Ezekiel 6 — Coptic (Sahidic)

1 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ ϫⲉ

2 ⲡϣⲏⲣⲉ ⲙⲡⲣⲱⲙⲉ ⲙⲁⲧⲁϫⲣⲟ ⲡⲉⲕϩⲟ ⲉϫⲛⲛⲧⲟⲟⲩ ⲙⲡⲓⲥⲣⲁⲏⲗ ⲁⲩⲱ ⲛⲅⲡⲣⲟⲫⲏⲧⲉⲩⲉ ⲉϩⲣⲁⲓ ⲉϫⲱⲟⲩ

3 ⲛⲅϫⲟⲟⲥ ϫⲉⲛⲧⲟⲟⲩ ⲙⲡⲓⲥⲣⲁⲏⲗ ⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ⲛⲛⲧⲟⲟⲩ ⲙⲛⲛⲥⲓⲃⲧ ⲙⲛⲛⲉⲓⲁ ⲙⲛⲛⲉⲕⲣⲣⲱⲟⲩ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲉⲓⲛⲉ ⲛⲟⲩⲥⲏϥⲉ ⲉϩⲣⲁⲓ ⲉϫⲱⲧⲛ ⲛⲥⲉϥⲱⲧⲉ ⲉⲃⲟⲗ ⲛⲛⲉⲧⲛⲙⲁ ⲉⲧϫⲟⲥⲉ

4 ⲁⲩⲱ ⲛⲥⲉⲟⲩⲱϣϥ ⲛϭⲓⲛⲉⲧⲛⲑⲩⲥⲓⲁⲥⲧⲏⲣⲓⲟⲛ ⲙⲛⲛⲉⲧⲛⲣⲡⲏⲩⲉ ⲛⲧⲁⲣⲱϩⲧ ⲛⲛⲉⲧⲛϩⲁⲧⲃⲉⲥ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲛⲉⲓⲇⲱⲗⲟⲛ

5 ⲁⲩⲱ ⲛⲧⲁϫⲱⲱⲣⲉ ⲉⲃⲟⲗ ⲛⲛⲉⲧⲛⲕⲉⲉⲥ ⲙⲡⲕⲱⲧⲉ ⲛⲛⲉⲧⲛⲑⲩⲥⲓⲁⲥⲧⲏⲣⲓⲟⲛ

6 ϩⲛⲛⲉⲧⲛⲙⲁ ⲛϣⲱⲡⲉ ⲧⲏⲣⲟⲩ ⲙⲡⲟⲗⲓⲥ ⲥⲉⲛⲁⲣϫⲁⲓⲉ ⲁⲩⲱ ⲙⲙⲁ ⲉⲧϫⲟⲥⲉ ⲥⲉⲛⲁⲧⲁⲕⲟ ϫⲉⲕⲁⲥ ⲉⲩⲉⲧⲁⲕⲟ ⲛϭⲓⲛⲉⲧⲛⲑⲩⲥⲓⲁⲥⲧⲏⲣⲓⲟⲛ ⲁⲩⲱ ⲛⲥⲉⲟⲩⲱϣϥ ⲛϭⲓⲛⲉⲧⲛⲉⲓⲇⲱⲗⲟⲛ ⲙⲛⲛⲉⲧⲛⲣⲡⲏⲩⲉ

7 ⲛⲥⲉⲣⲱϩⲧ ⲛϭⲓⲛⲉⲧⲛϩⲁⲧⲃⲉⲥ ϩⲛⲧⲉⲧⲙⲙⲏⲧⲉ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ

8 ϩⲙⲡⲧⲣⲉϩⲟⲓⲛⲉ ⲛϩⲏⲧⲧⲏⲩⲧⲛ ⲟⲩϫⲁⲓ ⲉⲧⲥⲏϥⲉ ϩⲛⲛϩⲉⲑⲛⲟⲥ ⲁⲩⲱ ϩⲙⲡⲉⲧⲛϫⲱⲱⲣⲉ ⲉⲃⲟⲗ ϩⲛⲛⲉⲭⲱⲣⲁ

9 ⲛⲥⲉⲣⲡⲁⲙⲉⲉⲩⲉ ⲛϭⲓⲛⲉⲧⲛⲁⲛⲟⲩϩⲙ ⲛϩⲏⲧⲧⲏⲩⲧⲛ ϩⲛⲛϩⲉⲑⲛⲟⲥ ⲡⲙⲁ ⲛⲧⲁⲩⲁⲓⲭⲙⲁⲗⲱⲧⲓⲍⲉ ⲙⲙⲟⲟⲩ ⲙⲙⲁⲩ ⲁⲓⲱⲣⲕ ⲙⲡⲉⲩϩⲏⲧ ⲡⲁⲓ ⲉⲛⲧⲁϥⲡⲟⲣⲛⲉⲩⲉ ⲉⲟⲩⲉ ⲉⲃⲟⲗ ⲙⲙⲟⲓ ⲙⲛⲛⲉⲩⲕⲉⲃⲁⲗ ⲉⲧⲡⲟⲣⲛⲉⲩⲉ ϩⲓⲡⲁϩⲟⲩ ⲛⲛⲉⲩϩⲃⲏⲩⲉ ϫⲉⲥⲉⲛⲁⲛⲉϩⲡⲉ ⲉϩⲟⲩⲛ ϩⲙⲡⲉⲩϩⲟ ⲉϫⲛⲛⲉⲩϩⲃⲏⲩⲉ ⲧⲏⲣⲟⲩ ϩⲛⲛⲉⲩⲃⲟⲧⲉ ⲧⲏⲣⲟⲩ

10 ⲁⲩⲱ ⲥⲉⲛⲁⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲉⲧϫⲱ ⲛⲛⲁⲓ

11 ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉϫⲁⲕ ⲛⲧⲉⲕϭⲓϫ ⲛⲅⲣϩⲣⲟⲟⲩ ⲛⲧⲉⲕⲟⲩⲉⲣⲏⲧⲉ ⲛⲅϫⲟⲟⲥ ϫⲉⲉⲩⲅⲉ ⲉⲩⲅⲉ ⲉϫⲛⲛⲃⲟⲧⲉ ⲧⲏⲣⲟⲩ ⲙⲡⲏⲓ ⲙⲡⲓⲥⲣⲁⲏⲗ ⲥⲉⲛⲁϩⲉ ϩⲛⲧⲥⲏϥⲉ ⲙⲛⲡⲙⲟⲩ ⲙⲛⲡϩⲉⲃⲱⲱⲛⲉ

12 ⲡⲉⲧϩⲏⲛ ⲉϩⲟⲩⲛ ⲛⲁϩⲉ ϩⲛⲧⲥⲏϥⲉ ⲡⲉⲧⲟⲩⲏⲟⲩ ⲇⲉ ⲉⲃⲟⲗ ϥⲛⲁⲙⲟⲩ ϩⲛⲟⲩⲙⲟⲩ ⲁⲩⲱ ⲡⲉⲧⲟⲣⲃ ⲉϩⲟⲩⲛ ϥⲛⲁⲙⲟⲩ ϩⲛⲟⲩϩⲉⲃⲱⲱⲛ ⲛⲧⲁϫⲱⲕ ⲉⲃⲟⲗ ⲛⲧⲁⲟⲣⲅⲏ ⲉϩⲣⲁⲓ ⲉϫⲱⲟⲩ

13 ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ϩⲙⲡⲧⲣⲉⲛⲉⲧⲛϩⲟⲧⲃⲉⲥ ⲛⲧⲙⲏⲧⲉ ⲛⲛⲉⲧⲛⲉⲓⲇⲱⲗⲟⲛ ⲙⲡⲕⲱⲧⲉ ⲛⲛⲉⲧⲛⲑⲩⲥⲓⲁⲥⲧⲏⲣⲓⲟⲛ ⲉϩⲣⲁⲓ ⲉϫⲛⲥⲓⲃⲧ ⲛⲓⲙ ⲉⲧϫⲟⲥⲉ ⲁⲩⲱ ϩⲓϫⲛⲛⲕⲟⲟϩ ⲧⲏⲣⲟⲩ ⲛⲧⲉⲛⲧⲟⲟⲩ ⲁⲩⲱ ϩⲁⲡⲉⲥⲏⲧ ⲛϣⲉ ⲛⲓⲙ ⲉⲧⲟ ⲛϩⲁⲓⲃⲉⲥ ⲉⲡⲙⲁ ⲉⲛⲧⲁⲩⲧⲁⲗⲉϣⲟⲩϩⲏⲛⲉ ⲉϩⲣⲁⲓ ⲛϩⲏⲧϥ ⲛⲛⲉⲩⲉⲓⲇⲱⲗⲟⲛ ⲧⲏⲣⲟⲩ

14 ⲁⲩⲱ ϯⲛⲁⲥⲟⲟⲩⲧⲛ ⲛⲧⲁϭⲓϫ ⲉϩⲣⲁⲓ ⲉϫⲱⲟⲩ ⲛⲧⲁⲕⲱ ⲙⲡⲕⲁϩ ⲉⲩⲧⲁⲕⲟ ⲙⲛⲟⲩϥⲱⲧⲉ ⲉⲃⲟⲗ ϫⲓⲛⲧⲉⲣⲏⲙⲟⲥ ⲛⲧⲉⲃⲗⲁⲑⲁ ϫⲓⲛⲙⲁ ⲛⲓⲙ ⲉⲧⲟⲩϣⲟⲟⲡ ⲛϩⲏⲧϥ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ