Ezekiel 28 — Coptic (Sahidic)

1 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

2 ϫⲉⲛⲧⲟⲕ ϩⲱⲱⲕ ⲡϣⲏⲣⲉ ⲙⲡⲣⲱⲙⲉ ⲁϫⲓⲥ ⲙⲡⲁⲣⲭⲱⲛ ⲛⲧⲩⲣⲟⲥ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲃⲟⲗ ϫⲉⲁⲡⲉⲕϩⲏⲧ ϫⲓⲥⲉ ⲁⲩⲱ ⲁⲕϫⲟⲟⲥ ϫⲉⲁⲛⲕ ⲟⲩⲛⲟⲩⲧⲉ ⲁⲛⲟⲕ ⲁⲓⲟⲩⲱϩ ϩⲛⲟⲩⲙⲁ ⲛϣⲱⲡⲉ ⲛⲛⲟⲩⲧⲉ ϩⲙⲡϩⲏⲧ ⲛⲧⲉⲑⲁⲗⲁⲥⲥⲁ ⲛⲧⲟⲕ ⲇⲉ ⲛⲧⲕ ⲟⲩⲣⲱⲙⲉ ⲁⲩⲱ ⲛⲧⲕ ⲟⲩⲛⲟⲩⲧⲉ ⲁⲛ ⲁⲩⲱ ⲁⲕϯ ⲙⲡⲉⲕϩⲏⲧ ⲛⲧϩⲉ ⲙⲡϩⲏⲧ ⲛⲟⲩⲛⲟⲩⲧⲉ

3 ⲙⲏ ⲛⲉⲥⲱⲕ ⲛⲧⲟⲕ ⲉⲇⲁⲛⲓⲏⲗ ϩⲉⲛⲥⲟⲫⲟⲥ ⲁⲛ ⲛⲉⲛⲧⲁⲩⲡⲁⲓⲇⲉⲩⲉ ⲙⲙⲟⲕ ϩⲛⲧⲉⲕⲥⲃⲱ

4 ⲙⲏ ϩⲛⲧⲉⲕⲥⲃⲱ ϭⲉ ⲏ ϩⲛⲧⲉⲕⲙⲛⲧⲥⲁⲃⲉ ⲁⲕⲕⲱ ⲛⲁⲕ ⲛⲟⲩϭⲟⲙ ⲁⲩⲱ ⲟⲩⲛⲟⲩⲃ ⲙⲛⲟⲩϩⲁⲧ ϩⲛⲛⲉⲕⲁϩⲱⲱⲣ

5 ϩⲛⲧⲉⲕⲥⲃⲱ ⲉⲧⲛⲁϣⲱⲥ ⲙⲛⲧⲉⲕⲉⲓⲉⲡϣⲱⲧ ⲛⲧⲁⲕⲧⲁϣⲟ ⲛⲧⲉⲕϭⲟⲙ ⲡⲉⲕϩⲏⲧ ⲁϥϫⲓⲥⲉ ϩⲛⲧⲉⲕϭⲟⲙ

6 ⲉⲧⲃⲉⲡⲁⲓ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲃⲟⲗ ϫⲉⲁⲕϯ ⲙⲡⲉⲕϩⲏⲧ ⲛⲧϩⲉ ⲙⲡϩⲏⲧ ⲛⲟⲩⲛⲟⲩⲧⲉ

7 ⲉⲧⲃⲉⲡⲁⲓ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲉⲓⲛⲉ ⲉϩⲣⲁⲓ ⲉϫⲱⲕ ⲛϩⲉⲛϣⲙⲙⲟ ⲛⲗⲟⲓⲙⲟⲥ ⲉⲃⲟⲗ ϩⲛⲛϩⲉⲑⲛⲟⲥ ⲁⲩⲱ ⲥⲉⲛⲁⲧⲱⲕⲙ ⲛⲛⲉⲩⲥⲏϥⲉ ⲉϩⲣⲁⲓ ⲉϫⲱⲕ ⲁⲩⲱ ⲉϫⲙⲡⲥⲁ ⲛⲧⲉⲕⲥⲃⲱ ⲛⲥⲉⲕⲱⲛⲥ ⲙⲡⲉⲕⲥⲁ ⲉⲩⲧⲁⲕⲟ

8 ⲁⲩⲱ ⲥⲉⲛⲁⲑⲃⲃⲓⲟⲕ ⲛⲕⲙⲟⲩ ⲙⲡⲙⲟⲩ ⲛⲛⲉⲛⲧⲁⲩϣⲟⲟϭⲟⲩ ϩⲙⲡϩⲏⲧ ⲛⲧⲉⲑⲁⲗⲁⲥⲥⲁ

9 ⲙⲏ ϩⲛⲟⲩϫⲟⲟⲥ ⲕⲛⲁϣϫⲟⲟⲥ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲙⲟⲩⲟⲩⲧ ⲙⲙⲟⲕ ϫⲉⲁⲛⲕ ⲟⲩⲛⲟⲩⲧⲉ ⲁⲛⲟⲕ ⲛⲧⲟⲕ ⲇⲉ ⲛⲧⲕ ⲟⲩⲣⲱⲙⲉ ⲁⲩⲱ ⲛⲧⲕ ⲟⲩⲛⲟⲩⲧⲉ ⲁⲛ

10 ⲕⲛⲁⲧⲁⲕⲟ ϩⲙⲡⲙⲏⲏϣⲉ ⲛⲛⲉⲧⲟ ⲛⲁⲧⲥⲃⲃⲉ ϩⲛⲛϭⲓϫ ⲛⲛϣⲙⲙⲟ ϫⲉⲁⲛⲟⲕ ⲁⲓϣⲁϫⲉ ⲡⲉϫⲉⲡϫⲟⲉⲓⲥ

11 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

12 ϫⲉⲡϣⲏⲣⲉ ⲙⲡⲣⲱⲙⲉ ϫⲓ ⲛⲟⲩⲧⲟⲉⲓⲧ ⲉϫⲙⲡⲁⲣⲭⲱⲛ ⲛⲧⲩⲣⲟⲥ ⲛⲕϫⲟⲟⲥ ⲛⲁϥ ϫⲉⲛⲧⲕ ⲟⲩⲥⲫⲣⲁⲅⲓⲥ ⲛⲧⲟⲛⲧⲛ ⲁⲩⲱ ⲟⲩⲕⲗⲟⲙ ⲛⲥⲁ

13 ⲁⲕϣⲱⲡⲉ ϩⲙⲡⲡⲁⲣⲁⲇⲓⲥⲟⲥ ⲛⲧⲉⲧⲣⲩⲫⲏ ⲙⲡⲛⲟⲩⲧⲉ ⲱⲛⲉ ⲛⲓⲙ ⲉⲛⲁⲛⲟⲩⲁⲕⲧⲁⲁⲩ ϩⲓⲱⲱⲕ ⲟⲩⲥⲁⲣⲇⲓⲟⲛ ⲙⲛⲟⲩⲧⲟⲡⲁⲇⲓⲟⲛ ⲁⲩⲱ ⲟⲩⲥⲙⲁⲣⲁⲕⲧⲟⲥ ⲙⲛⲟⲩⲁⲛⲑⲣⲁⲝ ⲁⲩⲱ ⲟⲩⲥⲁⲡⲡⲓⲣⲟⲛ ⲙⲛⲟⲩⲓⲁⲥⲡⲓⲥ ⲁⲩⲱ ⲟⲩϩⲁⲧ ⲙⲛⲟⲩⲛⲟⲩⲃ ⲁⲩⲱ ⲟⲩⲗⲓⲅⲩⲣⲓⲟⲛ ⲙⲛⲟⲩⲁⲭⲁⲧⲏⲥ ⲁⲩⲱ ⲟⲩⲁⲙⲉⲑⲏⲥⲧⲟⲥ ⲙⲛⲟⲩⲭⲣⲩⲥⲟⲗⲓⲑⲟⲥ ⲁⲩⲱ ⲟⲩⲃⲩⲣⲓⲗⲗⲟⲥ ⲙⲛⲟⲩⲟⲛⲏⲭⲓⲟⲛ ⲁⲩⲱ ⲛⲉⲕⲕⲉⲁϩⲱⲱⲣ ⲁⲕⲙⲁϩⲟⲩ ⲛⲛⲟⲩⲃ ⲙⲛⲛⲉⲕⲁⲡⲟⲑⲏⲕⲏ ⲉⲩⲛⲙⲙⲁⲕ

14 ϫⲓⲛⲡⲉϩⲟⲟⲩ ⲛⲧⲁⲩⲥⲟⲛⲧⲕ ⲁⲓⲕⲁⲁⲕ ⲙⲛⲡⲉⲭⲉⲣⲟⲩⲃⲓⲛ ϩⲙⲡⲧⲟⲟⲩ ⲉⲧⲟⲩⲁⲁⲃ ⲛⲧⲉⲡⲛⲟⲩⲧⲉ ⲁⲕϣⲱⲡⲉ ϩⲛⲧⲙⲏⲧⲉ ⲛϩⲉⲛⲱⲛⲉ ⲛⲕⲱϩⲧ

15 ⲁⲕϣⲱⲡⲉ ⲛⲧⲟⲕ ⲉⲕⲟⲩⲁⲁⲃ ϩⲛⲛⲉⲕϩⲟⲟⲩ ϫⲓⲛⲡⲉϩⲟⲟⲩ ⲛⲧⲁⲩⲥⲟⲛⲧⲕ ⲛⲧⲟⲕ ϣⲁϩⲣⲁⲓ ⲉⲡⲉϩⲟⲟⲩ ⲛⲧⲁⲩϩⲉ ⲉⲛⲉⲕϫⲓⲛϭⲟⲛⲥ ⲛϩⲏⲧⲕ

16 ⲉⲃⲟⲗ ⲙⲡⲁϣⲁⲓ ⲛⲧⲉⲕⲉⲓⲉⲡϣⲱⲧ ⲁⲕⲙⲉϩⲛⲉⲕⲧⲁⲙⲉⲓⲟⲛ ⲛⲁⲛⲟⲙⲓⲁ ⲁⲩⲱ ⲁⲕⲣⲛⲟⲃⲉ ⲁⲩϣⲟⲟϭⲉⲕ ⲁⲩⲛⲟϫⲕ ⲉⲃⲟⲗ ϩⲙⲡⲧⲟⲟⲩ ⲙⲡⲛⲟⲩⲧⲉ ⲁⲩⲱ ⲡⲉⲭⲉⲣⲟⲩⲃⲓⲛ ⲁϥⲥⲟⲕⲕ ⲉⲃⲟⲗ ⲟⲩⲧⲉ ⲛⲱⲛⲉ ⲛⲕⲱϩⲧ

17 ⲡⲉⲕϩⲏⲧ ⲁϥϫⲓⲥⲉ ϩⲙⲡⲉⲕⲥⲁ ⲧⲉⲕⲥⲃⲱ ⲁⲥⲧⲁⲕⲟ ⲙⲛⲡⲉⲕⲥⲁ ⲉⲧⲃⲉⲡⲁϣⲁⲓ ⲛⲛⲉⲕⲛⲟⲃⲉ ⲁⲓⲛⲟϫⲕ ⲉϫⲙⲡⲕⲁϩ ⲁⲓⲧⲁⲁⲕ ⲙⲡⲁⲣⲁⲇⲓⲅⲙⲁ ⲙⲡⲉⲙⲧⲟ ⲉⲃⲟⲗ ⲛⲛⲉⲣⲣⲱⲟⲩ

18 ⲉⲧⲃⲉⲡⲁϣⲁⲓ ⲛⲛⲉⲕⲛⲟⲃⲉ ⲙⲛⲛϫⲓⲛϭⲟⲛⲥ ⲛⲧⲉⲕⲉⲓⲉⲡϣⲱⲧ ⲁⲓϫⲱϩⲙ ⲛⲛⲉⲕⲙⲁ ⲉⲧⲟⲩⲁⲁⲃ ⲁⲩⲱ ϯⲛⲁⲉⲓⲛⲉ ⲛⲟⲩⲕⲱϩⲧ ⲉⲃⲟⲗ ϩⲛⲧⲉⲕⲙⲏⲧⲉ ⲡⲁⲓ ϥⲛⲁⲟⲩⲱⲙ ⲛⲥⲱⲕ ⲁⲩⲱ ϯⲛⲁⲕⲁⲁⲕ ⲉⲕⲟ ⲛⲕⲣⲙⲉⲥ ϩⲓϫⲙⲡⲉⲕⲕⲁϩ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲛⲁⲩ ⲉⲣⲟⲕ ⲧⲏⲣⲟⲩ

19 ⲁⲩⲱ ⲟⲩⲟⲛ ⲛⲓⲙ ⲉⲧⲥⲟⲟⲩⲛ ⲙⲙⲟⲕ ϩⲛⲛϩⲉⲑⲛⲟⲥ ⲥⲉⲛⲁⲁϣⲁϩⲟⲙ ⲉϩⲣⲁⲓ ⲉϫⲱⲕ ⲁⲕϣⲱⲡⲉ ⲛⲟⲩⲧⲁⲕⲟ ⲛⲕⲛⲁϣⲱⲡⲉ ϭⲉ ⲁⲛ ϫⲓⲛⲙⲡⲉⲓⲛⲁⲩ ϣⲁⲉⲛⲉϩ

20 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

21 ϫⲉⲡϣⲏⲣⲉ ⲙⲡⲣⲱⲙⲉ ⲧⲁϫⲣⲟ ⲙⲡⲉⲕϩⲟ ⲉϫⲛⲥⲓⲇⲱⲛ ⲁⲩⲱ ⲛⲕⲡⲣⲟⲫⲏⲧⲉⲩⲉ ⲉϩⲣⲁⲓ ⲉϫⲱⲥ

22 ⲛⲕϫⲟⲟⲥ ⲛⲁϥ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲉⲓⲛⲉ ⲉϩⲣⲁⲓ ⲉϫⲱ ⲥⲓⲇⲱⲛ ⲛⲧⲁϫⲓⲉⲟⲟⲩ ⲛϩⲏⲧⲉ ⲛⲧⲉϩⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ϩⲙⲡⲧⲣⲁⲉⲓⲣⲉ ϩⲣⲁⲓ ⲛϩⲏⲧⲉ ⲛϩⲉⲛⲕⲣⲓⲙⲁ ⲁⲩⲱ ⲛⲧⲁⲧⲃⲃⲟ ⲛϩⲏⲧⲉ

23 ⲟⲩⲥⲛⲟϥ ⲙⲛⲟⲩⲙⲟⲩ ⲥⲉⲛⲁϣⲱⲡⲉ ϩⲛⲛⲟⲩⲡⲗⲁϯⲁ ⲁⲩⲱ ⲛⲉⲛⲧⲁⲩⲣⲁϩⲟⲩ ⲥⲉⲛⲁϩⲉ ϩⲛⲧⲥⲏϥⲉ ⲛϩⲏⲧⲉ ϩⲙⲡⲟⲩⲕⲱⲧⲉ ⲛⲥⲉⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ

24 ⲛⲥⲉⲧⲙϣⲱⲡⲉ ϭⲉ ϫⲓⲛⲙⲡⲉⲓⲛⲁⲩ ϩⲙⲡⲏⲓ ⲙⲡⲓⲥⲣⲁⲏⲗ ⲛⲟⲩⲥⲟⲩⲣⲉ ⲙⲙⲁⲧⲟⲩ ⲁⲩⲱ ⲟⲩϣⲟⲛⲧⲉ ⲛⲙⲕⲁϩ ⲛϩⲏⲧ ⲉⲃⲟⲗ ϩⲛⲛⲉⲧⲉⲙⲡⲉⲩⲕⲱⲧⲉ ⲛⲉⲛⲧⲁⲩⲥⲟϣⲟⲩ ⲛⲥⲉⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ

25 ⲁⲩⲱ ϯⲛⲁⲥⲱⲟⲩϩ ⲉϩⲟⲩⲛ ⲙⲡⲓⲥⲣⲁⲏⲗ ⲉⲃⲟⲗ ϩⲛⲛϩⲉⲑⲛⲟⲥ ⲡⲙⲁ ⲛⲧⲁⲩϫⲟⲟⲣⲟⲩ ⲉⲣⲟϥ ⲁⲩⲱ ϯⲛⲁⲧⲃⲃⲟ ϩⲣⲁⲓ ⲛϩⲏⲧⲉ ⲙⲡⲉⲙⲧⲟ ⲉⲃⲟⲗ ⲛⲛⲗⲁⲟⲥ ⲙⲛⲛϩⲉⲑⲛⲟⲥ ⲛⲥⲉⲟⲩⲱϩ ϩⲓϫⲙⲡⲉⲩⲕⲁϩ ⲡⲁⲓ ⲛⲧⲁⲓⲧⲁⲁϥ ⲙⲡⲁϩⲙϩⲁⲗ ⲓⲁⲕⲱⲃ

26 ⲁⲩⲱ ⲥⲉⲛⲁⲟⲩⲱϩ ϩⲓϫⲱϥ ϩⲛⲟⲩϩⲉⲗⲡⲓⲥ ⲛⲥⲉⲕⲱⲧ ⲛϩⲉⲛⲏⲓ ⲛⲥⲉⲧⲱϭⲉ ⲛϩⲉⲛⲙⲁ ⲛⲉⲗⲟⲟⲗⲉ ⲛⲥⲉⲟⲩⲱϩ ϩⲛⲟⲩϩⲉⲗⲡⲓⲥ ϩⲟⲧⲁⲛ ⲉⲓϣⲁⲛⲉⲓⲣⲉ ⲛⲟⲩⲕⲣⲓⲙⲁ ϩⲛⲟⲩⲟⲛ ⲛⲓⲙ ⲛⲧⲁⲩⲥⲟϣⲟⲩ ⲉⲧϩⲙⲡⲉⲩⲕⲱⲧⲉ ⲁⲩⲱ ⲥⲉⲛⲁⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲡⲉⲩⲛⲟⲩⲧⲉ ⲁⲩⲱ ⲡⲛⲟⲩⲧⲉ ⲛⲛⲉⲩⲉⲓⲟⲧⲉ