Read Ezekiel 41 side by side with translations · The Final Bible
1 ⲁⲩⲱ ⲁϥϫⲓⲧ ⲉϩⲟⲩⲛ ⲉⲡⲣⲡⲉ ⲉⲧϩⲓϩⲟⲩⲛ ⲁⲩⲱ ⲁϥϣⲓ ⲛⲟⲩⲱϭ ⲉⲩⲛⲁⲣⲥⲟⲟⲩ ⲙⲙⲁϩⲉ ⲛⲟⲩⲱϣⲥ ⲛⲥⲁⲡⲁⲓ
2 ⲁⲩⲱ ⲕⲉⲥⲟⲟⲩ ⲙⲙⲁϩⲉ ⲛⲟⲩⲱϣⲥ ⲛⲥⲁⲡⲁⲓ ⲁⲩⲱ ⲡⲟⲩⲱϣⲥ ⲛⲧⲉⲥⲕⲩⲛⲏ ⲙⲛⲡⲟⲩⲱϣⲥ ⲙⲡⲣⲟ ⲉϥⲛⲁⲣⲙⲏⲧ ⲙⲙⲁϩⲉ ⲁⲩⲱ ⲛⲉⲥⲡⲓⲣ ⲙⲡⲣⲟ ⲉⲩⲛⲁⲣϯⲟⲩ ⲙⲙⲁϩⲉ ⲛⲥⲁⲡⲁⲓ ⲁⲩⲱ ⲕⲉϯⲟⲩ ⲙⲙⲁϩⲉ ⲛⲥⲁⲡⲁⲓ ⲁⲩⲱ ⲁϥϣⲓ ⲧⲉϥϣⲓⲏ ⲉϥⲛⲁⲣϩⲙⲉ ⲙⲙⲁϩⲉ ⲁⲩⲱ ϫⲟⲩⲱⲧ ⲙⲙⲁϩⲉ ⲛⲟⲩⲱϣⲥ
3 ⲁⲩⲱ ⲁϥϫⲱⲧⲉ ⲉⲡⲥⲁ ⲛϩⲟⲩⲛ ⲁϥϣⲓ ⲛⲟⲩⲱϭ ⲙⲡⲣⲟ ⲉⲩⲛⲁⲣⲙⲁϩⲉ ⲥⲛⲁⲩ ⲁⲩⲱ ⲡⲣⲟ ⲉϥⲛⲁⲣⲥⲟⲟⲩ ⲙⲙⲁϩⲉ ⲛϣⲓⲏ ⲁⲩⲱ ⲡⲟⲩⲱϣⲥ ⲙⲡⲣⲟ ⲉϥⲛⲁⲣⲥⲁϣϥ ⲙⲙⲁϩⲉ
4 ⲁⲩⲱ ⲧⲉϥϣⲓⲏ ⲁϥϣⲓⲧⲥ ⲉⲥⲛⲁⲣϫⲟⲩⲱⲧ ⲙⲙⲁϩⲉ ⲁⲩⲱ ϫⲟⲩⲱⲧ ⲙⲙⲁϩⲉ ⲛⲟⲩⲱϣⲥ ⲙⲡϩⲟⲧ ⲉⲃⲟⲗ ⲙⲡⲣⲉ ⲁⲩⲱ ⲡⲉϫⲁϥ ⲛⲁⲓ ϫⲉⲡⲁⲓ ⲡⲉ ⲡⲉⲧⲟⲩⲁⲁⲃ ⲛⲛⲉⲧⲟⲩⲁⲁⲃ
5 ⲁⲩⲱ ⲁϥϣⲓⲧϫⲟ ⲙⲡⲏⲓ ⲛⲥⲟⲟⲩ ⲙⲙⲁϩⲉ ⲁⲩⲱ ⲡⲟⲩⲱϣⲥ ⲙⲡⲣⲡⲉ ⲉϥⲛⲁⲣϥⲧⲟⲟⲩ ⲙⲙⲁϩⲉ ⲉϥⲕⲱⲧⲉ ⲉⲡⲏⲓ
6 ⲉⲣⲉⲛⲉⲥⲡⲓⲣⲟⲟⲩⲉ ⲕⲱⲧⲉ ⲉⲣⲟϥ ⲟⲩⲥⲡⲓⲣ ⲉϩⲟⲩⲛ ϩⲛⲟⲩⲥⲡⲓⲣ ⲉⲩⲛⲁⲣⲙⲁⲃϣⲟⲙⲧⲉ ⲛⲥⲟⲡ ⲥⲛⲁⲩ ⲁⲩⲱ ⲉⲩϫⲱⲧⲉ ⲉϩⲟⲩⲛ ⲉⲧϫⲟ ⲙⲡⲏⲓ ϩⲛⲛⲉⲥⲡⲓⲣⲟⲟⲩⲉ ⲉⲧⲕⲱⲧⲉ ⲉⲣⲟϥ ⲉⲧⲣⲉⲩϣⲱⲡⲉ ⲉⲩⲙⲏⲣ ⲉϩⲟⲩⲛ ⲉⲣⲟϥ ϩⲛⲧϫⲟ ⲙⲡⲏⲓ
7 ⲁⲩⲱ ⲁϥⲟⲩⲱϣⲥ ⲉⲃⲟⲗ ⲁϥⲕⲱⲧⲉ ⲉⲣⲟϥ ⲉⲧⲡⲉ ⲉⲙⲁⲧⲉ ϩⲛⲛⲉⲥⲡⲓⲣⲟⲟⲩⲉ ϫⲉⲥⲉⲕⲱⲧⲉ ⲉⲡⲕⲱⲧⲉ ⲙⲡⲏⲓ ⲉⲧⲃⲉⲡⲁⲓ ⲡⲟⲩⲱϣⲥ ⲙⲡⲏⲓ ⲉϥϫⲓ ⲉⲧⲡⲉ ⲁⲩⲱ ϫⲓⲛⲡⲉⲥⲏⲧ ⲉϥⲛⲁⲙⲟⲟϣⲉ ⲛⲥⲁⲧⲡⲉ ⲉⲧⲙⲏⲧⲉ
8 ⲁⲩⲱ ⲁⲓⲛⲁⲩ ⲉⲡϫⲓⲥⲉ ⲙⲡⲏⲓ ⲉⲣⲉⲛⲉϥⲥⲡⲓⲣⲟⲟⲩⲉ ⲧⲁϫⲣⲏⲩ ⲉⲩⲕⲱⲧⲉ ⲉⲣⲟϥ ⲉⲩⲙⲟⲩϩ ⲙⲡⲕⲁϣ ⲛⲥⲟⲟⲩ ⲙⲙⲁϩⲉ
9 ⲉϥϥⲏⲩ ⲙⲙⲁⲩ ⲛϭⲓⲡⲟⲩⲱϣⲥ ⲛⲧϫⲟ ⲉϥⲛⲏⲩ ϫⲓⲛⲡⲉⲥⲡⲉⲓⲣ ⲉⲡⲉⲥⲏⲧ ⲛϯⲟⲩ ⲙⲙⲁϩⲉ ⲁⲩⲱ ⲡⲉⲛⲧⲁⲩⲛⲁϩϥ ⲉⲃⲟⲗ ϩⲛⲧⲙⲏⲧⲉ ⲛⲛⲉⲥⲡⲓⲣⲟⲟⲩⲉ ⲉϥⲏⲡ ⲉⲡⲏⲓ
10 ⲁⲩⲱ ϩⲛⲧⲙⲏⲧⲉ ⲛⲛⲅⲁⲍⲟⲫⲩⲗⲁⲕⲓⲟⲛ ⲉϥⲛⲁⲣ ϫⲟⲩⲱⲧ ⲙⲙⲁϩⲉ ⲛⲟⲩⲱϣⲥ ⲉⲩⲕⲱⲧⲉ ⲉⲡⲏⲓ ⲧⲏⲣϥ
11 ⲁⲩⲱ ⲛⲣⲟ ⲙⲡⲉⲥⲡⲓⲣ ⲉⲡⲙⲁ ⲉⲧⲛⲉϩ ⲉⲃⲟⲗ ⲟⲩⲣⲟ ⲛⲟⲩⲱⲧ ⲉⲧⲉϩⲓⲏ ⲉⲧϫⲓ ⲉⲡⲉⲙϩⲓⲧ ⲁⲩⲱ ⲕⲉⲣⲟ ⲛⲟⲩⲱⲧ ⲉⲧⲉϩⲓⲏ ⲉⲧϫⲓ ⲉⲡⲣⲏⲥ ⲁⲩⲱ ⲡⲟⲩⲱϣⲥ ⲙⲡⲙⲁ ⲛⲧⲁⲩⲛⲉϩϥ ⲉⲃⲟⲗ ⲉϥⲛⲁⲣϯⲟⲩ ⲙⲙⲁϩⲉ ⲉϥⲕⲱⲧⲉ
12 ⲁⲩⲱ ⲡⲕⲱⲧ ⲉⲧⲙⲡϩⲟⲧ ⲉⲃⲟⲗ ⲙⲡⲉⲛⲧⲁⲩⲛⲉϩϥ ⲉⲃⲟⲗ ⲡⲉⲥⲡⲓⲣ ⲉⲧϫⲓ ⲉⲧⲉϩⲓⲏ ⲛⲧⲉⲑⲁⲗⲁⲥⲥⲁ ⲉϥⲛⲁⲣϣⲃⲉ ⲙⲙⲁϩⲉ ⲛⲟⲩⲱϣⲥ ⲁⲩⲱ ⲧϫⲟ ⲙⲡⲕⲱⲧ ⲉⲥⲛⲁⲣϯⲟⲩ ⲙⲙⲁϩⲉ ⲛⲟⲩⲱϣⲥ ⲉϥⲕⲱⲧⲉ ⲁⲩⲱ ⲧⲉϣⲓⲏ ⲉⲥⲛⲁⲣⲡⲥⲧⲁⲓⲟⲩ ⲙⲙⲁϩⲉ
13 ⲁⲩⲱ ⲁϥϣⲓ ⲡⲏⲓ ⲧⲉϥϣⲓⲏ ⲉⲥⲛⲁⲣϣⲉ ⲙⲙⲁϩⲉ ⲁⲩⲱ ⲡⲙⲁ ⲉⲧⲛⲉϩ ⲉⲃⲟⲗ ⲙⲡⲕⲱⲧ ⲙⲛⲛⲉϥⲉϫⲏ ⲉϥⲛⲁⲣϣⲉ ⲙⲙⲁϩⲉ ⲛϣⲓⲏ
14 ⲁⲩⲱ ⲧⲟⲩⲁϣⲥⲉ ⲙⲡⲉⲙⲧⲟ ⲉⲃⲟⲗ ⲙⲡⲏⲓ ⲙⲡⲙⲁ ⲉⲧⲛⲉϩ ⲉⲃⲟⲗ ⲉⲙⲙⲁ ⲛϣⲁ ⲉⲥⲛⲁⲣϣⲉ ⲙⲙⲁϩⲉ
15 ⲁⲩⲱ ⲁϥϣⲓⲧⲉϣⲓⲏ ⲙⲡⲕⲱⲧ ⲙⲡⲉⲙⲧⲟ ⲉⲃⲟⲗ ⲙⲡⲙⲁ ⲉⲧⲛⲉϩ ⲉⲃⲟⲗ ⲉϥⲛⲏⲩ ⲛⲥⲁⲡⲁϩⲟⲩⲟ ⲙⲙⲟⲥ ⲁⲩⲱ ⲛⲉϥⲉⲭⲑⲉⲧⲏⲥ ⲛⲥⲁⲡⲁⲓ ⲙⲛⲡⲁⲓ ⲙⲙⲟϥ ⲉⲩⲛⲁⲣϣⲉ ⲙⲙⲁϩⲉ ⲁⲩⲱ ⲡⲛⲁϫⲟⲉⲓⲥ ⲉⲧϩⲓϩⲟⲩⲛ ⲁⲩⲱ ⲙⲡⲁⲣⲁⲥⲧⲁⲥ ⲛⲧⲁⲩⲗⲏ
16 ⲛⲟⲩⲉϭⲣⲟ ⲙⲛⲛϣⲟⲩϣⲧ ⲛⲧⲁⲩϣⲟⲟⲣⲟⲩ ⲁⲩⲱ ⲛⲉⲭⲑⲉⲧⲏⲥ ⲉⲧⲕⲱⲧⲉ ⲉⲡϣⲟⲙⲛⲧ ⲛⲥⲡⲓⲣ ⲉⲧⲉⲙⲡⲉⲙⲧⲟ ⲉⲃⲟⲗ ⲙⲡϩⲁⲛⲣⲟ ⲉⲩϭⲟⲟⲗⲉ ⲛϣⲉ ⲉϥⲕⲱⲧⲉ ⲁⲩⲱ ⲡⲙⲁ ⲙⲡⲉⲥⲏⲧ ϣⲁϩⲣⲁⲓ ⲉⲛϣⲟⲩϣⲧ ⲁⲩⲱ ⲛϣⲟⲩϣⲧ ⲉⲩϩⲱⲃⲥ ⲛⲛⲟⲩⲱϭ ϩⲓⲧⲡⲉ ⲙⲡⲣⲟ
17 ϣⲁϩⲣⲁⲓ ⲉⲡⲏⲓ ⲉⲧϩⲓϩⲟⲩⲛ ⲁⲩⲱ ⲡⲏⲓ ⲧⲏⲣϥ ⲉⲧϩⲓⲃⲟⲗ ⲉϥⲕⲱⲧⲉ ⲉⲡⲉⲧϩⲓϩⲟⲩⲛ ⲁⲩⲱ ϩⲙⲡⲉⲧϩⲓⲃⲟⲗ
18 ⲉⲣⲉⲟⲩⲭⲉⲣⲟⲩⲃⲓⲛ ϣⲉⲧϣⲱⲧ ⲁⲩⲱ ⲉϥⲧⲁⲙⲓⲏⲩ ⲛϩⲏⲧϥ ⲙⲛϩⲉⲛⲕⲉϣⲟϫⲧ ⲉⲩϩⲛ ⲧⲙⲏⲧⲉ ⲙⲡⲉⲭⲉⲣⲟⲩⲃⲓⲛ ⲁⲩⲱ ⲡⲉⲭⲉⲣⲟⲩⲃⲓⲛ ⲛⲉⲣⲉϩⲟ ⲥⲛⲁⲩ ⲙⲙⲟϥ
19 ⲟⲩϩⲟ ⲛⲣⲱⲙⲉ ϩⲙⲡϣⲟϫⲧ ⲛⲥⲁⲡⲁⲓ ⲙⲛⲡⲁⲓ ⲁⲩⲱ ⲟⲩϩⲟ ⲙⲙⲟⲩⲓ ϩⲙⲡϣⲟϫⲧ ⲛⲥⲁⲡⲁⲓ ⲙⲛⲡⲁⲓ ⲉϥⲙⲟⲛⲅ ⲉⲡⲏⲓ ⲧⲏⲣϥ ⲉϥⲕⲱⲧⲉ
20 ϫⲓⲛⲡⲙⲁ ⲙⲡⲉⲥⲏⲧ ϣⲁⲡⲙⲁ ⲛⲧⲡⲉ ⲙⲡⲣⲟ ⲛⲉⲭⲉⲣⲟⲩⲃⲓⲛ ⲁⲩⲱ ⲛϣⲟϫⲧ ⲉⲩⲙⲟⲛⲅ
21 ⲁⲩⲱ ⲧϫⲟ ⲙⲡⲛⲁϫⲟⲉⲓⲥ ϩⲉⲛⲧⲱϣ ⲉⲩⲟ ⲛⲧⲉⲧⲣⲁⲅⲱⲛⲟⲛ ⲁⲩⲱ ⲡϩⲟ ⲙⲡⲉⲧⲟⲩⲁⲁⲃ ⲡⲉϥⲉⲓⲛⲉ ⲉϥⲟ ⲛⲧϩⲉ
22 ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲛϣⲉ ⲉϥⲛⲁⲣϣⲟⲙⲛⲧ ⲙⲙⲁϩⲉ ⲛϫⲓⲥⲉ ⲁⲩⲱ ⲙⲁϩⲉ ⲥⲛⲁⲩ ⲛϣⲓⲏ ⲁⲩⲱ ⲛⲉϥⲕⲟⲟϩ ⲙⲛⲛⲉϥⲉϫⲏ ϩⲉⲛϣⲉ ⲛⲉ ⲁⲩⲱ ⲁϥϣⲁϫⲉ ⲛⲙⲙⲁⲓ ⲉϥϫⲱ ⲙⲙⲟⲥ ϫⲉⲧⲉⲧⲣⲁⲡⲉⲍⲁ ⲉⲧⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲉⲥⲙⲟⲛⲅ ϩⲙⲡⲁⲓ ⲁⲩⲱ ⲣⲟ ⲥⲛⲁⲩ ⲉⲩϣⲟⲟⲡ ⲙⲡⲛⲁϫⲟⲉⲓⲥ
23 ⲙⲛⲡⲉⲧⲟⲩⲁⲁⲃ ⲁⲩⲱ ⲣⲟ ⲥⲛⲁⲩ
24 ⲙⲡⲣⲟ ⲥⲛⲁⲩ ⲉⲩⲕⲧⲟ ⲙⲙⲟⲟⲩ ⲣⲟ ⲥⲛⲁⲩ ⲉⲡⲣⲟ ⲛⲟⲩⲱⲧ ⲁⲩⲱ ⲣⲟ ⲥⲛⲁⲩ ⲉⲡⲕⲉⲣⲟ
25 ⲁⲩⲱ ⲕⲉⲉⲓⲉⲡⲥⲁ ϩⲓⲣⲱⲟⲩ ⲛⲛⲉⲭⲉⲣⲟⲩⲃⲓⲛ ⲉⲛⲣⲟ ⲙⲡⲛⲁϫⲟⲉⲓⲥ ⲙⲛϣⲉⲛϣⲟϫⲧ ⲕⲁⲧⲁⲧϩⲉ ⲛⲧⲁⲩⲧⲁⲙⲓⲟⲟⲩ ⲉⲛⲉϫⲏ ⲁⲩⲱ ⲟⲩⲟⲩⲙⲟⲧ ⲛϣⲉ ⲙⲡⲉⲙⲧⲟ ⲉⲃⲟⲗ ⲛⲧⲡⲁⲣⲁⲥⲧⲁⲥ ϩⲓⲃⲟⲗ
26 ⲁⲩⲱ ϩⲉⲛϣⲟⲩϣⲧ ⲉⲩϭⲟⲟⲗⲉ ⲧⲏⲣⲟⲩ ⲁⲩⲱ ϩⲉⲛϣⲟϫⲧ ⲛⲥⲁⲡⲁⲓ ⲙⲛⲡⲁⲓ ⲉⲛⲕⲟⲟϩ ⲛⲧⲡⲁⲣⲁⲥⲧⲁⲥ ⲁⲩⲱ ⲛⲉⲥⲡⲓⲣⲟⲟⲩⲉ ⲙⲡⲏⲓ ⲙⲛⲛⲉϥⲟⲩⲙⲟⲧ ⲙⲛⲛⲉϥϣⲓⲕ ⲏ ⲛⲉϥⲉⲓⲉⲡⲥⲁ
Ezekiel 40 · Ezekiel 42 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)