Ezekiel 23 — Coptic (Sahidic)

1 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

2 ϫⲉⲡϣⲏⲣⲉ ⲙⲡⲣⲱⲙⲉ ⲛⲉⲟⲩⲛⲥϩⲓⲙⲉ ⲥⲛⲧⲉ ⲉⲩⲟ ⲛϣⲉⲉⲣⲉ ⲛⲟⲩⲙⲁⲁⲩ ⲛⲟⲩⲱⲧ

3 ⲁⲩⲡⲟⲣⲛⲉⲩⲉ ϩⲛⲧⲉⲩⲙⲛⲧϣⲉⲉⲣⲉ ϣⲏⲙ ϩⲛⲕⲏⲙⲉ ⲁⲛⲉⲩⲉⲕⲓⲃⲉ ϩⲉ ϩⲙⲡⲙⲁ ⲉⲧⲙⲙⲁⲩ ⲁⲩϫⲱϩⲙ ⲛⲧⲉⲩⲙⲛⲧⲡⲁⲣⲑⲉⲛⲟⲥ

4 ⲁⲩⲱ ⲡⲁⲓ ⲡⲉ ⲡⲉⲩⲣⲁⲛ ⲧⲛⲟϭ ⲛⲥⲱⲛⲉ ⲉⲩⲙⲟⲩⲧⲉ ⲉⲣⲟⲥ ϫⲉⲟⲟⲗⲁ ⲡⲣⲁⲛ ⲛⲧⲉⲥⲱⲛⲉ ⲉⲩⲙⲟⲩⲧⲉ ⲉⲣⲟⲥ ϫⲉⲟⲟⲗⲓⲃⲁ ⲁⲩϣⲱⲡⲉ ⲛⲁⲓ ⲁⲩϫⲡⲟ ⲛϩⲉⲛϣⲏⲣⲉ ⲙⲛϩⲉⲛϣⲉⲉⲣⲉ ⲛⲉⲩⲣⲁⲛ ⲛⲉ ⲛⲁⲓ ⲧⲥⲁⲙⲁⲣⲓⲁ ⲧⲉ ⲟⲟⲗⲁ ⲁⲩⲱ ⲧϩⲓⲉⲣⲟⲩⲥⲁⲗⲏⲙ ⲧⲉ ⲟⲟⲗⲓⲃⲁ

5 ⲁⲥⲡⲟⲣⲛⲉⲩⲉ ⲛϭⲓⲟⲟⲗⲓⲃⲁ ⲁⲥⲥⲁϩⲱⲥ ⲉⲃⲟⲗ ⲙⲙⲟⲓ ⲁⲥⲟⲩⲁϩⲥ ⲛⲥⲁⲛⲉⲥⲙⲉⲣⲁⲧⲉ ⲉⲧⲉⲛⲁⲥⲥⲩⲣⲓⲟⲥ ⲛⲉ ⲉⲧϩⲏⲛ ⲉⲣⲟⲥ

6 ⲉⲣⲉϩⲉⲛϩⲩⲁⲕⲓⲛⲑⲓⲛⲟⲛ ϩⲓⲱⲟⲩ ϩⲉⲛϩⲩⲅⲟⲩⲙⲉⲛⲟⲥ ⲙⲛϩⲉⲛⲥⲧⲣⲁⲧⲏⲅⲟⲥ ϩⲉⲛϩⲣϣⲓⲣⲉ ⲉⲩⲥⲟⲧⲡ ϩⲉⲛϩⲓⲡⲡⲉⲩⲥ ⲧⲏⲣⲟⲩ ⲉⲩⲡⲏⲧ ϩⲓϫⲛⲛⲉⲧϩⲱⲱⲣ

7 ⲁⲩⲱ ⲁⲥϯ ⲛⲁⲩ ⲛⲧⲉⲥⲡⲟⲣⲛⲉⲓⲁ ⲛⲥⲱⲧⲡ ⲛϣⲏⲣⲉ ⲛⲛⲁⲥⲥⲩⲣⲓⲟⲥ ⲙⲛⲟⲩⲟⲛ ⲛⲓⲙ ⲛⲧⲁⲥⲧⲁⲁⲥ ⲛⲁⲩ ⲛⲉⲥϫⲱϩⲙ ϩⲣⲁⲓ ϩⲛⲛⲉⲥⲟⲩⲱϣ ⲧⲏⲣⲟⲩ

8 ⲁⲩⲱ ⲧⲉⲓⲡⲟⲣⲛⲉⲓⲁ ⲛⲧⲁⲥⲁⲁⲥ ϩⲛⲕⲏⲙⲉ ⲙⲡⲉⲥⲕⲁⲁⲥ ⲛⲥⲱⲥ ϫⲉⲛⲉⲩⲛⲕⲟⲧⲕ ⲛⲙⲙⲁⲥ ϫⲓⲛⲧⲉⲥⲙⲛⲧⲕⲟⲩⲓ ⲛⲧⲟⲟⲩ ⲡⲉⲛⲧⲁⲩⲁⲁⲥ ⲛⲥϩⲓⲙⲉ ⲁⲩⲱ ⲧⲉⲩⲡⲟⲣⲛⲉⲓⲁ ⲁⲥⲡⲁϩⲧⲥ ⲉϩⲣⲁⲓ ⲉϫⲱⲥ

9 ⲉⲧⲃⲉⲡⲁⲓ ⲁⲓⲧⲁⲁⲥ ⲉⲧⲟⲟⲧⲟⲩ ⲛⲛⲉⲥⲙⲉⲣⲁⲧⲉ ⲉϩⲣⲁⲓ ⲉⲧⲟⲟⲧⲟⲩ ⲛⲛϣⲏⲣⲉ ⲛⲛⲁⲥⲥⲩⲣⲓⲟⲥ ⲛⲁⲓ ⲛⲧⲁⲥⲟⲩⲁϣⲟⲩ

10 ⲛⲧⲟⲟⲩ ⲛⲉⲛⲧⲁⲩϭⲱⲗⲡ ⲉⲃⲟⲗ ⲛⲧⲉⲥⲁⲥⲭⲩⲙⲟⲥⲩⲛⲏ ⲁⲩϫⲓ ⲛⲛⲉⲥϣⲏⲣⲉ ⲙⲛⲛⲉⲥϣⲉⲉⲣⲉ ⲛⲧⲟⲥ ϩⲱⲱⲥ ⲁⲩⲙⲟⲟⲩⲧⲥ ϩⲛⲧⲥⲏϥⲉ ⲁⲩϣⲁϫⲉ ⲉⲣⲟⲥ ϩⲛⲛⲉϩⲓⲟⲙⲉ ⲁⲩⲉⲓⲣⲉ ⲛⲟⲩϫⲓⲕⲃⲁ ϩⲣⲁⲓ ⲛϩⲏⲧⲥ ⲉⲛⲉⲥϣⲉⲉⲣⲉ

11 ⲁⲩⲱ ⲁⲥⲛⲁⲩ ⲛϭⲓⲧⲉⲥⲥⲱⲛⲉ ⲟⲟⲗⲓⲃⲁ ⲁⲥϫⲱϩⲙ ⲛⲧⲉⲥⲙⲛⲧⲣⲟⲟⲩⲛⲉ ⲉϩⲟⲩⲉ ⲉⲣⲟⲥ ⲁⲩⲱ ⲧⲉⲥⲡⲟⲣⲛⲉⲓⲁ ⲁⲥⲧⲁϣⲟⲥ ⲉϩⲟⲩⲉ ⲧⲡⲟⲣⲛⲉⲓⲁ ⲛⲧⲉⲥⲥⲱⲛⲉ

12 ⲁⲥⲟⲩⲁϩⲥ ⲛⲥⲁⲛϣⲏⲣⲉ ⲛⲛⲁⲥⲥⲩⲣⲓⲟⲥ ⲛϩⲏⲅⲟⲩⲙⲉⲛⲟⲥ ⲙⲛⲛⲉⲥⲧⲣⲁⲧⲏⲅⲟⲥ ⲉⲧϩⲏⲛ ⲉⲣⲟⲥ ⲉⲩϯ ϫⲱⲟⲩ ⲛϩⲉⲛϩⲟⲉⲓⲧⲉ ⲉⲛⲉⲥⲱⲟⲩ ϩⲉⲛϩⲓⲡⲡⲉⲩⲥ ⲛⲉ ⲉⲩⲡⲏⲧ ϩⲓϫⲛⲛⲉϩⲣⲱⲱⲣ ⲛⲥⲱⲧⲡ ⲧⲏⲣⲟⲩ ⲛⲉ

13 ⲁⲩⲱ ⲁⲩⲛⲁⲩ ϫⲉⲁⲩϫⲱϩⲙ ⲟⲩϩⲓⲏ ⲛⲟⲩⲱⲧ ⲁⲥϣⲱⲡⲉ ⲛⲁⲩ ⲛⲧⲥⲛⲧⲉ

14 ⲁⲥⲟⲩⲱϩ ⲟⲛ ⲉϫⲛⲧⲉⲥⲡⲟⲣⲛⲉⲓⲁ ⲁⲥⲛⲁⲩ ⲉϩⲉⲛⲣⲱⲙⲉ ⲉⲩⲥⲏϩ ϩⲛⲟⲩϫⲟ ⲛϩⲓⲕⲱⲛ ⲛⲭⲁⲗⲇⲁⲓⲟⲥ ⲉⲩⲥⲏϩ ϩⲛⲟⲩϩⲛⲁⲁⲩ ⲛⲥϩⲁⲓ

15 ⲉⲩⲙⲏⲣ ⲉϫⲛⲧⲉⲩϯⲡⲉ ⲛϩⲉⲛⲙⲟϫϩ ⲛⲁⲩⲉⲓⲛⲁⲩⲁⲛ ⲉⲩϫⲏϭⲉ ⲉⲣⲉⲟⲩϩⲟ ⲛϣⲟⲙⲛⲧ ⲛⲥⲙⲟⲧ ϩⲓϫⲛⲛⲉⲩⲁⲡⲏⲩⲉ ⲧⲏⲣⲟⲩ ⲙⲡⲉⲓⲛⲉ ⲛⲛϣⲏⲣⲉ ⲛⲛⲉⲭⲁⲗⲇⲁⲓⲟⲥ ⲙⲡⲕⲁϩ ⲛⲧⲉⲩⲡⲟⲗⲓⲥ

16 ⲁⲥⲙⲉⲣⲓⲧⲟⲩ ϩⲙⲡⲛⲁⲩ ⲉⲣⲟⲟⲩ ⲛⲛⲉⲥⲃⲁⲗ ⲁⲩⲱ ⲁⲥϫⲟⲟⲩ ⲛϩⲉⲛϥⲁⲓϣⲓⲛⲉ ϣⲁⲣⲟⲟⲩ ⲉϩⲣⲁⲓ ⲉⲡⲕⲁϩ ⲛⲛⲉⲭⲁⲗⲇⲁⲓⲟⲥ

17 ⲁⲩⲉⲓ ϣⲁⲣⲟⲥ ⲛϭⲓⲛϣⲏⲣⲉ ⲛⲧⲃⲁⲃⲩⲗⲱⲛ ⲉϭⲟⲉⲓⲗⲉ ⲉⲣⲟⲥ ⲉϣⲱⲡⲉ ⲛⲙⲙⲁⲥ ⲁⲩϫⲁϩⲙⲉⲥ ϩⲛⲧⲉⲥⲡⲟⲣⲛⲉⲓⲁ ⲁⲥϫⲱϩⲙ ϩⲣⲁⲓ ⲛϩⲏⲧⲟⲩ ⲁⲩⲱ ⲁⲧⲉⲥⲯⲩⲭⲏ ⲥⲁϩⲱⲥ ⲉⲃⲟⲗ ⲙⲙⲟⲟⲩ

18 ⲁⲥϭⲱⲗⲡ ⲉⲃⲟⲗ ⲛⲧⲉⲥⲡⲟⲣⲛⲉⲓⲁ ⲁⲩⲱ ⲧⲉⲥⲁⲥⲭⲏⲙⲟⲩⲥⲩⲛⲏ ⲁⲥϭⲟⲗⲡⲥ ⲉⲃⲟⲗ ⲁⲧⲁⲯⲩⲭⲏ ⲥⲁϩⲱⲥ ⲉⲃⲟⲗ ⲙⲙⲟⲥ ⲛⲧϩⲉ ⲛⲧⲁⲧⲁⲯⲩⲭⲏ ⲥⲁϩⲱⲥ ⲉⲃⲟⲗ ⲛⲧⲉⲥⲥⲱⲛⲉ

19 ⲁⲩⲱ ⲁⲣⲧⲁϣⲟ ⲛⲧⲟⲩⲡⲟⲣⲛⲉⲓⲁ ⲉⲧⲣⲉⲣⲡⲙⲉⲉⲩⲉ ⲛⲛⲉϩⲟⲟⲩ ⲛⲧⲟⲩⲙⲛⲧⲕⲟⲩⲓ ⲛⲁⲓ ⲛⲧⲁⲣⲡⲟⲣⲛⲉⲩⲉ ⲛϩⲏⲧⲟⲩ ϩⲛⲕⲏⲙⲉ

20 ⲁⲩⲱ ⲁⲣⲧⲁⲁⲧⲉ ⲛⲛⲉⲭⲁⲗⲇⲁⲓⲟⲥ ⲛⲁⲓ ⲉⲣⲉⲛⲉⲩⲥⲁⲣⲝ ⲟ ⲛⲧϩⲉ ⲛⲛⲁⲛⲉⲟⲟⲩ ⲁⲩⲱ ⲉⲣⲉⲕⲟⲩⲛⲧⲟⲩ ⲟ ⲛⲧϩⲉ ⲛⲕⲟⲩⲛⲧⲟⲩ ⲛⲛⲉϩⲧⲱⲱⲣ

21 ⲁⲩⲱ ⲁⲣϭⲙⲡϣⲓⲛⲉ ⲛⲧⲁⲛⲟⲙⲓⲁ ⲛⲧⲟⲩⲙⲛⲧⲕⲟⲩⲓ ⲛⲉϩⲃⲏⲩⲉ ⲛⲧⲁⲣⲁⲁⲩ ϩⲛⲕⲏⲙⲉ ϩⲙⲡⲟⲩⲙⲁⲛϣⲱⲡⲉ ⲡⲙⲁ ⲛⲧⲁⲛⲉⲕⲓⲃⲉ ⲛⲧⲟⲩⲙⲛⲧⲕⲟⲩⲓ ϣⲱⲡⲉ ⲛϩⲏⲧϥ

22 ⲉⲧⲃⲉⲡⲁⲓ ⲟⲟⲗⲓⲃⲁ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲧⲟⲩⲛⲟⲩⲥ ⲛⲟⲩⲙⲉⲣⲁⲧⲉ ⲉϩⲣⲁⲓ ⲉϫⲱ ⲛⲁⲓ ⲛⲧⲁⲧⲟⲩⲯⲩⲭⲏ ⲟⲩⲉ ⲙⲙⲟⲟⲩ ⲁⲩⲱ ϯⲛⲁⲛⲧⲟⲩ ⲉϩⲣⲁⲓ ⲉϫⲱ ⲙⲡⲟⲩⲕⲱⲧⲉ

23 ⲛϣⲏⲣⲉ ⲛⲧⲃⲁⲃⲩⲗⲱⲛ ⲙⲛⲛⲉⲭⲁⲗⲇⲁⲓⲟⲥ ⲧⲏⲣⲟⲩ ⲫⲁⲕⲟⲩⲕ ⲙⲛⲥⲟⲩⲭ ⲙⲛⲭⲟⲩⲉ ⲙⲛⲛϣⲏⲣⲉ ⲧⲏⲣⲟⲩ ⲛⲛⲁⲥⲥⲩⲣⲓⲟⲥ ⲛⲙⲙⲁⲩ ϩⲉⲛϩⲣϣⲓⲣⲉ ⲛⲥⲱⲧⲡ ϩⲉⲛϩⲏⲅⲉⲙⲱⲛ ⲙⲛϩⲉⲛⲥⲧⲣⲁⲧⲏⲅⲟⲥ ϩⲉⲛⲧⲣⲓⲥⲧⲁⲧⲏⲥ ⲧⲏⲣⲟⲩ ⲛⲉ ⲛⲣⲙⲛⲥⲟⲉⲓⲧ ⲉⲩⲡⲏⲧ ϩⲓϫⲛⲛⲉϩⲧⲱⲱⲣ

24 ⲥⲉⲛⲏⲩ ⲧⲏⲣⲟⲩ ⲉϩⲣⲁⲓ ⲉϫⲱ ϫⲓⲛⲡⲉⲙϩⲓⲧ ⲛϭⲓϩⲉⲛϩⲁⲣⲙⲁ ⲙⲛϩⲉⲛⲧⲣⲟⲭⲟⲥ ⲙⲛⲟⲩⲙⲏⲏϣⲉ ⲛⲗⲁⲟⲥ ⲉⲩⲁⲙⲁϩⲧⲉ ⲛϩⲉⲛⲑⲩⲣⲱⲛ ⲙⲛϩⲉⲛϩⲟⲡⲗⲟⲛ ⲛⲥⲉⲕⲱⲧⲉ ⲉⲣⲟⲉⲩⲣⲟⲉⲓⲥ ⲉⲣⲟ

25 ⲛⲧⲁϯ ⲛⲟⲩϩⲁⲡ ⲙⲡⲉⲩⲙⲧⲟ ⲉⲃⲟⲗ ⲛⲥⲉⲉⲓⲛⲉ ⲛⲟⲩϫⲓⲕⲃⲁ ⲉϩⲣⲁⲓ ⲉϫⲱ ϩⲛⲛⲉⲩϩⲁⲡ ⲛⲧⲉⲡⲁⲕⲱϩ ϣⲱⲡⲉ ϩⲣⲁⲓ ⲛϩⲏⲧⲉ ⲛⲥⲉⲉⲓⲣⲉ ⲛⲙⲙⲉ ϩⲛⲟⲩⲟⲣⲅⲏ ⲛϭⲱⲛⲧ ⲛⲟⲩϭⲃϣⲁ ⲙⲛⲛⲟⲩⲙⲁⲁϫⲉ ⲥⲉⲛⲁϥⲓⲧⲟⲩ ⲁⲩⲱ ⲛⲟⲩⲕⲉⲥⲉⲉⲡⲉ ⲥⲉⲛⲁⲣⲁϩⲧⲟⲩ ϩⲛⲧⲥⲏϥⲉ ⲥⲉⲛⲁϥⲓ ⲛⲛⲟⲩϣⲏⲣⲉ ⲙⲛⲛⲟⲩϣⲉⲉⲣⲉ ⲁⲩⲱ ⲛⲟⲩⲕⲉϣⲱϫⲡ ⲧⲥⲁⲧⲉ ⲛⲁⲟⲩⲟⲙⲟⲩ

26 ⲛⲥⲉⲕⲁⲁⲧⲉ ⲕⲁϩⲏⲩ ⲛⲛⲟⲩϩⲟⲓⲧⲉ ⲛⲥⲉϥⲓ ⲛⲛⲉⲥⲕⲩⲏ ⲙⲡⲟⲩϣⲟⲩϣⲟⲩ

27 ⲁⲩⲱ ϯⲛⲁⲕⲧⲟ ⲉⲃⲟⲗ ⲙⲙⲟⲛⲟⲩⲙⲛⲧⲁⲥⲉⲃⲏⲥ ⲙⲛⲛⲟⲩⲕⲉⲡⲟⲣⲛⲉⲓⲁ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ ⲁⲩⲱ ⲛⲧⲉⲧⲙϥⲓⲁⲧⲉ ⲉϩⲣⲁⲓ ⲉⲣⲟⲟⲩ ⲛⲧⲉⲧⲙⲣⲡⲙⲉⲉⲩⲉ ⲛⲕⲏⲙⲉ ϫⲓⲛⲧⲉⲛⲟⲩ

28 ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲡⲁⲣⲁⲇⲓⲇⲟⲩ ⲙⲙⲟⲉⲧⲟⲟⲧⲟⲩ ⲛⲛⲉⲧⲣⲙⲟⲥⲧⲉ ⲙⲙⲟⲟⲩ ⲛⲁⲓ ⲛⲧⲁⲧⲟⲩⲯⲩⲭⲏ ⲟⲩⲉ ⲙⲙⲟⲟⲩ

29 ⲛⲥⲉⲉⲓⲣⲉ ϩⲣⲁⲓ ⲛϩⲏⲧⲉ ϩⲛⲟⲩⲙⲟⲥⲧⲉ ⲛⲥⲉϥⲓ ⲙⲡⲟⲩϩⲓⲥⲉ ⲙⲛⲛⲟⲩⲙⲟⲕϩⲥ ⲧⲏⲣⲟⲩ ⲛⲧⲉϣⲱⲡⲉ ⲉⲣⲉⲕⲏⲕⲁϩⲏⲩ ⲉⲣⲉⲁⲥⲭⲩⲙⲟⲛⲉⲓ ⲛⲥϭⲱⲗⲡ ⲉⲃⲟⲗ ⲛϭⲓⲧⲁⲥⲭⲏⲙⲟⲥⲩⲛⲏ ⲛⲧⲟⲩⲡⲟⲣⲛⲉⲓⲁ ⲙⲛⲧⲟⲩⲙⲛⲧⲁⲥⲉⲃⲏⲥ ⲧⲟⲩⲡⲟⲣⲛⲉⲓⲁ

30 ⲧⲉⲛⲧⲁⲥⲣⲛⲁⲓ ⲛⲉ ϩⲙⲡⲧⲣⲉⲡⲟⲣⲛⲉⲩⲉ ⲉⲟⲩⲁϩⲉ ⲛⲥⲁⲛϩⲉⲑⲛⲟⲥ ⲁⲩⲱ ⲉϫⲱϩⲙ ϩⲣⲁⲓ ϩⲙⲡⲟⲩⲱϣ ⲛϩⲏⲧ

31 ⲁⲣⲙⲟⲟϣⲉ ϩⲛⲧⲉϩⲓⲏ ⲛⲧⲟⲩⲥⲱⲛⲉ ϯⲛⲁϯ ϭⲉ ⲙⲡⲉⲥⲁⲡⲟⲧ ⲉϩⲣⲁⲓ ⲉⲧⲟⲟⲧⲉ

32 ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲡⲁⲡⲟⲧ ⲛⲧⲟⲩⲥⲱⲛⲉ ⲉⲣⲉⲥⲟⲟϥ ⲡⲉⲧϣⲏⲕ ⲁⲩⲱ ⲡⲉⲧⲟⲩⲱϣⲥ ⲡⲉⲧⲟ ⲛϩⲟⲩⲟ ⲉⲧⲣⲉⲡϯϩⲉ ϫⲱⲕ ⲉⲃⲟⲗ

33 ⲁⲩⲱ ⲛⲧⲉⲥⲱϣⲙ ⲉⲙⲁⲧⲉ ⲡⲁⲡⲟⲧ ⲛⲧⲟⲩⲥⲱⲛⲉ ⲧⲥⲁⲙⲁⲣⲓⲁ ⲡⲁⲡⲟⲧ ⲙⲡⲧⲁⲕⲟ ⲡⲉ

34 ⲁⲩⲱ ⲉⲣⲉⲥⲟⲟϥ ⲛⲉⲥϣⲁ ⲙⲛⲛⲉⲥⲥⲟⲩⲟⲩⲁ ϯⲛⲁⲕⲧⲟⲟⲩ ⲉⲃⲟⲗ ⲙⲙⲟⲥ ϫⲉⲁⲛⲟⲕ ⲁⲓϣⲁϫⲉ ⲡⲉϫⲉⲡϫⲟⲉⲓⲥ

35 ⲉⲧⲃⲉⲡⲁⲓ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲃⲟⲗ ϫⲉⲁⲣⲣⲡⲁⲱⲃϣ ⲁⲩⲱ ⲁⲣⲛⲟϫⲧ ϩⲓⲡⲁϩⲟⲩ ⲙⲡⲟⲩⲥⲱⲙⲁ ⲛⲧⲟ ϩⲱⲱⲧⲉ ϫⲓ ⲛⲧⲟⲩⲙⲛⲧⲁⲥⲉⲃⲏⲥ ⲙⲛⲧⲟⲩⲡⲟⲣⲛⲉⲓⲁ

36 ⲁⲩⲱ ⲡⲉϫⲉⲡϫⲟⲉⲓⲥ ⲛⲁⲓ ϫⲉⲡϣⲏⲣⲉ ⲙⲡⲣⲱⲙⲉ ⲛⲕⲛⲁϯϩⲁⲡ ⲁⲛ ⲉⲟⲟⲗⲁ ⲙⲛⲟⲟⲗⲓⲃⲁ ⲁⲩⲱ ⲛⲕϫⲱ ⲉⲣⲟⲟⲩ ⲛⲛⲉⲩⲁⲛⲟⲙⲓⲁ

37 ⲉⲃⲟⲗ ϫⲉⲁⲩⲣⲛⲟⲉⲓⲕ ⲁⲩⲱ ⲡⲉⲥⲛⲟϥ ϩⲣⲁⲓ ϩⲛⲛⲉⲩϭⲓϫ ⲁⲩⲣⲛⲟⲉⲓⲕ ϩⲛⲛⲉⲩⲟⲩⲱϣ ⲛϩⲏⲧ ⲁⲩⲱ ⲛⲉⲩϣⲏⲣⲉ ⲛⲧⲁⲩϫⲡⲟⲟⲩ ⲛⲁⲓ ⲁⲩⲛⲧⲟⲩ ⲉⲃⲟⲗ ϩⲓⲧⲟⲟⲧⲥ ⲛⲧⲥⲁⲧⲉ

38 ⲛⲁⲓ ⲁⲩⲁⲁⲩ ⲛⲁⲓ ⲁⲩϫⲱϩⲙ ⲛⲛⲁⲡⲉⲧⲟⲩⲁⲁⲃ ⲁⲩⲱ ⲁⲩϥⲱⲧⲉ ⲛⲛⲁⲕⲉⲥⲁⲃⲃⲁⲧⲟⲛ

39 ϩⲙⲡⲧⲣⲉⲩⲕⲱⲛⲥ ⲛⲛⲉⲩϣⲏⲣⲉ ⲛⲛⲉⲩⲉⲓⲇⲱⲗⲟⲛ ⲁⲩⲃⲱⲕ ⲉϩⲟⲩⲛ ⲉⲛⲁⲡⲉⲧⲟⲩⲁⲁⲃ ⲉⲧⲣⲉⲩϫⲁϩⲙⲟⲩ ⲁⲩⲱ ⲉⲓⲥ ϩⲏⲏⲧⲉ ⲛⲉⲩⲉⲓⲣⲉ ⲛⲧⲉⲓϩⲉ ϩⲛⲧⲙⲏⲧⲉ ⲙⲡⲏⲓ

40 ⲁⲩⲱ ϫⲉⲛⲣⲱⲙⲉ ⲉⲧⲛⲏⲩ ⲛⲉ ⲙⲡⲟⲩⲉ ⲛⲁⲓ ⲉⲧⲉⲣⲉϫⲟⲟⲩ ⲛϩⲉⲛϥⲁⲓϣⲓⲛⲉ ⲛⲥⲱⲟⲩ ϩⲙⲡⲧⲣⲉⲩⲉⲓ ϣⲁⲣⲟⲛⲧⲉⲩⲛⲟⲩ ϣⲁⲣⲉϫⲟⲕⲙⲉ ⲛⲁⲩ ⲁⲩⲱ ⲛⲉϣⲁⲣⲉϯⲡⲟⲩⲥⲧⲏⲙ ⲉⲛⲟⲩⲃⲁⲗ ⲛⲉϣⲁⲣⲕⲟⲥⲙⲉⲓ ⲙⲙⲟϩⲛⲟⲩⲕⲟⲥⲙⲟⲥ

41 ⲛⲉϣⲁⲣⲉϩⲙⲟⲟⲥ ϩⲓϫⲛⲟⲩϭⲗⲟϭ ⲉϥⲡⲟⲣϣ ⲉⲣⲉⲟⲩⲧⲣⲁⲡⲉⲍⲁ ϩⲓⲧϩⲏ ⲙⲙⲟⲉⲥϭⲟⲣϭ ⲁⲩⲱ ⲡⲁϣⲟⲩϩⲏⲛⲉ ⲙⲛⲡⲁⲛⲉϩ ⲛⲉⲩⲉⲩⲫⲣⲁⲛⲉ ⲡⲉ ϩⲣⲁⲓ ⲛϩⲏⲧⲟⲩ

42 ⲁⲩⲱ ⲛⲉⲩⲣⲧⲱⲣⲉ ⲡⲉ ϩⲛⲟⲩϩⲣⲟⲟⲩ ⲛϣⲱⲛϥ ⲛⲛⲁϩⲣⲛϩⲉⲛⲕⲉⲣⲱⲙⲉ ⲉⲃⲟⲗ ϩⲛⲟⲩⲁϣⲏ ⲛⲣⲱⲙⲉ ⲉⲁⲩⲉⲓ ⲉⲃⲟⲗ ϩⲓⲡϫⲁⲓⲉ ⲉⲩϯ ⲛϩⲉⲛⲯⲉⲗⲗⲓⲟⲛ ⲉⲛⲉⲩϭⲓϫ ⲁⲩⲱ ⲟⲩⲕⲗⲟⲙ ⲛϣⲟⲩϣⲟⲩ ⲉϫⲛⲛⲉⲩⲁⲡⲏⲩⲉ

43 ⲁⲩⲱ ⲁⲓϫⲟⲟⲥ ϫⲉⲙⲏ ⲉⲩⲛⲁⲣⲛⲟⲉⲓⲕ ⲁⲛ ϩⲛⲛⲁⲓ ⲁⲩⲱ ϩⲉⲛϩⲃⲏⲩⲉ ⲛⲉ ⲙⲡⲟⲣⲛⲏ ⲛⲧⲟⲥ ϩⲱⲱⲥ ⲁⲥⲡⲟⲣⲛⲉⲩⲉ

44 ⲉⲁⲩⲃⲱⲕ ⲉϩⲟⲩⲛ ϣⲁⲣⲟⲥ ⲛⲧϩⲉ ⲉϣⲁⲩⲃⲱⲕ ⲉϩⲟⲩⲛ ϣⲁⲟⲩⲥϩⲓⲙⲉ ⲙⲡⲟⲣⲛⲏ ⲧⲁⲓ ⲧⲉ ⲧϩⲉ ⲉϣⲁⲩⲃⲱⲕ ⲉϩⲟⲩⲛ ϣⲁⲟⲟⲗⲁ ⲙⲛⲟⲟⲗⲓⲃⲁ ⲉⲧⲣⲉⲩⲉⲓⲣⲉ ⲛⲟⲩⲁⲛⲟⲙⲓⲁ

45 ⲁⲩⲱ ϩⲉⲛⲣⲱⲙⲉ ⲛⲇⲓⲕⲁⲓⲟⲥ ⲛⲧⲟⲟⲩ ⲛⲉⲧⲛⲁϫⲓⲕⲃⲁ ⲙⲙⲟⲟⲩ ϩⲛⲟⲩϫⲓⲕⲃⲁ ⲛⲥϩⲓⲙⲉ ⲛⲛⲟⲉⲓⲕ ⲙⲛⲟⲩϫⲓⲕⲃⲁ ⲛⲥⲛⲟϥ ⲉⲃⲟⲗ ϫⲉϩⲉⲛⲛⲟⲉⲓⲕ ⲛⲉ ⲁⲩⲱ ⲡⲉⲥⲛⲟϥ ϩⲛⲛⲉⲩϭⲓϫ

46 ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲁⲛⲓⲛⲉ ⲉϩⲣⲁⲓ ⲉϫⲱⲟⲩ ⲛⲟⲩⲟⲭⲗⲟⲥ ⲁⲩⲱ ⲛⲕⲧⲁⲁⲩ ⲉⲩϣⲧⲟⲣⲧⲣ ⲙⲛⲟⲩⲧⲱⲣⲡ

47 ⲛⲥⲉϩⲓⲱⲛⲉ ⲉⲣⲟⲟⲩ ϩⲛϩⲉⲛⲱⲛⲉ ⲛϭⲓϩⲉⲛⲙⲏⲏϣⲉ ⲛⲕⲕⲟⲛⲥⲟⲩ ϩⲛⲛⲉⲩⲥⲏϥⲉ ⲥⲉⲛⲁⲙⲟⲩⲟⲩⲧ ⲛⲛⲉⲩϣⲏⲣⲉ ⲙⲛⲛⲉⲩϣⲉⲉⲣⲉ ⲁⲩⲱ ⲛⲉⲩⲏⲓ ⲥⲉⲛⲁⲣⲟⲕϩⲟⲩ ϩⲛⲟⲩⲥⲁⲧⲉ

48 ⲛⲧⲁⲕⲧⲟ ⲛⲧⲙⲛⲧⲁⲥⲉⲃⲏⲥ ⲉⲃⲟⲗ ϩⲓϫⲙⲡⲕⲁϩ ⲛⲥⲉϫⲓⲥⲃⲱ ⲛϭⲓⲛⲉϩⲓⲟⲙⲉ ⲧⲏⲣⲟⲩ ⲛⲥⲉⲧⲙⲉⲓⲣⲉ ⲕⲁⲧⲁⲛⲉⲩⲙⲛⲧⲁⲥⲉⲃⲏⲥ

49 ⲧⲉⲧⲛⲙⲛⲧⲁⲥⲉⲃⲏⲥ ⲇⲉ ⲥⲉⲛⲁⲛⲧⲥ ⲉϩⲣⲁⲓ ⲉϫⲛⲧⲏⲩⲧⲛ ⲁⲩⲱ ⲧⲉⲧⲛⲁϫⲓ ⲛⲛⲟⲃⲉ ⲛⲛⲉⲧⲛⲟⲩⲱϣ ⲛϩⲏⲧ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ