁ ⲛⲃⲱⲕ ⲉϩⲣⲁⲓ ⲉⲡⲏⲓ ⲙⲡⲉⲕⲉⲓⲱⲧ ⲉⲧⲃⲉϭⲉ ⲁⲕⲃⲓ ⲛⲛⲁⲕⲉⲛⲟⲩⲧⲉ ⲛϫⲓⲟⲩⲉ

31 ⲁϥⲟⲩⲱϣϥ ⲇⲉ ⲛϭⲓⲓⲁⲕⲱⲃ ⲡⲉϫⲁϥ ⲛⲗⲁⲃⲁⲛ ϫⲉⲁⲓⲉⲣϩⲟⲧⲉ ⲅⲁⲣ ϫⲉⲙⲏⲡⲟⲧⲉ ⲛⲅϥⲓ ⲛⲛⲉⲕϣⲉⲉⲣⲉ ⲛⲧⲟⲟⲧⲙⲛⲛⲉⲧⲉⲛⲟⲩⲓ ⲧⲏⲣⲟⲩ ⲛⲉ

32 ⲥⲟⲩⲛⲗⲁⲁⲩ ⲛⲛⲉⲧⲉⲛⲟⲩⲕ ⲛⲉ ⲛⲅϫⲓⲧⲟⲩ ⲁⲩⲱ ⲙⲡⲉϥⲥⲟⲩⲛⲗⲁⲁⲩ ⲛⲧⲟⲟⲧϥ ⲡⲉϫⲉⲓⲁⲕⲱⲃ ⲛⲁϥ ϫⲉⲡⲉⲧⲕⲛⲁϩⲉ ⲉⲛⲉⲕⲛⲟⲩⲧⲉ ⲛⲧⲟⲟⲧϥ ⲛⲛⲉϥⲱⲛϩ ⲙⲡⲙⲧⲟ ⲉⲃⲟⲗ ⲛⲛⲉϥⲥⲛⲏⲩ ⲛⲉⲣⲉⲓⲁⲕⲱⲃ ⲅⲁⲣ ⲥⲟⲟⲩⲛ ⲁⲛ ⲡⲉ ϫⲉⲁϩⲣⲁⲭⲏⲗ ⲧⲉϥⲥϩⲓⲙⲉ ϥⲓⲧⲟⲩ ⲛϫⲓⲟⲩⲉ

33 ⲁⲗⲁⲃⲁⲛ ⲇⲉ ⲃⲱⲕ ⲉϩⲟⲩⲛ ⲁϥⲙⲟⲩϣⲧ ⲙⲡⲏⲓ ⲛⲗⲓⲁ ⲙⲡⲉϥϩⲉ ⲉⲣⲟⲟⲩ ⲁϥⲉⲓ ⲉⲃⲟⲗ ϩⲙⲡⲏⲓ ⲛⲗⲓⲁ ⲁϥⲙⲟⲩϣⲧ ⲙⲡⲏⲓ ⲛⲓⲁⲕⲱⲃ ⲙⲡⲉϥϩⲉ ⲉⲣⲟⲟⲩ ⲁⲩⲱ ⲡⲏⲓ ⲛⲧϩⲙϩⲁⲗ ⲥⲛⲧⲉ ⲙⲡⲉϥϩⲉ ⲉⲣⲟⲟⲩ ⲁϥⲃⲱⲕ ⲇⲉ ⲉϩⲟⲩⲛ ⲉⲡⲏⲓ ⲛϩⲣⲁⲭⲏⲗ

34 ϩⲣⲁⲭⲏⲗ ⲇⲉ ⲁⲥϫⲓ ⲛⲛⲉⲓⲇⲱⲗⲟⲛ ⲁⲥⲕⲁⲁⲩ ϩⲁⲧϩⲁⲡⲟⲣⲕ ⲙⲡϭⲁⲙⲟⲩⲗ ⲁⲥϩⲙⲟⲟⲥ ⲉϩⲣⲁⲓ ⲉϫⲱⲟⲩ

35 ⲡⲉϫⲁⲥ ⲙⲡⲉⲥⲉⲓⲱⲧ ϫⲉⲙⲡⲣϩⲣⲟϣ ⲙⲙⲟⲕ ⲡⲁϫⲟⲉⲓⲥ ⲙⲛϭⲟⲙ ⲙⲙⲟⲓ ⲉⲧⲱⲟⲩⲛ ⲙⲡⲉⲕⲙⲧⲟ ⲉⲃⲟⲗ ϫⲉⲛⲥⲱⲛⲧ ⲅⲁⲣ ⲛⲛⲉϩⲓⲟⲙⲉ ϣⲟⲟⲡ ⲙⲙⲟⲓ ⲁⲗⲁⲃⲁⲛ ⲇⲉ ⲙⲟⲩϣⲧ ⲙⲡⲏⲓ ⲧⲏⲣϥ ⲙⲡⲉϥϩⲉ ⲉⲛⲉⲉⲓⲇⲱⲗⲟⲛ

36 ⲁⲓⲁⲕⲱⲃ ⲇⲉ ⲛⲟⲩϭⲥ ⲁϥⲙⲓϣⲉ ⲙⲛⲗⲁⲃⲁⲛ ⲁϥⲟⲩⲱϣⲃ ⲇⲉ ⲛϭⲓⲓⲁⲕⲱⲃ ⲡⲉϫⲁϥ ⲛⲗⲁⲃⲁⲛ ϫⲉⲟⲩ ⲡⲉ ⲡⲁϫⲓⲛϭⲟⲛⲥ ⲁⲩⲱ ⲟⲩ ⲡⲉ ⲡⲁⲛⲟⲃⲉ ϫⲉⲁⲕⲡⲱⲧ ⲛⲥⲱⲓ

37 ⲁⲩⲱ ⲁⲕⲙⲟⲩϣⲧ ⲛⲛⲁϩⲛⲁⲁⲩ ⲧⲏⲣⲟⲩ ⲟⲩ ⲡⲉⲛⲧⲁⲕϩⲉ ⲉⲣⲟϥ ⲛⲧⲟⲟⲧⲉⲃⲟⲗ ϩⲛⲛⲉϩⲛⲁⲁⲩ ⲧⲏⲣⲟⲩ ⲙⲡⲉⲕⲏⲓ ⲥⲙⲛⲧⲥ ⲙⲡⲉⲓⲙⲁ ⲙⲡⲙⲧⲟ ⲉⲃⲟⲗ ⲛⲛⲉⲕⲥⲛⲏⲩ ⲁⲩⲱ ⲙⲡⲙⲧⲟ ⲉⲃⲟⲗ ⲛⲛⲁⲥⲛⲏⲩ ⲛⲥⲉϫⲡⲓⲟ ϩⲛⲧⲉⲛⲙⲏⲧⲉ ⲙⲡⲉⲥⲛⲁⲩ

38 ⲉⲓⲥ ϫⲟⲩⲱⲧⲉ ⲛⲣⲟⲙⲡⲉ ⲙⲡϩⲟⲟⲩ ⲁⲛⲟⲕ ϯϣⲟⲟⲡ ⲛⲙⲙⲁⲕ ⲛⲉⲕⲉⲥⲟⲟⲩ ⲙⲛⲛⲉⲕⲃⲁⲁⲙⲡⲉ ⲙⲡⲟⲩⲣⲁⲧϣⲏⲣⲉ ⲙⲡⲉⲓⲟⲩⲉⲙⲟⲩⲟⲓⲗⲉ ⲉⲃⲟⲗ ϩⲛⲛⲉⲕⲉⲥⲟⲟⲩ

39 ⲙⲡⲓⲉⲓⲛⲉ ⲛⲁⲕ ⲉϩⲣⲁⲓ ⲙⲡⲉⲛⲧⲁⲟⲩⲑⲩⲣⲓⲟⲛ ⲧⲁⲕⲟϥ ⲁⲛⲟⲕ ⲡⲉⲛⲉⲓϯ ⲉⲃⲟⲗ ⲛⲧⲟⲟⲧⲛϫⲓⲟⲩⲉ ⲙⲡⲉϩⲟⲟⲩ ⲙⲛⲛϫⲓⲟⲩⲉ ⲛⲧⲉⲩϣⲏ

40 ⲉⲛⲉⲓⲣⲟⲕϩ ϩⲙⲡⲕⲁⲩⲙⲁ ⲙⲡⲉϩⲟⲟⲩ ⲙⲛⲡϫⲁϥ ⲛⲧⲉⲩϣⲏ ⲁⲩⲱ ⲡϩⲓⲛⲏⲃ ⲁϥⲥⲁϩⲱⲃ ⲉⲃⲟⲗ ⲛⲛⲁⲃⲁⲗ

41 ⲉⲓⲥ ϫⲟⲩⲱⲧⲉ ⲛⲣⲟⲙⲡⲉ ⲙⲡϩⲟⲟⲩ ⲁⲛⲟⲕ ϯϣⲟⲟⲡ ϩⲙⲡⲉⲕⲏⲓ ⲁⲓⲣϩⲙϩⲁⲗ ⲛⲁⲕ ⲙⲙⲛⲧⲁϥⲧⲉ ⲛⲣⲟⲙⲡⲉ ⲉⲡⲙⲁ ⲛⲧⲉⲕϣⲉⲉⲣⲉ ⲥⲛⲧⲉ ⲁⲩⲱ ⲥⲟ ⲛⲣⲟⲙⲡⲉ ϩⲛⲛⲉⲕⲉⲥⲟⲟⲩ ⲁⲩⲱ ⲁⲕϩⲟⲩⲣⲱⲱⲧ ⲙⲡⲁⲃⲉⲕⲉ ⲙⲡⲙⲏⲧ ⲛϩⲓⲉⲓⲃ

42 ⲛⲥⲁⲃⲏⲗ ϫⲉϥϣⲟⲟⲡ ⲛⲙⲙⲁⲓ ⲛϭⲓⲡⲛⲟⲩⲧⲉ ⲙⲡⲁⲉⲓⲱⲧ ⲁⲃⲣⲁϩⲁⲙ ⲁⲩⲱ ⲧϩⲟⲧⲉ ⲛⲓⲥⲁⲁⲕ ⲛⲉⲕⲛⲁϫⲟⲟⲩⲧ ⲡⲉ ⲧⲉⲛⲟⲩ ⲉⲓϣⲟⲩⲉⲓⲧ ⲁⲡⲛⲟⲩⲧⲉ ⲛⲁⲩ ⲉⲡⲁⲑⲃⲃⲓⲟ ⲙⲛⲡϩⲓⲥⲉ ⲛⲛⲁϭⲓϫ ⲁϥϫⲡⲓⲟⲕ ⲛⲥⲁϥ

43 ⲁϥⲟⲩⲱϣⲃ ⲇⲉ ⲛϭⲓⲗⲁⲃⲁⲛ ⲡⲉϫⲁϥ ⲛⲓⲁⲕⲱⲃ ϫⲉⲛⲉⲓϣⲉⲉⲣⲉ ⲛⲁϣⲉⲉⲣⲉ ⲛⲉ ⲁⲩⲱ ⲛⲉⲓϣⲏⲣⲉ ⲛⲁϣⲏⲣⲉ ⲛⲉ ⲁⲩⲱ ⲛⲉⲓⲧⲃⲛⲟⲟⲩⲉ ⲛⲁⲧⲃⲛⲟⲟⲩⲉ ⲛⲉ ⲁⲩⲱ ⲉⲛⲕⲁ ⲛⲓⲙ ⲉⲧⲕⲛⲁⲩ ⲉⲣⲟⲟⲩ ⲛⲧⲟⲕ ⲛⲟⲩⲓ ⲛⲉ ⲁⲩⲱ ⲛⲁⲛⲁϣⲉⲉⲣⲉ ⲛⲉ ⲉⲓⲛⲁⲣⲟⲩ ⲇⲉ ⲛⲛⲁⲓ ⲙⲡϩⲟⲟⲩ ⲏ ⲛⲉⲩϣⲏⲣⲉ ⲛⲧⲁⲩϫⲡⲟⲟⲩ

44 ⲧⲉⲛⲟⲩ ϭⲉ ⲁⲙⲟⲩ ⲛⲧⲛⲥⲙⲓⲛⲉ ⲛⲟⲩⲇⲓⲁⲑⲏⲕⲏ ⲁⲛⲟⲕ ⲛⲙⲙⲁⲕ ⲛⲥϣⲱⲡⲉ ⲉⲩⲙⲛⲧⲙⲛⲧⲣⲉ ⲛⲧⲁⲙⲏⲧⲉ ⲙⲛⲧⲉⲕⲙⲏⲧⲉ ⲡⲉϫⲁϥ ⲇⲉ ⲛⲁϥ ϫⲉⲉⲓⲥϩⲏⲏⲧⲉ ⲙⲙⲛⲗⲁⲁⲩ ⲙⲡⲉⲓⲙⲁ ⲛⲙⲙⲁⲛ ⲉⲓⲥ ϩⲏⲏⲧⲉ ⲡⲛⲟⲩⲧⲉ ⲟ ⲛⲙⲛⲧⲣⲉ ⲛⲧⲁⲙⲏⲧⲉ ⲙⲛⲧⲉⲕⲙⲏⲧⲉ

45 ⲓⲁⲕⲱⲃ ⲇⲉ ⲁϥϫⲓ ⲛⲟⲩⲱⲛⲉ ⲁϥⲧⲁϩⲟϥ ⲉⲣⲁⲧϥ ⲛⲟⲩⲟⲉⲓⲧ

46 ⲡⲉϫⲁϥ ⲇⲉ ⲛϭⲓⲓⲁⲕⲱⲃ ⲛⲛⲉϥⲥⲛⲏⲩ ϫⲉⲥⲱⲟⲩϩ ⲉϩⲟⲩⲛ ⲛϩⲉⲛⲱⲛⲉ ⲁⲩⲱ ⲁⲩⲥⲱⲟⲩϩ ⲉϩⲟⲩⲛ ⲛϩⲉⲛⲱⲛⲉ ⲁⲩⲧⲁⲙⲓⲟ ⲛⲟⲩⲧⲁⲗ ⲁⲩⲟⲩⲱⲙ ⲁⲩⲥⲱ ϩⲙⲡⲙⲁ ⲉⲧⲙⲙⲁⲩ ⲉϩⲣⲁⲓ ⲉϫⲛⲡⲧⲁⲗ ⲡⲉϫⲁϥ ⲛⲁϥ ⲛϭⲓⲗⲁⲃⲁⲛ ϫⲉⲡⲓⲧⲁⲗ ⲉⲣⲙⲛⲧⲣⲉ ϩⲛⲧⲁⲙⲏⲧⲉ ⲙⲛⲧⲉⲕⲙⲏⲧⲉ ⲙⲡϩⲟⲟⲩ

47 ⲁⲩⲱ ⲁⲗⲁⲃⲁⲛ ⲙⲟⲩⲧⲉ ⲉⲣⲟϥ ϫⲉⲡⲧⲁⲗ ⲛⲧⲙⲛⲧⲙⲛⲧⲣⲉ ⲓⲁⲕⲱⲃ ⲇⲉ ⲁϥⲙⲟⲩⲧⲉ ⲉⲣⲟϥ ϫⲉⲡⲧⲁⲗ ⲙⲡⲙⲛⲧⲣⲉ

48 ⲡⲉϫⲉⲗⲁⲃⲁⲛ ⲇⲉ ⲛⲓⲁⲕⲱⲃ ϫⲉⲉⲓⲥϩⲏⲏⲧⲉ ⲡⲓⲧⲁⲗ ⲙⲛⲡⲓⲟⲩⲟⲉⲓⲧ ⲛⲧⲁⲕⲧⲁϩⲟϥ ⲉⲣⲁⲧϥ ϩⲛⲧⲁⲙⲏⲧⲉ ⲙⲛⲧⲉⲕⲙⲏⲧⲉ ϥⲣⲙⲛⲧⲣⲉ ⲛϭⲓⲡⲧⲁⲗ ⲁⲩⲱ ϥⲣⲙⲛⲧⲣⲉ ⲛϭⲓⲡⲓⲟⲩⲟⲉⲓⲧ ⲉⲧⲃⲉⲡⲁⲓ ⲁϥⲙⲟⲩⲧⲉ ⲉⲡⲉϥⲣⲁⲛ ϫⲉⲡⲧⲁⲗ ⲙⲡⲙⲛⲧⲣⲉ

49 ⲁⲩⲱ ⲧϩⲟⲣⲁⲥⲓⲥ ⲛⲧⲁⲓⲛⲁⲩ ⲉⲣⲟⲥ ⲉⲣⲉⲡⲛⲟⲩⲧⲉ ⲛⲁⲩ ⲉⲧⲁⲙⲏⲧⲉ ⲙⲛⲧⲉⲕⲙⲏⲧⲉ ⲁⲩⲱ ϫⲉⲉⲛⲛⲁⲥⲁϩⲱⲛ ⲉⲃⲟⲗ ⲉⲛⲛⲛⲉⲣⲏⲩ

50 ⲉϣⲱⲡⲉ ⲉⲕϣⲁⲛⲑⲃⲃⲓⲟ ⲛⲛⲁϣⲉⲉⲣⲉ ⲏ ⲛⲅϫⲓⲥϩⲓⲙⲉ ⲉϫⲛⲛⲁϣⲉⲉⲣⲉ ⲉⲓⲥ ϩⲏⲏⲧⲉ ⲙⲛⲗⲁⲁⲩ ⲙⲡⲉⲓⲙⲁ ⲛⲙⲙⲁⲛ

52 (sic!) ⲉϣⲱⲡⲉ ⲅⲁⲣ ⲁⲛⲟⲕ ⲉⲓϣⲁⲛⲧⲙⲉⲓ ϣⲁⲣⲟⲕ ⲁⲩⲱ ⲛⲧⲟⲕ ϩⲱⲱⲕ ⲛⲅⲧⲙⲉⲓ ϣⲁⲣⲟⲓ

53 ⲡⲛⲟⲩⲧⲉ ⲛⲁⲃⲣⲁϩⲁⲙ ⲁⲩⲱ ⲡⲛⲟⲩⲧⲉ ⲛⲛⲁⲭⲱⲣ ⲉϥⲉⲕⲣⲓⲛⲉ ⲙⲡⲓⲧⲁⲗ ⲙⲛⲡⲓⲟⲉⲓⲧ ⲉϫⲛⲟⲩⲕⲁⲕⲓⲁ ⲛⲧⲉⲛⲙⲏⲧⲉ ⲁϥⲱⲣⲕ ⲛϭⲓⲓⲁⲕⲱⲃ ⲛⲧϩⲟⲧⲉ ⲙⲡⲉϥⲉⲓⲱⲧ ⲉⲓⲥⲁⲁⲕ

54 ⲁⲓⲁⲕⲱⲃ ϣⲱⲱⲧ ⲛⲟⲩⲑⲩⲥⲓⲁ ϩⲙⲡⲧⲟⲟⲩ ⲁⲩⲱ ⲁϥⲙⲟⲩⲧⲉ ⲉⲛⲉϥⲥⲛⲏⲩ ⲁⲩⲟⲩⲱⲙ ⲁⲩⲱ ⲁⲩⲥⲱ ⲁⲩⲛⲕⲟⲧⲕ ϩⲣⲁⲓ ϩⲙⲡⲧⲟⲟⲩ