Ezekiel 20 — Coptic (Sahidic)

1 ⲁⲩⲱ ⲁⲥϣⲱⲡⲉ ϩⲛⲧⲙⲉϩⲥⲁϣϥⲉ ⲛⲣⲟⲙⲡⲉ ⲙⲡⲙⲉϩϯⲟⲩ ⲛⲉⲃⲟⲧ ⲙⲡⲙⲉϩϯⲟⲩ ⲛⲉⲃⲟⲧ ⲁⲩⲉⲓ ⲛϭⲓϩⲉⲛⲣⲱⲙⲉ ⲉⲃⲟⲗ ϩⲛⲛⲉⲡⲣⲉⲥⲃⲩⲧⲉⲣⲟⲥ ⲙⲡⲏⲓ ⲙⲡⲓⲥⲣⲁⲏⲗ ⲉϫⲛⲉⲡϫⲟⲉⲓⲥ ⲁⲩϩⲙⲟⲟⲥ ⲙⲡⲁⲙⲧⲟ ⲉⲃⲟⲗ

2 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲣⲟⲓ ⲉϥϫⲱ ⲙⲙⲟⲥ

3 ϫⲉⲡϣⲏⲣⲉ ⲙⲡⲣⲱⲙⲉ ϣⲁϫⲉ ⲙⲛⲛⲉⲡⲣⲉⲥⲃⲩⲧⲉⲣⲟⲥ ⲙⲡⲗⲁⲟⲥ ⲛⲕϫⲟⲟⲥ ⲛⲁⲩ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲛⲉ ⲧⲉⲧⲛⲛⲏⲩ ⲛⲧⲱⲧⲛ ⲉϫⲛⲟⲩⲓ ϯⲟⲛϩ ⲁⲛⲟⲕ ϫⲉⲉϣⲱⲡⲉ ϯⲛⲁⲟⲩⲱⲱⲃ ⲛⲏⲧⲛ ⲡⲉϫⲉⲡϫⲟⲉⲓⲥ

4 ⲏ ⲉⲛⲉ ϩⲛⲟⲩϫⲓⲕⲃⲁ ϯⲛⲁϫⲓ ⲙⲡⲉⲩⲕⲃⲁ ⲡϣⲏⲣⲉ ⲙⲡⲣⲱⲙⲉ ⲁⲣⲓⲙⲛⲧⲣⲉ ⲛⲁⲩ ⲛⲛⲁⲛⲟⲙⲓⲁ ⲛⲛⲉⲩⲉⲓⲟⲧⲉ

5 ⲁⲩⲱ ⲛⲕϫⲟⲟⲥ ⲛⲁⲩ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡⲛⲟⲩⲧⲉ ϫⲱ ⲙⲙⲟⲟⲩ ϫⲉϫⲓⲛⲡⲉϩⲟⲟⲩ ⲛⲧⲁⲓⲥⲉⲧⲡ ⲡⲏⲓ ⲙⲡⲓⲥⲣⲁⲏⲗ ⲁⲓⲟⲩⲟⲛϩⲧ ⲉⲃⲟⲗ ⲙⲡⲉⲥⲡⲉⲣⲙⲁ ⲙⲡⲏⲓ ⲛⲓⲁⲕⲱⲃ ⲁⲩⲱ ⲁⲓⲧⲣⲉⲩⲥⲟⲩⲱⲛⲧ ϩⲙⲡⲕⲁϩ ⲛⲕⲏⲙⲉ ⲁⲩⲱ ⲁⲓϣⲟⲡⲟⲩ ⲉⲣⲟⲓ ⲉⲓϫⲱ ⲙⲙⲟⲥ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲡⲉⲧⲛⲛⲟⲩⲧⲉ

6 ϩⲙⲡⲉϩⲟⲟⲩ ⲉⲧⲙⲙⲁⲩ ⲁⲓⲁⲙⲁϩⲧⲉ ⲙⲙⲟⲟⲩ ϩⲛⲧⲁϭⲓϫ ⲉⲛⲧⲟⲩ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ ⲉϩⲟⲩⲛ ⲉⲡⲕⲁϩ ⲛⲧⲁⲓⲥⲃⲧⲱⲧϥ ⲛⲁⲩ ⲉⲩⲕⲁϩ ⲉϥϣⲟⲩⲉ ⲉⲣⲱⲧⲉ ⲉⲃⲟⲗ ϩⲓⲉⲃⲓⲱ ⲉⲩⲙⲟⲩⲗϩ ⲡⲉ ⲡⲁⲣⲁⲕⲁϩ ⲛⲓⲙ

7 ⲁⲩⲱ ⲁⲓϫⲟⲟⲥ ⲛⲏⲧⲛ ϫⲉⲙⲁⲣⲉⲡⲟⲩⲁ ⲡⲟⲩⲁ ⲙⲙⲱⲧⲛ ⲛⲟⲩϫⲉ ⲉⲃⲟⲗ ⲛⲛⲃⲟⲧⲉ ⲛⲛⲉϥⲃⲁⲗ ⲁⲩⲱ ⲙⲡⲣϫⲱϩⲙ ϩⲛⲛⲉϩⲃⲏⲩⲉ ⲛⲕⲏⲙⲉ ⲁⲛⲟⲕ ⲡⲉ ⲡϫⲟⲉⲓⲥ ⲡⲉⲧⲛⲛⲟⲩⲧⲉ

8 ⲁⲩⲥⲁϩⲱⲟⲩ ⲉⲃⲟⲗ ⲙⲙⲟⲓ ⲁⲩⲱ ⲙⲡⲟⲩⲟⲩⲱϣ ⲉⲥⲱⲧⲙ ⲛⲥⲱⲓ ⲙⲡⲟⲩⲛⲟⲩϫⲉ ⲉⲃⲟⲗ ⲛⲛⲃⲟⲧⲉ ⲛⲛⲉⲩⲃⲁⲗ ⲁⲩⲱ ⲛⲉϩⲃⲏⲩⲉ ⲛⲕⲏⲙⲉ ⲙⲡⲟⲩⲕⲁⲁⲩ ⲛⲥⲱⲟⲩ ⲁⲓϫⲟⲟⲥ ϫⲉϯⲛⲁⲡⲱϩⲧ ⲙⲡⲁϭⲱⲛⲧ ⲉϩⲣⲁⲓ ⲉϫⲱⲟⲩ ⲉⲧⲣⲁϫⲱⲕ ⲉⲃⲟⲗ ⲛⲧⲁⲟⲣⲅⲏ ϩⲣⲁⲓ ⲛϩⲏⲧⲟⲩ ϩⲛⲧⲙⲏⲧⲉ ⲙⲡⲕⲁϩ ⲛⲕⲏⲙⲉ

9 ⲁⲩⲱ ⲁⲓⲁⲁⲥ ϫⲉⲕⲁⲥ ⲛⲛⲉⲩϫⲉϩⲙⲡⲁⲣⲁⲛ ⲉⲡⲧⲏⲣϥ ⲙⲡⲉⲙⲧⲟ ⲉⲃⲟⲗ ⲛⲛϩⲉⲑⲛⲟⲥ ⲛⲁⲓ ⲛⲧⲟⲟⲩ ⲉⲧⲟⲩϩⲛ ⲧⲉⲩⲙⲏⲧⲉ ⲛⲉⲛⲧⲁⲓⲟⲩⲟⲛϩⲧ ⲛⲛⲁϩⲣⲁⲩ ⲙⲡⲉⲩⲙⲧⲟ ⲉⲃⲟⲗ ⲉⲧⲣⲁⲛⲧⲟⲩ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ

10 ⲁⲩⲱ ⲁⲓⲛⲧⲟⲩ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ ⲁⲓϫⲓⲧⲟⲩ ⲉϩⲣⲁⲓ ⲉⲡϫⲁⲓⲉ

11 ⲉⲁⲓϯ ⲛⲁⲩ ⲛⲛⲁⲡⲣⲟⲥⲧⲁⲅⲙⲁ ⲁⲩⲱ ⲛⲁⲇⲓⲕⲁⲓⲱⲙⲁ ⲁⲓⲟⲩⲟⲛϩⲟⲩ ⲛⲁⲩ ⲉⲃⲟⲗ ⲛⲁⲓ ⲉⲧⲉⲣⲉⲡⲣⲱⲙⲉ ⲛⲁⲁⲩ ⲛϥⲱⲛϩ ϩⲣⲁⲓ ⲛϩⲏⲧⲟⲩ

12 ⲁⲩⲱ ⲛⲁⲕⲉⲥⲁⲃⲃⲁⲧⲟⲛ ⲛⲁⲓ ⲛⲧⲁⲓⲧⲁⲁⲩ ⲛⲁⲩ ⲉⲧⲣⲉϣⲱⲡⲉ ⲙⲙⲁⲉⲓⲛ ϩⲛⲧⲁⲙⲏⲧⲉ ⲙⲛⲧⲉⲩⲙⲏⲧⲉ ⲉⲧⲣⲉⲩⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲉⲧⲧⲃⲃⲟ ⲙⲙⲟⲟⲩ

13 ⲁⲩⲱ ⲁⲓϫⲟⲟⲥ ⲙⲡⲏⲓ ⲙⲡⲓⲥⲣⲁⲏⲗ ϩⲛⲧⲉⲣⲏⲙⲟⲥ ϫⲉⲙⲟⲟϣⲉ ϩⲛⲛⲁⲟⲩⲉϩⲥⲁϩⲛⲉ ⲁⲩⲱ ⲙⲡⲉⲧⲙⲙⲟⲟϣⲉ ⲛⲁⲕⲉⲇⲓⲕⲁⲓⲱⲙⲁ ⲁⲩⲕⲁⲁⲩ ⲛⲥⲱⲟⲩ ⲛⲁⲓ ⲉⲧⲉⲣⲉⲡⲣⲱⲙⲉ ⲛⲁⲁⲩ ⲛϥⲱⲛϩ ⲛϩⲏⲧⲟⲩ ⲁⲩⲱ ⲛⲁⲕⲉⲥⲁⲃⲃⲁⲧⲟⲛ ⲁⲩϫⲁϩⲙⲟⲩ ⲉⲙⲁⲧⲉ ⲁⲓϫⲟⲟⲥ ϫⲉϯⲛⲁⲡⲱϩⲧ ⲙⲡⲁϭⲱⲛⲧ ⲉϩⲣⲁⲓ ⲉϫⲱⲟⲩ ϩⲓⲡϫⲁⲓⲉ ⲉϥⲟⲧⲟⲩ ⲉⲃⲟⲗ

14 ⲁⲩⲱ ⲁⲓⲉⲓⲣⲉ ϫⲉⲕⲁⲥ ⲡⲁⲣⲁⲛ ⲛⲛⲉⲩϥⲟⲧϥ ⲉⲃⲟⲗ ⲉⲡⲧⲏⲣϥ ⲙⲡⲉⲙⲧⲟ ⲉⲃⲟⲗ ⲛⲛϩⲉⲑⲛⲟⲥ ⲛⲁⲓ ⲛⲧⲁⲓⲛⲧⲟⲩ ⲉⲃⲟⲗ ⲙⲡⲉⲩⲙⲧⲟ ⲉⲃⲟⲗ

15 ⲁⲛⲟⲕ ϩⲱ ⲁⲓⲛ ⲧⲁϭⲓϫ ⲉϩⲣⲁⲓ ⲉϫⲱⲟⲩ ϩⲓⲧⲉⲣⲏⲙⲟⲥ ϫⲉⲕⲁⲥ ⲛⲛⲁϫⲓⲧⲟⲩ ⲉϩⲟⲩⲛ ⲉⲡⲕⲁϩ ⲉⲡⲧⲏⲣϥ ⲡⲁⲓ ⲛⲧⲁⲓⲧⲁⲁϥ ⲛⲁⲩ ⲟⲩⲕⲁϩ ⲉϥϣⲟⲩⲉ ⲉⲣⲱⲧⲉ ⲉⲃⲟⲗ ϩⲓⲉⲃⲓⲱ ⲉⲩⲙⲟⲩⲗϩ ⲡⲁⲣⲁⲡⲕⲁϩ ⲛⲓⲙ

16 ⲉⲃⲟⲗ ϫⲉⲁⲩⲕⲱ ⲛⲥⲱⲟⲩ ⲛⲛⲁⲇⲓⲕⲁⲓⲱⲙⲁ ⲁⲩⲱ ⲙⲡⲟⲩⲙⲟⲟϣⲉ ϩⲛⲛⲁⲟⲩⲉϩⲥⲁϩⲛⲉ ⲛⲁⲕⲉⲥⲁⲃⲃⲁⲧⲟⲛ ⲁⲩϫⲁϩⲙⲟⲩ ⲁⲩⲱ ⲛⲉⲩⲟⲩⲏϩ ⲛⲥⲁⲛⲟⲩⲱϣ ⲛⲛⲉⲩϩⲏⲧ

17 ⲁⲡⲁⲃⲁⲗ ϯⲥⲟ ⲉⲣⲟⲟⲩ ⲉⲧⲙϥⲟⲧⲟⲩ ⲉⲃⲟⲗ ⲁⲩⲱ ⲙⲡⲓⲉⲓⲣⲉ ⲛⲁⲩ ⲉⲩⲥⲩⲛⲧⲉⲗⲉⲓⲁ ϩⲛⲧⲉⲣⲏⲙⲟⲥ

18 ⲁⲩⲱ ⲁⲓϫⲟⲟⲥ ⲛⲛⲉⲩϣⲏⲣⲉ ϩⲓⲡϫⲁⲓⲉ ϫⲉⲙⲡⲣⲙⲟⲟϣⲉ ϩⲛⲛⲛⲟⲙⲟⲥ ⲛⲛⲉⲧⲛⲉⲓⲟⲧⲉ ⲁⲩⲱ ⲛⲉⲩⲇⲓⲕⲁⲓⲱⲙⲁ ⲙⲡⲣϩⲁⲣⲉϩ ⲉⲣⲟⲟⲩ ⲙⲡⲣϫⲉϩⲙⲧⲏⲩⲧⲛ ⲟⲩⲧⲉ ⲙⲡⲣⲧⲱϩ ⲛⲙⲙⲁⲩ

19 ⲁⲛⲟⲕ ⲡⲉ ⲡϫⲟⲉⲓⲥ ⲡⲉⲧⲛⲛⲟⲩⲧⲉ ⲁⲗⲗⲁ ⲙⲟⲟϣⲉ ϩⲛⲛⲁⲟⲩⲉϩⲥⲁϩⲛⲉ ⲁⲩⲱ ⲛⲁⲇⲓⲕⲁⲓⲱⲙⲁ ϩⲁⲣⲉϩ ⲉⲣⲟⲟⲩ ⲛⲧⲉⲧⲛⲁⲁⲩ

20 ⲁⲩⲱ ⲛⲁⲕⲉⲥⲁⲃⲃⲁⲧⲟⲛ ⲧⲃⲃⲟⲟⲩ ⲛⲥⲉϣⲱⲡⲉ ⲉⲩⲙⲁⲉⲓⲛ ϩⲛⲧⲁⲙⲏⲧⲉ ⲙⲛⲧⲉⲧⲛⲙⲏⲧⲉ ⲉⲧⲣⲉⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ⲡⲉⲧⲛⲛⲟⲩⲧⲉ

21 ⲛⲧⲟⲟⲩ ⲇⲉ ⲁⲩϯϭⲱⲛⲧ ⲛⲁⲓ ⲙⲛⲛⲉⲩϣⲏⲣⲉ ⲙⲡⲟⲩⲙⲟⲟϣⲉ ϩⲛⲛⲁⲟⲩⲉϩⲥⲁϩⲛⲉ ⲁⲩⲱ ⲛⲁⲇⲓⲕⲁⲓⲱⲙⲁ ⲙⲡⲟⲩϩⲁⲣⲉϩ ⲉⲣⲟⲟⲩ ⲉⲁⲁⲩ ⲛⲁⲓ ⲉⲣϣⲁⲛⲡⲣⲱⲙⲉ ⲁⲁⲩ ϥⲛⲁⲱⲛϩ ⲛϩⲏⲧⲟⲩ ⲛⲁⲕⲉⲥⲁⲃⲃⲁⲧⲟⲛ ⲁⲩϫⲁϩⲙⲟⲩ ⲁⲩⲱ ⲁⲓϫⲟⲟⲥ ⲉⲧⲣⲁⲡⲱϩⲧ ⲙⲡⲁϭⲱⲛⲧ ⲉϩⲣⲁⲓ ⲉϫⲱⲟⲩ ϩⲓⲡϫⲁⲓⲉ ⲉⲧⲣⲁϫⲱⲕ ⲉⲃⲟⲗ ⲛⲧⲁⲟⲣⲅⲏ ⲉϩⲣⲁⲓ ⲉϫⲱⲟⲩ

22 ⲁⲩⲱ ⲁⲓⲉⲓⲣⲉ ϫⲉⲕⲁⲥ ⲡⲁⲣⲁⲛ ⲛⲛⲉϥϫⲱϩⲙ ⲉⲡⲧⲏⲣϥ ⲙⲡⲉⲙⲧⲟ ⲉⲃⲟⲗ ⲛⲛϩⲉⲑⲛⲟⲥ ⲁⲩⲱ ⲁⲓⲛⲧⲟⲩ ⲉⲃⲟⲗ ⲙⲡⲉⲩⲙⲧⲟ ⲉⲃⲟⲗ

23 ⲁⲓⲉⲓⲛⲉ ⲛⲧⲁϭⲓϫ ⲉϩⲣⲁⲓ ⲉϫⲱⲟⲩ ϩⲛⲧⲉⲣⲏⲙⲟⲥ ⲉⲧⲣⲁϫⲟⲟⲣⲟⲩ ⲉⲃⲟⲗ ϩⲛⲛϩⲉⲑⲛⲟⲥ ⲁⲩⲱ ⲉⲧⲣⲁⲛⲟϫⲟⲩ ⲉϩⲣⲁⲓ ⲉⲛⲉⲭⲱⲣⲁ

24 ⲉⲃⲟⲗ ϫⲉⲛⲁⲇⲓⲕⲁⲓⲱⲙⲁ ⲙⲡⲟⲩⲁⲁⲩ ⲁⲩⲱ ⲛⲁⲡⲣⲟⲥⲧⲁⲅⲙⲁ ⲁⲩⲕⲁⲁⲩ ⲛⲥⲱⲟⲩ ⲛⲁⲕⲉⲥⲁⲃⲃⲁⲧⲟⲛ ⲁⲩϫⲁϩⲙⲟⲩ ⲁⲩⲱ ⲉⲣⲉⲛⲉⲩⲃⲁⲗ ϩⲓⲡⲁϩⲟⲩ ⲛⲛⲟⲩⲱϣ ⲛⲛⲉⲩⲉⲓⲟⲧⲉ

25 ⲁⲛⲟⲕ ϩⲱ ⲁⲓϯ ⲛⲁⲩ ⲛϩⲉⲛⲡⲣⲟⲥⲧⲁⲅⲙⲁ ⲉⲛⲁⲛⲟⲩⲟⲩ ⲁⲛ ⲙⲛϩⲉⲛⲇⲓⲕⲁⲓⲱⲙⲁ ⲛⲥⲉⲛⲁϣⲱⲛϩ ⲁⲛ ϩⲣⲁⲓ ⲛϩⲏⲧⲟⲩ

26 ϯⲛⲁϫⲁϩⲙⲟⲩ ϩⲛⲛⲉⲧⲟⲩϯ ⲙⲙⲟⲟⲩ ϩⲙⲡⲧⲣⲁⲉⲓ ⲉϫⲛϩⲟⲟⲩⲧ ⲛⲓⲙ ⲉⲧⲛⲁⲟⲩⲱⲛ ⲛⲧⲟⲟⲧⲉ ⲉⲧⲣⲁⲧⲁⲕⲟⲟⲩ

27 ⲉⲧⲃⲉⲡⲁⲓ ϣⲁϫⲉ ⲛⲛⲁϩⲣⲙⲡⲏⲓ ⲙⲡⲓⲥⲣⲁⲏⲗ ⲡϣⲏⲣⲉ ⲙⲡⲣⲱⲙⲉ ⲛⲕϫⲟⲟⲥ ⲛⲁⲩ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉϣⲁϩⲣⲁⲓ ⲉⲧⲉⲛⲟⲩ ⲁⲩϯϭⲱⲛⲧ ⲛⲁⲓ ⲛϭⲓⲛⲉⲧⲛⲉⲓⲟⲧⲉ ϩⲛⲛⲉⲩⲡⲁⲣⲁⲡⲧⲱⲙⲁ ⲛⲧⲁⲩⲁⲁⲩ ⲉϩⲟⲩⲛ ⲉⲣⲟⲟⲩ

28 ⲁⲩⲱ ⲁⲓϫⲓⲧⲟⲩ ⲉϩⲟⲩⲛ ⲉⲡⲕⲁϩ ⲡⲁⲓ ⲛⲧⲁⲓⲥⲟⲩⲧⲛ ⲧⲟⲟⲧⲉϩⲣⲁⲓ ⲉϫⲱϥ ⲉⲧⲣⲁⲧⲁⲁϥ ⲛⲁϥ ⲁⲩⲛⲁⲩ ⲉⲃⲟⲩⲛⲟⲥ ⲛⲓⲙ ⲉⲧϫⲟⲥⲉ ⲙⲛϣⲏⲛ ⲛⲓⲙ ⲉⲧⲟ ⲛϩⲁⲓⲃⲉⲥ ⲁⲩⲧⲁⲗⲉⲑⲩⲥⲓⲁ ⲉϩⲣⲁⲓ ϩⲙⲡⲙⲁ ⲉⲧⲙⲙⲁⲩ ⲛⲛⲉⲩⲛⲟⲩⲧⲉ ⲁⲩⲱ ⲁⲩⲧⲁⲗⲟ ⲉϩⲣⲁⲓ ⲙⲙⲁⲩ ⲛϩⲉⲛⲥϯⲛⲟⲩϥⲉ ⲁⲩⲱ ⲁⲩⲟⲩⲱⲧⲛ ⲉⲃⲟⲗ ⲛⲁⲩ ⲛⲛⲉⲩⲟⲩⲱⲧⲛ ⲉⲃⲟⲗ

29 ⲁⲩⲱ ⲁⲓϫⲟⲟⲥ ⲛⲁⲩ ϫⲉⲛⲓⲙ ⲡⲉ ⲁⲃⲁⲙⲁ ϫⲉⲉⲧⲉⲧⲛⲉⲃⲱⲕ ⲙⲙⲁⲩ ⲛⲧⲱⲧⲛ ⲁⲩⲱ ⲁⲩⲙⲟⲩⲧⲉ ⲉⲡⲉϥⲣⲁⲛ ϫⲉⲁⲃⲁⲙⲁ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ

30 ⲉⲧⲃⲉⲡⲁⲓ ⲁϫⲓⲥ ⲛⲛⲁϩⲣⲙⲡⲏⲓ ⲙⲡⲓⲥⲣⲁⲏⲗ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲉⲛⲉⲧⲉⲧⲛⲉϫⲱϩⲙ ⲙⲙⲱⲧⲛ ϩⲣⲁⲓ ϩⲛⲛⲁⲛⲟⲙⲓⲁ ⲛⲛⲉⲧⲛⲉⲓⲟⲧⲉ ⲁⲩⲱ ⲉⲛⲉⲧⲉⲧⲛⲁⲡⲟⲣⲛⲉⲩⲉ ⲛⲧⲱⲧⲛ ϩⲓⲡⲁϩⲟⲩ ⲛⲛⲉⲩⲃⲟⲧⲉ

31 ⲁⲩⲱ ⲉⲛⲉⲧⲉⲧⲛⲁϫⲉϩⲙⲧⲏⲩⲧⲛ ϩⲣⲁⲓ ϩⲛⲛⲁⲡⲁⲣⲭⲏ ⲛⲛⲉⲧⲉⲧⲛϯ ⲙⲙⲟⲟⲩ ϩⲛⲛⲉⲧⲉⲧⲛⲡⲱⲣϫ ⲙⲙⲟⲟⲩ ⲉⲃⲟⲗ ϩⲛⲛⲉⲧⲛⲟⲩⲱϣ ⲧⲏⲣⲟⲩ ϣⲁϩⲟⲩⲛ ⲉⲡϩⲟⲟⲩ ⲛϩⲟⲟⲩ ⲁⲩⲱ ⲁⲛⲟⲕ ⲙⲏ ϯⲛⲁⲟⲩⲱϣⲃ ⲛⲏⲧⲛ ⲡⲏⲓ ⲙⲡⲓⲥⲣⲁⲏⲗ ϯⲟⲛϩ ⲁⲛⲟⲕ ⲡⲉϫⲉⲡϫⲟⲉⲓⲥ ϫⲉⲛϯⲛⲁⲟⲩⲱϣⲃ ⲛⲏⲧⲛ ⲁⲛ ⲁⲩⲱ ⲉϣⲱⲡⲉ ⲡⲁⲓ ⲛⲁⲉⲓ ⲉϩⲣⲁⲓ ⲉϫⲙⲛⲉⲧⲛⲡⲛⲁ

32 ⲁⲩⲱ ⲛϥⲛⲁϣⲱⲡⲉ ⲁⲛ ⲕⲁⲧⲁⲧϩⲉ ⲉⲧⲉⲧⲛϫⲱ ⲙⲙⲟⲥ ⲛⲧⲱⲧⲛ ϫⲉⲉⲛⲛⲁⲣⲧϩⲉ ⲛⲛϩⲉⲑⲛⲟⲥ ⲁⲩⲱ ⲛⲧϩⲉ ⲛⲛⲉⲫⲩⲗⲟⲟⲩⲉ ⲙⲡⲕⲁϩ ⲉⲧⲣⲉⲛϣⲙϣⲉ ⲛⲛϣⲉ ⲙⲛⲛⲱⲛⲉ

33 ⲉⲧⲃⲉⲡⲁⲓ ϯⲟⲛϩ ⲁⲛⲟⲕ ⲡⲉϫⲉⲡϫⲟⲉⲓⲥ ϫⲉϩⲛⲟⲩϭⲓϫ ⲉⲥϫⲟⲟⲣ ⲙⲛⲟⲩϭⲃⲟⲓ ⲉϥϫⲟⲥⲉ ⲙⲛⲟⲩⲛⲟϭ ⲛϭⲱⲛⲧ ϯⲛⲁⲣⲣⲣⲟ ⲉϫⲛⲧⲏⲩⲧⲛ

34 ⲛⲧⲁⲛⲧⲏⲩⲧⲛ ⲉⲃⲟⲗ ϩⲛⲛⲗⲁⲟⲥ ⲁⲩⲱ ⲛⲧⲁϣⲡⲧⲏⲩⲧⲛ ⲉⲣⲟⲓ ⲉⲃⲟⲗ ϩⲛⲛⲉⲭⲱⲣⲁ ⲛⲁⲓ ⲛⲧⲁⲓϫⲉⲉⲣⲉⲧⲏⲩⲧⲛ ⲉⲃⲟⲗ ⲛϩⲏⲧⲟⲩ ϩⲛⲟⲩϭⲓϫ ⲉϥϫⲟⲟⲣ ⲙⲛⲟⲩϭⲃⲟⲓ ⲉϥϫⲟⲥⲉ ⲙⲛⲟⲩⲛⲟϭ ⲛϭⲱⲛⲧ

35 ⲛⲧⲁⲛⲧⲏⲩⲧⲛ ⲉⲃⲟⲗ ⲉⲩⲕⲁϩ ⲛϫⲁⲓⲉ ⲉⲙⲛⲧⲉ ⲛⲗⲁⲟⲥ ⲛϩⲏⲧϥ ⲛⲧⲁϫⲓϩⲁⲡ ⲛⲙⲙⲏⲧⲛ ⲙⲡⲙⲁ ⲉⲧⲙⲙⲁⲩ ⲛϩⲟ ⲟⲩⲃⲉ ϩⲟ

36 ⲛⲧϩⲉ ⲛⲧⲁⲓϫⲓϩⲁⲡ ⲙⲛⲛⲉⲧⲛⲉⲓⲟⲧⲉ ϩⲛⲧⲉⲣⲏⲙⲟⲥ ϩⲙⲡⲕⲁϩ ⲛⲕⲏⲙⲉ ⲧⲁⲓ ⲧⲉ ⲧϩⲉ ⲉϯⲛⲁϯϩⲁⲡ ⲉⲣⲱⲧⲛ ⲡⲉϫⲉⲡϫⲟⲉⲓⲥ

37 ⲛⲧⲁⲛⲧⲏⲩⲧⲛ ϩⲁⲡϭⲉⲣⲱⲃ ⲁⲩⲱ ⲛⲧⲁϫⲓⲧⲏⲩⲧⲛ ⲉϩⲟⲩⲛ ϩⲛⲟⲩⲏⲡⲉ

38 ⲛⲧⲁϥⲓ ⲛⲛⲁⲥⲉⲃⲏⲥ ⲉⲃⲟⲗ ⲛϩⲏⲧⲧⲏⲩⲧⲛ ⲙⲛⲛⲉⲛⲧⲁⲩⲟⲩⲉ ⲉⲃⲟⲗ ϫⲉϯⲛⲁⲛⲧⲟⲩ ⲉⲃⲟⲗ ϩⲙⲡⲉⲩⲙⲁ ⲛϭⲟⲓⲗⲉ ⲛⲥⲉⲧⲙⲃⲱⲕ ⲉϩⲟⲩⲛ ⲉⲡⲕⲁϩ ⲙⲡⲓⲥⲣⲁⲏⲗ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ

39 ⲁⲩⲱ ⲛⲧⲱⲧⲛ ⲡⲉ ⲡⲏⲓ ⲙⲡⲓⲥⲣⲁⲏⲗ ⲛⲁⲓ ⲛⲉⲧϥϫⲱ ⲙⲙⲟⲟⲩ ⲛϭⲓⲡϫⲟⲉⲓⲥ ⲡϫⲟⲉⲓⲥ ϫⲉⲙⲁⲣⲉⲡⲟⲩⲁ ⲡⲟⲩⲁ ϥⲓ ⲉⲃⲟⲗ ⲛϩⲏⲧϥ ⲛⲛⲉϥϩⲃⲏⲩⲉ ⲉⲧϩⲟⲟⲩ ⲁⲩⲱ ⲙⲛⲛⲥⲁⲛⲁⲓ ⲛⲧⲱⲧⲛ ⲉⲣϣⲁⲛⲧⲉⲧⲛⲥⲱⲧⲙ ⲛⲥⲱⲓ ⲁⲩⲱ ⲡⲁⲣⲁⲛ ⲉⲧⲟⲩⲁⲁⲃ ⲛⲧⲉⲧⲛⲧⲙϫⲁϩⲙⲉϥ ϫⲓⲛⲧⲉⲛⲟⲩ ϩⲛⲛⲉⲧⲛⲉⲓⲇⲱⲗⲟⲛ ⲙⲛⲛⲉⲧⲛϩⲃⲏⲩⲉ

40 ⲉⲧⲃⲉϫⲉϩⲙⲡⲁⲧⲟⲟⲩ ⲉⲧⲟⲩⲁⲁⲃ ⲡⲧⲟⲟⲩ ⲉⲧϫⲟⲥⲉ ⲥⲉⲛⲁⲣϩⲙϩⲁⲗ ⲛⲁⲓ ⲙⲙⲁⲩ ϣⲁⲃⲟⲗ ⲛϭⲓⲡⲏⲓ ⲧⲏⲣϥ ⲙⲡⲓⲥⲣⲁⲏⲗ ⲡⲉϫⲁϥ ⲛϭⲓⲡϫⲟⲉⲓⲥ ⲡϫⲟⲉⲓⲥ ⲁⲩⲱ ϩⲙⲡⲙⲁ ⲉⲧⲙⲙⲁⲩ ϯⲛⲁϣⲟⲡⲟⲩ ⲉⲣⲟⲓ ⲛⲧⲁϭⲙⲡϣⲓⲛⲉ ⲛⲛⲉⲧⲛⲁⲡⲁⲣⲭⲏ ⲙⲙⲁⲩ ⲙⲛⲛⲁⲡⲁⲣⲭⲏ ⲛⲛⲉⲧⲉⲧⲛⲡⲱⲣϫ ⲙⲙⲟⲟⲩ ⲉⲃⲟⲗ ϩⲛⲛⲉⲧⲛⲡⲉⲧⲟⲩⲁⲁⲃ ⲧⲏⲣⲟⲩ

41 ϯⲛⲁϣⲉⲡⲧⲏⲩⲧⲛ ⲉⲣⲟⲓ ϩⲛⲟⲩⲥϯⲛⲟⲩϥⲉ ϩⲙⲡⲧⲣⲁⲛⲧⲏⲩⲧⲛ ⲉⲃⲟⲗ ϩⲛⲛⲗⲁⲟⲥ ⲁⲩⲱ ⲛⲧⲁϣⲡⲧⲏⲩⲧⲛ ⲉⲣⲟⲓ ⲉⲃⲟⲗ ϩⲛⲛⲉⲭⲱⲣⲁ ⲛⲁⲓ ⲛⲧⲁⲩϫⲉⲉⲣⲉⲧⲏⲩⲧⲛ ⲉⲃⲟⲗ ⲛϩⲏⲧⲟⲩ ⲛⲧⲁϣⲱⲡⲉ ⲉⲓⲟⲩⲁⲁⲃ ⲛϩⲏⲧⲧⲏⲩⲧⲛ ⲙⲡⲉⲙⲧⲟ ⲉⲃⲟⲗ ⲛⲛⲗⲁⲟⲥ

42 ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ϩⲙⲡⲧⲣⲁϫⲓⲧⲏⲩⲧⲛ ⲉϩⲟⲩⲛ ⲉⲡⲕⲁϩ ⲙⲡⲓⲥⲣⲁⲏⲗ ⲡⲕⲁϩ ⲛⲧⲁⲓⲥⲟⲩⲧⲛ ⲧⲟⲟⲧⲉⲃⲟⲗ ⲉⲣⲟϥ ⲉⲧⲁⲁϥ ⲛⲛⲉⲧⲛⲉⲓⲟⲧⲉ

43 ⲁⲩⲱ ⲧⲉⲧⲛⲛⲁⲣⲡⲙⲉⲉⲩⲉ ⲛⲛⲉⲧⲛϩⲓⲟⲟⲩⲉ ϩⲙⲡⲙⲁ ⲉⲧⲙⲙⲁⲩ ⲙⲛⲛⲉⲧⲛϩⲃⲏⲩⲉ ⲛⲁⲓ ⲛⲧⲁⲧⲉⲧⲛϫⲱϩⲙ ϩⲣⲁⲓ ⲛϩⲏⲧⲟⲩ ⲛⲧⲉⲧⲛⲛⲁⲩ ⲉⲛⲉⲧⲛϩⲟ ϩⲛⲛⲉⲧⲛⲕⲁⲕⲓⲁ ⲧⲏⲣⲟⲩ

44 ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡϫⲟⲉⲓⲥ ϩⲙⲡⲧⲣⲁⲉⲓⲣⲉ ⲛⲏⲧⲛ ⲛⲧⲉⲓϩⲉ ϫⲉⲕⲁⲥ ⲛⲛⲉⲡⲁⲣⲁⲛ ϫⲱϩⲙ ⲕⲁⲧⲁⲛⲉⲧⲛϩⲓⲟⲟⲩⲉ ⲉⲧϩⲟⲟⲩ ⲁⲩⲱ ⲕⲁⲧⲁⲛⲉⲧⲛϩⲃⲏⲩⲉ ⲉⲧⲧⲁⲕⲏⲩⲧ ⲡⲉϫⲉⲡϫⲟⲉⲓⲥ

45 ...