Read Ezekiel 30 side by side with translations · The Final Bible
1 ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ
2 ϫⲉⲛⲧⲟⲕ ϩⲱⲱⲕ ⲡϣⲏⲣⲉ ⲙⲡⲣⲱⲙⲉ ⲡⲣⲟⲫⲏⲧⲉⲩⲉ ⲛⲕϫⲟⲟⲥ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲥ ⲱ ⲱ ⲉⲧⲃⲉⲡⲉϩⲟⲟⲩ
3 ϫⲉϥϩⲏⲛ ⲉϩⲟⲩⲛ ⲛϭⲓⲡⲉϩⲟⲟⲩ ⲙⲡϫⲟⲉⲓⲥ ⲡⲉϩⲟⲟⲩ ⲛⲁϣⲱⲡⲉ ⲛⲟⲩϩⲁⲏ ⲉϫⲛⲛϩⲉⲑⲛⲟⲥ
4 ⲁⲩⲱ ⲟⲩⲛ ⲟⲩⲥⲏϥⲉ ⲛⲁⲉⲓ ⲉϫⲛⲕⲏⲙⲉ ⲛⲧⲉⲟⲩϣⲧⲟⲣⲧⲣ ϣⲱⲡⲉ ϩⲙⲡⲕⲁϩ ⲛⲛⲉϭⲟⲟϣⲉ ⲁⲩⲱ ⲥⲉⲛⲁϩⲉ ⲛϭⲓⲛⲉⲛⲧⲁⲩϣⲟⲟϭⲟⲩ ϩⲛⲕⲏⲙⲉ ⲁⲩⲱ ⲛⲉϥⲕⲉⲥⲛⲧⲉ ⲥⲉⲛⲁϩⲉ ϩⲓⲟⲩⲥⲟⲡ
5 ⲙⲡⲉⲣⲥⲏⲥ ⲙⲛⲛⲉⲕⲣⲓⲧⲏⲥ ⲁⲩⲱ ⲛⲗⲩⲇⲟⲥ ⲙⲛⲛⲁⲧⲗⲓⲃⲩⲏ ⲙⲛⲛⲉⲧⲧⲏϩ ⲧⲏⲣⲟⲩ ⲛⲙⲙⲁⲕ ⲁⲩⲱ ⲛϣⲏⲣⲉ ⲛⲧⲁⲇⲓⲁⲑⲏⲕⲏ ⲥⲉⲛⲁϩⲉ ϩⲣⲁⲓ ⲛϩⲏⲧⲕ
6 ⲁⲩⲱ ⲥⲉⲛⲁϩⲉ ⲛϭⲓⲛϭⲟⲙ ⲛⲕⲏⲙⲉ ⲁⲩⲱ ϥⲛⲁⲑⲃⲃⲓⲟ ⲛϭⲓⲡϣⲟⲩϣⲟⲩ ⲛⲧⲉϥϭⲟⲙ ϫⲓⲛⲙⲉϫⲧⲱⲗ ϣⲁϩⲣⲁⲓ ⲉⲥⲟⲩⲁⲛ ⲥⲉⲛⲁϩⲉ ϩⲛⲧⲥⲏϥⲉ ϩⲣⲁⲓ ⲛϩⲏⲧϥ ⲡⲉϫⲉⲡϫⲟⲉⲓⲥ
7 ⲁⲩⲱ ϥⲛⲁϣⲱϥ ⲥⲉⲛⲁϣⲱⲡⲉ ϩⲛⲧⲙⲏⲧⲉ ⲛϩⲉⲛⲭⲱⲣⲁ ⲉⲩⲟ ⲛϫⲁⲓⲉ
8 ⲁⲩⲱ ⲛⲥⲉⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲉⲓϣⲁⲛⲉⲓⲛⲉ ⲛⲟⲩⲕⲱϩⲧ ⲉϫⲛⲕⲏⲙⲉ ⲁⲩⲱ ⲛⲥⲉⲟⲩⲱϣϥ ⲛϭⲓⲟⲩⲟⲛ ⲛⲓⲙ ⲉⲧⲃⲟⲏⲑⲉⲓ ⲉⲣⲟϥ
9 ϩⲙⲡⲉϩⲟⲟⲩ ⲉⲧⲙⲙⲁⲩ ⲥⲉⲛⲁⲉⲓ ⲉⲃⲟⲗ ⲛϭⲓϩⲉⲛⲁⲅⲅⲉⲗⲟⲥ ⲉⲩⲡⲏⲧ ⲉⲧⲁⲕⲉⲡⲕⲁϩ ⲛⲛⲉϭⲟⲟϣⲉ ⲁⲩⲱ ⲟⲩⲛ ⲟⲩϣⲧⲟⲣⲧⲣ ⲛⲁϣⲱⲡⲉ ⲛϩⲏⲧⲟⲩ ϩⲙⲡⲉϩⲟⲟⲩ ⲉⲧⲙⲙⲁⲩ ϩⲛⲕⲏⲙⲉ ϫⲉⲉⲓⲥϩⲏⲏⲧⲉ ⲁϥⲉⲓ
10 ⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡϫⲟⲉⲓⲥ ϫⲱ ⲙⲙⲟⲟⲩ ϫⲉϯⲛⲁⲧⲁⲕⲟ ⲙⲡⲙⲏⲏϣⲉ ⲛⲕⲏⲙⲉ ⲉⲃⲟⲗ ϩⲓⲧⲟⲟⲧϥ ⲛⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ
11 ⲛⲧⲟϥ ⲙⲛⲡⲉϥⲗⲁⲟⲥ ϩⲉⲛⲗⲟⲓⲙⲟⲥ ⲉⲃⲟⲗ ϩⲛⲛϩⲉⲑⲛⲟⲥ ⲁⲩⲧⲛⲛⲟⲟⲩⲥⲟⲩ ⲉⲩⲧⲁⲕⲉⲡⲕⲁϩ ⲁⲩⲱ ⲛⲧⲟⲟⲩ ⲧⲏⲣⲟⲩ ⲥⲉⲛⲁⲉⲓⲛⲉ ⲛⲛⲉⲩⲥⲏϥⲉ ⲉϫⲛⲕⲏⲙⲉ ⲁⲩⲱ ⲡⲕⲁϩ ⲛⲁⲙⲟⲩϩ ϩⲁⲛⲉⲛⲧⲁⲩϣⲟⲟϭⲟⲩ
12 ⲁⲩⲱ ϯⲛⲁⲕⲱ ⲛⲛⲉⲩⲓⲉⲣⲱⲟⲩ ⲉⲩⲟ ⲛϫⲁⲓⲉ ⲁⲩⲱ ϯⲛⲁⲧⲁⲕⲟ ⲙⲡⲕⲁϩ ⲙⲛⲡⲉϥϫⲱⲕ ⲉⲃⲟⲗ ϩⲓⲧⲟⲟⲧⲟⲩ ⲛϩⲉⲛϣⲙⲙⲟ ⲁⲛⲟⲕ ⲡϫⲟⲉⲓⲥ ⲁⲓϣⲁϫⲉ
13 ⲛⲁⲓ ⲛⲉⲧϥϫⲱ ⲙⲙⲟⲟⲩ ⲛϭⲓⲡϫⲟⲉⲓⲥ ⲡϫⲟⲉⲓⲥ ϫⲉϯⲛⲁⲧⲁⲕⲟ ⲛⲙⲙⲉⲅⲓⲥⲧⲁⲛⲟⲥ
Ezekiel 29 · Ezekiel 31 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)