Ezekiel 40 — Coptic (Sahidic)

1 ⲁⲩⲱ ⲁⲥϣⲱⲡⲉ ϩⲛⲧⲙⲉϩϫⲟⲩⲧⲏ ⲛⲣⲟⲙⲡⲉ ⲙⲡⲉⲛⲡⲱⲱⲛⲉ ⲉⲃⲟⲗ ⲉⲃⲟⲗ ϩⲛⲧⲁⲣⲭⲏ ⲛⲧⲉⲣⲟⲙⲡⲉ ⲛⲥⲟⲩⲙⲏⲧ ⲙⲡⲉⲃⲟⲧ ⲛⲧⲙⲉϩⲙⲛⲧⲁϥⲧⲉ ⲛⲣⲟⲙⲡⲉ ⲙⲛⲛⲥⲁⲧⲣⲉⲧⲡⲟⲗⲓⲥ ⲱϭⲉ ϩⲣⲁⲓ ϩⲙⲡⲉⲓϩⲟⲟⲩ ⲧϭⲓϫ ⲙⲡϫⲟⲉⲓⲥ ⲁⲥϣⲱⲡⲉ ϩⲓϫⲱⲓ ⲁⲩⲱ ⲁⲥⲛⲧ

2 ⲉⲡⲙⲁ ⲉⲧⲙⲙⲁⲩ ϩⲛϩⲉⲛϩⲟⲣⲁⲥⲓⲥ ⲛⲧⲉⲡⲛⲟⲩⲧⲉ ⲁⲥⲛⲧ ⲉϩⲣⲁⲓ ⲉⲡⲕⲁϩ ⲙⲡⲓⲥⲣⲁⲏⲗ ⲁⲥⲙⲟⲧⲛⲉⲧ ϩⲓϫⲛⲟⲩⲧⲟⲟⲩ ⲉϥϫⲟⲥⲉ ⲉⲙⲁⲧⲉ ⲁⲩⲱ ⲛⲉⲣⲉⲟⲩⲧⲱϣ ⲛⲕⲱⲧ ⲙⲡⲟⲗⲓⲥ ⲙⲡⲉϥϩⲟⲧ ⲉⲃⲟⲗ ⲙⲡⲥⲁ ⲙⲡⲣⲏⲥ

3 ⲁⲩⲱ ⲁϥϫⲓⲧ ⲉϩⲟⲩⲛ ⲉⲡⲙⲁ ⲉⲧⲙⲙⲁⲩ ⲁⲩⲱ ⲉⲓⲥ ⲟⲩⲣⲱⲙⲉ ⲡⲉϥⲉⲓⲛⲉ ⲇⲉ ⲛⲉϥⲟ ⲛⲧϩⲉ ⲙⲡⲉⲓⲛⲉ ⲛⲟⲩϩⲟⲙⲛⲧ ⲃⲁⲣⲱⲧ ⲉⲣⲉⲟⲩⲛⲟⲩϩ ⲛⲗⲁⲥ ⲛⲧⲟⲟⲧϥ ⲉϥϣⲏϣ ⲉⲣⲉⲟⲩⲕⲁϣ ⲛϣⲓ ϩⲛⲧⲉϥϭⲓϫ ⲁⲩⲱ ⲛⲉϥⲁϩⲉⲣⲁⲧϥ ϩⲓⲣⲛ ⲧⲡⲩⲗⲏ

4 ⲁϥϣⲁϫⲉ ⲛⲙⲙⲁⲓ ⲛϭⲓⲡⲣⲱⲙⲉ ⲉϥϫⲱ ⲙⲙⲟⲥ ϫⲉⲡϣⲏⲣⲉ ⲙⲡⲣⲱⲙⲉ ⲁⲛⲁⲩ ϩⲛⲛⲉⲕⲃⲁⲗ ⲁⲩⲱ ⲛⲕⲥⲱⲧⲙ ϩⲛⲛⲉⲕⲙⲁⲁϫⲉ ⲛⲕϯ ⲙⲡⲉⲕϩⲏⲧ ⲉⲛⲉⲧⲓⲛⲁⲧⲥⲁⲃⲟⲕ ⲉⲣⲟⲟⲩ ⲧⲏⲣⲟⲩ ϫⲉⲛⲧⲁⲩⲛⲧⲕ ⲉⲡⲉⲓⲙⲁ ⲉⲧⲣⲉⲕⲛⲁⲩ ⲁⲩⲱ ⲛⲉⲧⲕⲛⲁⲛⲁⲩ ⲉⲣⲟⲟⲩ ⲧⲏⲣⲟⲩ ⲛⲕⲧⲁⲩⲟⲟⲩ ⲉⲡⲏⲓ ⲙⲡⲓⲥⲣⲁⲏⲗ

5 ⲁⲩⲱ ⲉⲓⲥ ⲟⲩⲥⲟⲃⲧ ⲛⲉϥⲙⲡⲃⲟⲗ ⲙⲡⲏⲓ ⲉϥⲕⲱⲧⲉ ⲉⲣⲟϥ ⲁⲩⲱ ⲛⲉϥϩⲛ ⲧϭⲓϫ ⲙⲡⲣⲱⲙⲉ ⲛϭⲓⲟⲩⲕⲁϣ ⲛϣⲓ ⲉϥⲛⲁⲣⲥⲟⲟⲩ ⲙⲙⲁϩⲉ ϩⲛⲟⲩⲙⲁϩⲉ ⲙⲛⲟⲩϣⲟⲡ ⲁⲩⲱ ⲁϥϣⲓ ⲡⲟⲩⲱϣⲥ ⲙⲡⲕⲱⲧ ⲛⲟⲩⲕⲁϣ ⲛⲟⲩⲱⲧ ⲁⲩⲱ ⲡⲉϥϫⲓⲥⲉ ⲛⲉϥϣⲏϣ ⲙⲛⲡⲕⲁϣ ⲉⲡⲥⲁ ⲡⲥⲁ

6 ⲁⲩⲱ ⲁϥⲛⲧ ⲉϩⲣⲁⲓ ⲉⲧⲡⲩⲗⲏ ⲉⲧϭⲱϣⲧ ⲉⲡⲥⲁ ⲙⲡⲉⲓⲏⲃⲧ ⲁⲩⲱ ⲁϥⲙⲟⲟϣⲉ ϩⲣⲁⲓ ϩⲛⲛⲉⲥⲧⲱⲣⲧⲣ ⲁϥϣⲓ ⲙⲡϩⲁⲛⲣⲟ ⲛⲧⲡⲩⲗⲏ ⲡⲉϥⲟⲩⲱϣⲥ ⲉϥⲛⲁⲣⲟⲩⲕⲁϣ ⲛⲟⲩⲱⲧ

7 ⲁⲩⲱ ⲡϫⲓⲥⲉ ⲙⲡϩⲁⲛⲣⲟ ⲉϥⲛⲁⲣⲟⲩⲕⲁϣ ⲛⲟⲩⲱⲧ ⲁⲩⲱ ⲡⲙⲁ ⲉⲧⲛⲉⲥⲱϥ ⲉϥⲛⲁⲣⲟⲩⲕⲁϣ ⲛⲟⲩⲱⲧ ⲛⲟⲩⲁϣⲥⲉ ⲁⲩⲱ ⲧⲙⲏⲧⲉ ⲙⲡⲁⲉⲧⲛⲉⲥⲱϥ ⲉϥⲛⲁⲣϯⲟⲩ ⲙⲙⲁϩⲉ

9 ⲁⲩⲱ ⲡϩⲁⲛⲣⲟ ⲛⲧⲡⲩⲗⲏ ⲉⲧϩⲏⲛ ⲉⲧⲡⲁⲣⲁⲥⲧⲁⲥ ⲡϩⲟⲩⲛ ⲛⲧⲡⲩⲗⲏ ⲉϥⲛⲁⲣⲟⲩⲕⲁϣ ⲛⲟⲩⲱⲧ ⲁⲩⲱ ⲁϥϣⲓ ⲧⲡⲁⲣⲁⲥⲧⲁⲥ ⲛⲧⲡⲩⲗⲏ ⲉⲥⲛⲁⲣϣⲙⲟⲩⲛ ⲙⲙⲁϩⲉ ⲁⲩⲱ ⲡⲉⲥⲟⲩⲱϣⲥ ⲉϥⲛⲁⲣⲙⲁϩⲉ ⲥⲛⲁⲩ

10 ⲁⲩⲱ ⲧⲡⲁⲣⲁⲥⲧⲁⲥ ⲛⲧⲡⲩⲗⲏ ⲉⲧϩⲓϩⲟⲩⲛ ⲛⲙⲙⲁⲉⲧⲛⲉⲥⲱⲟⲩ ⲛⲧⲡⲩⲗⲏ ⲛⲧⲉϩⲓⲏ ⲉⲧϫⲓ ⲉⲙⲙⲁ ⲛϣⲁ ϣⲟⲙⲛⲧ ⲛⲥⲁⲡⲁⲓ ⲁⲩⲱ ϣⲟⲙⲛⲧ ⲛⲥⲁⲡⲁⲓ ⲉⲩϣⲓ ⲛⲟⲩⲱⲧ ⲡⲉ ⲙⲡϣⲟⲙⲛⲧ ⲁⲩⲱ ⲉⲩϣⲓ ⲛⲟⲩⲱⲧ ⲡⲉ ⲛⲛⲉⲥⲟⲩⲱϣⲥ ⲉⲡⲥⲁ ⲡⲥⲁ

11 ⲁⲩⲱ ⲁϥϣⲓⲟⲩⲱϣⲥ ⲛⲛⲣⲟ ⲛⲧⲡⲩⲗⲏ ⲙⲙⲏⲧ ⲙⲙⲁϩⲉ

12 ⲁⲩⲱ ⲡⲉⲕⲉⲓⲱⲧⲉ ⲉⲧϫⲓ ⲉⲧⲉϩⲓⲏ ⲛⲙⲙⲁⲉⲧⲛⲉⲥⲱⲟⲩ ⲉϥⲛⲁⲣⲟⲩⲙⲁϩⲉ ⲛⲟⲩⲱⲧ ⲛⲉⲕⲉⲓⲱⲧⲉ ⲛⲥⲁⲡⲁⲓ ⲁⲩⲱ ⲡⲙⲁ ⲉⲧⲛⲉⲥⲱϥ ⲉϥⲛⲁⲣⲥⲟⲟⲩ ⲙⲙⲁϩⲉ ⲛⲥⲁⲡⲁⲓ ⲁⲩⲱ ⲕⲉⲥⲟⲟⲩ ⲙⲙⲁϩⲉ ⲛⲥⲁⲡⲁⲓ

13 ⲁⲩⲱ ⲁϥϣⲓⲧⲡⲩⲗⲏ ϫⲓⲛϫⲱϥ ⲙⲡⲙⲁ ⲉⲧⲛⲉⲥⲱϥ ⲉϫⲱⲥ ⲛⲧⲡⲩⲗⲏ ⲡⲉⲥⲟⲩⲱϣⲥ ⲉϥⲛⲁⲣϫⲟⲩⲧⲏ ⲙⲙⲁϩⲉ ⲉⲣⲉⲟⲩⲣⲟ ⲙⲡϩⲟⲧ ⲉⲃⲟⲗ ⲛⲟⲩⲣⲟ

14 ⲁⲩⲱ ⲁϥⲧⲁⲙⲓⲟ ⲛⲛⲟⲩⲱϭ ⲛⲥⲉⲙⲙⲁϩⲉ ⲁⲩⲱ ϩⲁϩⲧⲉ ⲛⲟⲩⲱϭ ⲛⲧⲁⲩⲗⲏ ⲙⲡⲕⲱⲧⲉ ⲛⲧⲡⲩⲗⲏ ⲙⲡⲉⲥⲕⲱⲧⲉ ⲧⲏⲣϥ

15 ⲁⲩⲱ ϩⲓϩⲣⲁⲥ ⲛⲧⲡⲩⲗⲏ ⲉⲧϫⲟⲟⲣ ϣⲁϩⲓϩⲏ ⲛⲧⲡⲁⲣⲁⲥⲧⲁⲥ ⲛⲧⲡⲩⲗⲏ ϩⲓϩⲟⲩⲛ ⲉⲩⲛⲁⲣⲧⲁⲓⲟⲩ ⲙⲙⲁϩⲉ

16 ⲁⲩⲱ ϩⲉⲛϣⲟⲩϣⲧ ⲉⲩⲧⲟⲟⲙⲉ ϩⲁϩⲧⲏⲛ ⲙⲙⲁ ⲉⲧⲛⲉⲥⲱⲟⲩ ⲁⲩⲱ ϩⲁϩⲧⲏⲛ ⲛⲟⲩⲱϭ ⲛⲉⲧⲙⲡϩⲟⲩⲛ ⲛⲧⲡⲩⲗⲏ ⲙⲡⲕⲱⲧⲉ ⲧⲏⲣϥ ⲧⲁⲓ ⲧⲉ ⲧϩⲉ ⲉⲧⲟⲩϣⲟⲟⲡ ⲛϭⲓϩⲉⲛϣⲟⲩϣⲧ ⲛⲙⲡⲁⲣⲁⲥⲧⲁⲥ ⲙⲡⲉⲩⲕⲱⲧⲉ ⲧⲏⲣϥ ⲉⲣⲉϩⲉⲛϣⲟϫⲧ ϣⲟⲟⲡ ϩⲙⲡⲟⲩⲱϭ

17 ⲁⲩⲱ ⲁϥϫⲓⲧ ⲉϩⲟⲩⲛ ⲉⲧⲁⲩⲗⲏ ⲉⲧϩⲓⲃⲟⲗ ⲁⲩⲱ ⲉⲓⲥ ϩⲉⲛⲅⲁⲍⲟⲫⲩⲗⲁⲕⲓⲟⲛ ⲉⲩⲡⲟⲣϣ ⲛⲱⲛⲉ ⲉⲁⲩⲧⲁⲙⲓⲟⲟⲩ ⲛⲧⲁⲩⲗⲏ ⲙⲡⲉⲥⲕⲱⲧⲉ ⲧⲏⲣϥ ⲙⲁⲁⲃ ⲛⲅⲁⲍⲟⲫⲩⲗⲁⲕⲓⲟⲛ ϩⲁⲧⲉ ⲡⲗⲓⲑⲟⲥⲧⲣⲱⲧⲟⲛ

18 ⲁⲩⲱ ⲡⲗⲓⲑⲟⲥⲧⲣⲱⲧⲟⲛ ⲡⲉⲧϩⲓ ⲧⲡⲉ ⲛⲧⲁⲩⲗⲏ ⲉϥϣⲏϣ ⲙⲛⲧⲉϣⲓⲏ ⲛⲙⲡⲩⲗⲏ ⲛⲛⲁϩⲣⲙⲡⲗⲓⲑⲟⲥⲧⲣⲱⲧⲟⲛ ⲉⲧϩⲁ ⲡⲉⲥⲏⲧ

19 ⲁⲩⲱ ⲁϥϣⲓⲡⲟⲩⲱϣⲥ ϫⲓⲛϩⲓϩⲏ ⲛⲧⲡⲩⲗⲏ ⲉⲧϩⲁ ⲡⲉⲥⲏⲧ ⲉϩⲏ ⲛⲧⲁⲩⲗⲏ ⲉⲧϩⲓⲟⲩⲛ ⲉⲡⲥⲁ ⲙⲡⲃⲟⲗ ⲉϥⲛⲁⲣϣⲉ ⲙⲙⲁϩⲉ ⲉⲡⲥⲁ ⲙⲡⲓⲏⲃⲧ ⲙⲛⲡⲉⲙϩⲓⲧ

20 ⲁⲩⲱ ⲧⲡⲩⲗⲏ ⲉⲧϭⲱϣⲧ ⲉⲧⲉϩⲓⲏ ⲙⲡⲉⲙϩⲓⲧ ⲛⲧⲁⲩⲗⲏ ⲉⲧϩⲓⲃⲟⲗ ⲁϥϣⲓⲧⲥ ⲉⲡⲉⲥϣⲓⲁⲓ ⲁⲩⲱ ⲉⲡⲉⲥⲟⲩⲱϣⲥ

21 ⲁⲩⲱ ⲛⲉⲥⲕⲉⲙⲁ ⲉⲧⲛⲉⲥⲱⲟⲩ ϣⲟⲙⲛⲧ ⲛⲥⲁⲡⲁⲓ ⲁⲩⲱ ⲕⲉϣⲟⲙⲛⲧ ⲛⲥⲁⲡⲁⲓ ⲁⲩⲱ ⲛⲉⲥⲧⲱϣ ⲙⲛⲛⲉⲥⲕⲉⲡⲁⲣⲁⲥⲧⲁⲥ ⲁϥⲧⲁⲙⲓⲟⲟⲩ ⲕⲁⲧⲁⲡⲉⲓⲛⲉ ⲛⲧⲡⲩⲗⲏ ⲛϣⲟⲣⲡ ⲧⲁⲉⲓⲟⲩ ⲙⲙⲁϩⲉ ⲉⲡⲉⲥϣⲓⲁⲓ ⲁⲩⲱ ϫⲟⲩⲧⲏ ⲙⲙⲁϩⲉ ⲉⲡⲉⲥⲟⲩⲱϣⲥ ϩⲣⲁⲓ ϩⲙⲡⲙⲁϩⲉ

22 ⲁⲩⲱ ⲛⲉⲥϣⲟⲩϣⲧ ⲙⲛⲛⲉⲥⲕⲉⲡⲁⲣⲁⲥⲧⲁⲥ ⲁⲩⲱ ⲛⲉⲥϣⲟϫⲧ ⲕⲁⲧⲁⲡⲉⲓⲛⲉ ⲛⲧⲡⲩⲗⲏ ⲛϣⲟⲣⲡ ⲧⲉⲧϭⲱϣⲧ ⲉⲧⲉϩⲓⲏ ⲉⲧϫⲓ ⲉⲙⲙⲁ ⲛϣⲁ ⲁⲩⲱ ϩⲛⲥⲁϣϥ ⲛⲧⲱⲣⲧⲣ ⲉⲩⲉⲃⲱⲕ ⲉϩⲣⲁⲓ ⲉⲣⲟⲥ ⲁⲩⲱ ⲧⲉⲥⲡⲁⲣⲁⲥⲧⲁⲥ ⲉⲥϩⲓϩⲏ ⲙⲙⲟⲟⲩ

23 ⲁⲩⲱ ⲧⲡⲩⲗⲏ ⲛⲧⲁⲩⲗⲏ ⲉⲧϩⲓϩⲟⲩⲛ ⲙⲡⲉⲙⲧⲟ ⲉⲃⲟⲗ ⲛⲧⲁⲩⲗⲏ ⲙⲡⲉⲙϩⲓⲧ ⲛⲙⲙⲁⲛϣⲁ ⲁⲩⲱ ⲁϥϣⲓ ϫⲓⲛⲡⲩⲗⲏ ⲉⲡⲩⲗⲏ ⲛϣⲉ ⲙⲙⲁϩⲉ

24 ⲁⲩⲱ ⲁϥϫⲓⲧ ⲉⲃⲟⲗ ϩⲙⲡⲣⲏⲥ ⲁⲩⲱ ⲉⲓⲥ ⲟⲩⲡⲩⲗⲏ ⲙⲡⲥⲁ ⲙⲡⲣⲏⲥ ⲁϥϣⲓ ⲛⲛⲉⲥⲟⲩⲱϭ ⲙⲛⲛⲉⲥⲡⲁⲣⲁⲥⲧⲁⲥ ⲕⲁⲧⲁⲛⲉⲓϣⲓ ⲛⲟⲩⲱⲧ

25 ⲉⲣⲉϩⲉⲛϣⲟⲩϣⲧ ⲙⲙⲟⲥ ⲁⲩⲱ ⲧⲉⲥⲕⲉⲡⲁⲣⲁⲥⲧⲁⲥ ⲉⲣⲉⲟⲩⲟⲛ ⲙⲙⲟⲥ ϩⲙⲡⲉⲥⲕⲱⲧⲉ ⲧⲏⲣϥ ⲛⲧϩⲉ ⲛⲛⲉⲓϣⲟⲩϣⲧ ⲉⲩⲛⲁⲣⲧⲁⲓⲟⲩ ⲙⲙⲁϩⲉ ⲛϣⲓⲏ ⲁⲩⲱ ϫⲟⲩⲧⲏ ⲙⲙⲁϩⲉ ⲛⲟⲩⲱϣⲥ

26 ⲁⲩⲱ ⲥⲁϣϥ ⲛⲧⲱⲣⲧⲣ ⲉⲩϣⲟⲟⲡ ⲛⲁⲥ ⲁⲩⲱ ⲧⲉⲥⲡⲁⲣⲁⲥⲧⲁⲥ ⲉⲓⲥ ϩⲓϩⲏ ⲙⲙⲟⲟⲩ ⲁⲩⲱ ⲛⲉⲥϣⲟϫⲧ ⲟⲩⲁ ⲛⲥⲁⲡⲁⲓ ⲁⲩⲱ ⲟⲩⲁ ⲛⲥⲁⲡⲁⲓ ⲙⲙⲟⲥ ϩⲓⲧⲛⲛⲉⲥⲟⲩⲱϭ

27 ⲁⲩⲱ ⲧⲡⲩⲗⲏ ⲛⲧⲁⲩⲗⲏ ⲉⲧϩⲓϩⲟⲩⲛ ⲉⲡⲥⲁ ⲙⲡⲣⲏⲥ ⲁⲩⲱ ⲁϥϣⲓ ϫⲓⲛⲡⲩⲗⲏ ⲉⲡⲩⲗⲏ ⲉⲡⲥⲁ ⲙⲡⲣⲏⲥ ⲛϣⲉ ⲙⲙⲁϩⲉ

28 ⲁⲩⲱ ⲁϥϫⲓⲧ ⲉϩⲟⲩⲛ ⲉⲧⲁⲩⲗⲏ ⲉⲧϩⲓϩⲟⲩⲛ ϫⲓⲛⲧⲡⲩⲗⲏ ⲙⲡⲣⲏⲥ ⲁⲩⲱ ⲁϥϣⲓ ⲧⲡⲩⲗⲏ ⲙⲡⲣⲏⲥ ⲕⲁⲧⲁⲛⲉⲓϣⲓ

29 ⲁⲩⲱ ⲛⲉⲥⲙⲁ ⲉⲧⲛⲉⲥⲱⲟⲩ ⲙⲛⲛⲉⲥⲟⲩⲱϭ ⲁⲩⲱ ⲛⲉⲥⲡⲁⲣⲁⲥⲧⲁⲥ ⲉⲩⲛⲏⲩ ⲕⲁⲧⲁⲛⲉⲓϣⲓ ⲁⲩⲱ ⲛⲉⲥϣⲟⲩϣⲧ ⲙⲛⲛⲉⲥⲡⲁⲣⲁⲥⲧⲁⲥ ϩⲙⲡⲉⲥⲕⲱⲧⲉ ⲧⲏⲣϥ ⲉⲩⲛⲁⲣⲧⲁⲓⲟⲩ ⲙⲙⲁϩⲉ ⲛϣⲓⲏ ⲁⲩⲱ ϫⲟⲩⲧⲏ ⲙⲙⲁϩⲉ ⲛⲟⲩⲱϣⲥ

30 ⲁⲩⲱ ⲛⲉⲥⲡⲁⲣⲁⲥⲧⲁⲥ ⲉⲧϩⲙⲡⲉⲥⲕⲱⲧⲉ ⲉⲩⲛⲁⲣϫⲟⲩⲧⲏ ⲙⲙⲁϩⲉ ⲛϣⲓⲏ ⲁⲩⲱ ϯⲟⲩ ⲙⲙⲁϩⲉ ⲛⲟⲩⲱϣⲥ

31 ⲁⲩⲱ ⲧⲉⲥⲡⲁⲣⲁⲥⲧⲁⲥ ⲉⲧϫⲓ ⲉϩⲟⲩⲛ ⲉⲧⲁⲩⲗⲏ ⲉⲧϩⲓⲃⲟⲗ ⲁⲩⲱ ⲛϣⲟϫⲧ ϩⲁⲧⲛⲛⲉⲥⲟⲩⲱϭ ⲁⲩⲱ ϣⲙⲟⲩⲛ ⲛⲧⲱⲣⲧⲣ ⲉⲩϣⲟⲟⲡ ⲛⲁⲥ ⲉⲃⲱⲕ ⲉϩⲣⲁⲓ ⲉⲣⲟⲥ

32 ⲁⲩⲱ ⲁϥϫⲓⲧ ⲉϩⲟⲩⲛ ⲉⲧⲁⲩⲗⲏ ⲉⲧϩⲓϩⲟⲩⲛ ⲉⲃⲟⲗ ϩⲛⲧⲉϩⲓⲏ ⲉⲧϫⲓ ⲉⲙⲙⲁ ⲛϣⲁ ⲁϥϣⲓⲧⲡⲩⲗⲏ ⲕⲁⲧⲁⲛⲉⲓϣⲓ

33 ⲙⲛⲛⲉⲥⲡⲁⲣⲁⲥⲧⲁⲥ ⲙⲛⲛⲉⲧϩⲙ ⲡⲉⲥⲕⲱⲧⲉ ⲁⲩⲱ ⲛⲉⲥⲙⲁ ⲉⲧⲛⲉⲥⲱⲟⲩ ⲙⲛⲛⲉⲥⲟⲩⲱϭ ⲁⲩⲱ ⲛⲉⲥⲕⲉⲙⲁ ⲉⲧϩⲓⲣⲛ ⲛⲉⲥⲡⲩⲗⲏ ⲕⲁⲧⲁⲛⲉⲓϣⲓ ⲁⲩⲱ ⲛⲉⲥϣⲟⲩϣⲧ ⲙⲛⲛⲉⲥⲡⲣⲟⲡⲩⲗⲱⲛ ⲉⲧϩⲙⲡⲉⲥⲕⲱⲧⲉ ⲉⲩⲛⲁⲣⲧⲁⲓⲟⲩ ⲙⲙⲁϩⲉ ⲛϣⲓⲏ ⲁⲩⲱ ϫⲟⲩⲧⲏ ⲙⲙⲁϩⲉ ⲛⲟⲩⲱϣⲥ

34 ⲛⲉⲥⲡⲣⲟⲡⲩⲗⲱⲛ ⲇⲉ ⲁⲩⲱ ⲧⲁⲩⲗⲏ ⲉⲧϩⲓϩⲟⲩⲛ ⲙⲛⲛϣⲟϫⲧ ⲉⲧϩⲙⲡⲉⲥⲕⲱⲧⲉ ⲛⲥⲁⲡⲉⲓⲥⲁ ⲁⲩⲱ ⲛⲥⲁⲡⲁⲓ ⲙⲙⲟⲥ ⲡⲉⲥⲙⲁ ⲛⲃⲱⲕ ⲉϩⲣⲁⲓ ⲉⲩⲛⲁⲣϣⲙⲟⲩⲛ ⲛⲧⲱⲣⲧⲣ

35 ⲁⲩⲱ ⲁϥϫⲓⲧ ⲉϩⲟⲩⲛ ⲉⲧⲁⲩⲗⲏ ⲙⲡⲉⲙϩⲓⲧ ⲁⲩⲱ ⲁϥϣⲓⲧⲥ ⲕⲁⲧⲁⲛⲉⲓϣⲓ

36 ⲁⲩⲱ ⲛⲉⲥⲙⲁ ⲉⲧⲛⲉⲥⲱⲟⲩ ⲙⲛⲛⲉⲥⲟⲩⲱϭ ⲁⲩⲱ ⲛⲉⲥⲡⲁⲣⲁⲥⲧⲁⲥ ⲙⲛⲛⲉⲥϣⲟⲩϣⲧ ϩⲙⲡⲉⲥⲕⲱⲧⲉ ⲉⲩⲛⲁⲣⲧⲁⲓⲟⲩ ⲙⲙⲁϩⲉ ⲛϣⲓⲏ ⲁⲩⲱ ϫⲟⲩⲧⲏ ⲙⲙⲁϩⲉ ⲛⲟⲩⲱϣⲥ

37 ⲁⲩⲱ ⲛⲉⲥⲟⲩⲱϭ ⲉⲩϫⲓ ⲉϩⲟⲩⲛ ⲉⲧⲁⲩⲗⲏ ⲉⲧϩⲓⲃⲟⲗ ⲁⲩⲱ ⲛϣⲟϫⲧ ϩⲁⲧⲛⲛⲉⲥⲟⲩⲱϭ ⲛⲥⲁⲡⲁⲓ ⲙⲛⲡⲁⲓ ⲙⲙⲟⲥ ⲁⲩⲱ ϣⲙⲟⲩⲛ ⲛⲧⲱⲣⲧⲣ ⲡⲉ ⲡⲉⲥⲙⲁ ⲛⲃⲱⲕ ⲉϩⲣⲁⲓ

38 ⲁⲩⲱ ⲡⲅⲁⲍⲟⲫⲩⲗⲁⲕⲓⲟⲛ ⲙⲛⲛⲉϥⲣⲟ ⲉⲩϩⲛ ⲛⲟⲩⲱϭ ⲛⲙⲡⲩⲗⲏ ⲉⲩⲛⲁⲉⲓⲱ ⲉⲃⲟⲗ ⲙⲡⲙⲁ ⲉⲧⲙⲙⲁⲩ ⲙⲡⲉϭⲗⲓⲗ

39 ⲁⲩⲱ ϩⲛⲧⲡⲁⲣⲁⲥⲧⲁⲥ ⲛⲧⲡⲩⲗⲏ ⲧⲣⲁⲡⲉⲍⲁ ⲥⲛⲧⲉ ⲉⲩⲕⲏ ⲉϩⲣⲁⲓ ⲛⲥⲁⲡⲉⲓⲥⲡⲓⲣ ⲁⲩⲱ ⲧⲣⲁⲡⲉⲍⲁ ⲥⲛⲧⲉ ⲛⲥⲁⲡⲁⲓ ⲉϣⲱⲱⲧ ϩⲓϫⲱⲟⲩ ⲙⲡⲉϭⲗⲓⲗ ⲕⲁⲧⲁⲛⲛⲟⲃⲉ ⲁⲩⲱ ⲛⲉⲑⲩⲥⲓⲁ ⲛⲧⲙⲉⲧⲁⲛⲟⲓⲁ

40 ⲁⲩⲱ ϩⲓϫⲙⲡⲉⲥⲡⲓⲣ ⲉⲧϩⲓⲃⲟⲗ ⲉⲧϫⲓ ⲉϩⲟⲩⲛ ⲉⲡⲣⲟ ⲛⲧⲡⲩⲗⲏ ⲙⲡⲉⲙϩⲓⲧ ⲧⲣⲁⲡⲉⲍⲁ ⲥⲛⲧⲉ ⲉⲩⲕⲏ ⲉϩⲣⲁⲓ ⲁⲩⲱ ϩⲁϩⲧⲛ ⲡⲕⲉⲥⲡⲓⲣ ⲡⲉⲧϩⲛ ⲧⲡⲁⲣⲁⲥⲧⲁⲥ ⲛⲧⲡⲩⲗⲏ ⲧⲣⲁⲡⲉⲍⲁ ⲥⲛⲧⲉ

41 ⲁⲩⲱ ⲕⲉϥⲧⲟ ⲛⲧⲣⲁⲡⲉⲍⲁ ⲛⲥⲁⲡⲁⲓ ⲁⲩⲱ ⲕⲉϥⲧⲟ ⲛⲥⲁⲛⲏⲉⲡⲉⲥⲡⲓⲣ ⲛⲧⲡⲩⲗⲏ ϣⲙⲟⲩⲛ ⲛⲧⲣⲁⲡⲉⲍⲁ ⲉⲩⲕⲏ ⲉϩⲣⲁⲓ ⲉⲧⲣⲉⲩϣⲱⲱⲧ ϩⲓϫⲱⲟⲩ

42 ⲁⲩⲱ ϥⲧⲟ ⲛⲧⲣⲁⲡⲉⲍⲁ ⲉⲡⲉϭⲗⲓⲗ ⲛϩⲉⲛⲱⲛⲉ ⲉⲩⲕⲉϩⲕⲱϩ ⲉⲩⲛⲁⲣⲟⲩⲙⲁϩⲉ ⲟⲩϭⲟⲥ ⲛϣⲓⲏ ⲁⲩⲱ ⲟⲩⲙⲁϩⲉ ⲟⲩϭⲟⲥ ⲛⲟⲩⲱϣⲥ ⲁⲩⲱ ⲟⲩⲙⲁϩⲉ ⲛϫⲓⲥⲉ ⲉⲧⲣⲉⲩⲕⲱ ⲛⲛⲉⲩⲥⲕⲉⲩⲏ ϩⲁϩⲧⲏⲩ ⲛⲁⲓ ⲉⲧⲟⲩⲛⲁϣⲱⲱⲧ ⲛϩⲏⲧⲟⲩ ⲛⲛⲉϭⲗⲓⲗ ⲛⲧⲉⲑⲩⲥⲓⲁ

43 ⲁⲩⲱ ϩⲉⲛⲥⲡⲟⲧⲟⲩ ⲉⲩⲛⲁⲣ ⲟⲩϣⲟⲡ ⲉⲩⲧⲏϣ ϩⲓϩⲟⲩⲛ ⲙⲡⲕⲱⲧⲉ ⲧⲏⲣϥ ⲉⲧⲣⲉⲩϣⲱⲡⲉ ϩⲓϫⲛⲛⲉⲧⲣⲁⲡⲉⲍⲁ ⲛϭⲓⲛⲁϥ ⲙⲡⲇⲱⲣⲟⲛ

44 ⲁⲩⲱ ⲡⲃⲟⲗ ⲙⲧⲡⲩⲗⲏ ⲉⲧϩⲓϩⲟⲩⲛ ⲅⲁⲍⲟⲫⲩⲗⲁⲕⲓⲟⲛ ⲥⲛⲁⲩ ⲛⲛⲁⲣⲭⲱⲛ ϩⲛⲧⲁⲩⲗⲏ ⲉⲧϩⲓϩⲟⲩⲛ ⲙⲡϩⲟ ⲛⲧⲡⲩⲗⲏ ⲙⲡⲉⲙϩⲓⲧ ⲁⲩⲱ ⲛⲉⲩϩⲟ ⲉⲩϭⲱϣⲧ ⲉⲧⲉϩⲓⲏ ⲙⲡⲣⲏⲥ ⲙⲡϩⲟⲧ ⲉⲃⲟⲗ ⲛⲧⲡⲩⲗⲏ ⲉⲧϩⲛⲙⲙⲁ ⲛϣⲁ ⲉϥϭⲱϣⲧ ⲉⲡⲉⲙϩⲓⲧ

45 ⲁⲩⲱ ⲁϥϣⲁϫⲉ ⲛⲙⲙⲁⲓ ⲉϥϫⲱ ⲙⲙⲟⲥ ϫⲉⲡⲉⲓⲅⲁⲍⲟⲫⲩⲗⲁⲕⲓⲟⲛ ⲉⲧϭⲱϣⲧ ⲉⲡⲥⲁ ⲙⲡⲣⲏⲥ ⲉϥⲛⲁϣⲱⲡⲉ ⲛⲛⲟⲩⲏⲏⲃ ⲛⲉⲧⲣⲟⲉⲓⲥ ⲉⲛⲟⲩⲣϣⲉ ⲙⲡⲏⲓ

46 ⲁⲩⲱ ⲡⲕⲉⲅⲁⲍⲟⲫⲩⲗⲁⲕⲓⲟⲛ ⲉⲧϭⲱϣⲧ ⲉⲡⲥⲁ ⲙⲡⲉⲙϩⲓⲧ ⲉϥⲛⲁϣⲱⲡⲉ ⲛⲛⲟⲩⲏⲏⲃ ⲛⲉⲧⲣⲟⲉⲓⲥ ⲉⲡⲉⲑⲩⲥⲓⲁⲥⲧⲏⲣⲓⲟⲛ ⲉⲧⲉⲛⲧⲟⲟⲩ ⲛⲉ ⲛϣⲏⲣⲉ ⲛⲥⲁⲇⲱⲕ ⲛⲉⲧϩⲏⲛ ⲉϩⲟⲩⲛ ⲉⲡϫⲟⲉⲓⲥ ⲉⲃⲟⲗ ϩⲛⲛϣⲏⲣⲉ ⲛⲗⲉⲩⲉⲓ ⲉϣⲙϣⲉ ⲛⲁϥ

47 ⲁⲩⲱ ⲁϥϣⲓ ⲧϭⲟⲙ ⲉⲥⲛⲁⲣϣⲉ ⲙⲙⲁϩⲉ ⲛϣⲓⲏ ⲁⲩⲱ ϣⲉ ⲙⲙⲁϩⲉ ⲛⲟⲩⲱϣⲥ ⲉⲥⲟ ⲛⲧⲉⲧⲣⲁⲅⲱⲛⲟⲛ ⲁⲩⲱ ⲡⲉⲑⲩⲥⲓⲁⲥⲧⲏⲣⲓⲟⲛ ⲉⲧϩⲓϩⲏ ⲙⲡⲏⲓ

48 ⲁⲩⲱ ⲁϥϫⲓⲧ ⲉϩⲟⲩⲛ ⲉⲧⲡⲁⲣⲁⲥⲧⲁⲥ ⲙⲏⲡⲓ ⲁϥϣⲓ ⲧⲡⲁⲣⲁⲥⲧⲁⲥ ϯⲟⲩ ⲙⲙⲁϩⲉ ⲉⲥⲟ ⲙⲙⲟⲟⲩ ⲛⲥⲁⲡⲁⲓ ⲁⲩⲱ ⲕⲉϯⲟⲩ ⲙⲙⲁϩⲉ ⲛⲥⲁⲡⲁⲓ ⲁⲩⲱ ⲡⲟⲩⲱϣⲥ ⲛⲧⲡⲩⲗⲏ ϣⲟⲙⲛⲧ ⲙⲙⲁϩⲉ ⲛⲥⲁⲡⲁⲓ

49 ⲁⲩⲱ ⲡⲉϣⲓⲏ ⲛⲧⲡⲁⲣⲁⲥⲧⲁⲥ ⲉϥⲛⲁⲣϫⲟⲩⲱⲧ ⲙⲙⲁϩⲉ ⲁⲩⲱ ⲡⲟⲩⲱϣⲥ ⲛⲧⲡⲁⲣⲁⲥⲧⲁⲥ ⲉϥⲛⲁⲣⲙⲛⲧⲟⲩⲉ ⲙⲙⲁϩⲉ ⲁⲩⲱ ⲡⲉⲥⲧⲱϣ ⲉϥⲥⲙⲟⲛⲧ ϩⲛⲙⲛⲧⲟⲩⲉ ⲛⲧⲱⲣⲧⲣ ⲉⲧⲣⲉⲩⲃⲱⲕ ⲛⲁϥ ⲉϩⲣⲁⲓ ⲛϩⲏⲧⲟⲩ ⲁⲩⲱ ϩⲉⲛⲥⲧⲩⲗⲗⲟⲥ ϩⲁϩⲧⲛ ⲛⲟⲩⲱϭ ⲟⲩⲁ ⲛⲥⲁⲡⲁⲓ ⲁⲩⲱ ⲕⲉⲟⲩⲁ ⲛⲥⲁⲡⲁⲓ