Read Ezekiel 7 side by side with translations · The Final Bible
1 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ ϫⲉ
2 ⲡϣⲏⲣⲉ ⲙⲡⲣⲱⲙⲉ ⲁϫⲓⲥ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ⲙⲡⲕⲁϩ ⲙⲡⲓⲥⲣⲁⲏⲗ ϫⲉⲁⲥⲉⲓ ⲛϭⲓⲧϩⲁⲏ ⲧϩⲁⲏ ⲁⲥⲉⲓ ⲉϫⲙⲡⲉϥⲧⲟⲟⲩ ⲛⲥⲁⲙⲡⲕⲁϩ
3 ⲧϩⲁⲏ ⲁⲥⲉⲓ
4 ⲉϫⲱⲕ ⲡⲉⲧⲟⲩⲏϩ ϩⲓϫⲙⲡⲕⲁϩ ⲁϥⲉⲓ ⲛϭⲓⲡⲕⲁⲓⲣⲟⲥ ⲡⲉϩⲟⲟⲩ ⲁϥϩⲱⲛ ⲉϩⲟⲩⲛ ϩⲛϩⲉⲛϣⲧⲟⲣⲧⲣ ⲁⲛ ⲟⲩⲇⲉ ϩⲛϩⲉⲛⲛⲁⲁⲕⲉ ⲁⲛ
5 ⲧⲉⲛⲟⲩ ϩⲛⲟⲩϭⲉⲡⲏ ϯⲛⲁⲡⲱϩⲧ ⲛⲧⲁⲟⲣⲅⲏ ⲉϩⲣⲁⲓ ⲉϫⲱⲕ ⲁⲩⲱ ⲡⲁϭⲱⲛⲧ ϯⲛⲁϫⲟⲕϥ ⲉⲃⲟⲗ ϩⲣⲁⲓ ⲛϩⲏⲧⲕ ⲛⲧⲁϯϩⲁⲡ ⲉⲣⲟⲕ ϩⲛⲛⲉⲕϩⲓⲟⲟⲩⲉ ⲧⲏⲣⲟⲩ ⲁⲩⲱ ⲛⲉⲕⲃⲟⲧⲉ ⲧⲏⲣⲟⲩ ϯⲛⲁⲧⲁⲁⲩ ⲉϩⲣⲁⲓ ⲉϫⲱⲕ
6 ⲡⲁⲃⲁⲗ ⲛϥⲛⲁϯⲥⲟ ⲁⲛ ⲟⲩⲇⲉ ⲛϯⲛⲁⲛⲁ ⲁⲛ ⲉⲃⲟⲗ ϫⲉⲛⲉⲕϩⲓⲟⲟⲩⲉ ϯⲛⲁⲧⲁⲁⲩ ⲉϩⲣⲁⲓ ⲉϫⲱⲕ ⲁⲩⲱ ⲛⲉⲕⲃⲟⲧⲉ ⲛⲁϣⲱⲡⲉ ϩⲛⲧⲉⲕⲙⲏⲧⲉ ⲛⲅⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲡⲛⲟⲩⲧⲉ ⲉⲧⲉⲓⲣⲉ ⲛⲛⲁⲓ
7 ⲧⲉⲛⲟⲩ ⲧϩⲁⲏ ⲛⲏⲩ ⲉϩⲣⲁⲓ ⲉϫⲱⲕ ⲁⲩⲱ ϯⲛⲁⲧⲛⲛⲟⲟⲩ ⲁⲛⲟⲕ ⲉϫⲱⲕ ⲛⲧⲁϫⲓ ⲛⲟⲩⲕⲃⲁ ⲉⲧⲃⲉⲛⲉⲕϩⲓⲟⲟⲩⲉ ⲁⲩⲱ ⲛⲉⲕⲃⲟⲧⲉ ⲧⲏⲣⲟⲩ ϯⲛⲁⲧⲁⲁⲩ ⲉϩⲣⲁⲓ ⲉϫⲱⲕ
8 ⲡⲁⲃⲁⲗ ⲛϥⲛⲁϯⲥⲟ ⲁⲛ ⲟⲩⲇⲉ ⲛϯⲛⲁⲛⲁ ⲁⲛ ϫⲉⲧⲉⲕϩⲓⲏ ϯⲛⲁⲧⲁⲁⲥ ⲉϩⲣⲁⲓ ⲉϫⲱⲕ ⲁⲩⲱ ⲛⲉⲕⲃⲟⲧⲉ ⲛⲁϣⲱⲡⲉ ϩⲛⲧⲉⲕⲙⲏⲧⲉ ⲁⲩⲱ ⲕⲛⲁⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ
9 ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉ
10 ⲉⲓⲥ ⲧϩⲁⲏ ⲁⲥⲉⲓ ⲁⲩⲱ ⲉⲓⲥ ⲡⲉϩⲟⲟⲩ ⲙⲡϫⲟⲉⲓⲥ ⲁϥⲉⲓ ⲁⲩⲱ ⲡϭⲉⲣⲱⲃ ⲁϥϯⲟⲩⲱ ⲁϥⲧⲱⲟⲩⲛ ⲛϭⲓⲡⲥⲱϣ
11 ⲉϥⲛⲁⲟⲩⲱϣϥ ⲙⲡⲧⲁϫⲣⲟ ⲙⲡⲁⲛⲟⲙⲟⲥ ϩⲛⲟⲩϣⲧⲟⲣⲧⲣ ⲁⲛ ⲟⲩⲇⲉ ϩⲛⲟⲩϭⲉⲡⲏ ⲁⲛ
12 ⲁϥⲉⲓ ⲛϭⲓⲡⲕⲁⲓⲣⲟⲥ ⲁⲩⲱ ⲉⲓⲥ ⲡⲉϩⲟⲟⲩ ⲁϥϩⲱⲛ ⲉϩⲟⲩⲛ ⲡⲉⲧϣⲱⲡ ⲙⲡⲣⲧⲣⲉϥⲣⲁϣⲉ ⲁⲩⲱ ⲡⲉⲧϯ ⲉⲃⲟⲗ ⲙⲡⲣⲧⲣⲉϥⲧⲟⲉⲓⲧ
13 ⲉⲃⲟⲗ ϫⲉⲡⲉⲧϣⲱⲡ ⲛϥⲛⲁⲕⲧⲟϥ ⲁⲛ ⲉⲣⲁⲧϥ ⲙⲡⲉⲧϯ ⲉⲃⲟⲗ ⲁⲩⲱ ⲡⲣⲱⲙⲉ ϩⲙⲡⲃⲁⲗ ⲙⲡⲉϥⲱⲛϩ ⲛϥⲛⲁⲁⲙⲁϩⲧⲉ ⲁⲛ
14 ⲥⲁⲗⲡⲓⲍⲉ ϩⲛⲟⲩⲥⲁⲗⲡⲓⲅⲝ ⲁⲩⲱ ⲛⲧⲉⲧⲛϯϩⲁⲡ ⲉⲙⲁ ⲛⲓⲙ
15 ⲡⲡⲟⲗⲉⲙⲟⲥ ⲛⲧⲥⲏϥⲉ ϩⲓⲃⲟⲗ ⲡϩⲉⲃⲱⲱⲛⲉ ⲙⲛⲡⲙⲟⲩ ϩⲓϩⲟⲩⲛ ⲡⲉⲧϩⲛⲧⲥⲱϣⲉ ϥⲛⲁⲙⲟⲩ ϩⲛⲧⲥⲏϥⲉ ⲛⲉⲧϩⲛⲙⲡⲟⲗⲓⲥ ⲇⲉ ⲥⲉⲛⲁⲱϫⲛ ϩⲛⲟⲩϩⲕⲟ ⲙⲛⲟⲩⲙⲟⲩ
16 ⲁⲩⲱ ⲛⲉⲧⲛⲁⲟⲩϫⲁⲓ ⲥⲉⲛⲁⲟⲩϫⲁⲓ ⲛϩⲏⲧⲟⲩ ⲛⲥⲉϣⲱⲡⲉ ϩⲓϫⲛⲛⲧⲟⲩⲓⲏ ϯⲛⲁⲙⲟⲟⲩⲧⲟⲩ ⲧⲏⲣⲟⲩ ⲡⲟⲩⲁ ⲡⲟⲩⲁ ϩⲙⲡⲉϥϫⲓⲛϭⲟⲛⲥ
17 ϭⲓϫ ⲛⲓⲙ ⲥⲉⲛⲁⲃⲱⲗ ⲉⲃⲟⲗ ⲛⲧⲉⲙⲏⲣⲟⲥ ⲛⲓⲙ ⲧⲱⲗⲙ ⲛⲁⲕⲁⲑⲁⲣⲥⲓⲁ
18 ⲁⲩⲱ ⲥⲉⲛⲁⲙⲟⲣⲟⲩ ⲛϩⲉⲛϭⲟⲟⲩⲛⲉ ⲛⲧⲉⲟⲩϩⲟⲧⲉ ϩⲟⲃⲥⲟⲩ ⲁⲩⲱ ⲡϣⲓⲡⲉ ⲛⲏⲩ ⲉϫⲛϩⲟ ⲛⲓⲙ ⲛⲧⲉⲟⲩⲟⲛ ⲛⲓⲙ ϩⲉⲕⲉϫⲱⲟⲩ
19 ⲡⲉⲩϩⲁⲧ ⲥⲉⲛⲁⲛⲟϫϥ ϩⲛⲛⲉⲡⲗⲁϯⲁ ⲁⲩⲱ ⲡⲉⲩⲛⲟⲩⲃ ⲥⲉⲛⲁϭⲱϣⲧ ⲛⲥⲱϥ ⲁⲛ ⲁⲩⲱ ⲛⲉⲩⲯⲩⲭⲏ ⲥⲉⲛⲁⲥⲓ ⲁⲛ ⲁⲩⲱ ϩⲏⲧⲟⲩ ⲛϥⲛⲁⲙⲟⲩϩ ⲁⲛ ϫⲉⲧⲃⲁⲥⲁⲛⲟⲥ ⲛⲛⲉⲩϫⲓⲛϭⲟⲛⲥ ⲁⲥϣⲱⲡⲉ ⲛⲁⲩ
20 ⲛⲉⲧⲥⲟⲧⲡ ⲛⲧⲉⲡⲕⲟⲥⲙⲟⲥ ⲁⲩⲕⲁⲁⲩ ⲉⲩⲙⲛⲧϫⲁⲥⲓϩⲏⲧ ⲁⲩⲱ ⲁⲩⲧⲁⲙⲓⲟ ⲛⲛϩⲓⲕⲱⲛ ⲛⲛⲉⲩⲃⲟⲧⲉ ⲉⲃⲟⲗ ⲛϩⲏⲧⲟⲩ ⲉⲧⲃⲉⲡⲁⲓ ⲁⲓⲧⲁⲁⲩ ⲛⲁⲩ ⲉⲩϫⲱϩⲙ
21 ⲁⲩⲱ ϯⲛⲁⲡⲁⲣⲁⲇⲓⲇⲟⲩ ⲙⲙⲟⲟⲩ ⲉⲧⲟⲟⲧⲟⲩ ⲛⲛϣⲙⲙⲟ ⲛⲥⲉⲧⲟⲣⲡⲟⲩ ⲛⲧⲉⲛⲗⲟⲓⲙⲟⲥ ⲙⲡⲕⲁϩ ϣⲟⲗⲟⲩ ⲁⲩⲱ ⲛⲥⲉϫⲁϩⲙⲟⲩ
22 ⲛⲧⲁⲕⲧⲉⲡⲁϩⲟ ⲉⲃⲟⲗ ⲙⲙⲟⲟⲩ ⲛⲥⲉϫⲱϩⲙ ⲛⲧⲁⲉⲡⲓⲥⲕⲟⲡⲏ ⲁⲩⲱ ⲛⲥⲉⲃⲱⲕ ⲉϩⲟⲩⲛ ⲉⲣⲟⲟⲩ ⲁϫⲛϯⲥⲟ ⲛⲥⲉϫⲁϩⲙⲟⲩ
23 ⲛⲥⲉⲧⲉϩⲧⲱϩⲟⲩ ⲉⲃⲟⲗ ϫⲉⲡⲕⲁϩ ⲙⲉϩ ⲛⲗⲁⲟⲥ ⲁⲩⲱ ⲙⲡⲟⲗⲓⲥ ⲙⲉϩ ⲛⲁⲛⲟⲙⲓⲁ
24 ⲁⲩⲱ ϯⲛⲁⲕⲧⲟ ⲛⲧⲙⲛⲧϫⲁⲥⲓϩⲏⲧ ⲛⲧⲉⲩϭⲟⲙ ⲛⲥⲉϫⲱϩⲙ ⲛϭⲓⲛⲉⲩⲡⲉⲧⲟⲩⲁⲁⲃ
25 ϥⲛⲏⲩ ⲛϭⲓⲟⲩⲕⲱ ⲉⲃⲟⲗ ⲛϥⲕⲱⲧⲉ ⲛⲥⲁⲟⲩⲉⲓⲣⲏⲛⲏ ⲁⲩⲱ ⲛⲥⲉⲛⲁϣⲱⲡⲉ ⲁⲛ
26 ⲟⲩⲛ ⲟⲩⲟⲓ ⲛⲏⲩ ⲉϫⲛⲟⲩⲟⲩⲟⲓ ⲁⲩⲱ ⲟⲩⲟⲩⲱ ⲉϥⲛⲁⲧⲁϩⲉⲟⲩⲱ ⲛⲥⲉⲕⲱⲧⲉ ⲛⲥⲁⲟⲩϩⲟⲣⲁⲥⲓⲥ ϩⲓⲧⲛⲟⲩⲡⲣⲟⲫⲏⲧⲏⲥ ⲁⲩⲱ ⲡⲛⲟⲙⲟⲥ ⲛⲁⲥⲱⲣⲙ ⲛⲧⲙ ⲡⲟⲩⲏⲏⲃ ⲛⲧⲉⲡϣⲟϫⲛⲉ ⲥⲱⲣⲙ ⲛⲧⲛⲛⲉⲡⲣⲉⲥⲃⲩⲧⲉⲣⲟⲥ
27 ⲡⲁⲣⲭⲱⲛ ⲛⲁϯ ϩⲓⲱⲱϥ ⲛⲟⲩⲧⲁⲕⲟ ⲁⲩⲱ ⲛϭⲓϫ ⲙⲡⲗⲁⲟⲥ ⲙⲡⲕⲁϩ ⲥⲉⲛⲁⲃⲱⲗ ⲉⲃⲟⲗ ϯⲛⲁⲉⲓⲣⲉ ⲛⲁⲩ ⲕⲁⲧⲁⲛⲉⲩϩⲓⲟⲟⲩⲉ ⲁⲩⲱ ϯⲛⲁⲉⲓⲣⲉ ⲛⲟⲩⲕⲃⲁ ⲛϩⲏⲧⲟⲩ ⲕⲁⲧⲁⲛⲉⲩϩⲁⲡ ⲛⲥⲉⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ
Ezekiel 6 · Ezekiel 8 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)