Genesis 12 — Coptic (Sahidic)

1 ⲡⲉϫⲉⲡϫⲟⲉⲓⲥ ⲛⲁⲃⲣⲁϩⲁⲙ ϫⲉⲁⲙⲟⲩ ⲉⲃⲟⲗ ϩⲙⲡⲉⲕⲕⲁϩ ⲁⲩⲱ ⲉⲃⲟⲗ ϩⲛⲧⲉⲕⲥⲩⲛⲅⲉⲛⲉⲓⲁ ⲁⲩⲱ ⲉⲃⲟⲗ ϩⲙⲡⲏⲓ ⲙⲡⲉⲕⲉⲓⲱⲧ ⲉϩⲟⲩⲛ ⲉⲡⲕⲁϩ ⲉϯⲛⲁⲧⲟⲩⲟⲕ ⲉⲣⲟϥ

2 ⲁⲩⲱ ϯⲛⲁⲁⲕ ⲛⲟⲩⲛⲟϭ ⲛϩⲉⲑⲛⲟⲥ ⲧⲁⲥⲙⲟⲩ ⲉⲣⲟⲕ ⲧⲁϫⲓⲥⲉ ⲙⲡⲉⲕⲣⲁⲛ ⲛⲅϣⲱⲡⲉ ⲉⲕⲥⲙⲁⲙⲁⲁⲧ

3 ⲁⲩⲱ ϯⲛⲁⲥⲙⲟⲩ ⲉⲛⲉⲧⲥⲙⲟⲩ ⲉⲣⲟⲕ ⲧⲁⲥϩⲟⲩⲉⲣⲛⲉⲧⲛⲁⲥⲁϩⲟⲩ ⲙⲙⲟⲕ ⲁⲩⲱ ⲛⲥⲉϫⲓⲥⲙⲟⲩ ϩⲣⲁⲓ ⲛϩⲏⲧⲕ ⲛϭⲓⲛⲉⲫⲩⲗⲏ ⲧⲏⲣⲟⲩ ⲙⲡⲕⲁϩ

4 ⲁⲁⲃⲣⲁⲙ ⲇⲉ ⲉⲓ ⲉⲃⲟⲗ ⲕⲁⲧⲁⲧϩⲉ ⲛⲧⲁⲡϫⲟⲉⲓⲥ ϣⲁϫⲉ ⲛⲙⲙⲁϥ ⲁⲩⲱ ⲁϥⲃⲱⲕ ⲛⲙⲙⲁϥ ⲛϭⲓⲗⲱⲧ ⲁⲃⲣⲁⲙ ⲇⲉ ⲛⲉϥϩⲛϣϥⲉⲧⲏ ⲛⲣⲟⲙⲡⲉ ⲛⲧⲉⲣⲉϥⲉⲓ ⲉⲃⲟⲗ ϩⲛⲭⲁⲣⲣⲁⲛ

5 ⲁⲁⲃⲣⲁⲙ ϫⲓ ⲛⲥⲁⲣⲁ ⲧⲉϥⲥϩⲓⲙⲉ ⲁⲩⲱ ⲗⲱⲧ ⲡϣⲏⲣⲉ ⲙⲡⲉϥⲥⲟⲛ ⲙⲛⲛⲉⲩϩⲩⲡⲁⲣⲭⲟⲛⲧⲁ ⲧⲏⲣⲟⲩ ⲛⲧⲁⲩⲕⲁⲁⲩ ⲛⲁⲩ ⲙⲛⲯⲩⲭⲏ ⲛⲓⲙ ⲛⲧⲁⲩⲕⲁⲁⲩ ⲛⲁⲩ ϩⲣⲁⲓ ϩⲙⲡⲕⲁϩ ⲛⲭⲁⲣⲣⲁⲛ ⲁⲩⲉⲓ ⲉⲃⲟⲗ ⲉⲃⲱⲕ ⲉϩⲣⲁⲓ ⲉⲡⲕⲁϩ ⲛⲭⲁⲛⲁⲛ

6 ⲁⲁⲃⲣⲁϩⲁⲙ ⲙⲏϣⲧⲡⲕⲁϩ ⲉⲧⲉϥϣⲓⲏ ϣⲁϩⲣⲁⲓ ⲉⲡⲙⲁ ⲛⲥⲉⲭⲏⲙ ⲉϫⲙⲡϣⲏⲛ ⲉⲧϫⲟⲥⲉ ⲛⲉⲭⲁⲛⲁⲛⲁⲓⲟⲥ ⲇⲉ ⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲛⲉⲩⲟⲩⲏϩ ϩⲓϫⲙⲡⲕⲁϩ ⲡⲉ

7 ⲁⲡϫⲟⲉⲓⲥ ⲇⲉ ⲟⲩⲱⲛϩ ⲉⲃⲟⲗ ⲛⲁⲃⲣⲁⲙ ⲡⲉϫⲁϥ ⲛⲁϥ ϯⲛⲁϯ ⲙⲡⲉⲓⲕⲁϩ ⲙⲡⲉⲕⲥⲡⲉⲣⲙⲁ ⲁⲁⲃⲣⲁⲙ ⲕⲱⲧ ϩⲙⲡⲙⲁ ⲉⲧⲙⲙⲁⲩ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ ⲡⲉⲛⲧⲁϥⲟⲩⲱⲛϩ ⲛⲁϥ ⲉⲃⲟⲗ

8 ⲁϥⲧⲱⲟⲩⲛ ⲇⲉ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲉϩⲣⲁⲓ ⲉⲡⲧⲟⲟⲩ ⲕⲁⲧⲁⲙⲙⲁ ⲛϣⲁ ⲛⲃⲁⲓⲑⲏⲗ ⲁϥⲥⲙⲓⲛⲉ ϩⲙⲡⲙⲁ ⲉⲧⲙⲙⲁⲩ ⲛⲧⲉϥⲥⲕⲩⲛⲏ ϩⲉⲛⲃⲁⲓⲑⲏⲗ ⲕⲁⲧⲁⲧϩⲁⲗⲁⲥⲥⲁ ⲁⲩⲱ ⲁⲕⲅⲁⲓ ⲕⲁⲧⲁⲙⲙⲁ ⲛϣⲁ ⲁϥⲕⲱⲧ ϩⲙⲡⲙⲁ ⲉⲧⲙⲙⲁⲩ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ ⲡⲛⲟⲩⲧⲉ ⲁⲩⲱ ⲁϥⲉⲡⲓⲕⲁⲗⲉⲓ ⲙⲡⲣⲁⲛ ⲙⲡϫⲟⲉⲓⲥ ⲡⲛⲟⲩⲧⲉ ⲡⲉⲛⲧⲁϥⲟⲩⲱⲛϩ ⲛⲁϥ ⲉⲃⲟⲗ

9 ⲁϥⲧⲱⲟⲩⲛ ⲇⲉ ⲛϭⲓⲁⲃⲣⲁⲙ ⲁϥⲙⲟⲟϣⲉ ϩⲛⲧⲉⲣⲏⲙⲟⲥ

10 ⲁⲩϩⲉⲃⲱⲱⲛ ⲇⲉ ϣⲱⲡⲉ ⲉϫⲙⲡⲕⲁϩ ⲁⲁⲃⲣⲁⲙ ⲃⲱⲕ ⲉⲡⲉⲥⲏⲧ ⲉⲕⲏⲙⲉ ⲉⲟⲩⲱϩ ϩⲙⲡⲙⲁ ⲉⲧⲙⲙⲁⲩ ϫⲉⲁⲡϩⲉⲃⲱⲱⲛ ϭⲙϭⲟⲙ ⲉϩⲣⲁⲓ ⲉϫⲙⲡⲕⲁϩ

11 ⲁⲥϣⲱⲡⲉ ⲇⲉ ⲛⲧⲉⲣⲉⲁⲃⲣⲁⲙ ϩⲱⲛ ⲉϩⲟⲩⲛ ⲉⲃⲱⲕ ⲉϩⲣⲁⲓ ⲉⲕⲏⲙⲉ ⲡⲉϫⲉⲁⲃⲣⲁⲙ ⲛⲥⲁⲣⲁ ⲧⲉϥⲥϩⲓⲙⲉ ϫⲉϯⲉⲓⲙⲉ ⲁⲛⲟⲕ ϫⲉⲛⲧⲉⲟⲩⲥϩⲓⲙⲉ ⲉⲛⲉⲥⲉϩⲣⲁⲥ

12 ⲥⲛⲁϣⲱⲡⲉ ⲇⲉ ⲉⲩϣⲁⲛⲛⲁⲩ ⲉⲣⲟⲛϭⲓⲛⲣⲙⲛⲕⲏⲙⲉ ⲥⲉⲛⲁϫⲟⲟⲥ ϫⲉⲧⲉϥⲥϩⲓⲙⲉ ⲧⲉ ⲧⲁⲓ ⲛⲥⲉⲙⲟⲩⲟⲩⲧ ⲙⲙⲟⲓ ⲛⲧⲟ ⲇⲉ ⲛⲥⲉⲧⲁⲛϩⲟ

13 ⲁϫⲓⲥ ϭⲉ ϫⲉⲁⲛⲅ ⲧⲉϥⲥⲱⲛⲉ ϫⲉⲉⲣⲉⲡⲉⲧⲛⲁⲛⲟⲩϥ ϣⲱⲡⲉ ⲙⲙⲟⲓ ⲉⲧⲃⲏⲏⲧⲉ

14 ⲁⲥϣⲱⲡⲉ ⲇⲉ ⲛⲧⲉⲣⲉⲁⲃⲣⲁⲙ ⲃⲱⲕ ⲉϩⲣⲁⲓ ⲉⲕⲏⲙⲉ ⲁⲛⲣⲙⲛⲕⲏⲙⲉ ⲛⲁⲩ ⲉⲧⲉϥⲥϩⲓⲙⲉ ϫⲉⲉⲛⲉⲥⲱⲥ ⲉⲙⲁⲧⲉ

15 ⲉⲁⲩⲛⲁⲩ ⲉⲣⲟⲥ ⲛϭⲓⲛⲁⲣⲭⲱⲛ ⲙⲫⲁⲣⲁⲱ ⲁⲩϣⲟⲩϣⲟⲩ ⲉϫⲱⲥ ϩⲁⲧⲙ ⲫⲁⲣⲁⲱ ⲁⲩϫⲓ ⲙⲙⲟⲥ ⲉϩⲟⲩⲛ ⲉⲡⲏⲓ ⲙⲫⲁⲣⲁⲱ

16 ⲁⲩⲱ ⲁⲩⲣⲡⲡⲉⲧⲛⲁⲛⲟⲩϥ ⲙⲛⲁⲃⲣⲁⲙ ⲉⲧⲃⲏⲏⲧⲥ ⲁⲩϣⲱⲡⲉ ⲛⲁϥ ⲛϭⲓϩⲉⲛⲉⲥⲟⲟⲩ ⲙⲛϩⲉⲛⲙⲁⲥⲉ ⲁⲩⲱ ϩⲉⲛⲉⲓⲱ ⲙⲛϩⲉⲛϩⲙϩⲁⲗ ⲛϩⲟⲟⲩⲧ ⲁⲩⲱ ϩⲉⲛϩⲙϩⲁⲗ ⲛⲥϩⲓⲙⲉ ⲙⲛϩⲉⲛⲙⲁⲥⲡⲟⲣⲕ ⲙⲛϩⲉⲛϭⲁⲙⲟⲩⲗ

17 ⲁⲡⲛⲟⲩⲧⲉ ⲇⲉ ϩⲉⲧⲁⲍⲉ ⲙⲫⲁⲣⲁⲱ ϩⲛϩⲉⲛⲥⲏϣⲉ ⲉⲩϩⲟⲟⲩ ⲙⲛⲡⲉϥⲏⲓ ⲉⲧⲃⲉⲥⲁⲣⲁ ⲧⲉⲥϩⲓⲙⲉ ⲛⲁⲃⲣⲁⲙ

18 ⲁⲫⲁⲣⲁⲱ ⲙⲟⲩⲧⲉ ⲉⲁⲃⲣⲁⲙ ⲡⲉϫⲁϥ ⲛⲁϥ ϫⲉⲟⲩ ⲡⲉ ⲡⲁⲓ ⲛⲧⲁⲕⲁⲁϥ ⲛⲁⲓ ⲙⲡⲉⲕⲧⲁⲙⲟⲓ ϫⲉⲧⲉⲕⲥϩⲓⲙⲉ ⲧⲉ

19 ⲉⲧⲃⲉⲟⲩ ⲁⲕϫⲟⲟⲥ ϫⲉⲧⲁⲥⲱⲛⲉ ⲧⲉ ⲁⲩⲱ ⲁⲓϫⲓ ⲙⲙⲟⲥ ⲛⲁⲓ ⲛⲥϩⲓⲙⲉ ⲧⲉⲛⲟⲩ ϭⲉ ⲉⲓⲥ ϩⲏⲏⲧⲉ ⲧⲉⲕⲥϩⲓⲙⲉ ⲙⲡⲉⲕⲙⲧⲟ ⲉⲃⲟⲗ ϫⲓⲧⲥ ⲛⲅⲃⲱⲕ

20 ⲁⲫⲁⲣⲁⲱ ⲇⲉ ϩⲱⲛ ⲉⲧⲟⲟⲧⲟⲩ ⲛϩⲉⲛⲣⲱⲙⲉ ⲉⲧⲣⲉⲩⲑⲡⲟ ⲛⲁⲃⲣⲁⲙ ⲙⲛⲧⲉϥⲥϩⲓⲙⲉ ⲙⲛⲡⲉⲧⲉⲛⲧⲁϥ ⲧⲏⲣϥ ⲁⲩⲱ ⲗⲱⲧ ⲛⲙⲙⲁϥ