Read Ezekiel 19 side by side with translations · The Final Bible
1 ⲛⲧⲟⲕ ϩⲱⲱⲕ ⲡϣⲏⲣⲉ ⲙⲡⲣⲱⲙⲉ ϫⲓ ⲟⲩⲧⲟⲉⲓⲧ ⲉϫⲙⲡⲁⲣⲭⲱⲛ ⲙⲡⲓⲥⲣⲁⲏⲗ
2 ⲛⲕϫⲟⲟⲥ ϫⲉⲉⲧⲃⲉⲟⲩ ⲧⲉⲕⲙⲁⲁⲩ ⲁⲥⲣⲟⲩⲙⲁⲥ ⲙⲙⲟⲩⲓ ϩⲛⲧⲙⲏⲧⲉ ⲛϩⲉⲛⲙⲟⲩⲓ ⲁⲥⲧⲁϣⲉ ⲛⲉⲥⲙⲁⲥ ⲙⲙⲟⲩⲓ ϩⲛⲧⲙⲏⲧⲉ ⲛϩⲉⲛⲙⲟⲩⲓ
3 ⲁⲩⲱ ⲟⲩⲁ ⲛⲧⲉⲛⲉⲥⲙⲁⲥ ⲙⲙⲟⲩⲓ ⲁϥⲡⲱⲧ ⲉⲃⲟⲗ ⲁϥⲣⲟⲩⲙⲟⲩⲓ ⲁϥⲧⲥⲁⲃⲟ ⲉⲧⲱⲣⲡ ⲛϩⲉⲛⲧⲱⲣⲡ ⲁϥⲟⲩⲉⲙⲣⲱⲙⲉ
4 ⲁⲩⲥⲱⲧⲙ ⲉⲧⲃⲏⲏⲧϥ ⲛϭⲓⲛϩⲉⲑⲛⲟⲥ ⲁⲩϭⲟⲡϥ ϩⲙⲡⲉⲩⲧⲁⲕⲟ ⲁⲩⲛⲧϥ ϩⲛⲟⲩϣⲧⲟϥ ⲉϩⲣⲁⲓ ⲉⲡⲕⲁϩ ⲛⲕⲏⲙⲉ
5 ⲁⲩⲱ ⲁⲥⲛⲁⲩ ϫⲉⲁⲩϥⲓⲧϥ ⲛⲧⲟⲟⲧⲥ ⲁⲩⲱ ϫⲉⲁⲧⲉⲥϭⲟⲙ ⲧⲁⲕⲟ ⲁⲥϫⲓ ⲛⲕⲉⲟⲩⲁ ⲉⲃⲟⲗ ϩⲛⲛⲉⲥⲙⲁⲥ ⲙⲙⲟⲩⲓ ⲁⲥⲕⲁⲁϥ ⲛⲟⲩⲙⲟⲩⲓ
6 ⲁϥϣⲱⲡⲉ ⲛⲧⲙⲏⲧⲉ ⲛϩⲉⲛⲙⲟⲩⲓ ⲁⲩⲱ ⲁϥⲥⲃⲟ ⲉⲧⲱⲣⲡ ⲛϩⲉⲛⲧⲱⲣⲡ ⲁϥⲟⲩⲉⲙⲣⲱⲙⲉ
7 ⲁⲩⲱ ⲛⲉϥⲙⲟⲟⲛⲉ ⲡⲉ ϩⲙⲡⲉϥⲛϣⲟⲧ ⲁϥϣⲱϥ ⲛⲛⲉⲩⲡⲟⲗⲓⲥ ⲁⲩⲱ ⲁϥⲧⲁϫⲉ ⲙⲡⲕⲁϩ ⲙⲛⲡⲉϥϫⲱⲕ ⲉⲃⲟⲗ ϩⲓⲧⲙⲡⲉϩⲣⲟⲟⲩ ⲙⲡⲉϥⲗϩⲏⲙ
8 ⲁⲩϯ ⲛⲛϩⲉⲑⲛⲟⲥ ⲛⲥⲱϥ ⲉⲃⲟⲗ ϩⲛⲛⲉⲭⲱⲣⲁ ⲉⲧⲙⲡⲉϥⲕⲱⲧⲉ ⲁⲩⲱ ⲁⲩⲡⲱⲣϣ ⲛⲛⲉⲩϣⲛⲏⲩ ⲉⲃⲟⲗ ⲉϫⲱϥ ⲁⲩϭⲟⲡϥ ϩⲙⲡⲉⲩⲧⲁⲕⲟ
9 ⲁⲩϯ ⲛⲟⲩϣⲧⲟϥ ⲉⲣⲱϥ ⲁⲩⲛⲧϥ ϩⲛⲟⲩⲅⲁⲗⲉⲗⲅⲣⲁ ⲉⲣⲁⲧϥ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲁⲩⲱ ⲁⲩϫⲓⲧϥ ⲉϩⲟⲩⲛ ⲉⲩϣⲧⲉⲕⲟ ϫⲉⲛⲛⲉⲩⲥⲱⲧⲙ ⲉⲡⲉϥϩⲣⲟⲟⲩ ϩⲓϫⲛⲛⲧⲟⲟⲩ ⲙⲡⲓⲥⲣⲁⲏⲗ
10 ⲧⲉⲕⲙⲁⲁⲩ ⲉⲥⲟ ⲛⲧϩⲉ ⲛⲟⲩⲃⲱ ⲛⲉⲗⲟⲟⲗⲉ ⲛⲧϩⲉ ⲛⲟⲩϩⲣⲏⲣⲉ ϩⲛⲟⲩⲃⲱ ⲛϩⲉⲣⲙⲁⲛ ⲉⲥⲧⲏϭ ϩⲓϫⲛⲟⲩⲙⲟⲟⲩ ⲛⲉⲥϯⲟⲩⲱ ⲙⲡⲉⲥⲕⲁⲣⲡⲟⲥ ⲁϥϣⲱⲡⲉ ⲉⲃⲟⲗ ϩⲓⲧⲛⲟⲩⲙⲟⲟⲩ ⲉⲛⲁϣⲱϥ
11 ⲁⲩⲱ ⲟⲩϭⲉⲣⲱⲃ ⲁϥϣⲱⲡⲉ ⲛϩⲏⲧⲥ ⲉϩⲣⲁⲓ ⲉϫⲛⲧⲉⲫⲩⲗⲏ ⲛⲛϩⲩⲅⲟⲩⲙⲉⲛⲟⲥ ⲁⲥϫⲓⲥⲉ ϩⲛⲧⲉⲥϣⲓⲏ ⲛⲧⲙⲏⲧⲉ ⲛϩⲉⲛϣⲁⲩ ⲁⲩⲱ ⲁⲥⲛⲁⲩ ⲉⲧⲉⲥϭⲟⲧ ϩⲙⲡⲁϣⲁⲓ ⲛⲛⲉⲥϣⲗϩ
12 ⲁⲩϩⲟⲣⲃⲉⲥ ϩⲛⲟⲩϭⲱⲛⲧ ⲁⲩⲱ ⲁⲩⲛⲟϫⲥ ⲉϫⲙⲡⲕⲁϩ ⲟⲩⲧⲏⲩ ⲛϣⲁϥⲣⲁ ⲁϥⲧⲣⲉⲛⲉⲥⲥⲱⲧⲡ ϣⲟⲟⲩⲉ ⲁⲩϫⲓⲕⲃⲁ ⲙⲙⲟⲟⲩ ⲁⲩⲱ ⲁϥϣⲟⲟϭⲟⲩ ⲛϭⲓⲡϭⲉⲣⲱⲃ ⲛⲧⲉⲥϭⲟⲙ ⲁⲩⲕⲱϩⲧ ⲟϫⲛⲥ
13 ⲧⲉⲛⲟⲩ ϭⲉ ⲁⲩⲧⲟϭⲥ ϩⲓⲡϫⲁⲓⲉ ϩⲛⲟⲩⲕⲁϩ ⲉⲙⲛⲙⲟⲟⲩ ⲛϩⲏⲧϥ
14 ⲁⲩⲕⲱϩⲧ ⲉⲓ ⲉⲃⲟⲗ ϩⲙⲡϭⲉⲣⲱⲃ ⲛⲛⲉⲥⲥⲱⲧⲡ ⲁϥⲟⲩⲟⲙⲥ ⲁⲩⲱ ⲛⲉϥϣⲟⲟⲡ ⲁⲛ ⲛϩⲏⲧⲥ ⲛϭⲓⲟⲩϭⲉⲣⲱⲃ ⲉϥϫⲟⲟⲣ ⲧⲉⲫⲩⲗⲏ ⲉⲥⲕⲏ ⲉⲩⲡⲁⲣⲁⲃⲟⲗⲏ ⲛⲧⲟⲉⲓⲧ ⲁⲩⲱ ⲥⲛⲁϣⲱⲡⲉ ⲉⲩⲧⲟⲉⲓⲧ
Ezekiel 18 · Ezekiel 20 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)