Ezekiel 33 — Coptic (Sahidic)

1 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

2 ϫⲉⲡϣⲏⲣⲉ ⲙⲡⲣⲱⲙⲉ ϣⲁϫⲉ ⲙⲛⲛϣⲏⲣⲉ ⲙⲡⲉⲕⲗⲁⲟⲥ ⲛⲕϫⲟⲟⲥ ⲉϩⲟⲩⲛ ⲉϩⲣⲁⲩ ϫⲉⲡⲕⲁϩ ⲉϯⲛⲁⲉⲓⲛⲉ ⲛⲧⲁⲥⲏϥⲉ ⲉϩⲣⲁⲓ ⲉϫⲱϥ ⲁⲩⲱ ⲛⲧⲉⲡⲗⲁⲟⲥ ⲙⲡⲕⲁϩ ϫⲓ ⲛⲟⲩⲣⲱⲙⲉ ⲛⲟⲩⲱⲧ ⲉⲃⲟⲗ ⲛϩⲏⲧⲟⲩ ⲛⲥⲉⲕⲁⲁϥ ⲛⲁⲩ ⲛⲥⲕⲟⲡⲟⲥ

3 ⲁⲩⲱ ⲛϥⲛⲁⲩ ⲉⲧⲥⲏϥⲉ ⲉⲥⲛⲏⲩ ⲉϫⲙⲡⲕⲁϩ ⲁⲩⲱ ⲛϥⲥⲁⲗⲡⲓⲍⲉ ϩⲛⲧⲥⲁⲗⲡⲓⲅⲝ ⲛϥⲥⲩⲙⲁⲛⲉ ⲙⲡⲗⲁⲟⲥ

4 ⲁⲩⲱ ⲛϥⲥⲱⲧⲙ ⲛϭⲓⲡⲉⲛⲧⲁϥⲥⲱⲧⲙ ⲉⲡⲉϩⲣⲟⲟⲩ ⲛⲧⲥⲁⲗⲡⲓⲅⲝ ⲛϥⲧⲙϩⲟⲣϥ ⲉⲣⲟϥ ⲁⲩⲱ ⲛⲧⲉⲧⲥⲏϥⲉ ⲉⲓ ⲛⲥⲧⲁϩⲟϥ ⲡⲉϥⲥⲛⲟϥ ⲉϥⲉϣⲱⲡⲉ ϩⲓϫⲱϥ

5 ⲉⲃⲟⲗ ϫⲉⲡⲉϩⲣⲟⲟⲩ ⲛⲧⲥⲁⲗⲡⲓⲅⲝ ⲁϥⲥⲱⲧⲙ ⲉⲣⲟϥ ⲙⲡⲉϥϩⲟⲣϥ ⲉⲣⲟϥ ⲡⲉϥⲥⲛⲟϥ ⲉϥⲛⲁϣⲱⲡⲉ ϩⲓϫⲱϥ ⲁⲩⲱ ⲡⲁⲓ ϫⲉⲁϥϩⲟⲣϥ ⲉⲣⲟϥ ⲁϥⲧⲟⲩϫⲉ ⲧⲉϥⲯⲩⲭⲏ

6 ⲁⲩⲱ ⲡⲉⲥⲕⲟⲡⲟⲥ ⲉϥϣⲁⲛⲛⲁⲩ ⲉⲧⲥⲏϥⲉ ⲉⲥⲛⲏⲩ ⲉϥⲧⲙⲥⲩⲙⲁⲛⲉ ϩⲛⲧⲥⲁⲗⲡⲓⲅⲝ ⲁⲩⲱ ⲡⲗⲁⲟⲥ ⲛϥⲧⲙϩⲟⲣϥ ⲉⲣⲟϥ ⲛⲧⲉⲧⲥⲏϥⲉ ⲇⲉ ⲉⲓ ⲛⲥϥⲓ ⲛⲟⲩⲯⲩⲭⲏ ⲉⲃⲟⲗ ⲛϩⲏⲧⲟⲩ ⲧⲁⲓ ⲉⲧⲃⲉⲧⲉⲥⲁⲛⲟⲙⲓⲁ ⲛⲧⲁⲩϥⲓⲧⲥ ⲁⲩⲱ ⲡⲉⲥⲥⲛⲟϥ ϯⲛⲁⲕⲱⲧⲉ ⲛⲥⲱϥ ⲛⲧⲟⲟⲧϥ ⲙⲡⲉⲥⲕⲟⲡⲟⲥ

7 ⲛⲧⲟⲕ ϩⲱⲱⲕ ⲡϣⲏⲣⲉ ⲙⲡⲣⲱⲙⲉ ⲉⲓⲥ ϩⲏⲏⲧⲉ ⲁⲓⲕⲁⲁⲕ ⲛⲥⲕⲟⲡⲟⲥ ⲉⲃⲟⲗ ϩⲛⲧⲁⲧⲁⲡⲣⲟ

8 ϩⲙⲡⲧⲣⲁϫⲟⲟⲥ ⲉϩⲟⲩⲛ ⲉⲣⲟϥ ϩⲙⲡⲧⲣⲉϥⲣⲛⲟⲃⲉ ϫⲉϩⲛⲟⲩⲙⲟⲩ ⲕⲛⲁⲙⲟⲩ ⲁⲩⲱ ⲛⲕⲧⲙϣⲁϫⲉ ⲉⲧⲣⲉⲡⲁⲥⲉⲃⲏⲥ ϩⲁⲣⲉϩ ⲉⲣⲟϥ ⲉⲧⲉϥϩⲓⲏ ⲛⲧⲟϥ ⲡⲉⲓⲁⲛⲟⲙⲟⲥ ⲉϥⲛⲁⲙⲟⲩ ϩⲛⲧⲉϥⲁⲛⲟⲙⲓⲁ ⲡⲉϥⲥⲛⲟϥ ⲇⲉ ϯⲛⲁⲕⲱⲧⲉ ⲛⲥⲱϥ ⲛⲧⲟⲟⲧⲕ

9 ⲛⲧⲟⲕ ⲇⲉ ⲉⲕϣⲁⲛⲣϣⲟⲣⲡ ⲉⲧⲁⲙⲉⲡⲁⲥⲉⲃⲏⲥ ⲉⲧⲉϥϩⲓⲏ ⲉⲧⲣⲉϥⲥⲁϩⲱϥ ⲉⲃⲟⲗ ⲙⲙⲟⲥ ⲛϥⲧⲙⲥⲁϩⲱϥ ⲉⲃⲟⲗ ⲛⲧⲉϥϩⲓⲏ ⲡⲁⲓ ϥⲛⲁⲙⲟⲩ ϩⲛⲧⲉϥⲙⲛⲧϣⲁϥⲧⲉ ⲛⲧⲟⲕ ⲇⲉ ⲕⲛⲁⲧⲟⲩϫⲟ ⲛⲧⲉⲕⲯⲩⲭⲏ

10 ⲁⲩⲱ ⲛⲧⲟⲕ ⲡϣⲏⲣⲉ ⲙⲡⲣⲱⲙⲉ ⲁϫⲓⲥ ⲙⲡⲏⲓ ⲙⲡⲓⲥⲣⲁⲏⲗ ϫⲉⲧⲁⲓ ⲧⲉ ⲧϩⲉ ⲛⲧⲁⲧⲉⲧⲛϣⲁϫⲉ ⲉⲧⲉⲧⲛϫⲱ ⲙⲙⲟⲥ ϫⲉⲛⲉⲛⲡⲗⲁⲛⲁ ⲁⲩⲱ ⲛⲉⲛⲁⲛⲟⲙⲓⲁ ⲥⲉϩⲓϫⲱⲛ ⲁⲩⲱ ⲁⲛⲟⲛ ⲁⲛⲃⲱⲗ ⲉⲃⲟⲗ ⲛϩⲏⲧⲟⲩ ⲁⲩⲱ ⲉⲛⲛⲁⲱⲛϩ ⲛⲁϣ ⲛϩⲉ

11 ⲁϫⲓⲥ ⲛⲁⲩ ϫⲉϯⲟⲛϩ ⲁⲛⲟⲕ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲛϯⲟⲩⲉϣⲡⲙⲟⲩ ⲁⲛ ⲙⲡⲁⲥⲉⲃⲏⲥ ⲛⲧϩⲉ ⲉⲧⲣⲉⲡⲁⲥⲉⲃⲏⲥ ⲕⲧⲟϥ ⲉⲃⲟⲗ ⲛⲧⲉϥϩⲓⲏ ⲛϥⲱⲛϩ ϩⲛⲟⲩⲕⲧⲟ ⲕⲧⲉⲧⲏⲩⲧⲛ ⲉⲃⲟⲗ ⲛⲧⲉⲧⲛϩⲓⲏ ⲁⲩⲱ ⲉⲧⲃⲉⲟⲩ ⲧⲉⲧⲛⲛⲁⲙⲟⲩ ⲡⲏⲓ ⲙⲡⲓⲥⲣⲁⲏⲗ

12 ⲁϫⲓⲥ ⲛⲛϣⲏⲣⲉ ⲙⲡⲉⲕⲗⲁⲟⲥ ϫⲉⲧⲇⲓⲕⲁⲓⲟⲥⲩⲛⲏ ⲙⲡⲇⲓⲕⲁⲓⲟⲥ ⲛⲥⲛⲁⲛⲁϩⲙⲉϥ ⲁⲛ ϩⲙⲡⲉϩⲟⲟⲩ ⲉⲧϥⲛⲁⲡⲗⲁⲛⲁ ⲁⲩⲱ ⲧⲁⲛⲟⲙⲓⲁ ⲙⲡⲁⲥⲉⲃⲏⲥ ⲛⲥⲛⲁⲑⲙⲕⲟϥ ⲁⲛ ϩⲙⲡⲉϩⲟⲟⲩ ⲉⲧϥⲛⲁⲕⲧⲟϥ ⲉⲃⲟⲗ ϩⲛⲧⲉϥⲁⲛⲟⲙⲓⲁ ⲁⲩⲱ ⲡⲇⲓⲕⲁⲓⲟⲥ ⲛϥⲛⲁϣⲛⲁϩⲙϥ ⲁⲛ

13 ϩⲙⲡⲧⲣⲁϫⲟⲟⲥ ⲙⲡⲇⲓⲕⲁⲓⲟⲥ ϫⲉⲡⲁⲓ ⲁϥⲛⲁϩⲧⲉ ⲉⲧⲉϥⲇⲓⲕⲁⲓⲟⲥⲩⲛⲏ ⲁⲩⲱ ⲛϥⲉⲓⲣⲉ ⲛⲟⲩⲁⲛⲟⲙⲓⲁ ⲛⲉϥⲇⲓⲕⲁⲓⲟⲥⲩⲛⲏ ⲧⲏⲣⲟⲩ ⲛⲥⲉⲛⲁⲣⲡⲉⲩⲙⲉⲉⲩⲉ ⲁⲛ ⲧⲁⲇⲓⲕⲓⲁ ⲛⲧⲁϥⲁⲁⲥ ⲉϥⲛⲁⲙⲟⲩ ϩⲣⲁⲓ ⲛϩⲏⲧⲥ

14 ⲁⲩⲱ ϩⲙⲡⲧⲣⲁϫⲟⲟⲥ ⲙⲡⲁⲥⲉⲃⲏⲥ ϫⲉϩⲛⲟⲩⲙⲟⲩ ⲕⲛⲁⲙⲟⲩ ⲁⲩⲱ ⲛϥⲕⲧⲟϥ ⲉⲃⲟⲗ ϩⲙⲡⲉϥⲛⲟⲃⲉ ⲛϥⲉⲓⲣⲉ ⲛⲟⲩⲕⲣⲓⲙⲁ ⲙⲛⲟⲩⲇⲓⲕⲁⲓⲟⲥⲩⲛⲏ

15 ⲁⲩⲱ ⲧⲉⲟⲩⲱ ⲧⲉⲧⲛⲧⲟⲟⲧϥ ⲛϥⲧⲁⲁⲥ ⲁⲩⲱ ⲡⲉⲛⲧⲁϥⲧⲱⲣⲡ ⲙⲙⲟϥ ⲛϥⲧⲁⲁϥ ⲁⲩⲱ ⲛϥⲙⲟⲟϣⲉ ϩⲛⲛⲉⲡⲣⲟⲥⲧⲁⲅⲙⲁ ⲙⲡⲱⲛϩ ⲉⲧⲙⲉⲓⲣⲉ ⲛⲟⲩⲁⲇⲓⲕⲓⲁ ϩⲛⲟⲩⲱⲛϩ ϥⲛⲁⲱⲛϩ ⲁⲩⲱ ⲛϥⲛⲁⲙⲟⲩ ⲁⲛ

16 ⲛⲉϥⲛⲟⲃⲉ ⲧⲏⲣⲟⲩ ⲛⲧⲁϥⲁⲁⲩ ⲛⲥⲉⲛⲁⲣⲡⲉⲩⲙⲉⲉⲩⲉ ⲁⲛ ⲉⲃⲟⲗ ϫⲉⲁϥⲉⲓⲣⲉ ⲛⲟⲩⲕⲣⲓⲙⲁ ⲙⲛⲟⲩⲇⲓⲕⲁⲓⲟⲥⲩⲛⲏ ⲛⲁⲓ ⲉϥⲛⲁⲱⲛϩ ⲛϩⲏⲧⲟⲩ

17 ⲁⲩⲱ ⲥⲉⲛⲁϫⲟⲟⲥ ⲛϭⲓⲛϣⲏⲣⲉ ⲙⲡⲉⲕⲗⲁⲟⲥ ϫⲉⲛⲥⲥⲟⲩⲧⲱⲛ ⲁⲛ ⲛϭⲓⲧⲉϩⲓⲏ ⲙⲡϫⲟⲉⲓⲥ ⲧⲉⲩϩⲓⲏ ⲛⲧⲟⲟⲩ ⲧⲉⲛⲥⲥⲟⲩⲧⲱⲛ ⲁⲛ

18 ϩⲙⲡⲧⲣⲉⲡⲇⲓⲕⲁⲓⲟⲥ ⲕⲧⲟϥ ⲉⲃⲟⲗ ⲛⲧⲉϥⲇⲓⲕⲁⲓⲟⲥⲩⲛⲏ ⲛϥⲉⲓⲣⲉ ⲛϩⲉⲛⲁⲛⲟⲙⲓⲁ ⲛϥⲛⲁⲛⲟⲩϩⲙ ⲁⲛ ϩⲣⲁⲓ ⲛϩⲏⲧⲟⲩ

19 ⲁⲩⲱ ϩⲙⲡⲧⲣⲉⲡⲣⲉϥⲣⲛⲟⲃⲉ ⲕⲧⲟϥ ⲉⲃⲟⲗ ϩⲛⲧⲉϥⲁⲛⲟⲙⲓⲁ ⲛϥⲉⲓⲣⲉ ⲛⲟⲩⲕⲣⲓⲙⲁ ⲙⲛⲟⲩⲇⲓⲕⲁⲓⲟⲥⲩⲛⲏ ⲉϥⲛⲁⲱⲛϩ ⲛϩⲏⲧⲟⲩ

20 ⲁⲩⲱ ⲡⲁⲓ ⲡⲉⲛⲧⲁⲧⲉⲧⲛϫⲟⲟϥ ϫⲉⲛⲥⲥⲟⲩⲧⲱⲛ ⲁⲛ ⲛϭⲓⲧⲉϩⲓⲏ ⲙⲡϫⲟⲉⲓⲥ ϯⲛⲁϯϩⲁⲡ ⲉⲡⲟⲩⲁ ⲡⲟⲩⲁ ⲙⲙⲱⲧⲛ ⲡⲏⲓ ⲙⲡⲓⲥⲣⲁⲏⲗ ϩⲛⲛⲉϥϩⲓⲟⲟⲩⲉ ⲡⲉϫⲉⲡϫⲟⲉⲓⲥ

21 ⲁⲩⲱ ⲁⲥϣⲱⲡⲉ ϩⲛⲧⲙⲉϩⲙⲛⲧⲥⲛⲟⲟⲩⲥ ⲛⲣⲟⲙⲡⲉ ⲙⲡⲙⲉϩⲙⲛⲧⲥⲛⲟⲟⲩⲥ ⲛⲉⲃⲟⲧ ⲛⲥⲟⲩϯⲟⲩ ⲙⲡⲉⲃⲟⲧ ⲛⲧⲁⲓⲭⲙⲁⲗⲱⲥⲓⲁ ⲁϥⲉⲓ ϣⲁⲣⲟⲓ ⲛϭⲓⲡⲉⲛⲧⲁϥⲟⲩϫⲁⲓ ⲉⲃⲟⲗ ϩⲛⲧϩⲓⲉⲣⲟⲩⲥⲁⲗⲏⲙ ⲉϥϫⲱ ⲙⲙⲟⲥ ϫⲉⲁⲩϫⲓ ⲧⲡⲟⲗⲓⲥ

22 ⲁⲩⲱ ⲧϭⲓϫ ⲙⲡϫⲟⲉⲓⲥ ⲁⲥϣⲱⲡⲉ ϩⲓϫⲱⲓ ⲙⲡⲛⲁⲩ ⲛⲣⲟⲩϩⲉ ⲙⲡⲁⲧϥⲉⲓ ϣⲁⲣⲟⲓ ⲁⲩⲱ ⲁⲥⲟⲩⲱⲛ ⲛϭⲓⲧⲁⲧⲁⲡⲣⲟ ⲛⲧⲉⲣⲉⲡⲣⲱⲙⲉ ⲉⲓ ϣⲁⲣⲟⲓ ⲙⲡⲛⲁⲩ ⲛϩⲧⲟⲟⲩⲉ ⲁⲩⲱ ⲛⲧⲉⲣⲉⲧⲁⲧⲁⲡⲣⲟ ⲟⲩⲱⲛ ⲙⲡⲉⲥϣⲱⲧⲙ ϭⲉ

23 ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

24 ϫⲉⲡϣⲏⲣⲉ ⲙⲡⲣⲱⲙⲉ ⲛⲉⲧⲟⲩⲏϩ ϩⲛⲛⲉⲧⲟ ⲛϫⲁⲓⲉ ϩⲓϫⲙⲡⲕⲁϩ ⲙⲡⲓⲥⲣⲁⲏⲗ ⲥⲉϫⲱ ⲙⲙⲟⲥ ϫⲉⲛⲉⲟⲩⲣⲱⲙⲉ ⲛⲟⲩⲱⲧ ⲡⲉ ⲁⲃⲣⲁϩⲁⲙ ⲁⲩⲱ ⲁϥⲣϫⲟⲉⲓⲥ ⲉⲡⲕⲁϩ ⲁⲛⲟⲛ ⲇⲉ ⲧⲛⲟϣ ⲁⲛⲟⲛ ⲛⲉⲛⲧⲁⲩϯⲡⲕⲁϩ ⲛⲁⲛ ⲉⲕⲗⲏⲣⲟⲛⲟⲙⲉⲓ ⲙⲙⲟϥ

25 ⲉⲧⲃⲉⲡⲁⲓ ⲁϫⲓⲥ ⲛⲁⲩ

27 ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉϯⲟⲛϩ ⲁⲛⲟⲕ ϫⲉⲛⲉⲧϣⲟⲟⲡ ϩⲛⲛⲉⲧϣⲏϥ ⲉϣⲱⲡⲉ ⲛⲥⲉⲛⲁϩⲉ ⲁⲛ ϩⲛⲛⲥⲏϥⲉ ⲁⲩⲱ ⲛⲉⲧϣⲟⲟⲡ ϩⲓϩⲣⲁⲥ ⲛⲧⲥⲱϣⲉ ⲥⲉⲛⲁⲧⲁⲁⲩ ⲉⲧⲟⲟⲧⲟⲩ ⲛⲛⲉⲑⲩⲣⲓⲟⲛ ⲉⲧⲣⲉⲩⲟⲩⲟⲙⲟⲩ ⲁⲩⲱ ⲛⲉⲧϣⲟⲟⲡ ϩⲛⲙⲡⲟⲗⲓⲥ ⲉⲧⲕⲧⲏⲩ ⲛⲥⲟⲃⲧ ⲙⲛⲛⲉⲧϩⲛⲛⲉⲥⲡⲏⲗⲁⲓⲟⲛ ϯⲛⲁⲙⲟⲟⲩⲧⲟⲩ ϩⲛⲟⲩⲙⲟⲩ

28 ⲁⲩⲱ ϯⲛⲁⲕⲁⲡⲕⲁϩ ⲉϥⲟ ⲛϫⲁⲓⲉ ⲁⲩⲱ ϥⲛⲁⲧⲁⲕⲟ ⲛϭⲓⲡϣⲟⲩϣⲟⲩ ⲛⲧⲉϥϭⲟⲙ ⲁⲩⲱ ⲛⲧⲟⲩⲉⲓⲏ ⲙⲡⲓⲥⲣⲁⲏⲗ ⲥⲉⲛⲁⲣϫⲁⲓⲉ ⲉⲃⲟⲗ ϫⲉⲛϥⲛⲁϣⲱⲡⲉ ⲁⲛ ⲛϭⲓⲛⲉⲧⲙⲟⲟϣⲉ ⲛϩⲏⲧⲟⲩ

29 ⲁⲩⲱ ⲥⲉⲛⲁⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲁⲩⲱ ϯⲛⲁⲧⲣⲉⲡⲉⲩⲕⲁϩ ⲣϫⲁⲓⲉ ⲁⲩⲱ ⲛⲉⲩϥⲟⲧⲉ ⲧⲏⲣⲟⲩ ⲛⲧⲁⲩⲧⲁⲙⲓⲟⲟⲩ ⲥⲉⲛⲁϣⲱϥ

30 ⲛⲧⲟⲕ ϩⲱⲱⲕ ⲡϣⲏⲣⲉ ⲙⲡⲣⲱⲙⲉ ⲛϣⲏⲣⲉ ⲙⲡⲉⲕⲗⲁⲟⲥ ⲛⲉⲧϣⲁϫⲉ ⲉⲧⲃⲏⲏⲧϩⲁϩⲧⲛ ⲛⲥⲟⲃⲧ ⲁⲩⲱ ϩⲛⲛϩⲁⲉⲓⲧ ⲛⲛⲉⲩⲏⲓ ⲉⲣⲉⲡⲣⲱⲙⲉ ϣⲁϫⲉ ⲙⲛⲡⲉϥⲥⲟⲛ ⲉⲩϫⲱ ⲙⲙⲟⲥ ϫⲉⲙⲁⲣⲛⲥⲱⲟⲩϩ ⲉϩⲟⲩⲛ ⲛⲧⲛⲥⲱⲧⲙ ⲉⲛⲉⲛⲧⲁⲡϫⲟⲉⲓⲥ ϫⲟⲟⲩ

31 ⲁⲩⲱ ⲥⲉⲛⲁⲉⲓ ϣⲁⲣⲟⲕ ⲛⲧϩⲉ ⲛⲟⲩⲗⲁⲟⲥ ⲉϣⲁϥⲉⲓ ϩⲓⲛⲉϥⲉⲣⲏⲩ ⲛⲥⲉϩⲙⲟⲟⲥ ⲙⲡⲉⲕⲙⲧⲟ ⲉⲃⲟⲗ ⲛⲥⲉⲥⲱⲧⲙ ⲉⲛⲉⲕϣⲁϫⲉ ⲛⲥⲉⲧⲙⲁⲁⲩ ⲉⲃⲟⲗ ϫⲉⲟⲩⲛⲟⲩϭⲟⲗ ϩⲛⲧⲉⲩⲧⲁⲡⲣⲟ ⲁⲩⲱ ⲡⲉⲩϩⲏⲧ ⲉϥⲟⲩⲏϩ ⲛⲥⲁⲛⲉⲩϫⲱϩⲙ

32 ⲁⲩⲱ ⲉⲕⲉϣⲱⲡⲉ ⲛⲁⲩ ⲛⲧϩⲉ ⲛⲟⲩϩⲣⲟⲟⲩ ⲙⲯⲁⲗⲧⲏⲣⲓⲟⲛ ⲉϥⲛⲟⲧⲙ ⲡⲉϥ... ⲁⲩⲱ ⲥⲉⲛⲁⲥⲱⲧⲙ ⲉⲛⲉⲕϣⲁϫⲉ ⲛⲥⲉⲧⲙⲁⲁⲩ

33 ⲁⲩⲱ ⲉⲩϣⲁⲛⲉⲓ ⲥⲉⲛⲁϫⲟⲟⲥ ϫⲉⲉⲓⲥϩⲏⲏⲧⲉ ⲁⲩⲉⲓ ⲛⲥⲉⲉⲓⲙⲉ ϫⲉⲛⲧⲕ ⲟⲩⲡⲣⲟⲫⲏⲧⲏⲥ ⲛⲧⲟⲕ ϩⲛⲧⲉⲩⲙⲏⲧⲉ