Read Ezekiel 42 side by side with translations · The Final Bible
1 ⲁⲩⲱ ⲁϥⲛⲧ ⲉⲃⲟⲗ ⲉⲧⲁⲩⲗⲏ ⲉⲧϩⲓⲃⲟⲗ ⲉⲧⲉϩⲓⲏ ⲉⲧϫⲓ ⲉⲡⲉⲙϩⲓⲧ ⲁⲩⲱ ⲁϥϫⲓⲧ ⲉϩⲟⲩⲛ ⲉⲡⲅⲁⲍⲟⲫⲩⲗⲁⲕⲓⲟⲛ ⲉⲧⲙⲡⲉⲙⲧⲟ ⲉⲃⲟⲗ ⲙⲡⲙⲁ ⲉⲧⲛⲉϩ ⲉⲃⲟⲗ ⲁⲩⲱ ⲡⲉⲧⲙⲡⲉⲙⲧⲟ ⲉⲃⲟⲗ ⲙⲡⲕⲱⲧⲉ ⲉⲧϩⲙⲡⲥⲁ ⲙⲡⲉⲙϩⲓⲧ
2 ⲉϥⲛⲁⲣϣⲉ ⲙⲙⲁϩⲉ ⲛϣⲓⲏ ⲁⲩⲱ ⲡⲣⲟ ⲙⲡⲉⲙϩⲓⲧ ⲙⲛⲡⲟⲩⲱϣⲥ ⲉⲩⲛⲁⲣⲧⲁⲓⲟⲩ ⲙⲙⲁϩⲉ
3 ⲙⲡⲉⲙⲧⲟ ⲉⲃⲟⲗ ⲙⲡⲉϫⲟⲩⲱⲧ ⲛⲧⲉⲧⲁⲩⲗⲏ ⲉⲧϩⲓϩⲟⲩⲛ ⲁⲩⲱ ⲙⲡⲉⲥⲙⲧⲟ ⲉⲃⲟⲗ ⲟⲩⲗⲓⲑⲟⲥⲧⲣⲱⲧⲟⲛ ⲉϥⲕⲏ ⲉϩⲣⲁⲓ ⲉϥϫⲓ ⲉϩⲟⲩⲛ ⲉⲧⲁⲩⲗⲏ ⲉⲧϩⲓⲃⲟⲗ ⲉⲣⲉⲟⲩⲉⲭⲑⲉⲧⲏⲥ ⲥⲙⲟⲛⲧ ⲙⲡⲉⲙⲧⲟ ⲉⲃⲟⲗ ⲛⲕⲉⲉⲕⲑⲉⲧⲏⲥ ⲉⲩⲟ ⲛϣⲟⲙⲛⲧ ⲛⲥⲙⲟⲧ
4 ⲁⲩⲱ ϩⲓⲧϩⲏ ⲛⲛⲅⲁⲍⲟⲫⲩⲗⲁⲕⲓⲟⲛ ⲟⲩⲡⲉⲣⲓⲡⲁⲧⲟⲥ ⲉϥⲥⲙⲟⲛⲧ ⲉϥⲛⲁⲣⲙⲏⲧ ⲙⲙⲁϩⲉ ⲛⲟⲩⲱϣⲥ ⲉⲧⲁⲩⲗⲏ ⲉⲧϩⲓϩⲟⲩⲛ ⲁⲩⲱ ⲟⲩⲙⲁϩⲉ ⲛⲟⲩⲱⲧ ⲛϣⲓⲏ ⲁⲩⲱ ⲛⲉⲩⲣⲟ ⲉⲩϭⲱϣⲧ ⲉⲡⲥⲁ ⲙⲡⲉⲙϩⲓⲧ
5 ⲁⲩⲱ ⲛⲕⲁⲍⲟⲫⲩⲗⲁⲅⲓⲟⲛ ⲛⲉⲩϩⲓ ⲧⲡⲉ ⲉⲩⲥⲟⲃⲕ ϫⲉⲁⲩϥⲓ ⲉⲃⲟⲗ ⲙⲙⲟⲟⲩ ⲛϩⲉⲛⲟⲩⲱϭ ⲛⲥⲁⲡⲉⲥⲏⲧ ⲙⲙⲟⲟⲩ ⲁⲩⲱ ⲛⲥⲁⲧⲙⲏⲧⲉ ⲙⲡⲕⲱⲧ
6 ⲉⲃⲟⲗ ϫⲉⲉⲩⲟ ⲛϣⲟⲙⲛⲧ ⲛⲥⲙⲟⲧ ⲁⲩⲱ ⲙⲛⲥⲧⲩⲗⲗⲟⲥ ϣⲟⲟⲡ ⲛⲁⲩ ⲛⲧϩⲉ ⲛⲛⲉⲥⲧⲩⲗⲗⲟⲥ ⲛⲧⲁⲩⲗⲏ ⲉⲧⲃⲉⲡⲁⲓ ⲁⲩϥⲓ ⲉⲃⲟⲗ ⲛⲥⲁ ⲙⲡⲉⲥⲏⲧ ⲁⲩⲱ ⲉⲃⲟⲗ ϩⲛⲛⲥⲁⲛⲧⲙⲏⲧⲉ ⲛⲧⲁⲉⲓⲟⲩ ⲙⲙⲁϩⲉ ⲉⲃⲟⲗ ϩⲛⲧⲉϣⲓⲏ
7 ⲁⲩⲱ ⲧϫⲟ ⲉⲧϩⲓⲃⲟⲗ ⲕⲁⲧⲁⲛⲉⲥⲙⲟⲧ ⲛⲛⲅⲁⲍⲟⲫⲩⲗⲁⲕⲓⲟⲛ ⲉⲥⲕⲏ ⲉϩⲣⲁⲓ ϫⲓⲛⲧⲉϩⲓⲏ
8 ...
9 ⲛⲃⲱⲕ ⲉϩⲟⲩⲛ ⲉⲙⲙⲁ ⲛϣⲁ ⲉⲩⲛⲁⲃⲱⲕ ⲉϩⲟⲩⲛ ⲉⲣⲟⲟⲩ ⲉⲃⲟⲗ ϩⲛⲧⲁⲩⲗⲏ ⲉⲧϩⲓⲃⲟⲗ
10 ⲉⲣⲉⲧϫⲟ ⲛⲧⲁⲩⲗⲏ ϣⲟⲟⲡ ϩⲛⲧⲉⲥⲟⲩⲁϣⲥⲉ ⲕⲁⲧⲁⲙⲙⲁ ⲛϣⲁ ⲙⲡϩⲟⲧ ⲉⲃⲟⲗ ⲙⲡⲙⲁ ⲉⲧⲛⲉϩ ⲉⲃⲟⲗ ⲁⲩⲱ ⲙⲡϩⲟⲧ ⲉⲃⲟⲗ ⲙⲡⲕⲱⲧ ϩⲉⲛⲅⲁⲍⲟⲫⲩⲗⲁⲕⲓⲟⲛ ⲉⲩⲕⲏ ⲉϩⲣⲁⲓ
11 ⲁⲩⲱ ⲟⲩϩⲓⲏ ϩⲓϩⲏ ⲙⲙⲟⲟⲩ ⲛⲧϩⲉ ⲙⲡⲉⲓⲛⲉ ⲛⲛⲅⲁⲍⲟⲫⲩⲗⲁⲕⲓⲟⲛ ⲙⲛⲛⲉⲧϩⲙ ⲡⲥⲁ ⲙⲡⲉⲙϩⲓⲧ ⲕⲁⲧⲁⲛⲉⲩϣⲓⲏ ⲧⲁⲓ ⲧⲉ ⲧϩⲉ ⲛⲧⲉⲩⲕⲉⲟⲩⲁϣⲥⲉ ⲁⲩⲱ ⲛⲉⲩϩⲓⲟⲟⲩⲉ ⲧⲏⲣⲟⲩ ⲛⲉⲓⲉⲃⲟⲗ ⲕⲁⲧⲁⲡⲉⲩⲧⲱϣ ⲁⲩⲱ ⲕⲁⲧⲁⲛⲉⲩⲣⲟ
12 ⲁⲩⲱ ⲕⲁⲧⲁⲛⲛⲣⲟ ⲛⲛⲅⲁⲍⲟⲫⲩⲗⲁⲕⲓⲟⲛ ⲉⲧⲙⲡⲥⲁ ⲙⲡⲣⲏⲥ ⲟⲩⲣⲟ ⲉϥⲕⲏ ⲉϩⲣⲁⲓ ⲉⲧⲁⲣⲭⲏ ⲛⲧⲉϩⲓⲏ ⲉⲧⲣⲉⲩϣⲱⲡⲉ ⲙⲡϩⲟⲧ ⲉⲃⲟⲗ ⲛⲧϫⲟ ⲕⲁⲧⲁⲙⲙⲁ ⲛϣⲁ ϩⲛⲧⲉⲩϩⲓⲏ ⲛⲃⲱⲕ ⲉϩⲟⲩⲛ
13 ⲁⲩⲱ ⲡⲉϫⲁϥ ⲛⲁⲓ ϫⲉⲛⲅⲁⲍⲟⲫⲩⲗⲁⲕⲓⲟⲛ ⲙⲡⲉⲙϩⲓⲧ ⲁⲩⲱ ⲛⲅⲁⲍⲟⲫⲩⲗⲁⲕⲓⲟⲛ ⲙⲡⲣⲏⲥ ⲛⲉⲧⲙⲡϩⲟⲧ ⲉⲃⲟⲗ ⲙⲡⲙⲁ ⲉⲧⲛⲉϩ ⲉⲃⲟⲗ ⲛⲧⲟⲟⲩ ⲛⲉ ⲛⲅⲁⲍⲟⲫⲩⲗⲁⲕⲓⲟⲛ ⲙⲡⲉⲧⲟⲩⲁⲁⲃ ⲛⲥⲉⲛⲁⲟⲩⲱⲙ ⲁⲛ ⲙⲡⲙⲁ ⲉⲧⲙⲙⲁⲩ ⲛϭⲓⲛⲟⲩⲏⲏⲃ ⲉⲧϩⲏⲛ ⲉϩⲟⲩⲛ ⲉⲡϫⲟⲉⲓⲥ ⲛⲛⲉⲧⲟⲩⲁⲁⲃ ⲛⲛⲉⲧⲟⲩⲁⲁⲃ ⲉⲩⲛⲁⲕⲱ ⲙⲡⲙⲁ ⲉⲧⲙⲙⲁⲩ ⲛⲛⲉⲧⲟⲩⲁⲁⲃ ⲛⲛⲉⲧⲟⲩⲁⲁⲃ ⲁⲩⲱ ⲧⲉⲑⲩⲥⲓⲁ ⲙⲛⲛⲉⲧⲟⲩⲛⲁⲧⲁⲗⲟⲟⲩ ⲉϩⲣⲁⲓ ϩⲁⲛⲟⲃⲉ ⲁⲩⲱ ⲧⲙⲉⲧⲁⲛⲟⲓⲁ ϫⲉⲡⲧⲟⲡⲟⲥ ⲡⲉ ⲛⲛⲉⲧⲟⲩⲁⲁⲃ
14 ⲛⲟⲩⲏⲏⲃ ⲇⲉ ⲉⲩϣⲁⲛⲃⲱⲕ ⲉϩⲟⲩⲛ ⲛⲛⲉⲩⲉⲓ ⲉⲃⲟⲗ ⲉⲡⲙⲁ ⲉⲧⲙⲙⲁⲩ ⲉⲧⲁⲩⲗⲏ ⲉⲧϩⲓⲃⲟⲗ ⲁⲩⲱ ⲉⲩⲉⲕⲱ ⲙⲡⲙⲁ ⲉⲧⲙⲙⲁⲩ ⲛⲛⲉⲩϩⲟⲉⲓⲧⲉ ⲛⲁⲓ ⲉⲧⲟⲩⲛⲁϣⲙϣⲉ ⲛϩⲏⲧⲟⲩ ϫⲉⲥⲉⲟⲩⲁⲁⲃ ⲁⲩⲱ ⲉⲩⲉϯ ϩⲓⲱⲟⲩ ⲛϩⲉⲛⲕⲉϩⲟⲓⲧⲉ ⲛⲥⲉϯⲡⲉⲩⲟⲩⲟⲓ ⲉⲛⲉⲧⲡⲏ ⲉⲛⲁⲡⲗⲁⲟⲥ
15 ⲁⲩⲱ ⲁϥϫⲱⲕ ⲉⲃⲟⲗ ⲛⲛϣⲓ ⲙⲡⲏⲓ ⲉⲧϩⲓϩⲟⲩⲛ ⲁⲩⲱ ⲁϥⲛⲧ ⲉⲃⲟⲗ ϩⲛⲧⲡⲩⲗⲏ ⲉⲧϭⲱϣⲧ ⲉⲙⲙⲁ ⲛϣⲁ ⲁϥϣⲓⲧⲥ ⲉⲡⲉⲥⲕⲱⲧⲉ ⲧⲏⲣϥ
16 ⲡⲉⲥⲡⲓⲣ ⲛⲙⲙⲁⲛϣⲁ ⲁϥϣⲓⲧϥ ϩⲙⲡⲕⲁϣ ⲉϣⲁϥϣⲓ ⲛϩⲏⲧϥ
17 ⲁⲩⲱ ⲡⲉⲥⲡⲓⲣ ⲙⲡⲉⲙϩⲓⲧ ⲁϥϣⲓⲧϥ ⲛϯⲟⲩ ⲛϣⲉ ⲛⲕⲁϣ ⲉϥⲕⲱⲧⲉ ϩⲙⲡⲙⲁ ⲉϣⲁϥϣⲓ ⲙⲙⲟϥ
18 ⲁⲩⲱ ⲡⲉⲥⲡⲓⲣ ⲙⲡⲣⲏⲥ ⲁϥϣⲓⲧϥ ⲛϯⲟⲩ ⲛϣⲉ ⲙⲡⲕⲁϣ ⲉϥⲕⲱⲧⲉ ϩⲙⲡⲕⲁϣ ⲉϣⲁϥϣⲓ ⲙⲙⲟϥ
19 ⲁⲩⲱ ⲁϥϣⲓ ⲡⲉⲥⲡⲓⲣ ⲛⲧⲉⲑⲁⲗⲁⲥⲥⲁ ⲛϯⲟⲩ ⲛϣⲉ ⲛⲕⲁϣ ⲉϥⲕⲱⲧⲉ ⲙⲡⲕⲁϣ ⲉϣⲁϥϣⲓ ⲙⲙⲟϥ
20 ⲉⲁϥϣⲓ ⲙⲡⲉϥⲧⲟⲩⲧⲏⲩ ⲛϩⲏⲧϥ ⲁⲩⲱ ⲟⲩⲥⲟⲃⲧ ⲉϥϩⲙ ⲡⲉϥⲕⲱⲧⲉ ⲉϥⲛⲁⲣϥⲧⲟⲩ ϣⲉ ⲙⲙⲁϩⲉ ⲛϣⲓⲏ ⲁⲩⲱ ϥⲧⲟⲩ ϣⲉ ⲙⲙⲁϩⲉ ⲛⲟⲩⲱϣⲥ ⲉⲡⲱⲣϫ ϩⲛⲧⲙⲏⲧⲉ ⲙⲡⲉⲧⲟⲩⲁⲁⲃ ⲉⲧⲃⲉⲟⲩϫⲱϩⲙ
Ezekiel 41 · Ezekiel 43 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)