Ezekiel 27 — Coptic (Sahidic)

1 ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

2 ϫⲉⲛⲧⲟⲕ ϩⲱⲱⲕ ⲡϣⲱⲡⲉ ⲙⲡⲣⲱⲙⲉ ϫⲓ ⲛⲟⲩⲧⲟⲉⲓⲧ ⲉϫⲛⲥⲟⲣ

3 ⲁⲩⲱ ⲛⲕϫⲟⲟⲥ ⲉϩⲟⲩⲛ ϩⲛⲥⲟⲣ ϩⲓϫⲛⲧⲉϩⲓⲏ ⲛⲃⲱⲕ ⲉϩⲟⲩⲛ ⲉⲧⲉⲑⲁⲗⲁⲥⲥⲁ ⲡⲙⲁ ⲛⲉϣⲱⲧ ⲛⲛⲗⲁⲟⲥ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ⲛⲥⲟⲣ ϫⲉⲛⲧⲟ ⲁⲣϫⲟⲟⲥ ϫⲉⲁⲛⲟⲕ ⲁⲓϯⲡⲉⲓⲥⲁ ⲉⲣⲟⲓ

4 ⲉⲓϩⲙ ⲡϩⲏⲧ ⲛⲧⲑⲁⲗⲁⲥⲥⲁ ⲛⲃⲉⲉⲗⲉⲓⲙ ⲛⲟⲩϣⲏⲣⲉ ⲁⲩϯⲡⲉⲓⲥⲁ ⲉⲣⲟ

5 ⲧⲕⲉⲇⲣⲟⲥ ⲧⲉ ⲉⲃⲟⲗ ϩⲛⲥⲉⲛⲉⲓⲣ ⲁⲩⲕⲟⲧⲥ ⲛⲉ ϩⲉⲛϣⲁⲩ ⲙⲡⲁϭⲉ ⲛϣⲉ ⲛⲕⲩⲡⲁⲣⲓⲥⲟⲥ ⲁⲩϫⲓⲧⲟⲩ ⲉⲃⲟⲗ ϩⲙⲡⲗⲓⲃⲁⲛⲟⲥ ⲉⲧⲣⲉⲩⲧⲁⲙⲓⲟ ⲛⲉ ⲛϩⲉⲛϣⲧⲉ ⲛϣⲉ ⲛⲉⲗⲗⲧⲏ

6 ⲁⲩⲧⲁⲙⲓⲟ ⲛⲛⲟⲩⲟⲥⲣ ⲉⲃⲟⲗ ϩⲙⲡⲕⲁϩ ⲛⲧⲃⲁⲥⲁⲛ ⲛⲟⲩⲣⲡⲏⲩⲉ ⲛⲧⲁⲩⲧⲁⲙⲓⲟⲟⲩ ⲉⲃⲟⲗ ϩⲙⲡⲕⲁϩ ⲛⲉⲗⲉⲫⲁⲥ ϩⲉⲛⲏⲓ ⲉⲩⲟ ⲛϩⲁⲓⲃⲉⲥ ⲛϣⲏⲛ ⲉⲃⲟⲗ ϩⲛⲛⲛⲏⲥⲟⲥ ⲛϫⲉⲧⲧⲓⲛ

7 ⲁⲩⲱ ⲟⲩϣⲛⲥ ⲙⲛϩⲉⲛⲁⲩⲉⲓⲛⲁⲩⲁⲛ ⲉⲃⲟⲗ ϩⲛⲕⲏⲙⲉ ϩⲉⲛⲡⲣⲏϣ ⲁⲩⲧⲁⲙⲓⲟⲟⲩ ⲛⲉ ⲉⲧⲣⲉⲩϯ ⲉⲣⲟⲛⲟⲩⲉⲟⲟⲩ ⲁⲩⲱ ⲉⲧⲣⲉⲩϭⲟⲟⲗⲉ ⲛⲟⲩϩⲩⲁⲕⲓⲛⲑⲓⲛⲟⲥ ⲙⲛⲟⲩϫⲏϭⲉ ⲉⲃⲟⲗ ϩⲛⲛⲛⲏⲥⲟⲥ ⲛⲉⲗⲓⲥⲁⲅ ⲁⲩⲱ ⲁⲩϣⲱⲡⲉ ⲛⲉ ⲛϭⲓⲛⲉϣⲁⲣⲉϭⲟⲟⲗⲉ ⲙⲙⲟⲟⲩ

8 ⲁⲩⲱ ⲛⲟⲩⲁⲣⲭⲱⲛ ⲛⲉⲧⲟⲩⲏϩ ⲛⲉ ϩⲛⲥⲓⲇⲱⲛ ⲁⲩⲱ ⲛⲁⲣⲁⲇⲓⲟⲥ ⲁⲩϣⲱⲡⲉ ⲛⲉ ⲛⲣⲉϥⲥⲱⲕ ⲛⲛⲟⲩⲟⲥⲣ ⲛⲟⲩⲥⲁⲃⲉⲉⲩ ⲥⲟⲣ ⲛⲉⲧϣⲟⲟⲡ ⲛϩⲏⲧⲉ ⲛⲁⲓ ⲛⲉ ⲛⲟⲩⲣⲉϥⲣϩⲙⲙⲉ

9 ⲛⲉⲡⲣⲉⲥⲃⲩⲧⲉⲣⲟⲥ ϩⲛⲛⲉⲩϫⲱⲱⲙⲉ ⲁⲩⲱ ⲛⲉⲩⲥⲟⲫⲟⲥ ⲛⲉⲩϣⲟⲟⲡ ⲛϩⲏⲧⲉ ⲛⲁⲓ ⲁⲩⲧⲁϫⲣⲉ ⲡⲟⲩϣⲟϫⲛⲉ ⲁⲩⲱ ⲛⲉϫⲏⲩ ⲧⲏⲣⲟⲩ ϩⲛⲧⲉⲑⲁⲗⲁⲥⲥⲁ ⲙⲛⲛⲉⲧϩⲛ ⲙⲙⲟⲟⲩ ⲁⲩϣⲱⲡⲉ ⲛⲉ ⲙⲙⲁ ⲛⲧⲱⲧⲡ ⲉϩⲟⲩⲛ

10 ⲙⲡⲉⲣⲥⲟⲥ ⲙⲛⲛⲗⲩⲧⲟⲥ ⲁⲩⲱ ⲛⲁⲧⲗⲓⲃⲩⲏ ⲛⲉⲩϣⲟⲟⲡ ϩⲛⲧⲟⲩϭⲟⲙ ⲛⲟⲩⲣⲉϥⲙⲓϣⲉ ϩⲙⲡⲡⲟⲗⲉⲙⲟⲥ ⲛⲉⲩϩⲱⲕ ⲙⲛⲛⲉⲩⲡⲉⲣⲓⲕⲉⲫⲁⲗⲁⲓⲁ ⲁⲩⲁϣⲧⲟⲩ ⲛϩⲏⲧⲉ ⲛⲁⲓ ⲁⲩϯ ⲙⲡⲟⲩⲉⲟⲟⲩ

11 ⲛϣⲏⲣⲉ ⲛⲁⲣⲁⲇⲓⲟⲥ ⲙⲛⲧⲉⲩϭⲟⲙ ⲛⲉⲩϣⲟⲟⲡ ϩⲓϫⲛⲛⲟⲩⲥⲟⲃⲧ ⲛⲉⲧⲣⲟⲉⲓⲥ ⲛⲉⲩϣⲟⲟⲡ ϩⲛⲛⲟⲩⲡⲩⲣⲅⲟⲥ ⲛⲉⲩϩⲛⲁⲁⲩ ⲛⲕⲁ ⲥⲟⲧⲉ ⲁⲩⲁϣⲧⲟⲩ ⲉⲛⲟⲩϣⲙⲟⲩ ⲙⲡⲟⲩⲕⲱⲧⲉ ⲛⲁⲓ ⲁⲩϫⲱⲕ ⲉⲃⲟⲗ ⲙⲡⲟⲩⲥⲁ

12 ⲛⲣⲱⲙⲉ ⲛⲕⲁⲣⲭⲏⲧⲱⲛ ⲛⲉ ⲛⲟⲩϣⲟⲧⲉ ⲉⲃⲟⲗ ϩⲙⲡⲁϣⲁⲓ ⲛⲧⲟⲩϭⲟⲙ ⲧⲏⲣⲥ ⲁⲩⲡⲱⲣϣ ⲛⲧⲟⲩⲁⲅⲟⲣⲁ ϩⲛⲟⲩϩⲁⲧ ⲙⲛⲟⲩⲛⲟⲩⲃ ⲙⲛⲟⲩⲡⲉⲛⲓⲡⲉ ⲙⲛⲟⲩⲃⲁⲥϭⲛ ⲙⲛⲟⲩⲧⲁϩⲧ

13 ⲁⲩⲱ ⲑⲁⲗⲗⲁⲥ ⲙⲛⲛⲕⲉⲙⲁ ⲧⲏⲣⲟⲩ ⲁⲩⲱ ⲛⲉⲩⲧⲟϣ ⲧⲏⲣⲟⲩ ⲛⲧⲟⲟⲩ ⲛⲉⲩⲟ ⲛⲉϣⲱⲧ ⲛⲉ ϩⲛϩⲉⲛⲯⲩⲭⲏ ⲛⲣⲱⲙⲉ ⲁⲩⲱ ϩⲛϩⲛⲁⲁⲩ ⲛϩⲟⲙⲛⲧ ⲁⲩⲧⲁⲁⲩ ⲉⲧⲟⲩⲉⲡϣⲱⲧ

14 ⲉⲃⲟⲗ ϩⲙⲡⲏⲓ ⲛⲑⲉⲣⲅⲁⲙⲁ ϩⲉⲛⲧⲱⲱⲣ ⲙⲛϩⲉⲛϩⲓⲡⲡⲉⲩⲥ ⲁⲩϯ ⲛⲧⲟⲩⲁⲅⲟⲣⲁ

15 ⲛϣⲏⲣⲉ ⲛⲛⲉϩⲣⲟⲇⲓⲟⲥ ⲛⲉⲩⲟ ⲛⲉϣⲱⲧ ⲛⲉ ⲁⲩⲧⲁϣⲟ ⲛⲧⲟⲩⲉⲓⲉⲡϣⲱⲧ ⲉⲃⲟⲗ ϩⲛⲛⲛⲏⲥⲟⲥ ϩⲛϩⲉⲛϣⲟⲗ ⲛⲉⲗⲉⲫⲁⲥ ⲁⲩⲱ ϩⲛⲛⲉϣⲁⲩⲛⲧⲟⲩ ⲉϩⲟⲩⲛ ⲛⲉϣⲁⲣⲉϯ ⲛⲛⲟⲩⲃⲉⲕⲉⲉⲩⲉ

16 ⲛⲛⲣⲱⲙⲉ ⲧⲟⲩⲓⲉⲡϣⲱⲧ ⲉⲃⲟⲗ ϩⲙⲡⲙⲏⲏϣⲉ ⲉⲧⲧⲏϩ ⲛⲙⲙⲉ ⲁⲩⲛⲧⲥ ⲛⲥⲧⲁⲕⲧⲏ ϩⲓⲁⲩⲉⲓⲛⲁⲩⲁⲛ ⲉⲃⲟⲗ ϩⲛⲑⲁⲣⲥⲓⲥ ⲁⲩⲱ ⲁⲙⲙⲱⲑ ⲙⲛⲕⲟⲣⲭⲟⲣ ⲁⲩϯ ⲛⲧⲟⲩⲁⲅⲟⲣⲁ

17 ⲓⲟⲩⲇⲁⲥ ⲁⲩⲱ ⲛϣⲏⲣⲉ ⲙⲡⲓⲥⲣⲁⲏⲗ ⲛⲁⲓ ⲉⲛⲉⲩⲟ ⲛⲉϣⲱⲧ ⲛⲉ ⲉⲩϯ ⲥⲟⲩⲟ ⲉⲃⲟⲗ ⲙⲛⲛϩⲏⲛⲉ ⲁⲩⲱ ⲧⲕⲁⲥⲓⲁ ⲙⲛⲡⲉⲃⲓⲱ ⲉⲧⲥⲟⲧⲡ ⲁⲩⲱ ⲟⲩⲛⲉϩ ⲙⲛⲟⲩⲥⲟⲛⲧⲉ ⲁⲩⲧⲁⲁⲩ ⲙⲡⲙⲏⲏϣⲉ ⲉⲧⲧⲏϩ ⲛⲙⲙⲉ

18 ⲇⲁⲙⲁⲥⲕⲟⲥ ⲛⲉⲥⲟ ⲛⲉϣⲱⲧ ⲛⲉ ⲉⲃⲟⲗ ϩⲙⲡⲁϣⲁⲓ ⲛⲧⲟⲩϭⲟⲙ ⲧⲏⲣⲥ ⲟⲩⲏⲣⲡ ⲛⲉⲩⲉⲓⲛⲉ ⲙⲙⲟϥ ⲉⲃⲟⲗ ϩⲛⲭⲉⲃⲣⲱⲛ ⲁⲩⲱ ϩⲉⲛⲥⲟⲣⲧ ⲉⲃⲟⲗ ϩⲙⲙⲓⲗⲏⲧⲟⲥ

19 ⲟⲩⲏⲣⲡ ⲁⲩⲧⲁⲁϥ ⲉⲧⲟⲩⲁⲅⲟⲣⲁ ⲁⲩⲱ ⲟⲩⲡⲉⲛⲓⲡⲉ ⲉϥⲙⲟⲛⲅ ⲁⲩⲛⲧϥ ⲉⲃⲟⲗ ϩⲛⲁⲥⲏⲗ ⲁⲩⲱ ⲙⲙⲟⲉⲓⲧ ⲙⲙⲟⲟϣⲉ ⲛⲉⲩϣⲟⲟⲡ ϩⲛⲛⲉⲧⲧⲏϩ ⲛⲙⲙⲉ

20 ⲇⲁⲓⲇⲁⲛ ⲛⲉⲩⲟ ⲛⲉϣⲱⲧ ⲛⲉ ϩⲛϩⲉⲛⲧⲃⲛⲟⲟⲩⲉ ⲉⲩⲥⲟⲧⲡ ⲉϩⲉⲛϩⲁⲣⲙⲁ

21 ⲧⲁⲣⲁⲃⲓⲁ ⲙⲛⲛⲁⲣⲭⲱⲛ ⲧⲏⲣⲟⲩ ⲛⲕⲏⲇⲁⲣ ⲛⲁⲓ ⲛⲉⲩⲟ ⲛⲉϣⲱⲧ ⲛⲉ ϩⲛⲧⲟⲟⲧⲉ ϩⲉⲛϭⲁⲙⲟⲩⲗ ⲙⲛϩⲉⲛⲟⲉⲓⲗⲉ ⲁⲩⲱ ϩⲉⲛϩⲓⲉⲓⲃ ⲛⲁⲓ ⲉⲧⲟⲩⲣⲉⲓⲉⲡϣⲱⲧ ⲙⲙⲟⲟⲩ ⲛⲉ

22 ⲛϭⲓⲛⲉϣⲟⲧⲉ ⲛⲥⲁⲃⲁ ⲁⲩⲱ ⲛⲁⲅⲣⲁⲙⲙⲁ ⲛⲁⲓ ⲉⲛⲉⲩⲟ ⲛⲉϣⲱⲧ ⲛⲉ ϩⲛϩⲉⲛϩⲏⲛⲉ ⲛⲥⲱⲧⲡ ⲁⲩⲱ ⲛⲱⲛⲉ ⲉⲧⲉⲛⲁϣⲉ ⲥⲟⲩⲛⲧⲟⲩ ⲕⲉⲛⲟⲩⲃ ⲁⲩⲧⲁⲁⲩ ⲉⲧⲟⲩⲁⲅⲟⲣⲁ

23 ⲭⲁⲣⲣⲁⲛ ⲙⲛⲭⲁⲛⲁⲁⲛ ⲛⲁⲓ ⲉⲛⲉⲩⲟ ⲛⲉϣⲱⲧ ⲛⲉ ⲁⲥⲥⲟⲩⲣ ⲙⲛⲭⲁⲣⲙⲁⲛ ⲛⲁⲓ ⲉⲛⲉⲩⲟ ⲛⲉϣⲱⲧ ⲛⲉ

24 ⲉⲩⲉⲓⲛⲉ ⲛⲧⲟⲩⲉⲡϣⲱⲧ ⲟⲩϩⲩⲁⲕⲓⲛⲑⲟⲥ ⲁⲩⲱ ϩⲉⲛⲁϩⲱⲱⲣ ⲉⲩⲥⲟⲧⲡ ⲉⲩⲙⲏⲣ ⲉϩⲉⲛⲛⲟⲩϩ

25 ⲁⲩⲱ ϩⲉⲛⲉϫⲏⲩ ⲛϣⲉ ⲛⲕⲩⲡⲁⲣⲓⲥⲟⲥ ⲉⲩⲟ ⲛⲉϣⲱⲧ ⲛⲉ ϩⲙⲡⲙⲏⲏϣⲉ ⲉⲧⲧⲏϩ ⲛⲙⲙⲉ ⲁⲩⲱ ⲁⲣⲥⲉⲓ ⲁⲣⲁϣⲁⲓ ⲉⲙⲁⲧⲉ

26 ⲛⲉⲧⲥⲉⲕ ⲟⲩⲟⲥⲣ ϩⲁⲣⲟⲛⲉⲩⲥⲱⲕ ⲙⲙⲟϩⲙⲡϩⲏⲧ ⲛⲧⲑⲁⲗⲁⲥⲥⲁ ϩⲛⲟⲩⲙⲟⲟⲩ ⲉⲛⲁϣⲱϥ ⲡⲧⲟⲩⲣⲏⲥ ⲁϥⲑⲙⲕⲟ ⲛⲟⲩϭⲟⲙ ⲛⲉⲩϣⲟⲟⲡ ϩⲙⲡϩⲏⲧ ⲛⲧⲉⲑⲁⲗⲁⲥⲥⲁ

27 ⲁⲩⲱ ⲡⲟⲩⲃⲉⲕⲉ ⲙⲛⲛⲉⲧⲧⲏϩ ⲛⲙⲙⲉ ⲁⲩⲱ ⲛⲉⲧⲥⲉⲕ ⲟⲩⲟⲥⲣ ϩⲁⲣⲟⲙⲛⲛⲟⲩⲣⲉϥϩⲙⲙⲉ ⲁⲩⲱ ⲛⲉⲧϫⲓϣⲟϫⲛⲉ ⲛⲙⲙⲉ ⲙⲛⲛⲉⲧⲧⲏϩ ⲛⲙⲙⲉ ⲁⲩⲱ ⲛⲟⲩⲣⲱⲙⲉ ⲧⲏⲣⲟⲩ ⲉⲧⲙⲓϣⲉ ⲁⲩⲱ ⲉⲧⲉⲛⲙⲉ ⲁⲩⲱ ⲧⲟⲩⲥⲟⲟⲩϩⲥ ⲧⲏⲣⲥ ⲥⲉⲛⲁϩⲉ ϩⲛⲧⲟⲩⲙⲏⲧⲉ ϩⲙⲡϩⲏⲧ ⲛⲧⲑⲁⲗⲁⲥⲥⲁ ϩⲙⲡⲉϩⲟⲟⲩ ⲙⲡⲟⲩϩⲉ

28 ⲡⲣⲟⲥ ⲡⲁϣⲁⲓ ⲙⲡⲟⲩϩⲣⲟⲟⲩ ⲛⲟⲩⲣⲉϥϩⲙⲙⲉ ⲥⲉⲛⲁϣⲧⲟⲣⲧⲣ ϩⲛⲟⲩϩⲟⲧⲉ ⲛⲧⲉⲧϩⲟⲧⲉ ϫⲓⲧⲟⲩ

29 ⲁⲩⲱ ⲛⲉⲧⲥⲱⲕ ⲧⲏⲣⲟⲩ ⲛⲛⲟⲩⲟⲥⲣ ⲥⲉⲛⲁⲡⲉ ⲉⲃⲟⲗ ϩⲛⲛⲉϫⲏⲩ ⲁⲩⲱ ⲛⲉϩⲟⲩⲏⲧ ⲙⲛⲛⲛⲉⲉϥ ⲛⲧϩⲏ ⲛⲛⲉϫⲏⲩ ⲛⲧⲉⲑⲁⲗⲁⲥⲥⲁ ⲥⲉⲛⲁⲁϩⲉⲣⲁⲧⲟⲩ ϩⲓⲡⲉⲕⲣⲟ

30 ⲛⲥⲉⲱϣ ⲉⲃⲟⲗ ⲉϫⲱ ϩⲙⲡⲉⲩϩⲣⲟⲟⲩ ⲁⲩⲱ ⲥⲉⲛⲁϫⲓϣⲕⲁⲕ ⲉⲃⲟⲗ ϩⲛⲟⲩⲥⲓϣⲉ ⲛⲥⲉⲛⲉϫ ⲉⲓⲧⲛ ⲉϫⲛⲛⲉⲩⲁⲡⲏⲩⲉ ⲛⲥⲉⲡⲱⲣϣ ⲕⲣⲙⲉⲥ ϩⲁⲣⲟⲟⲩ

32 ⲁⲩⲱ ⲛⲉⲩϣⲏⲣⲉ ⲥⲉⲛⲁϫⲓ ⲛⲟⲩⲧⲟⲉⲓⲧ ⲉϫⲱ ⲉⲧⲣⲉϥϣⲱⲡⲉ ⲛⲉ ⲉⲩⲧⲟⲉⲓⲧ ⲉⲩϫⲱ ⲙⲙⲟⲥ

33 ϫⲉⲁⲣϩⲉ ⲉⲟⲩⲏⲣ ⲛⲃⲉⲕⲉ ⲉⲃⲟⲗ ϩⲛⲧⲉⲑⲁⲗⲁⲥⲥⲁ ⲁⲉⲧⲡ ⲛϩⲉⲑⲛⲟⲥ ⲉⲃⲟⲗ ⲛⲧⲟⲩⲁϣⲏ ⲁⲩⲱ ⲉⲃⲟⲗ ⲙⲡⲟⲩⲙⲏⲏϣⲉ ⲉⲧⲧⲏϩ ⲛⲙⲙⲉ ⲛⲉⲣⲱⲟⲩ ⲧⲏⲣⲟⲩ ⲙⲡⲕⲁϩ ⲁⲣⲁⲁⲩ ⲛⲣⲙⲙⲁⲟ

34 ⲧⲉⲛⲟⲩ ⲇⲉ ⲁⲣⲟⲩⲱⲥϥ ϩⲛⲧϩⲁⲗⲁⲥⲥⲁ ϩⲛⲟⲩⲙⲟⲟⲩ ⲉⲛⲁϣⲱϥ ⲛⲉⲧⲧⲏϩ ⲛⲙⲙⲉ ⲁⲩⲱ ⲧⲟⲩⲥⲟⲟⲩϩⲥ ⲧⲏⲣⲥ ⲁⲩϩⲉ ϩⲛⲧⲟⲩⲙⲏⲧⲉ

35 ⲛⲟⲩⲣⲉϥⲥⲉⲕⲟⲩⲟⲥⲣ ⲧⲏⲣⲟⲩ ⲛⲉⲧⲟⲩⲏϩ ϩⲛⲛⲛⲏⲥⲟⲥ ⲁⲩⲱⲕⲙ ⲉϫⲱ ⲛⲉⲩⲕⲉⲣⲣⲱⲟⲩ ϩⲛⲟⲩϣⲧⲟⲣⲧⲣ ⲁⲩϣⲧⲟⲣⲧⲣ ⲁⲩⲱ ⲁⲩⲣⲓⲙⲉ

36 ⲛⲉϣⲟⲧⲉ ⲉⲃⲟⲗ ϩⲛⲛϩⲉⲑⲛⲟⲥ ⲁⲩⲛⲉϫϩⲣⲟⲟⲩ ⲉϫⲱ ⲁⲣϣⲱⲡⲉ ⲉⲩⲧⲁⲕⲟ ⲛⲧⲉⲛⲁϣⲱⲡⲉ ϭⲉ ⲁⲛ ϣⲁⲉⲛⲉϩ