Ezekiel 22 — Coptic (Sahidic)

1 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

2 ϫⲉⲛⲧⲟⲕ ϩⲱⲱⲕ ⲡϣⲏⲣⲉ ⲙⲡⲣⲱⲙⲉ ϫⲓϩⲁⲡ ⲟⲩⲃⲉ ⲧⲡⲟⲗⲓⲥ ⲛⲛⲉⲥⲛⲱⲱϥ ⲁⲩⲱ ⲛⲉⲕⲟⲩⲱⲛϩ ⲛⲁⲥ ⲉⲃⲟⲗ ⲛⲛⲉⲥⲁⲛⲟⲙⲓⲁ ⲧⲏⲣⲟⲩ

3 ⲛⲕϫⲟⲟⲥ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲩ ϫⲉⲱ ⲧⲡⲟⲗⲓⲥ ⲉⲧⲡⲉϩⲧ ⲥⲛⲟϥ ⲉⲃⲟⲗ ϩⲛⲧⲉⲥⲙⲏⲧⲉ ⲉⲧⲣⲉⲡⲉⲥⲟⲩⲟⲉⲓϣ ⲉⲓ ⲁⲩⲱ ⲉⲥⲉⲓⲣⲉ ⲛϩⲉⲛⲟⲩⲱϣ ⲛϩⲏⲧ ⲉⲩϯⲟⲩⲃⲏⲥ ⲉⲧⲣⲉⲥϫⲱϩⲙ

4 ϩⲛⲛⲉⲥⲛⲱⲱϥ ⲛⲧⲁⲣⲡⲟⲟⲛⲟⲩ ⲁⲣϩⲉ ⲉⲃⲟⲗ ⲁⲩⲱ ⲛⲉϩⲃⲏⲩⲉ ⲉⲛⲉⲣⲉⲉⲓⲣⲉ ⲙⲙⲟⲟⲩ ⲁⲣϫⲱϩⲙ ⲛϩⲏⲧⲟⲩ ⲉⲧⲣⲉⲛⲟⲩϩⲟⲟⲩ ϩⲱⲛ ⲉϩⲟⲩⲛ ⲉⲉⲓⲛⲉ ⲙⲡⲉⲟⲩⲟⲉⲓϣ ⲛⲛⲟⲩⲣⲙⲡⲟⲟⲩⲉ ⲉⲧⲃⲉⲡⲁⲓ ⲁⲓⲧⲁⲁⲧⲉ ⲉⲩⲛⲟϭⲛⲉϭ ⲛⲛϩⲉⲑⲛⲟⲥ ⲙⲛⲟⲩⲥⲱⲃⲉ ⲛⲛⲉⲭⲱⲣⲁ ⲧⲏⲣⲟⲩ

5 ⲉⲧϩⲏⲛ ⲉϩⲟⲩⲛ ⲉⲣⲟⲙⲛⲛⲉⲧⲟⲩⲏⲩ ⲙⲙⲟⲛⲥⲉⲣϩⲁⲗ ⲙⲙⲟⲧⲁⲕⲁⲑⲁⲣⲧⲟⲥ ⲧⲉⲧⲟ ⲛⲥⲟⲉⲓⲧ ⲧⲉⲧⲟϣ ϩⲛⲛⲉⲥⲁⲛⲟⲙⲓⲁ

6 ⲉⲓⲥ ϩⲏⲏⲧⲉ ⲛϩⲏⲅⲟⲩⲙⲉⲛⲟⲥ ⲙⲡⲏⲓ ⲙⲡⲓⲥⲣⲁⲏⲗ ⲡⲟⲩⲁ ⲡⲟⲩⲁ ⲛⲛⲉϥⲥⲩⲅⲅⲉⲛⲏⲥ ⲉⲩϫⲱϩⲙ ϩⲣⲁⲓ ⲛϩⲏⲧⲉ ϫⲉⲕⲁⲥ ⲉⲩⲉⲡⲱϩⲧ ⲉⲃⲟⲗ ⲛⲟⲩⲥⲛⲟϥ

7 ⲁⲩϫⲉ ⲡⲉⲧϩⲟⲟⲩ ⲛⲥⲁⲟⲩⲉⲓⲱⲧ ⲙⲛⲟⲩⲙⲁⲁⲩ ϩⲣⲁⲓ ⲛϩⲏⲧⲉ ⲟⲩⲡⲣⲟⲥⲩⲗⲏⲧⲟⲥ ⲁⲩϫⲓⲧϥ ⲛϭⲟⲛⲥ ϩⲣⲁⲓ ⲛϩⲏⲧⲉ ⲟⲩⲟⲣⲫⲁⲛⲟⲥ ⲙⲛⲟⲩⲭⲏⲣⲁ ⲁⲩⲑⲙⲕⲟⲟⲩ ⲛϩⲏⲧⲉ

8 ⲁⲩⲱ ⲛⲁⲡⲉⲧⲟⲩⲁⲁⲃ ⲁⲩⲥⲟϣϥⲟⲩ ⲛⲁⲕⲉⲥⲁⲃⲃⲁⲧⲟⲛ ⲁⲩϫⲁϩⲙⲟⲩ ⲛϩⲏⲧⲉ

9 ϩⲉⲛⲣⲱⲙⲉ ⲛⲥⲟⲟⲛⲉ ⲛⲉⲩⲛϩⲏⲧⲉ ϫⲉⲕⲁⲥ ⲉⲩⲉⲡⲉϩⲧ ⲥⲛⲟϥ ⲉⲃⲟⲗ ϩⲣⲁⲓ ⲛϩⲏⲧⲉ ⲁⲩⲱ ⲛⲉⲧⲟⲩⲱⲙ ϩⲓϫⲛⲛⲧⲟⲟⲩ ⲛⲉⲩⲛϩⲣⲁⲓ ⲛϩⲏⲧⲉ ⲛⲉⲩⲉⲓⲣⲉ ⲛϩⲉⲛϫⲱϩⲙ ϩⲛⲧⲟⲩⲙⲏⲧⲉ

10 ⲧⲁⲥⲭⲩⲙⲟⲥⲩⲛⲏ ⲛⲟⲩⲉⲓⲱⲧ ⲁⲩϭⲟⲗⲡⲥ ⲉⲃⲟⲗ ϩⲣⲁⲓ ⲛϩⲏⲧⲉ ⲁⲩⲱ ⲧⲉⲧⲛⲉϩ ⲉⲃⲟⲗ ϩⲛⲛⲉⲥⲁⲕⲁⲑⲁⲣⲥⲓⲁ ⲁⲩϣⲱⲡⲉ ⲛⲙⲙⲁⲥ ϩⲣⲁⲓ ⲛϩⲏⲧⲉ

11 ⲡⲟⲩⲁ ⲡⲟⲩⲁ ⲁϥⲁⲛⲟⲙⲉⲓ ⲉⲧϩⲓⲙⲉ ⲙⲡⲉⲧϩⲓⲧⲟⲩⲱϥ ⲁⲩⲱ ⲡⲟⲩⲁ ⲡⲟⲩⲁ ⲁϥϫⲱϩⲙ ⲛⲧⲉϥϣⲉⲗⲉⲉⲧ ϩⲛⲟⲩⲙⲛⲧⲁⲥⲉⲃⲏⲥ ⲁⲩⲱ ⲡⲟⲩⲁ ⲡⲟⲩⲁ ⲁϥϫⲱϩⲙ ⲛⲧⲉϥⲥⲱⲛⲉ ⲧϣⲉⲉⲣⲉ ⲙⲡⲉϥⲉⲓⲱⲧ ϩⲣⲁⲓ ⲛϩⲏⲧⲉ

12 ⲛⲉⲩϫⲓ ⲇⲱⲣⲟⲛ ⲡⲉ ϩⲣⲁⲓ ⲛϩⲏⲧⲉ ϫⲉⲕⲁⲥ ⲉⲩⲉⲡⲉϩⲧⲥⲛⲟϥ ⲉⲃⲟⲗ ⲟⲩⲙⲏⲏⲥⲉ ⲙⲛⲟⲩϩⲟⲩⲟ ⲛⲉⲩϫⲓ ⲙⲙⲟⲟⲩ ⲡⲉ ϩⲣⲁⲓ ⲛϩⲏⲧⲉ ⲁⲣϫⲱⲕ ⲉⲃⲟⲗ ⲛⲧϩⲁⲏ ⲛⲧⲟⲩⲕⲁⲕⲓⲁ ϩⲛⲟⲩϫⲓⲛϭⲟⲛⲥ ⲁⲛⲟⲕ ⲇⲉ ⲁⲣⲉⲣⲡⲁⲱⲃϣ ⲡⲉϫⲉⲡϫⲟⲉⲓⲥ

13 ⲉⲓϣⲁⲛϫⲁϩϫϩ ⲇⲉ ⲛⲛⲁϭⲓϫ ⲉϫⲛⲛⲉⲩⲉⲣⲏⲩ ⲉϫⲛⲛⲉⲧⲓⲛⲁⲛⲧⲟⲩ ⲉϫⲱ ϩⲁⲛⲉⲛⲧⲁⲣⲁⲁⲩ ϩⲛⲛⲉⲥⲛⲱⲱϥ ⲛⲧⲁⲣⲡⲟⲟⲛⲟⲩ ⲉⲃⲟⲗ ϩⲛⲧⲟⲩⲙⲏⲧⲉ

14 ⲉϣⲱⲡⲉ ⲉⲣⲉⲡⲟⲩϩⲏⲧ ⲛⲁϣϥⲓ ⲏ ⲛⲟⲩϭⲓϫ ⲛⲁϣⲁⲙⲁϩⲧⲉ ϩⲛⲛⲉϩⲟⲟⲩ ⲉϯⲛⲁⲣⲛⲁⲓ ⲛⲉ ⲁⲛⲟⲕ ⲡϫⲟⲉⲓⲥ ⲁⲓϣⲁϫⲉ ϯⲛⲁⲁⲁⲩ

15 ⲁⲩⲱ ϯⲛⲁϫⲟⲟⲣⲉ ⲉⲃⲟⲗ ϩⲛⲛϩⲉⲑⲛⲟⲥ ⲛⲧⲁⲛⲟϫⲉ ⲉⲃⲟⲗ ⲉⲛⲉⲭⲱⲣⲁ ⲛⲧⲉⲧⲟⲩⲁⲕⲁⲑⲁⲣⲥⲓⲁ ⲱϫⲛ ⲉⲃⲟⲗ ⲛϩⲏⲧⲉ

16 ⲁⲩⲱ ⲛⲥⲉⲕⲗⲏⲣⲟⲛⲟⲙⲉⲓ ⲙⲙⲟⲙⲡⲉⲙⲧⲟ ⲉⲃⲟⲗ ⲛⲛϩⲉⲑⲛⲟⲥ ⲛⲥⲉⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ

17 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ ϫⲉ

18 ⲡϣⲏⲣⲉ ⲙⲡⲣⲱⲙⲉ ⲉⲓⲥ ⲡⲏⲓ ⲙⲡⲓⲥⲣⲁⲏⲗ ⲁⲩϣⲱⲡⲉ ⲛⲁⲓ ⲉⲩⲙⲟϫϭ ⲧⲏⲣⲟⲩ ⲙⲛⲡϩⲟⲙⲛⲧ ⲁⲩⲱ ⲡⲡⲉⲛⲓⲡⲉ ⲙⲛⲡⲃⲁⲥⲛϭ ⲙⲛⲡⲧⲁϩⲧ ⲉϥⲙⲟϫϭ ϩⲛⲧⲙⲏⲧⲉ ⲙⲡϩⲁⲧ

19 ⲉⲧⲃⲉⲡⲁⲓ ⲁϫⲓⲥ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲥ ϫⲉⲉⲃⲟⲗ ϫⲉⲁⲧⲉⲧⲛϣⲱⲡⲉ ⲧⲏⲣⲧⲛ ⲉⲩⲙⲟⲩϫϭ ⲛⲟⲩⲱⲧ ⲉⲧⲃⲉⲡⲁⲓ ⲁⲛⲟⲕ ϯⲛⲁϫⲓⲧⲏⲩⲧⲛ ⲉϩⲟⲩⲛ ⲉⲧⲙⲏⲧⲉ ⲛⲧϩⲓⲏⲙ

20 ⲁⲩⲱ ⲕⲁⲧⲁⲧϩⲉ ⲉϣⲁⲩⲛⲟⲩϫⲉ ⲙⲡϩⲁⲧ ⲙⲛⲡϩⲟⲙⲛⲧ ⲙⲛⲡⲡⲉⲛⲓⲡⲉ ⲙⲛⲡⲃⲁⲥⲛϭ ⲙⲛⲡⲧⲁϩⲧ ⲉⲧⲙⲏⲧⲉ ⲛⲧⲉϩⲣⲱ ⲛⲥⲉⲛⲓϥⲉ ⲉⲧⲥⲁⲧⲉ ⲉⲟⲩⲟⲧϩⲟⲩ ⲧⲁⲓ ⲧⲉ ⲧϩⲉ ⲉϯⲛⲁϫⲓⲧⲏⲩⲧⲛ ϩⲛⲧⲁⲟⲣⲅⲏ ⲁⲩⲱ ⲛⲧⲁⲥⲉⲩϩⲧⲏⲩⲧⲛ ⲛⲧⲁⲟⲩⲱⲧϩ ⲙⲙⲱⲧⲛ

21 ⲛⲧⲁⲛⲓϥⲉ ⲉϩⲟⲩⲛ ⲉⲣⲱⲧⲛ ϩⲙⲡⲕⲱϩⲧ ⲛⲧⲁⲟⲣⲅⲏ ⲁⲩⲱ ⲛⲧⲉⲧⲛⲟⲩⲱⲧϩ ⲉⲃⲟⲗ ϩⲛⲧⲉⲥⲙⲏⲧⲉ

22 ⲙⲡⲉⲥⲙⲟⲧ ⲉϣⲁⲣⲉⲡϩⲁⲧ ⲟⲩⲱⲧϩ ⲉⲃⲟⲗ ϩⲛⲧⲙⲏⲧⲉ ⲛⲧⲉϩⲣⲱ ⲧⲁⲓ ⲧⲉ ⲧϩⲉ ⲉⲧⲉⲧⲛⲛⲁ ⲉⲃⲟⲗ ϩⲛⲧⲉⲥⲙⲏⲧⲉ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲁⲓⲡⲱϩⲧ ⲙⲡⲁϭⲱⲛⲧ ⲉϫⲛⲧⲏⲩⲧⲛ

23 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ ϫⲉ

24 ⲡϣⲏⲣⲉ ⲙⲡⲣⲱⲙⲉ ⲁϫⲓⲥ ⲛⲁⲥ ϫⲉⲛⲧⲟ ⲡⲉ ⲡⲕⲁϩ ⲉⲧⲉⲙⲡϥϫⲓⲙⲟⲟⲩ ⲟⲩⲧⲉ ⲙⲡⲉⲙⲟⲩ ⲛϩⲱⲟⲩ ⲉⲓ ⲉϩⲣⲁⲓ ⲉϫⲱ ϩⲙⲡⲉϩⲟⲟⲩ ⲛⲧⲁⲟⲣⲅⲏ

25 ⲧⲁⲓ ⲉⲣⲉⲛⲉⲥⲁⲫⲏⲅⲟⲩⲙⲉⲛⲟⲥ ⲉⲩⲟ ⲛⲧϩⲉ ⲛϩⲉⲛⲙⲟⲩⲓ ⲉⲩϩⲙϩⲙ ϩⲛⲧⲉⲥⲙⲏⲧⲉ ⲉⲩⲧⲱⲣⲡ ⲛϩⲉⲛⲧⲱⲣⲡ ⲉⲩⲟⲩⲱⲙ ⲛϩⲉⲛⲯⲩⲭⲏ ϩⲛⲟⲩϫⲓⲛϭⲟⲛⲥ ⲁⲩⲱ ⲉⲩϫⲓⲧⲁⲉⲓⲟ ⲛⲉⲥⲭⲏⲣⲁ ⲁⲩⲁϣⲁⲓ ϩⲛⲧⲉⲥⲙⲏⲧⲉ

26 ⲁⲩⲱ ⲛⲉⲥⲟⲩⲏⲏⲃ ⲁⲩⲁⲑⲉⲧⲉⲓ ⲙⲡⲁⲛⲟⲙⲟⲥ ⲁⲩϫⲱϩⲙ ⲛⲛⲁⲡⲉⲧⲟⲩⲁⲁⲃ ⲙⲡⲟⲩⲡⲱⲣϫ ⲛⲧⲙⲏⲧⲉ ⲙⲡⲉⲧⲟⲩⲁⲁⲃ ⲙⲛⲡⲉⲧϫⲁϩⲙ ⲁⲩⲱ ϩⲛⲧⲙⲏⲧⲉ ⲛⲟⲩⲁⲕⲁⲑⲁⲣⲧⲟⲥ ⲙⲛⲟⲩⲁ ⲉϥⲧⲃⲃⲏⲩ ⲁⲩⲟⲃϣⲟⲩ ϩⲛⲛⲉⲩⲃⲁⲗ ⲉⲛⲁⲥⲁⲃⲃⲁⲧⲟⲛ ⲁⲩⲱ ⲁⲓϣⲱⲡⲉ ⲉⲓⲃⲏⲧ ϩⲛⲧⲉⲩⲙⲏⲧⲉ

27 ⲛⲉⲥⲁⲣⲭⲱⲛ ⲉⲩⲟ ⲛⲧϩⲉ ⲛϩⲉⲛⲟⲩⲱⲛϣ ϩⲛⲧⲉⲥⲙⲏⲧⲉ ⲉⲩⲧⲱⲣⲡ ⲛϩⲉⲛⲧⲱⲣⲡ ⲉⲧⲣⲉⲩⲡⲱϩⲧ ⲉⲃⲟⲗ ⲛϩⲉⲛⲥⲛⲟϥ ϫⲉⲕⲁⲁⲥ ⲉⲩⲉϥⲓ ⲙⲡⲉⲧⲉⲡⲱⲟⲩ ⲁⲛ ⲡⲉ

28 ⲁⲩⲱ ⲛⲉⲥⲡⲣⲟⲫⲏⲧⲏⲥ ⲉⲩⲧⲱϩⲥ ⲙⲙⲟⲟⲩ ⲥⲉⲛⲁϩⲉ ⲉϩⲣⲁⲓ ⲉⲩⲛⲁⲩ ⲉϩⲉⲛⲡⲉⲧϣⲟⲩⲉⲓⲧ ⲉⲩϣⲓⲛⲉ ⲉⲩⲧⲁⲩⲟ ⲛϩⲉⲛϭⲟⲗ ⲉⲩϫⲱ ⲙⲙⲟⲥ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ⲁⲩⲱ ⲙⲡⲉⲡϫⲟⲉⲓⲥ ϫⲱ ⲙⲙⲟⲟⲩ

29 ⲁⲩⲱ ⲡϩⲏⲕⲉ ⲙⲛⲡⲉⲃⲓⲏⲛ ⲉⲩϫⲓ ⲙⲙⲟⲟⲩ ⲛϭⲟⲛⲥ ϩⲣⲁⲓ ⲛϩⲏⲧⲥ