Ezekiel 29 — Coptic (Sahidic)

1 ϩⲛⲧⲙⲉϩⲙⲛⲧⲥⲛⲟⲟⲩⲥ ⲛⲣⲟⲙⲡⲉ ⲙⲡⲙⲉϩⲙⲛⲧⲟⲩⲉ ⲛⲉⲃⲟⲧ ⲛⲥⲟⲩⲟⲩⲁ ⲙⲡⲉⲃⲟⲧ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

2 ϫⲉⲡϣⲏⲣⲉ ⲙⲡⲣⲱⲙⲉ ⲧⲁϫⲣⲉⲡⲉⲕϩⲟ ⲉϫⲙⲫⲁⲣⲁⲱ ⲡⲣⲣⲟ ⲛⲕⲏⲙⲉ ⲛⲕⲡⲣⲟⲫⲏⲧⲉⲩⲉ ⲉϩⲣⲁⲓ ⲉϫⲱϥ ⲁⲩⲱ ⲉϫⲛⲕⲏⲙⲉ ⲧⲏⲣϥ

3 ⲛⲕϫⲟⲟⲥ ϫⲉⲛⲁⲓ ⲛⲉⲧϥϫⲱ ⲙⲙⲟⲟⲩ ⲛϭⲓⲡϫⲟⲉⲓⲥ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲉⲓⲛⲉ ⲉϫⲙⲫⲁⲣⲁⲱ ⲡⲛⲟϭ ⲛⲇⲣⲁⲕⲱⲛ ⲡⲉⲧϩⲙⲟⲟⲥ ϩⲛⲧⲙⲏⲧⲉ ⲛⲛⲉϥⲓⲉⲣⲱⲟⲩ ⲡⲉⲧϫⲱ ⲙⲙⲟⲥ ϫⲉⲛⲟⲩⲓ ⲛⲉ ⲛⲉⲓⲉⲣⲱⲟⲩ ⲁⲩⲱ ⲁⲛⲟⲕ ⲡⲉⲛⲧⲁⲧⲁⲙⲓⲟⲟⲩ

4 ⲁⲛⲟⲕ ⲇⲉ ϯⲛⲁϯ ⲛϩⲉⲛϭⲟⲣϭⲥ ⲉⲛⲉⲕⲟⲩⲟⲟϭⲉ ⲁⲩⲱ ⲛⲧⲃⲧ ⲙⲡⲉⲕⲓⲉⲣⲟ ϯⲛⲁⲗⲟϫϭⲟⲩ ⲉⲛⲉⲕⲧⲛϩ ⲁⲩⲱ ϯⲛⲁⲥⲟⲕⲕ ⲉϩⲣⲁⲓ ϩⲛⲧⲙⲏⲧⲉ ⲙⲡⲉⲕⲓⲉⲣⲟ

5 ⲁⲩⲱ ⲛⲧⲃⲧ ⲧⲏⲣⲟⲩ ⲙⲡⲉⲕⲓⲉⲣⲟ ⲛⲉⲕϩⲉ ⲉϫⲙⲡϩⲟ ⲛⲧⲉⲕⲥⲱϣⲉ ⲛⲥⲉⲧⲙⲟⲗⲕ ⲉϩⲟⲩⲛ ⲛⲉⲑⲩⲣⲓⲟⲛ ⲙⲡⲕⲁϩ ⲁⲩⲱ ⲛϩⲁⲗⲁⲧⲉ ⲛⲧⲡⲉ ⲁⲓⲧⲁⲁⲕ ⲛⲁⲩ ⲛϩⲣⲉ

6 ⲁⲩⲱ ⲥⲉⲛⲁⲉⲓⲙⲉ ⲛϭⲓⲛⲉⲧⲟⲩⲏϩ ⲧⲏⲣⲟⲩ ϩⲛⲕⲏⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲉⲃⲟⲗ ϫⲉⲁⲕϣⲱⲡⲉ ⲛⲟⲩϭⲉⲣⲱⲃ ⲛⲕⲁϣ ⲙⲡⲏⲓ ⲙⲡⲓⲥⲣⲁⲏⲗ

7 ⲛⲧⲉⲣⲟⲩⲙⲉϩ ⲧⲟⲟⲧⲟⲩ ⲙⲙⲟⲕ ⲁⲕⲟⲩⲱϣϥ ⲁⲩⲱ ⲛⲧⲉⲣⲉϭⲓϫ ⲛⲓⲙ ϫⲁⲕ ⲉϫⲱⲟⲩ ⲉⲁⲩⲕⲁϩⲧⲏⲩ ⲉⲣⲟⲕ ⲁⲕⲟⲩⲱϣϥ ⲁⲩⲱ ⲁⲕϩⲱⲣϥ ⲛⲛⲉⲩϯⲡⲉ ⲧⲏⲣⲟⲩ

8 ⲉⲧⲃⲉⲡⲁⲓ ⲛⲁⲓ ⲛⲉⲧϥϫⲱ ⲙⲙⲟⲟⲩ ⲛϭⲓⲡϫⲟⲉⲓⲥ ⲡϫⲟⲉⲓⲥ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲉⲓⲛⲉ ⲉϫⲱⲕ ⲛⲟⲩⲥⲏϥⲉ ⲁⲩⲱ ϯⲛⲁⲧⲁⲕⲟ ⲛϩⲉⲛⲣⲱⲙⲉ ⲉⲃⲟⲗ ⲙⲙⲟⲕ ⲙⲛϩⲉⲛⲧⲃⲛⲟⲟⲩⲉ

9 ⲁⲩⲱ ⲕⲏⲙⲉ ⲛⲁϣⲱⲡⲉ ⲉⲩⲧⲁⲕⲟ ⲛϥⲣϫⲁⲓⲉ ⲛⲥⲉⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲉⲧⲃⲉϫⲉⲁⲕϫⲟⲟⲥ ϫⲉⲛⲉⲓⲉⲣⲱⲟⲩ ⲛⲟⲩⲓ ⲛⲉ ⲁⲩⲱ ⲁⲛⲟⲕ ⲁⲓⲧⲁⲙⲓⲟⲟⲩ

10 ⲉⲧⲃⲉⲡⲁⲓ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲉⲓⲛⲉ ⲉϩⲣⲁⲓ ⲉϫⲱⲕ ⲁⲩⲱ ⲉϫⲛⲛⲉⲕⲓⲉⲣⲱⲟⲩ ⲧⲏⲣⲟⲩ ⲁⲩⲱ ϯⲛⲁϯ ⲙⲡⲕⲁϩ ⲛⲕⲏⲙⲉ ⲉⲧⲣⲉϥⲣϫⲁⲓⲉ ⲟⲩⲥⲏϥⲉ ⲙⲛⲟⲩⲧⲁⲕⲟ ϯⲛⲁⲧⲁⲁⲩ ϫⲓⲛⲙⲉϫⲧⲱⲗ ⲙⲛⲥⲟⲩⲁⲛ ϣⲁϩⲣⲁⲓ ⲉⲛⲧⲟϣ ⲛⲛⲉϭⲟⲟϣⲉ

11 ⲛⲧⲉⲧⲙⲣⲁⲧϥ ⲛⲣⲱⲙⲉ ⲙⲟⲟϣⲉ ⲛϩⲏⲧϥ ⲁⲩⲱ ⲣⲁⲧϥ ⲛⲧⲃⲛⲏ ⲛϥⲧⲙϭⲱⲣϭ ⲛϩⲙⲉ ⲛⲣⲟⲙⲡⲉ

12 ⲁⲩⲱ ϯⲛⲁϯ ⲙⲡⲉϥⲕⲁϩ ⲉⲩⲧⲁⲕⲟ ϩⲛⲧⲙⲏⲧⲉ ⲛⲟⲩⲕⲁϩ ⲉϥⲟ ⲛϫⲁⲓⲉ ⲁⲩⲱ ⲛⲉϥⲡⲟⲗⲓⲥ ⲥⲉⲛⲁϣⲱⲡⲉ ϩⲛⲧⲙⲏⲧⲉ ⲛϩⲉⲛⲡⲟⲗⲓⲥ ⲉⲩⲟ ⲛϫⲁⲓⲉ ⲛϩⲙⲉ ⲛⲣⲟⲙⲡⲉ ⲁⲩⲱ ϯⲛⲁϫⲱⲱⲣⲉ ⲉⲃⲟⲗ ⲛⲕⲏⲙⲉ ϩⲛⲛϩⲉⲑⲛⲟⲥ ⲁⲩⲱ ϯⲛⲁϣⲁϣⲟⲩ ⲉⲛⲉⲭⲱⲣⲁ

13 ⲛⲁⲓ ⲛⲉⲧϥϫⲱ ⲙⲙⲟⲟⲩ ⲛϭⲓⲡϫⲟⲉⲓⲥ ⲡϫⲟⲉⲓⲥ ϫⲉⲙⲛⲛⲥⲁϩⲙⲉ ⲛⲣⲟⲙⲡⲉ ϯⲛⲁⲥⲱⲟⲩϩ ⲉϩⲟⲩⲛ ⲛⲛϩⲉⲑⲛⲟⲥ ⲡⲙⲁ ⲛⲧⲁⲩϫⲟⲟⲣⲟⲩ ⲉⲣⲟϥ

14 ⲁⲩⲱ ϯⲛⲁⲕⲧⲟ ⲛⲧⲁⲓⲭⲙⲁⲗⲱⲥⲓⲁ ⲛⲛⲣⲙⲛⲕⲏⲙⲉ ⲛⲧⲁⲧⲣⲉⲩⲟⲩⲱϩ ϩⲙⲡⲕⲁϩ ⲙⲡⲁⲑⲱⲣⲏⲥ ⲡⲕⲁϩ ⲛⲧⲁⲩϫⲓⲧⲟⲩ ⲛϩⲏⲧϥ ⲁⲩⲱ ⲥⲉⲛⲁϣⲱⲡⲉ ⲛⲟⲩⲁⲣⲭⲏ ⲉⲥⲑⲃⲃⲓⲏⲩ

15 ⲡⲁⲣⲁⲛⲕⲉⲁⲣⲭⲏ ⲧⲏⲣⲟⲩ ⲛⲥⲧⲙϫⲓⲥⲉ ϭⲉ ⲉϫⲛⲛϩⲉⲑⲛⲟⲥ ⲁⲩⲱ ϯⲛⲁⲧⲥⲃⲕⲟⲟⲩ ⲉⲧⲙⲧⲣⲉⲩⲁϣⲁⲓ ϩⲛⲛϩⲉⲑⲛⲟⲥ

16 ⲛⲥⲉⲧⲙϣⲱⲡⲉ ϭⲉ ϫⲓⲛⲙⲡⲉⲓⲛⲁⲩ ⲙⲡⲏⲓ ⲙⲡⲓⲥⲣⲁⲏⲗ ⲉⲩϩⲉⲗⲡⲓⲍⲉ ⲣⲡⲙⲉⲉⲩⲉ ⲛⲧⲉⲩⲁⲛⲟⲙⲓⲁ ϩⲙⲡⲧⲣⲉⲩⲟⲩⲁϩⲟⲩ ⲛⲥⲱⲟⲩ ⲁⲩⲱ ⲥⲉⲛⲁⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ

17 ⲁⲥϣⲱⲡⲉ ⲇⲉ ϩⲛⲧⲙⲉϩϫⲟⲩⲧⲥⲁϣϥⲉ ⲛⲣⲟⲙⲡⲉ ⲛⲥⲟⲩⲟⲩⲁ ⲙⲡϣⲟⲣⲡ ⲛⲉⲃⲟⲧ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

18 ϫⲉⲡϣⲏⲣⲉ ⲙⲡⲣⲱⲙⲉ ⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲧⲉϥϭⲟⲙ ⲁϥⲁⲁⲥ ⲛϩⲙϩⲁⲗ ϩⲛⲟⲩⲛⲟϭ ⲙⲙⲛⲧϩⲙϩⲁⲗ ⲉϫⲛⲧⲩⲣⲟⲥ ⲁⲡⲉ ⲛⲓⲙ ⲛⲁϩⲱⲱⲕⲉ ⲁⲩⲱ ⲛⲁϩⲃⲉ ⲛⲓⲙ ⲥⲉⲛⲁϣⲟⲃⲟⲩ ⲁⲩⲱ ⲙⲡⲉⲃⲉⲕⲉ ϣⲱⲡⲉ ⲛⲁϥ ⲙⲛⲧⲉϥϭⲟⲙ ⲉϫⲛⲧⲩⲣⲟⲥ ⲙⲛⲧⲙⲛⲧϩⲙϩⲁⲗ ⲛⲧⲁⲩⲧⲁⲁⲥ ϩⲓⲣⲱⲥ

19 ⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲓⲥϩⲏⲏⲧⲉ ϯⲛⲁϯ ⲙⲡⲕⲁϩ ⲛⲕⲏⲙⲉ ⲛⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲛϥⲣϫⲟⲉⲓⲥ ⲉⲡⲉⲧϣⲟⲟⲡ ϩⲛⲕⲏⲙⲉ ⲛϥϣⲱⲗ ⲛⲛⲉϥϣⲱⲗ ⲁⲩⲱ ⲟⲩⲛ ⲟⲩⲃⲉⲕⲉ ⲛⲁϣⲱⲡⲉ ⲛⲧⲉϥϭⲟⲙ

20 ⲉⲡⲙⲁ ⲙⲡⲉϥϣⲙϣⲉ ⲛⲧⲁϥⲣϩⲙϩⲁⲗ ⲛϩⲏⲧϥ ⲉϫⲛⲧⲩⲣⲟⲥ ⲁⲓϯ ⲛⲁϥ ⲙⲡⲕⲁϩ ⲛⲕⲏⲙⲉ ⲛⲁⲓ ⲛⲉⲧϥϫⲱ ⲙⲙⲟⲟⲩ ⲛϭⲓⲡϫⲟⲉⲓⲥ ⲡϫⲟⲉⲓⲥ

21 ϫⲉϩⲙⲡⲉϩⲟⲟⲩ ⲉⲧⲙⲙⲁⲩ ⲟⲩⲛ ⲟⲩⲧⲁⲡ ⲛⲁϯⲟⲩⲱ ⲙⲡⲏⲓ ⲧⲏⲣϥ ⲙⲡⲓⲥⲣⲁⲏⲗ ⲁⲩⲱ ⲛⲧⲟⲕ ϯⲛⲁϯ ⲛⲁⲕ ⲛⲟⲩⲧⲁⲡⲣⲟ ⲉⲥⲟⲩⲏⲛ ϩⲛⲧⲉⲩⲙⲏⲧⲉ ⲛⲥⲉⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ